JOHAN 5
5
Tuikan sahawi y no nai khumi ai hawi sa pi nai
1Hunai bo y ly Judaichi i pawi harei awm i, Isu ly Jerusalem y chei kalau. 2Naibaly Jerusalem y ly Beram Katheu Pa-kho ahawi y ang awm: huni ly Hebrai leu y Bethesda napi; charai py pangrei awm. 3Hu y ly no naichi, mei kamjuchi, kheu kangbaichi, kamkhynchi neangneang aseaung i, [tui sampyh theu ai nai ajeng. 4Tlen tlenrei ly kani pri i amtaw thau nai leaungrei ly tui y satla i tui sampyh theu hai; huni bo y tui y satla man nai khumi ly atiti no nai py hawi ryp bo.]
5Hu y ly ami mo leaungrei saneng phai palyh tajarei no nai awm. 6Naibaly aseaung nai ly Isu my niu i, huna nai ka-tawm awm nai neangneang kra bo, nanai pany iy ni teng y, “Hawi sa pi ai nai ngai a?” napi. 7Naibaly no nai khumi ly, “Areng, tui sampyh theu khala y kai ai ang y khai ai nai khumi by y i, kai ly tako khala y kalang my katlen pawn jojo,” nanai pathang. 8Isu my ni teng y, “Angthau ly, nang i ira la iy tako jau,” napi. 9Naibaly tlenrei khyh my huni khumi ly hawi ryp i, mymy i ira la iy tako.
10Huni kani ly Anawn Kani ne. Hunaibaly Judachi ly hawi nai khumi teng y, “Anawn Kani ne he, nang i ira ly lo ngau y,” napi.#Neh 13.19; Jer 17.21 11Mymy ly nichi teng y, “Kai ai hawi sa nai keung ly kai teng y, ‘Nang i ira la iy tako jau,’ napi khyp nai bo,” nanai pathang. 12Nichi ly mymy teng y, “Nang i ira la iy tako jau,’ napi nai keung ly ami mo?” nanai deng. 13Na i py hawi nai khumi my ly ami mo, nanai pany y; hu y ly khumi mipuichi awm nai deaungkho y Isu ly leh veng bo. 14Huni bo y ly Isu ly mymy ai achura yhm kalen pui y niu i ni teng y, “Khen cham, nang hawi bo he; kamngo so bi moh, ti y baly nang i tlang tleaung y hawi y keh nai tym lawh na,” napi. 15Naibaly huni khumi ly chei iy, mymy ai hawi sa nai keung ly Isu ne, nanai Judaichi teng thui pi. 16Hunaibaly Isu my Anawn Kani y huna naichi sa nai deaungkho y Judaichi my ni ai ana bo. 17Na i py Isu my nichi teng y, “Ngaai ly vai khrairei atiti sa, kai py sa,” nanai pathang. 18Hunaibaly anawn Kani taphra nai harei khyh py ny y i, Tameuh ly mymy i Ampo kypkyp y pathi iy Tameuh tanrei amlawn nai deaungkho y Judachi ly ni ai padei ai nai hau ra.
Chapo i sa thai naira
19Hunaibaly Isu my nichi teng y, “Meitang khypkhyp kang thui pi, Chapo ly ampo i atiti sa nai niu y baly amy tlairei ati sai py so thai y leang: ni i atiti sa nai ngierei ly Chapo py sa teang. 20Ampo ly Chapo ai tamen, ni i atiti sa nai ngierei py mymy teng y patei: naibaly nangchi ly lyh thai ai nai hini tleaung y atiti sa nai lyh nai py ni teng y patei bi ai. 21Ampo my kadeichi ai pathau iy paheng nai kamta ly, Chapo py ni i ngai nai ngierei ai ly paheng teang. 22Khumi bawibawichi ly ampo ai tahm khai nai kamta Chapo ai py tahm khai ai nai, Ampo ly ami ai py tara chih y, tara chih ai nai bawibawi ly Chapo teng y au bo. 23Ami py chapo ai tahm khai y nai ngierei ly Ampo, ni ai pato nai keung ai py tahm khai y nai bo.
