Baroma 7
7
She khuubonelakho she bukhwaale
1Bebuulebe, inywe mwamanya buulayi bibiwaamba khu makaambila. Ne ndi simumanya muri kamakaambila kaba ni buwuli khu muundu nga ashiili umulamu ta? 2Shili busa nga umukhasi umukhwaalikhe n'awulibwa ni kamakaambila kakawaambakana n'umuseetsa weewe nga umuseetsa n'ashiili umulamu. Ne umuseetsa n'afwa, shino shiba shakanguluule umukhasi khukhwaama khu makaambila abe kakamubowa khu museetsa weewe. 3Ni abweene awo, umukhasi uyu n'atsya khu museetsa ukuundi nga umuseetsa weewe ashiili umulamu, ilala alilaangibwa khuuba umuyeyani. Ne umuseetsa weewe n'afwa, umukhasi yuno aba s'ashiili aasi e kamakaambila ako ta. Naluundi abe akhakhwaalikha khu musaani ukuundi, s'abalikha nga umuyeyani ta. 4Shili shitweela busa ni nanywe be buulebe. Inywe mwayikyela baafu isi kamakaambila khulwe kumubili kwa Kristo, nio akile mube b'oyo, uwalamusibwa khukhwaama mu bafu, ne shishamamo mube be kumukaso mu bwakaanisi bwa Wele. 5Ifwe ni khwaba nga khushiili mu khumenya khukhulondekhana ni busaalikhana bwe kimibili kyeefwe nga ni kili, khukhwikoomba khukhola bibyoonako, abe khutsiila khu makaambila kakakholela mu myoyo kyeefwe. Na buli sheesi khukhola abe shamamo bibyaamo bye khuufwa. 6Ne ari ifwe khwaamala khuulekhuulibwa khukhwaama mu makaambila, ari khuli baafu isi kamakaambila abe kakakhubowa ifwe. Nashiryo sikhuli babakaanisi babaloondelela kamakaambila kamakhale kakaronebwa ta, ne khulondelela buulamu bushaakha bw'Omwoyo.
Kamakaambila ni Bibyoonako
7 #
Luky 20.17; Maka 5.21 Ari kane khulome khuri shiina? Khulome khuri kamakaambila kameene niko kali bibyoonako? Seshinyalikha taawe. Khulwekhuuba ilekha khubawo kamakaambila ta, khali ise simanya nga bibyoonako nibyo shiina ta. Kamakaambila kalekha khubawo ta, khali ise imanya indyeena nga likaambila ni liloma liri, “Ukhekoomba shishiindu sh'owashoowo taawe?” 8Ne bibyoonako ni byanyoola ikhabi mu makaambila byandereera kumuluungo kwe khukhwikoomba khwa buli saambo. Shikila akhaliwo kamakaambila ta, bibyoonako biba biifu. 9Ne ise samweene lutweela naba umulamu nga kamakaambila kashiili khubawo ta. Ne kamakaambila ni keetsa, bibyoonako byarakikha bushaakha ni nase naafwa. 10Kamakaambila katsana ni kameene yaba niko kakaaba kakareera buulamu, ne ise kandereera khufwa. 11#Rak 3.13Khulwekhuuba bibyoonako byanyoola ikhabi mu makaambila, byamombelesa ise lwanyuma byantsira.
12Nashiryo, kamakaambila kameene kali kamakhosefu, ni bilakilo bili bikhosefu, naluundi bilayi ate nga bya ŋali. 13Ne ari shimanyisa shiri shishiindu shilayi nisho shishandereera ise khuufwa? Taawe. Bubwoonaki nibwo bubwandeerera ise khufwa. Bubwoonaki buraambisa shishiindu shilayi wakila bwandereera ise khuufwa, ari nio akile bubwoonaki bumanyikhe lubuula nga ni buli mu saambo yabwo. Nashiryo kamakaambila kayeeta khukhwokesana kari bubwoonaki buli shiibi she angaaki naabi.
Khuusoolana khukhuuli mu mibili kyeefwe
14Khwaamanya khuri kamakaambila kali busa nga imbewo, sikali ni kumubili ta. Ne ise s'indi nga imbewo ta. Naluundi nakulisibwa nga umukulwa isi bibyoonako. 15#Gal 5.17Ise simanya bikholwa byase nga ni bili ta. Khulwekhuuba mu shifwo she khukhola ibyo byeesi ingana khukhola, ikhola byeesi ikhekoomba khukhola ta. 16Ari nga nakholile ibyo byeesi ikhekoomba khukhola ta, ifukiilisa ndi kamakaambila kali kamalayi. 17Nashiryo s'ali ise niye ukhola ibyo ta, ne akhali bibyoonako bibiimenya mus'iise nibyo bibikhola biryo. 18Khulwekhuuba ise namanya ndi mbaawo shishiindu shilayi shoosi shishiili mus'iise ta; khulondekhana ni busaalikhana bwe kumubili kwase nga ni kuli. Abe lukana nakhekoomba khukhola shishiindu shilayi, ninyoola ndi sinanyalile khukhola shishiindu shilayi isho ta. 19S'ikhola bilayi byeesi nikoomba khukhola ta, ne akhali ikhola bibiindu biibi byeesi ikhekoomba khukhola ta. 20Ne noola ikhola sheesi ikhekoomba khukhola ta, shimanyisa shiri s'ili ise niye ukhola isho ta, ne akhali bibyoonako bibiimenya mus'iise.
21Nashiryo ari shino shekyelile busa nga likaambila shiri, buli lweesi ingana khukhola shishiindu shilayi, ninyoola nakholile shishiindu shishikhali shilayi ta. 22Ne mu mwoyo kwase, ise samweene ingana kamakaambila ka Wele. 23Ne imbona mus'iise samweene mulimo likaambila liliindi nga lisoolanisa kamakaambila kameene keesi ise nambaasa. Shino shakila ise nekyela umuundu uwabowebwa ni likaambila lye bibyoonako, liliimenya mu mubili kwase. 24Nga kumutaambo kwanyoolile! Naanu ukane asikule ise khukhwaama mu mubili kuno kukuuli khukhumbila ise mu khufwa? 25Wele asiimibwe, khulwa Yesu Kristo Umukasya weefwe! Nashiryo ise samweene ni bibyambaaso byase ikhola sheesi kamakaambila ka Wele kaloma. Ne kumubili kwase kwakaanisa nga kamakaambila ke bibyoonako ni kakana.
Одоогоор Сонгогдсон:
Baroma 7: LPE
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
The Bible in Lumasaaba © Bible Society of Uganda, 2016.