Marcos 10
10
Farizeu room nae saal oid kook Nai Jesus enlaa hiin nor maen soek loor
(Mateus 19:1-12; Lucas 16:18)
1Faklau telo, Jesus nor Ni eskolanti room laa nii provinsia Judeia, nor laa hati selu nii slook Jordaun ni seri laa. Roo rini maa hleu Jesus, i man adada Ura noir room.
2Roo Farizeu seir maa naha kook oid amou Jesus. Room tuuk dega, “Tuir iit relijiaun ni noir, se maen iid kaben nor hiin iid, ura leob soek ni hina ka tais?”
3Jesus ataan, “Anoin laed! Lei enlaa hiin nor maen kaben nain, bae fee Moises nee la iit, dega sabiid?”
4Room ataan, “Moises ni lei dega, roo leob soek loor, sala nee ura fun muun suraat hae loor ni i nee la ni kaben.”#Deuteronomio 24:1-4; Mateus 5:31
5Jesus ataan siil, “Fliik maa! Deslaa iim ulu hatu sio, fee Moises hlai lei manura! 6Mahee, iim ba leob mliuk istori muna faklau enlaa Nai Maromak fun lalehan nor rae. Istori ura hlai soub dega,
Nai Maromak fun ubu, maen nor hiin.#Jenesis 1:27; 5:2
7Idura fee, maen hii fois telo ni ina nor ni ama, oid
laa mori hua-lala iid nor ni kaben hiin,
8deslaa room ubu ruu sai ubu kiid lea. Des manura room ubu ruu ba loos roo ubu ruu soub mahee sai ubu kiid lea.’#Jenesis 2:24
9Se Nai Maromak fun room ubu ruu sai soub iid, ba nei artuub iid leob hae deis room.”
10Faklau telo, Jesus nor ni eskolanti room tafae la nii uum iid. Nii la-ura, room tuuk la Jesus enlaa ni noir too.
11Jesus ataan, “Seen fee soek ni hina, i kaben siil nor hiin selu, maen ura fun siil sala seksual asour ura ni hina muna. 12Hiin meit mes manloor! Se ura soek telo ni mane, i kaben siil nor maen selu, hiin meit fun sala seksual nor ni mane muna.”#Mateus 5:32; Korintu 1 7:10-11
Nai Jesus nee bensaun la ankate room
(Mateus 19:13-15; Lucas 18:15-17)
13Nii leolbaan iid, roo oid ankate room la Jesus. Room tuuk la Jesus oid fois lima i nee bensaun la ankate room. Mahee Jesus ni eskolanti room baud telo.
14Arfiil Jesus fei manura, Ura bruis Ni eskolanti room oid dega, “Fois ankate seirgaa maa Au! Ba leob baud! Deslaa artuub man ankate seirgaa fee Nai Maromak ni reun. 15Au tafaar la iim, tuir doloo, seen fee akar tafae nii Nai Maromak ni reun, ura tenki sium Nai Maromak ni ukun man ankate room sium. Se tais, ura hii ba tafae nii Nai Maromak ni reun.”#Mateus 18:3 16Toom maa Jesus meit koof ankate seirgaa, i fois lima la iid-ida ni ulu, oid nee bensaun la room.
Artuub soi kiid nae saal oid eot mori eha ba nei nii lalehan
(Mateus 19:16-30; Lucas 18:18-30)
17Arfiil Jesus naha sai soub, artuub soi kiid flaer maa asour Jesus. Ura maa diku nii Jesus ni ahe, oid tuuk, “Mestri! Iit Tuu fee kode! Au naha tuuk naam iid: Sabiid fee au tenki fun oid leob eot mori eha ba nei nii lalehan?”
18Jesus ataan, “Deslaa sabiid fee o dega, ‘Au kode’? Ba nei artuub iid fee kode, so Nai Maromak mesa lea. 19O taad soub Nai Maromak ni lei bae fee dega:
‘Ba leob loet roo.
Ba leob fun relasaun seksual nor roo bae fee ba loos o mane ka o hina.
Ba leob fanao.
Ba leob bobar teor asour roo selu.
Ba leob aa maat roo namo;
I anai o ina nor o ama.’ ”#Ezodu 20:12-16; Deuteronomio 5:16-20
20Roo ura ataan, “Doloo, Mestri! Fes au hii kate, Nai Maromak ni lei seirgaa, au fun tuir meit soub.”
