Marcos 8
8
Nai Jesus nee namaa la roo rihun-faat
(Mateus 15:32-39)
1-3Nii leolbaan iid, roo rini maa futu nor Jesus. Nii leolbaan teul nor hoda teul room futu nor Jesus raat room belhaet meit. I Jesus haah ni eskolanti room, oid dega, “Au hua kiid lako arfiil fei roo rini kidura. Seir maa ois hati roo, room nii uri leolbaan teul hoda teul soub raat room belhaet meit telo. Keer koed room ba leob suli nor bai mamu, be fun la seir beil naal i mou nii saal.”
4Jesus ni eskolanti room ataan, “Mestri. Hati kiduri roo ois aldeia. Fun mansaba iit leob tau roo utu manuri?”
5Mahee Jesus tuuk la room, “Iim nei paun hua fiil?”
Room ataan, “Mestri. Aem nei paun hua liim-nai-ruu lea.”
6Toom maa Jesus ruu roo seirgaa medei telo nii rae. I Ura huu paun hua liim-nai-ruu too, oid nee obrigadu la Nai Maromak. Ura heul-hae paun i nee la ni eskolanti room, oid laa hae la roo utu too. 7Room meit nei ikan loba kaet-keen. Toom maa Jesus nee loi obrigadu la Nai Maromak la ikan seirgaa. I Ura ruu ni eskolanti room oid laa hae la roo seirgaa. 8-9Room haigaa kalman rihun faat. Room haigaa aa raat besu. Aa telo meit, Jesus ni eskolanti room laa alibur namaa restu nii nukat liim-nai-rua benu. Toom maa Jesus ruu roo utu too suli. 10Room suli telo, Jesus nor ni eskolante room laa sae bero, oid laa nii hati kiid gala Dalmanuta.
Roo Farizeu naha amou Nai Jesus
(Mateus 16:1-4)
11Arfiil Jesus raat nii Dalmanuta, nei artuub seir ois grupu Farizeu maa asour Jesus. Room maa nor anoin iid naha kook Jesus. Room tuuk la Jesus dega, “Am-Nai, fun milagre oid atuud dega, O sium forsa ois Nai Maromak.”#Mateus 12:38; Lucas 11:16
12Jesus daad snuga, oid dega, “Des sabiid leolbaan nafai roo tuuk milagre ma Au? Milagre nei didi, mahee Au ba fun la iim.”#Mateus 12:39; Lucas 11:29
13Meit telo, Jesus fois bael room, oid laa sae siil bero nor Ura ni eskolanti room, oid laa nii taes seri laa.
Nai Jesus noir dega, kuidaud nor roo Farizeu room
(Mateus 16:5-12)
14Arfiil Jesus nor Ni eskolanti room raat nii taes fusu, ni eskolanti room hina anoin dega, room mliuk telo belhaet. Room oid lea paun hua kiid. 15Entaun Jesus nee anoin la room dega, “Iim tenki neo mori nor kuidaud nor daot Erodes nor Farizeu room. Deslaa room man fermentu bae fee fois la trigu oid fun trigu sae. #Lucas 12:1
16Fliik Ura kase manura, ni eskolanti room duvida nor tuuk la loor dega, “Mestri too dega sabiid fee ura? Nornamo Ura kase manura, deslaa iit ba oid paun.”
17Mahee Jesus taad room anoin. Ura dega, “Mambae fee iim kase lea enlaa paun? Iim ba taad hei, ka? Iim ulu hatu sio tustus! 18Iim fei soub nor iim mata rasik, mahee iim ba taad idura dega sabiid, iim man roo mata rafu! Iim fliik nor iim teliga rasik, mahee iim ba taad naam iid, iim man roo teliga baa. Iim mliuk soub#Jeremias 5:21; Ezequiel 12:2; Marcos 4:12 19paun hua liim bae fee Au heul-hae oid tau roo rihun-liim too? Leolbaan idura, iim libur paun restu boet fiil?”
Room ataan, “Boet saguul-resi-ruu.”
20Jesus tuuk loi, “Iim hii anoin leolbaan iid bae, Au heul-hae paun hua liim-nai-rua oid tau roo rihun-faat too? Iim alibur paun restu boet fiil?”
Room ataan, “Boet liim-nai-rua.”
21Jesus dega, “Doloo didi! Iim fei nor iim mata rasik, mahee des mambae fee iim ba taad?”
Nai Jesus fun kode maen mata klao kiid nii aldeia Betsaida
22Toom maa, Jesus nor ni eskolanti room raat nii aldeia Betsaida. Nii la-ura, roo oid maen mata klao kiid la Jesus. Room tuuk la Jesus fois Ni lima oid fun kode maen too ni mata. 23I Jesus fael maen too ni lima, oid sai ois aldeia. I Jesus luu aba la maen too ni mata, i fois meit Ura ni lima la maen too ni mata. Jesus tuuk, “Mambae? O leob fei naam seir soub ka?”
