Baroma 8
8
Buulamu bweesi Umwoyo areera
1Ari abo babaali atweela ni Kristo Yesu, mbaawo khukhwikiitsibwa ta. 2Lwekhuuba kamakaambila k'Omwoyo ureera buulamu uuli mu Kristo Yesu, niko kayiindekhuula ise khukhwaama mu makaambila ke bibyoonako ni khuufwa. 3Khukhwaama nga Wele n'arumana umwaana weewe umweene wabonekha nga umwonaki khulwe bibyoonako khurusawo khukhwoneka mu baandu, warusawo likaambila abe khulwe butoro bwe babaandu abe lilikhanyala lyakhola ta. 4Wele akhola shino ari nio isho shishikanibwa khu makaambila sholelesebwe mwiifwe, babaali balamu khulw'Omwoyo ne shiili lwekhuuba nga kumubili ni kukana ta. 5Khulwekhuuba abo babamenya nga kumubili ni kukana bara bibyambaaso byaabwe khu biindu byeesi kumubili kukana. Ne abo babaamenya nga Umwoyo n'akana, bara bibyambaaso byaabwe khu biindu byeesi Umwoyo akana. 6Khuumalila kamakyesi koosi khu biindu bye kumubili khureera khuufwa. Ne khuura bibyambaaso khu biindu by'Omwoyo, khureera buulamu ni lukoosi. 7Bibyambaaso bibiiba khu biindu bye kumubili biba bikhaandisana ni Wele; sibiwulila kamakaambila ka Wele ta. Ilala sibinyala na khafwiiti byawulila Wele ta. 8Naluundi abo babaali khu biindu bye kumubili sibanyala khukhwikhoyesa Wele ta.
9Ne niiba nga Umwoyo wa Wele amenya mus'iinywe, muba nga inywe simumenya nga kimibili kyeenywe ni kikana ta, akhali muba mumenya khulw'Omwoyo uwa Wele umenya mus'iinywe. Ne umuundu yeesi n'aba nga s'ali n'Umwoyo uwa Kristo ta, aba s'ali uwa Kristo ta. 10Ne noola Kristo ali mus'iinywe, abe akhaba nga kimibili kyeenywe kili kimifu khulwe bubwoonaki, kimyoyo kyeenywe kili kimilamu khulwe bukwalaafu. 11#1 Kor 3.16Ne noola Umwoyo wa Wele uwalamusa Yesu khukhwaama mu bafu ali mus'iinywe, aba ndi uyo uwalamusa Kristo khukhwaama mu bafu, nanywe aliwa kimibili kyeenywe buulamu, nga abirira mu Mwoyo weewe, umenya mus'iinywe.
12Nashiryo be buulebe, khuli ni kumukheemba. Kumukheemba kuno sikuli kwe khumenya nga kumubili ni kukana ta. 13Khulwekhuuba ni mumenya nga kimibili ni kikana, kane mufwe. Ne ni mumenya nga Umwoyo n'akana, kane mube balamu khulwekhuuba muba mwafuniakile buraambi bwe kumubili. 14Abo boosi beesi Umwoyo wa Wele araangilila bali babaana ba Wele. 15#Gal 4.5-7#Mako 14.36; Gal 4.6Khulwekhuuba Umwoyo is'inywe mwaweebwa s'ali Umwoyo uwe khuuba bakulwa shishikila mwaaba ni khuurya ta. Ne Umwoyo is'inywe mwafuna ali ubashuusa inywe khukhwikyela babaana ba Wele. Khulwe kamaani k'Omwoyo wakila khwalaanga khuri, “Abba,” shimanyisa shiri “Paapa.” 16Umwoyo uwa Wele umweene etubaasa ni kimyoyo kyeefwe, waboola ari khuli babaana ba Wele. 17Ni khuba nga khuli babaana, khuba khuli basikha; basikha ba Wele, naluundi khuba khuli be busikha atweela ni Kristo, khukhwamila khu khutaambisibwa atweela ni naye, nio nafwe khufune shiriifwa atweela ni naye.
