Baroma 6
6
Khuli baafu isi Bibyoonako ne Baalamu mu Kristo
1Ne ari kane khulome khuryeena? Khulome khuri khwiloosele khuukhola bye bubwoonaki nio bubweela bwa Wele bwiloosele? 2Taawe. Shinyalikha shiryeena ifwe babekaana bibyoonako khukhwiloosela khuumenya mu byoonako? 3Simumanya muri ifwe fweesi khukhwabatisibwa mu Kristo Yesu, khwabatisibwa mu khufwa khweewe ta? 4#Kol 2.12Nashiryo mu khubatisibwa khweefwe khwasiikhibwa atweela ni naye mu khufwa khweewe, nio akile ari nga Kristo n'alamusibwa khukhwaama mu bafu khuubirira mu shiriifwa sha Paapa, ni nafwe khuryo khunyalise khukyendela mu bulamu bushaakha.
5Ne ni khuba nga khwatubaasibwa ni Kristo mu khufwa khukhuuli nga khukhweewe, aba luundi khuryo khulitubaasibwa mu khulamukha nga khukhweewe. 6Khulwekhuuba khwaamanya khuri isaambo isi khwabamo khaale yatsaangiliwa khu musalaba ni Kristo. Nio akile kumubili kumwoonaki kuwewo, naluundi nio khulekhe khuuba babakaanisi isi bibyoonako ta. 7Khulwekhuuba umuundu n'afwa aba wawonisibwile khukhwaama mu maani ke khukhola bye bubwoonaki. 8Ne ni khuba nga khwafiile ni Kristo, khufukiilila khuri khulimenya ni naye. 9Khwaashimanya khuri Kristo n'amala khuulamusibwa khukhwaama mu bafu, s'alifwa luundi ta. Khuufwa sikhumulikho ni kamaani koosi ta. 10Khuufwa khweesi Kristo aafwa, aafwa musaambo iye bibyoonako, kumuluundi mutweela kwonyene. Ne buulamu bweesi amenya, abumenya mu Wele. 11Nashiryo ni nanywe mweesi shandyashiile mwiyambaase mwabeene khuuba baafu isi bibyoonako, ne nga muli balamu isi Wele, khuubirira mu Kristo Yesu.
12Nashiryo mukhafukiilisa bibyoonako byaaba ni bunyala mu bulamu bweenywe, khuubakhonjelesa mulondelele byeesi kimibili kyeenywe kikoomba ta. 13Namwe mukhawanatsakayo bisiintsa bye kimibili kyeenywe khuuraambisibwa khulwe bubwoonaki ta. Ne ni mwiwaaneyo mwabeene nga babaandu beesi bakobosa mu bulamu khukhwaama mu bafu. Naluundi muwaaneyo kimibili kyeenywe isi Wele kiraambisibwe khulwe bukwalaafu. 14Khukhwaama nga ni mukhayilibwa ni kamakaambila ta, ne mwaba nga muyilibwa ni bubweela bwa Wele, bibyoonako sibibalikho ni bunyala ta.
Baakulwa be Bukwalaafu
15Ari khulome khuryeena? Khulome khuri lwekhuuba khuli aasi e bubweela bwa Wele, ne akhuba aasi e kamakaambila ta, nashiryo khwiloosele khukhola bibyoonako? Seshinyalikha ta. 16Ne simumanya muri ni muba mwewanileyo mwabeene isi umuundu khuuba bakulwa beewe babamuwulila, muba muli bakulwa bomweene uyo isi muba muwulila ta? Nashiryo muba bakulwa oba be bibyoonako bibireera khufwa, namwe bakulwa babawulila, shishireera bukwalaafu. 17Ne Wele asiimibwe! Khulwekhuuba inywe mumwabakho bakulwa be bibyoonako, ari mwekyelile babamurekeeresa, khukhwamila ilala nga mushiili munda, mu myoyo kyeenywe, bya ŋali bibiili mu khuleekela khweesi mwaweebwa. 18Ne khukhwaama ni mwalekhuulibwa khukhwaama mu byoonako, mwekyelile bakulwa be bukwalaafu.
19Indikho inganikha mu saambo iye babaandu babusheele, khulwe butoro bwenywe bubuuli busaalikhana. Khulwekhuuba nga lutweela ni mwawaanayo bisiintsa byeenywe khuukhola bye bunyaalu, ni mu khwoonaka khuubiririfu, ni aluno ari mwaakha muwaaneyo bisiintsa byeenywe isi bukwalaafu khu lwe bikholwa bikhosefu.
20Ne ni mwaba bakulwa be bibyoonako, mwaba nga simwinaanayo isi bukwalaafu ta. 21Ne mafuurisa shiina keesi mwafuna khukhwaama mu biindu ibyo ari biibi bibiwaambisa kamaŋaanyu? Intsakamilo iye bibiindu ibyo nikhwo khuufwa. 22Ari ni mwalekhuulibwa khukhwaama mu byoonako naluundi mwekyela bakulwa isi Wele, kamafuurisa keesi mwafuna nibwo bulamu bubuwaanibwilayo ilala isi niye. N'ibwakamilo wayo, nibwo bulamu bubukhawawo ta. 23Khulwekhuuba kumusheemba kwe bibyoonako nikwo khuufwa. Ne shiwaanwa sha busa sheesi Wele akhuwa nisho buulamu bubukhawawo ta, nga akhuwa buulamu buno khuubirira mu Kristo Yesu, Umukasya weefwe.
Одоогоор Сонгогдсон:
Baroma 6: LPE
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
The Bible in Lumasaaba © Bible Society of Uganda, 2016.