JOHAN 4
4
Isu hawi Samari neampachy
1Naibaly Isu ly Johan tleaung y abangnai nawi keh naichi nga nai hawi, baptis sa nai py Pharisaichi my thai, nanai Areng my pany baly, 2mymy ly Judai pri i nai theu iy Kalili pri y vawi ali teang: 3(ne mang ly Isu kypkyp ly baptis so y leang, abangnaichi my sa lawh.) 4Hunaibaly mymy ly Samari pri y tako prei ai nai avo i, 5Jakob ly my i chapo Josepha teng y pei nai meingtym ahawi y Samari avang harei, Sukara napi naira y tym: Jakob i tuikan py hu y awm.#AA 33.19; Josua 24.32 6Hunaibaly Isu ly tako akawm nai deaungkho y tuikan ahawi y ateh pawh; kanithun biu cha neng ne.
7Naibaly Samari neampachy leaungrei tui deu ai nai jeu i, Isu my ni teng y, 8“Kai ai nei ai nai pei ba,” napi; abangnaichi khy teicha teinei van ai nai avang y chei u bo. 9Hunaibaly Samari neampachy ly ni teng y, “Nang ly Juda khumi ne, kai ly Samari neampachy ne:atimana nai kai teng y nei ai nai hnei mo?” napi; (ati mana nai mo nabaly Judachi ly Samarichi hawi ati ra y py amkawm vai y.)#Eza 4.1–5; Neh 4.1–2 10Isu my ni teng y, “Tameuh i atiti pei nai hawi, nang teng y Kai nei ai nai pei ba’ napi nai keung ai nang pany i khyly, nangmy ni teng y hnei lawh ai i, ni my ly tui kangheng ang pei ai bo,” nanai pathang. 11Naibaly neampachy my ni teng y, “Areng, nang ly atheura ati sai py by y pui be, tuikan ly thiu parai; nang ly huni tui kangheng ma mang i nai nga mo? 12Nang ly kaichi i amsi Jakob tleaung y len keh a? Ni ly hini tuikan ang pei i, mymy py mymy i chanauchi py tawnbawichi py nei,” napi. 13Naibaly Isu my ni teng y, “Ami py hini tui nei nai ngierei ly tui ahai bi ai; 14ami py kai i pei ai nai tui nei nai ngierei ly tlen py tui ahai y ai; kai i ni teng y pei ai nai tui ly my i taku theung y tuino awm ai i, deungtasarei hengra tym pa-rei achawn ai,” nanai pathang. 15Neampachy ly ni teng y, “Areng, kai ly tui ahai y ai nai hawi, hi khrai khrairei tui deu ai jeu y ai nai py huni tui kai teng y pei ba,” napi.
16Naibaly Isu my ni teng y, “Chei ly, nang i juvo ai palau ly, hi y jeu bi ba,” napi. 17Neampachy my ly ni teng y, “Kai ly juvo by y pui be,” nanai pathang. Isu my ni teng y, “Kai ly juvo by y pui be,’ nanai ly teng parai mang; nang ly juvo pangrei awm bo, 18vai i nai ly nang i juvo ny y leang khyp; hini nang i leu thui nai ly teng khyp mang,” napi. 19Neampachy my ni teng y, “Areng, nang ly amo ne, nanai kai pany bo. 20Kaichi i amsi sangumchi ly hini mawi y Tameuh ai chiu reng; na i py nangchi ly, Khumichi i Tameuh ai chiu ai nai meingtym ly Jerusalem avang y awm,’ napi u lawh,” napi. 21Naibaly Isu my ni teng y, “Lo awi, kai i leu sai ym: hini mawi y py, Jerusalem avang y py nangchi ly Ampo ai chiu y ai nai neng tym ai bo. 22Nangchi i chiu nai ly nangchi pany y: kaichi i chiu nai ly kaichi pany; lawi hai ai naira ly Judachi theung i nai theu ai. 23Na i py neng tym dudu bo, vai py tym ryp bo, huna nai khala y ly Tameuh ai chiu tatang naichi ly phailo hawi meitang khyp naimy Ampo ai chiu ai: Tameuh ly mymy ai chiu ai nai huna naichi ai ly hau mang. 24Tameuh ly Phailo ne; mymy ai chiu nai keungchi ly phailo hawi meitang khyp naimy ni ai chiu ai nai tla,” napi. 25Naibaly neampachy my ni teng y, “Messia, Krista napi nai ang jeu ai, nanai ly kai pany:ni ly ang jeu khala y ly ati cheaungkhang ang thui pi ai,” napi. 26Isu my ni teng y, “Kai nang ai arum hai nai keung ly ne bo,” napi.
