Marcos 9
9
1Iim ba leob mliuk Au teor hua uri: Ois iim sergia, seir hii ba mate molok iim fei Nai Maromak fael ukun nor forsa tuu.”
Nai Jesus tagael lolo telo nii rae-lau kiid
(Mateus 17:1-13; Lucas 9:28-36)
2Faklau telo leolbaan liim-nai-ida, Jesus oid Pedro, Tiago, nor João sae la nii rae-lau manaru kiid. Nii hati kidura roo iid ba nei. Arfiil room raat nii rae-lau, room fei Jesus tagael lolo telo. 3Jesus ni hena sai buti blilo. Nii mundu kiduri ba nei naam iid fee fun hena buti faklau man Jesus ni hena too. 4Molok hleeh, room fei Jesus kase bael nor tat Elias nor tat Moises.
5-6Room ubu teul matau tustus, raat Pedro kase arbiru lea la Jesus manuri, “Mestri! Aem sorti tuu aem nii hati kiduri! Kode faklau aem fun uum sarleol teul. Iid nee la Iit Tuu, iid nee la tata Moises, i iid loi nee la tata Elias.”
7Faklau telo, sbai duu maa biil tama room. Room meit fliik tero kiid sai ois sbai too maa, dega, “Fliik maa! Jesus uri Au Ana Mane bae fee Au doim. Iim fliik kod-koed lea la Ura.”#Pedro 2 1:17-18; Mateus 3:17; Marcos 1:11; Lucas 3:22
8Arfiil Pedro room fliik teor-hua kidura, room fei laa-maa, mahee room ba eot artuub iid. Room eot lea fee Jesus.
9Faklau telo, Jesus nor ni eskolante room duu siil ois rae-lau too maa. Jesus meit baud room dega, “Naam bae fee iim hina fei nafai too, iim ba leob tuir la roo iid. Au Roo Ana. Au hii maet didi. I arfiil Au mori siil soub, man iim leob tuir la roo.”
10Room fael tama Jesus ni teor-hua too, i room meit ba tuir la roo iid. Mahee room ubu teul tuuk la loor dega, “Ura dega Ura hii mate i mori siil. Idura dega sabiid?”
11I room meit tuuk la Ura, “Tuir mestri room enlaa Judeu lei ni dega, ‘Elias fee hii maa muun, man hina Kristu maa.’ Mahee tuir Iit Tuu ni anoin mansaba?”#Malaquias 4:5; Mateus 11:14
12Jesus ataan, “Doloo didi. Elias fee hii maa mun oid adia naam haigaa fun kode suli siil. Mahee idura mansaba? Nii Nai Maromak ni Livru Sagradu hlai soub enlaa Roo Ana, dega, arfiil Roo Ana maa soub, roo hii fun terus i migia Ura. 13Iim tenki fliik kod-koed! Elias maa telo soub. Mahee roo fun terus ura, tuir room akar. Idura sai doloo meit tuir naam bae fee Nai Maromak ni gugu nor lama room muna hlai.”#Mateus 17:13#9:13 Tuir Mateus 17:13, Eskolanti room taad soub Jesus kase enlaa João Saraen Ubu. Mahee mestri room enlaa lei Judeu ni, room hii ganaan gugu nor lama Elias hii maa ois lalehan oid fun tuir naam bae hlai soub nii Nai Maromak ni Livru Sagradu.
Nai Jesus toeh sai espiritu klao ois ankate kiid
(Mateus 17:14-21; Lucas 9:37-43a)
14Arfiil Jesus nor ni eskolanti ubu teul too suli siil, room fei Jesus ni eskolanti room seir nor mestri room enlaa lei Judeu ni diskuti loor i nei roo rini meit aleu bael room. 15Arfiil roo seirgaa eot Jesus, room hleeh i flaer la asour Ura.
16I Jesus meit tuuk la room, “Iim diskuti sabiid fee ura?”