24Maen too tloo ulu oid fei leom-leom i ataan, “Au fei roo lolai, mahee room man ai fuu bae fee lolai.”
25I Jesus fois loi Ni lima ruu la maen too ni mata. I maen ura kook naha fei, i ni mata kode enene, i ura leob fei moo naam hailagaa. 26Meit telo, Jesus ruu maen too suli laa ni uma, i tafaar la ura, “O suli laab, mahee laa ois saal selu! Ba leob laa siil nii aldeia Betsaida.”
Pedro nee sai dega Jesus too fee Kristu, bae fee Nai Maromak loi enene fes muna
(Mateus 16:13-20; Lucas 9:18-21)
27Faklau telo ura, Jesus nor Ni eskolanti room laa nii aldeia-aldeia nii Sezareia Filipi. Nii saal fusu, Jesus tuuk la room dega, “Toom roo kase, seen fee Au?”
28Room ataan, “Roo seir dega, ‘João Saraen-Door Ubu’. Seer loi dega, ‘Nai Maromak ni gugu nor lama Elias’. I selu loi dega, ‘Iit Tuu uri, Nai Maromak ni gugu nor lama selu kiid nii tempu muna.’”#Marcos 6:14-15; Lucas 9:7-8
29Toom maa Jesus tuuk loi la room, “Mahee toom iim anoin, seen fee Au?”
Pedro ataan, dega, “Iit Tuu fee Kristu! Iid bae fee Nai Maromak atuud enene fes muna faklau.”#João 6:68-69
30Mahee Jesus baud la room dega, “Iim ba leob tafaar sai la roo selu!”
Nai Jesus nee sai enene enlaa Ni terus nor Ni mate
(Mateus 16:21-28; Lucas 9:22-27)
31Faklau telo ois leolbaan idura, Jesus noir la ni eskolanti room, dega, “Au uri, Roo Ana. Au tenki eot terus rini, ois mai tuu teor ubu room, ulu relijiaun Judeu ni tuu room nor mestri room enlaa lei Judeu ni. Roo haigaa hii ba sium Au. Room hii loet Au, mahee nii leolbaan teul,#8:31:Nor tero Gregu, room suur leolbaan manuri: nafai leolbaan (= 1), ada (= 2), airuu (= 3), arteul (= 4). Idura ni tero Gregu, μετὰ τρεῖς ἡμέρας (meta treis hēmeras) “nii leolbaan teul”. Anoin kook dega, Nai Jesus maet nii Sesta Feira Santa (suur leolbaan iid). Ada leolbaan Sabdu, Nai Jesus ni bael haut goa lala (suur leolbaan ruu). Nii airuu, fee Domingu Paskua Nai Jesus mori siil (suur leolbaan teul). Manura, tuir iit suur leolbaan, Ura maet hoda ruu, depois Ura mori siil. Au mori siil.”
32Jesus nee sai momoo manura, toom maa Pedro daad telo Jesus la nii seri, oid bruis dega, “Iit Tuu ba leob kase manura!”
33Fedu Pedro kase manura, mahee ba toom Nai Maromak ni akar. I Jesus tagael ahe, oid fei ni eskolanti seir selu. I Ura bruis Pedro, i kase sio, dega, “Iid ura Satanaas ni tuu fee kase! O sai ois uri! O anoin toom lea roo akar, ba loos toom Nai Maromak ni akar.”
34Toom maa Jesus haah ni eskolanti room nor roo selu des, oid noir la room, dega, “Seen fee akar toom Au, ura tenki fois telo naam bae fee ura akar, oid toom lea Nai Maromak ni akar. Ura tenki prontu eot terus nor maet, man roo bae fee oid ura ni kruus laa raat ni mate hati. I ura tenki toom Au man eskolanti kiid.#Mateus 10:38; Lucas 9:23; 14:27 35Roo bae fee mori lea la ura ni eta lolo rasik, ura hii lako ni mori. Mahee roo bae fee prontu maet deslaa toom Au nor nee sai Nai Maromak ni Novidadi Kode, ura hii mori futu nor Nai Maromak.#Mateus 10:39; Lucas 17:33; João 12:25 36Fliik kod-koed! Se o nei naam meit nii mundu uri, mahee o ba eot mori eha ba nei futu nor Nai Maromak, o manaan sabiid? 37Fedu o nei naam meit nii mundu uri, ba nei naam iid o leob nee la Nai Maromak oid sium mori eha ba nei.
38Anoin kod-koed! Fonori uri, roo nii mundu uri mes klao faklau i room ba liig oid toom Nai Maromak. Nii mundu uri, seen fee suat toom Au ka suat nee sai Au Teor Hua nii ura ni mori, Au meit hii suat oid sium ura nii Nai Maromak ni ahe arfiil Au, Roo Ana, hii suli siil ois lalehan, i Nai Maromak ni anju room maa meit nor Au. Aem duu maa ois lalehan nor Au Ama Maromak ni kbiit blilo.
सध्या निवडलेले:
Marcos 8: BMGM
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023 Wycliffe Bible Translators Inc