27Naibaly hunai thym khala y abangnaichi ly ang jeu i, neampachy hawi arum nai ly lyh parai; na i py ami py ni teng y, “Nang ly ati hau mo? Neampachy hawi ati mana nai arum mo?” nanai tapi y. 28Hunaibaly neampachy ly mymy i tui kacheang khai jo iy, avang y chei i khumichi teng y, 29“Jeu u ly, kai i atiti sa nai ngierei ang thui pi ryp ryp nai keung khumi leaungrei ai khen u cham. Hini ly Krista ny y a?” napi. 30Naibaly nichi ly avang i nai theu iy ni teng y chei u tapai.
31Hunai sala y abangnaichi my ly ni teng y, “Sara, cho ba,” napi. 32Na i py ni my ly nichi teng y, “Kai ly nangchi i pany y nai biu cha ai nai awm,” napi. 33Hunaibaly abangnaichi ly arum i, “Ni i cha ai nai ami my syn pi cham be?” na u. 34Isu my nichi teng y, “Kai ai pato nai keung i kangai sa ai nai hawi, ni i kalop sa pajau ai nai ly kai i biu ne. 35Nangchi ly, ‘Choh tyn ai nai ly lo palyhrei awm rai,’ na u mo kana? Khen u cham, kang thui pi, angdeang u ly, hlau y khen u cham, vai py tyn ai nai aau jawn bo. 36Hei nai keung hawi tyn nai keung py kawn ahawi thai ai nai, tyn nai keung ly vang nga i, deungtasarei hengra tym pa-rei awm ai nai athai pakym. 37‘Leaungrei ly hei, khumi takhra my tyn,’ nanai leu ly hunira y ly teng parai. 38Nangmychi i so y naira y tyn ai nai kang pato; khumi takhrachi my sa iy nichi i sa angchi ly nangchi my patawm bo,” napi.
39Naibaly huni neampachy ly, “Kai i atiti sa nai ngierei ly ang thui pi ryp ryp,” nanai pany hai nai leu deaungkho y, huni avang i Samari khumi neangneangchi ly Isu ai ym bo. 40Hunaibaly Samari khumichi ly mymy teng y jeu u i, mychi teng y awm ai nai takeng; hunaibaly mymy ly hu y kani nyhrei ni awm. 41Naibaly khumi takhra neangneangchi py mymy i leu deaungkho y ym bi. 42Nichi ly neampachy teng y, “Vai taleang ly kaichi nang i leu thui nai deaungkho y ym nai ny y leang bo: kaimychi kypkyp my ni i leu thai iy, hini ly khaileaung pri ai lawi hai nai keung ne khyp, nanai pany bo,” napi.
Miteang keh i chapo ai hawi sa pi nai
43Naibaly huni kani nyhrei bo y mymy ly hu i dengdairei theu i, Kalili pri y chei. 44Isu mymy kypkyp ly, amo ly amy i meingtym y ly tahm by y, nanai pany hai.#Mt 13.57; Mk 6.4; Lk 4.24 45Hunaibaly mymy ly Kalili pri y tym i, Kalili pri i khumichi my Jerusalem avang y pawi y awm nai khala y ni i atiti sa nai bawibawi ly niu nai deaungkho y ni ai kawn u: nichi py pawi y chei teang bo.#Jh 2.23
46Hunaibaly mymy ly Kalili pri, Kana avang y tui kreip athai hang palawn hai naira y tym bi. Naibaly ami mo khumi kanang leaungrei awm i, ni i chapo ly Kapernaum avang y no.#Jh 2.1–11 47Mymy ly Isu Judai pri i dengdairei Kalili pri y ang jeu nanai thai baly ni teng y chei i, mymyi chapo dei vi dei vi nai deaungkho y, jeu kathiu iy ni ai hawi sa ai nai takeng. 48Isu ly ni teng y, “Nangchi ly ka-ma-rachi hawi lyh ai awm naichi py niu y baly pipi ym ai ny y leang,” napi. 49Khumi kanang my ni teng, “Areng, kai i chanau dei y rai kha y my jeu kathiu ba,” napi. 50Isu my ni teng y, “Vawi ali teang teu ba, nang i chapo ly hawi bo mang,” napi. Naibaly huni khumi ly Isu my ni teng y leu thui pi nai ly ym i tako bo. 51Naibaly mymy ly tako kathiu nai thym khala y ni i miseaungchi ly lamchung i, “Nang i chapo ly hawi bo,” napi. 52Ni ly mymychi teng y ni i hawi angchei nai neng deng i, nichi ly ni teng y, “Jangdyh kani amheng khyp khala keaung pra bo,” napi. 53Hunaibaly Isu my ni teng y, “Nang i chapo ly hawi bo mang,” napi nai neng ne khyp, nanai ampo my pany bo; naibaly mymy hawi ni i dengtheungchi bawibawi py ym u. 54Huni ly Judai pri i nai Kalili pri y jeu kha y Isu i pa-nyh rengrang sa nai ne.
Одоогоор Сонгогдсон:
JOHAN 4: KCL02
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Khumi Common Language Bible © Bible Society of Myanmar, 2005.