17Artuub iid maa tafaar, “Mestri, favoor iid! Au oid au ana mane maa la Iit Tuu fun kode. Deslaa espiritu klao tafae nii ura, fun ura notoo lea i ba leob kase. 18Arfiil espiritu klao tafae nii au ana, ura blai aan too la rae, fun ni aba buti sai nor ruun nifa. I ura ni eta lolo sio telo man ai. Au tuuk telo la Iit Tuu ni eskolante room soub, oid toeh sai espiritu klao too. Mahee room ba leob fun naam iid.”
19Fliik manura, Jesus kase makaas la Ni eskolanti room dega, “Iim uri demais telo soub! Iim fiar ba tama! Au noir bak-bako iim, mahee iim ba taad manhati ka? Au pasiensia la iim raat arfiil? Oid ankate ura maa nii uri!” 20Toom maa room oid aan too la Jesus. Mahee arfiil espiritu klao too fei Jesus, ura fun aan too todood enene raat blai la rae i mahale laa-mahale maa, fun aba buti sai ois aan too ni gugu.
21I Jesus tuuk la aan too ni ama, “O ana ni moras agi soub ka?”
Ura ni ama ataan, “Fes ura hii loba. 22Espiritu klao too agi soub naha loet aan uri. Ura soek aan too bak-bako la aef lala nor la eer lala. Manura se Iit tuu leob fun naam seir, i doim aem la, fun kode aan uri.”
23Jesus ataan, “Manbae fee o dega, ‘Se leob’? Au leob fun naam hailagaa meit, sala nee roo fiar muun!”
24Toom maa aan too ni ama ataan nor hua-lala broe, “Mestri! Au fiar soub. Mahee tulun au oid au fiar too sai makaas des.
25Arfiil Jesus fei roo rini maa nii hati kidura. Ura nee orde la espiritu klao too dega, “He, espiritu klao bae fee fun ankate too teliga baa nor molu! O sai ois aan uri, la aan too leob fliik nor kase. I o ba leob tafae des la ura!”
26Fliik Jesus kase manura, espiritu klao too kirai makaas. Ura fun aan too mou la rae, toi lima toi oe, man ura hina sai ois aan too. I aan too mandau nee maet telo soub. Raat roo kase la loor dega, “Ura maet telo soub.”
27Mahee Jesus fael aan too ni lima oid tloo ura, i ura mrii enene.
28I Jesus nor ni eskolanti room fois telo hati kidura, oid laa siil nii uum iid.’ Nii la-ura, arfiil room mesa nor Jesus, room tuuk la Jesus dega, “Mestri! Manbae fee aem ba leob toeh sai espiritu klao too?”
29Jesus ataan, “Fliik kod-koed maa! Espiritu klao idura klao didi. Iim fun orasaun tuuk tulun la Nai Maromak, deslaa iim ba nei kbiit oid toeh sai espiritu klao manura.”#9:29 Dokumentu seir, dega des “iim meit tenki adeer-lolo”.
Nai Jesus nee sai loi enlaa Ura ni mate
(Mateus 17:22-23; Lucas 9:43-45)
30Faklau telo, Jesus nor ni eskolanti room fois telo hati kidura, i oid lolai faklau siil ois provinsia Galileia. Tempu idura, Jesus boi fun roo taad Ura nii hati kidura, 31deslaa Ura akar noir lea fee ni eskolanti room. Ura tafaar la room, dega, “Ba agi des, roo hii nee Au la roo selu ni lima i room hii loet Au, Roo Ana. Au maet didi, mahee nii leolbaan teul Au mori siil.”#9:31:Teor hua Gregu muna ni dega, “nii leolbaan teul”, mahee room suur ois leolbaan nafai (leolbaan iid), ada (leolbaan ruu), airuu (leolbaan teul). Manura, teor hua Gregu “nii leolbaan teul”, idura dega, nii airuu.
32Jesus nee sai manura, mahee ni eskolanti room ba taad manhati. I room meit ba brani tuuk la Jesus enlaa ni noir too dega sabiid.
Nai Jesus ni eskolanti room diskuti loor enlaa seen fee tuu
(Mateus 18:1-5; Lucas 9:46-48)
33Faklau telo ura, Jesus nor ni eskolanti room lolai raat nii sidadi Kafarnaun. Arfiil room tafae nii uum lala, Jesus tuuk la ni eskolanti room, dega, “Nafai nii saal iim diskuti loor enlaa sabiid?”