21I Jesus fei la ura nor doim, oid dega, “Doloo! Mahee hii hela naam iid. Agora o suli laab oid laa seo telo o naam soi hailagaa meit. O osa too hae la artuub kiak room, deslaa Nai Maromak hii nee la o, soi selu nii lalehan. Toom maa, o maa toom Au.”
22Mahee arfiil ura fliik Jesus kase manura, ura ni hua-lala muit tus-tus. Ura suli nor hua-lala tristi, deslaa ura ni soi rini tus-tus.
23Jesus meit fei laa maa, i tafaar la ni eskolanti room, “Iim fliik maa! Muit tus-tus roo soi naha tafae nii Nai Maromak ni reun.”
24Fliik Ura kase manura, Ni eskolanti room kauk ulu nor kakaha. Mahee Jesus dega loi, “Au ana room fliik kod-koed! Naha tafae nii Nai Maromak ni reun muit tus-tus. 25Kuud-kamelu tafae la nii luha ois daum goa muit tus-tus. Mahee muit faklau des, roo soi naha tafae nii Nai Maromak ni reun.”
26Jesus kase manura, fun Ni eskolanti room kauk ulu des loi oid dega la loor, “Se manura didi, seen fee leob salva ni eta lolo rasik ois julgamentu i tafae nii Nai Maromak ni reun?”
27Jesus fei la room, i dega, “La roo, ba leob didi. Mahee la Nai Maromak naam haigaa meit leob.”
28Toom maa Pedro meit kase, dega, “Am-Nai! Aem fois telo aem naam hailagaa meit oid toom Iit Tuu.”
29-30Jesus ataan, “Au naha tafaar la iim. Tuir doloo, seen fee fois bael ni uma, ni ina nor ni ama, ni bou nor ni kau, ni bii nor ni kau, ni ana room, ni marao, ni uum lala tema, deslaa toom Au nor Nai Maromak ni Novidadi Kode, roo ura hii sium siil ois Nai Maromak haet atus-iid. Nii ura ni mori kidura ura hii eot siil rini faklau naam bae fee ura fois soub i ura meit hii eot terus deslaa ura toom Au. Mahee arfiil mundu uri remata soub, ura hii eot mori eha ba nei futu nor Nai Maromak. Idura fee ura sium. 31Anoin kod-koed! Roo bae fee nii ahe, hii laa siil nii hoho, i roo bae fee nii hoho, hii laa siil nii ahe.”#Mateus 20:16; Lucas 13:30
# 10:32 Nii iit mori kiduri, seen fee fun eko man roo tuu, ada-airuu, hii sai roo loba faklau. Mahee, nii iit ni mori kiduri, seen fee fun lolo man roo loba, ada-airuu, hii sai roo tuu. Nai Jesus nee sai haet teul soub enlaa Ura ni mate
(Mateus 20:17-19; Lucas 18:31-34)
32Nii tempu laura, Jesus nor Ni eskolanti room nii saal laa Jerusalem. Jesus lolai nii ahe. Nii saal fusu, Jesus ni eskolanti room hleeh i roo selu bae fee toom ois hoho meit matau. Entaun, Jesus haah lea fee Ni eskolanti ubu saguul-resi-ruu oid tafaar la room enlaa sabiid fee roo naha fun la Ura nii Jerusalem. 33Jesus dega, “Iim fliik maa! Iit nii saal naha laa Jerusalem. Nii la-ura, roo hii nee Au, Roo Ana, la ulu relijiaun Judeu room tuu nor la mestri room enlaa lei Judeu ni. I room hii nee kastigu maet Au. Toom maa, room hii nee Au la roo selu ni lima bae fee ba taad Nai Maromak. 34I roo seirgaa hii trata Au, luu aba la Au, dae Au nor sikoti raat huga broe. I toom maa, room hii loet Au. Au hii maet didi. Mahee nii leolbaan teul,#10:34:Nor tero Gregu, room suur leolbaan manuri: nafai leolbaan (= 1), ada (= 2), airuu (= 3), arteul (= 4). Idura ni tero Gregu, μετὰ τρεῖς ἡμέρας (meta treis hēmeras) “nii leolbaan teul”, idura dega, “nii airuu”. Anoin kook dega, Nai Jesus maet ni i Sesta Feira Santa (suur leolbaan iid). Ada leolbaan Sabdu, Nai Jesus nii bael haut goa lala (suur leolbaan ruu). Nii airuu, fee Domingu Paskua Nai Jesus mori siil (suur leolbaan teul). Manura, tuir iit suur leolbaan, Ura maet hoda ruu, depois Ura mori siil. Au hii mori siil.”