Shiriifwa shishiili khukhwiitsa i buraangisi
18Ise nambaasa ndi khuutaambisibwa khukhuuliwo ari, sikhunyala khwalekhaanisibwa na khafwiiti khu shiriifwa shishiitsa khukhwokesebwa ifwe ta. 19Khulwekhuuba bibuumbe byoosi byaloleelela, naluundi byaliindiilila lukali khubona nga Wele ni okesa lubuula babaana beewe. 20#Rak 3.17-19Shishireera shino shili ndi bibuumbe byoosi babikhalila kumusaango. S'ali nga nibyo ni byakana ta, ne akhali nga Wele umweene n'akana shibe shiryo. Akhaba nga shaba shiryo, ne aabawo khukhwiyikina khukhuuloma khuri; 21shifukhu shitweela bibuumbe bibyeene balibikangulula khukhwaama mu bubowe bwe bukulwa ni khubola, babingise mu khulekhuulibwa khwe shiriifwa she babaana ba Wele. 22Khulwekhuuba khwaamanya khuri khukhwoolisa ari, bibuumbe byoosi bikholatsaka shiisa, nga bitsiinikhanila atweela khukhwoolisa ana ari. 23#2 Kor 5.2-4Ne shiili bibuumbe byonyene ta. Ni nafwe fweesi babaali ni bibyaamo bikiboole by'Omwoyo, ni nafwe khukholaka shiisa fwabeene fwenyene, nga khulilila munda, nga ni khuliindiilila Wele khukhukalusa ifwe khukhwikyela babaana beewe. Nga khuno nikhwo khuwonesebwa khwe kimibili kyeefwe. 24Khulwekhuuba Wele wakhuwonesa ifwe khuubirira mu khwiyikina khuno. Ne nikhwiyikina sheesi khubonakho, ukhwo sikhuba khukhwiyikina ta. Naanu khusifwe unyala weyikina shishiindu sheesi abonakho buboni? 25Ne khwiyikina sheesi khukhabonakho ta, khulwekhuuba khuba khushiliindiilila ni khukhwikhaliilikha.
26Ni musaambo niyo indweela, Umwoyo akhuyeeta ifwe mu butoro bweefwe. Khubweefwe fwenyene, sikhwaamanya nga ni khwaakha khwaaloomba ta. Ne Umwoyo umweene ekontselela ni khuutsiinikha khukhukhalomekha ta, mu lisiina lyeefwe. 27Ni Wele, uwofwasa kimyoyo kye babaandu, wamanya sheesi Umwoyo aba alikho ambaasa. Khulwekhuuba Umwoyo aba alikho ekontselela nga Wele n'akana, nga aloombela bakhosefu.
28Khwaamanya khuri mu biindu byoosi, Wele akholela buulayi abo babamukana; abo beesi niye alaanga khuulondekhana ni shitsilililwa sheewe. 29Abo beesi Wele aamala khaale khuurobola, waamala khaale khuubara khu ndulo bashuukhe bekyele nga Umwaana weewe, nio akile Umwaana weewe abe umukiboole mu be buulebe bakali. 30Abo beesi Wele aamala khuurobola, abalaanga; ni naabo beesi aamala khuulaanga, aabashuusa bekyela bakwalaafu; ni nabo beesi aashuusa bekyela bakwalaafu, aabawa shiriifwa.
Khuukana khukhwaama isi Wele
31Mu khulolelela bino byoosi, kane khulome khuri shiina? Noola Wele ali khu lubeka lweefwe, ne ndi naanu unakhusoolanisa ifwe? 32Wele s'aloba khuuwaanayo Umwaana weewe umweene ta, ne aamuwaanayo khulweefwe fweesi. N'endi Wele anyala aryeena waloba khukhuwa ifwe bibiindu byoosi atweela n'Umwaana weewe? 33Ari ndi naanu uliwabila babaandu ba Wele barobole? Wele umweene niye ushuusa babaandu balekha khuubakho ni kumusaango ta. 34Naanu ulibakhalila kumusaango? Kristo Yesu uwafwa naluundi waalamusibwa khukhwaama mu bafu, s'anyala waaba niye ubakhalila kumusaango ta. Umweene uyo ari ali khu mukhono kumulayi kwa Wele, akhuloombela ifwe isi Wele. 35Ari naanu ndi unyala wakhwawukhanisa ifwe khu khukana khweesi Kristo aakhukanamo ifwe? Bukosi, namwe bihangafu, namwe khuukubyeengebwa, namwe intsala, namwe butaambi, namwe bukosi bwe khuufwa, namwe khuufwa? 36#Zab 44.22Nga bibyaronebwa bikhosefu ni biloma biri,
“Buli busheele khuli mu bukosi bwe khuufwa khulwoowo.
Ifwe khubirisibwa buubi busa nga kamasheese keesi batsya khukhwiira.”
37Mu biindu bino byoosi ifwe khwaamala khaale khuuwula, khulwa Yesu uyo uwakhukana ifwe! 38Lwekhuuba ise ishiŋaŋasa ndi mbaawo shishiindu shishinyala shakhwawukhanisa ifwe khu khukana khwa Yesu ta. Abe ikhaba khuufwa, namwe buulamu, namwe bamalayika, namwe be buwuli, namwe bibiindu byoosi bibiiliwo ari, namwe bibiindu bibiliitsa mu moni, namwe bayiinga, sibilikhwawukhanisa ta. 39Namwe oba tsingoongo, namwe kamatila, namwe shishiindu shoosi mu byabuumbibwa, mbaawo na shitweela shishinyalisa khukhwawukhanisa ifwe khu khukana khweesi Wele aakhukanamo ifwe khuubirira mu Mukasya weefwe Kristo Yesu ta.
Одоогоор Сонгогдсон:
Baroma 8: LPE
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
The Bible in Lumasaaba © Bible Society of Uganda, 2016.