34Mahee ba nei ubu kiid brani ataan. Room suat, deslaa nii saal room kase enlaa seen fee tuu reis room haigaa.#Lucas 22:24
35Toom maa Jesus medei telo oid noir ni eskolanti ubu saguul resi ruu too manuri, “Seen fee naha sai tuu, ura hii sai loba faklau i serbii roo haigaa meit.”#Mateus 20:26-27; 23:11; Marcos 10:43-44; Lucas 22:26
36I Jesus huu ankate kiid oid laa nii room fusu, i Ura koof aan too oid dega, 37“Seen fee toom Au, ura hii sium ankate kiduri nor kode. Arfiil ura fun manura, ura meit sium Au. I seen fee sium Au, ura sium meit Nai Maromak, iid bae fee ruu Au maa nii mundu uri.”#Mateus 10:40; Lucas 10:16; João 13:20
Seen fee leob sai iit artuub?
(Lucas 9:49-50)
38Toom maa Jesus ni eskolanti iid, gala João, dega, “Mestri! Nii leolbaan iid, aem fei roo iid oid Iit Tuu ni gala toeh sai espiritu klao ois roo. Mahee aem baud telo ura, deslaa ura ba loos iit artuub.”
39Mahee Jesus ataan, “Iim ba leob baud ura. Deslaa seen fee oid Au gala fun milagre, ura ba leob kase klao Au. 40Se ura ba kontra iit, ura iit artuub.#Mateus 12:30; Lucas 11:23 41Anoin kod-koed! Se roo selu taad, dega iim toom Kristu, i roo ura hii tulun iim fedu roo ura nee lea eer kopu kiid meit, Maromak ba mliuk ura ni kole.”#Mateus 10:42
Ba leob tilu nor sala!
(Mateus 18:6-9; Lucas 17:1-2)
42Toom maa Jesus nee sai loi la room dega, “Se artuub seir oid ankate kiid toom saal bae fee sala, raat ura ba fiar des la Au, kuidaud! Keer-koed faklau la artuub idura huu haut tuu kiid,#9:42:Dokumentu Gregu orijinal ni hlai dega ‘haut tuut’, iid bae room uza oid fun afo. Room haut tuut tuu reis ubu. eis nii ura ni tegeu, oid laa soek telo la taes lala.
43Se o fun sala nor o lima, teis telo lima kidura! Keer-koed faklau o tafae lalehan nor lima seri lea, duke o nei lima ruu, mahee o tafae la infernu, hati bae fee aef hii ba maet.#Mateus 5:30 44[Infernu ura hati terus ni. Nii hati kidura uul ana seirgaa ba maet. I aef meit hii ba maet.]#9:44:Dokumentu Gregu bae fee muna ba hlai versiklu 44 ura. 45Se o fun sala nor o oe, teis telo oe kidura. Keer-koed o tafae lalehan nor oe seri lea, duke o nei oe ruu, mahee o tafae la infernu. 46[Infernu ura hati terus ni. Nii hati kidura uul ana seirgaa ba maet. I aef meit hii ba maet.]#9:46:Dokumentu Gregu bae fee muna ba hlai versikulu 46 ura. 47Se o fun sala nor o mata, siuk telo o mata kidura! Keer-koed faklau o tafae nii Nai Maromak ni reun nor mata seri, duke o nei mata ruu, mahee o tafae la infernu.#Mateus 5:29
48‘Infernu ura hati terus ni.
Nii hati kidura uul ana seirgaa ba maet.
I aef meit hii ba maet.’#Isaías 66:24
49Tuir doloo, roo bae fee toom Au, hii asour susar nor terus man nii aef lala. Mahee susar nor terus idura, hii nee rezultadu kode, man sii fois la siis sakrifisiu oid tuun nii Maromak ni altar.
50Sii kode didi, deslaa fun namaa hula. Mahee se sii too ba nee meer soub, ura ni tubu ba nei soub. Iim meit man sii. Iim hii mori pas la loor.”#Mateus 5:13; Lucas 14:34-35
सध्या निवडलेले:
Marcos 9: BMGM
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023 Wycliffe Bible Translators Inc