Tiago nor João tuuk naha sai roo tuu
(Mateus 20:20-28)
35Faklau telo, Zebedeu ni ana, Tiago nor João maa nii Jesus. Room tuuk la Jesus dega, “Mestri, aem akar Iit Tuu fun tuir sabiid fee aem naha tuuk, leob ka?”
36Jesus tuuk la room, “Sabiid fee iim akar Au fun la iim?”
37Room ataan, dega, “Am-Nai! Ada airuu arfiil Iit Tuu fael ukun nor kbiit, aem tuuk Iit Tuu nee hati la aem: Iid medei nii Iit Tuu ni lima-doloo i iid medei nii lima-toi.”
38Mahee Jesus tafaar la room, “Iim ubu ruu ba taad sabiid fee iim tuuk. Ba agi Au hii eot terus. Idura fun mansaba? Iim anoin iim leob sium terus man terus bae Au hei sium ka?”#Lucas 12:50#10:38 Teor Gregu dega, “Iim ubu ruu leob eun ois kopu bae Au hii eun ka iim ubu ruu leob sium sarani bae fee Au hii sium?”
39Room ataan, “Aem leob!”
Jesus dega loi la room, “Doloo didi! Baa agi des, iim meit eot terus man Au. 40Mahee seen fee naha medei nii Au lima doloo nor lima-toi, idura ba loos Au fee teis. Idura Nai Maromak teis telo soub seen-seen fee la medei nii hati kidura.”
41Arfiil Jesus ni eskolanti room seir fliik Tiago nor João tuuk manura, room bruis Tiago nor João 42Toom maa Jesus haah room hailagaa, oid dega, “Roo tuu room ukun nasaun bae fee ba taad Nai Maromak, room bak-bako fun terus la room ni povu. I ulu room nii nasaun ura meit nee orde meded la povu, raat room reun ba leob tloo ulu. 43Mahee iim ba leob fun manura! Seen fee naha sai tuu, ura tenki lui lolo oid serbii roo selu.#Lucas 22:25-26 44I roo bae fee naha sai nai ulu, ura tenki lui lolo, i sai ata la roo haigaa.#Mateus 23:11; Marcos 9:35; Lucas 22:26 45Deslaa Au, Roo Ana, maa nii mundu ba loos la roo naha serbii Au, mahee Au maa oid serbii roo i nee Au eta lolo oid seul togout roo rini ni tusa.
Nai Jesus fun kode artuub mata klao kiid
(Mateus 20:29-34; Lucas 18:35-43)
46Jesus nor ni eskolanti room raat nii sidadi Jeriko. Arfiil room lolai sai ois sidade ura, roo rini meit toom room. Nii saal gugu, nei artuub mata klao kiid medei bael oid taen lima tuuk oos. Ura ni gala Bartimeu, Timeu ni ana. 47Arfiil ura fliik iid bae fee lolai faklau too Jesus ois Nazaré, ura haah nor tero makaas, dega, “Jesus! Daot David ni jerasaun! Doim au laed!”
48Fliik roo mata klao ura haah manura, roo meit bruis ura dega, “Hee! Noto telo!”
Mahee roo mata klao ura haah makaas desloi dega, “Daot David ni jerasaun! Doim au laed!”
49Manura Jesus para telo oid dega, “Iim laa haah ura maa!”
I room laa haah roo mata klao ura oid dega, “O noto laab! Mrii laab! Mestri haah o.”
50Fliik manura, roo mata klao ura soek telo ni hena, ura meit mrii hurhuur oid laa asour Jesus.
51I Jesus tuuk la ura, “Sabiid fee o akar Au fun la o?”
Roo mata klao ura ataan, “Mestri! Au akar fei.”
52Jesus dega loi la ura, “Deslaa o fiar Au leob fun o kode, agora o mata kode soub!”
I ura ni mata meit kode enene. Toom maa ura la lolai futu nor Jesus.
सध्या निवडलेले:
Marcos 10: BMGM
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023 Wycliffe Bible Translators Inc