24“Meitang khypkhyp kang thui pi, ami py kai i leu thai iy, kai ai pato nai keung ai ym nai ngierei ly deungtasarei hengra nga bo, sum py sum y ai, na i py dei naira i nai theu iy heng naira y kun bo. 25Meitang khypkhyp kang thui pi, neng ang tym dudu bo, vai py tym ryp bo, huna nai khala y ly kadeichi my Tameuh i Chapo raawi thai ai i, thai nai ngierei ly heng ai. 26Ampo ly amy teng y hengra awm nai kamta ly, Chapo ai py amy teng y hengra awm ai nai pei bo: 27naibaly ni my ly Khumi i Chapo ne nai deaungkho y mymy teng y tara chih ai nai au bo. 28Huni ly rengrang ti u moh; neng ang tym ai bo, huna nai khala y ly angawm y awm nai bawibawichi ly mymy i raawi thai iy theu bebe ai; 29atiti kahawi sa naichi ly hengra nga ai nai angthau u bi ai; atiti hawi y sa naichi ly sumra nga ai nai angthau u bi ai.#Dan 12.2
Isu i satang pany hai nai keungchi
30“Kaimy tlairei ly ati sai py kaso thai y leang; kai i thai nai kamta ly tara kachih khyh; kai ly kaimy i kangai hau y naimy kai ai pato nai keung i kangai kahau nai deaungkho y kai i tara chih nai ly teng parai mang. 31Kaimy i satang kapany hai baly, kai i pany hai nai leu ly teng y leang. 32Kai i satang pany hai nai keung takhra ne; ni my kai i satang pany hai nai ly teng, nanai kapany. 33Nangchi ly Johan teng y khumi ai pato i, ni my ly leu meitang satang pany hai bo.#Jh 1.19–27, 3.27–30 34Ne mang ly kai ai pany hai nai ly khumi teng i nai ny y leang: na i py nangchi ly hengra nga thai ai nai hini leu kang thui pi nai teu. 35Ni ly angveaung parai nai hawi angvang parai nai maisi yhm ne i, nangchi ly maidenrei ni i kangvang y amo theu ai nai ngai u be. 36Na i py kai ai pany hai naira ly Johan i pany hai nai tleaung y len keh nai ne; Ampo my kai ai pato, nanai Ampo my kai ai atiti sa pajau ai nai au nai, kai i atiti sa nai khypkhyp my kai i satang pany hai. 37Kai ai pato nai keung Ampo my py kai i satang pany hai teang. Nangchi ly mana khala y py ni i raawi py thai vai y, ni i mo py niu vai y.#Mt 3.17; Mk 1.11; Lk 3.22 38Ni i leu py nangchi i paleung y patleng u jo vai y: ati mana nai mo nabaly mymy i pato nai keung ai ly nangchi my ym y leang bo.
39“Tameuh i cha-iu theung y deungtasarei hengra awm, nanai ym u nai deaungkho y nangchi hawihai my phain; naibaly huni ly kai i satang pany hai reng; 40na i py nangchi ly hengra nga thai ai nai kai teng y jeu ai nai ngai u y. 41Khumi i palo nai ly kakawn y leang. 42Nangchi ai kang pany, nangchi i paleung theung y Tameuh ai tamen naira by y leang. 43Ngaai i amyn y kang jeu nai i, nangchi ly kai ai kawn y; khumi takhra ly amy i amyn y jeu i khyly ni ai ly nangchi my kawn ai. 44Nangmychi my apalo leungtang i, Leaungrei Awm Khyh nai Tameuh i dengdairei theu nai palo naira ai ly nangchi hau y: mana ym u thai ai mo? 45Kai ly Ampo teng y nangchi ai seu ai, nanai dawn u moh:nangchi ai seu nai keung leaungrei awm i, huni ly nangchi i ym nai Mosi ne. 46Nangchi ly Mosi ai ym bo nabaly kai ai py ym u ai bo: ni ly kaimy i satang tajiu pi bo. 47Na i py nangchi ly ni i leu tajiu nai ym y baly, kai i leu mana ym u ai mo?” nanai pathang.
Одоогоор Сонгогдсон:
JOHAN 5: KCL02
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Khumi Common Language Bible © Bible Society of Myanmar, 2005.