LUK 21
21
Hemepi Kepi Adan
(Mar 12.41-44)
1Ansi Jisu aphu chingthursi adung arei langsi keplang-o amonit atum kardom ahem apuru along dan kethap thek long-lo, 2lapen alangli inut keboidet ahemepi pai-ni apoisa kethapta thek-long-lo. 3Alangli pulo, “Ne nangtum aphan nangthanlang, kadokave atum apar labangso keboidet ahemepi kethap ongmuchot-lo. 4Pima kadokave atum ke kedortang ahin angbong pensi thap-lo; bonta labangpi ke boidet-lo setta kereng-iji aphan kedo-an asonta choche selesi pidet-lo.”
Kardomhemthepi Pavirdetji Pu Jisu Kepu
(Mat 24.1-2; Mar 13.1-2)
5Sangho atum angbong pen manene atum Kardomhemthepi alam chethanseilo. Atheke Kardomhemthepi a-arlong kelang ko-an alon kedo, lapen Arnam aphan kepi adan hei heita ko-an alon kedo pusi halatum chethanseilo. 6Jisu pulo, “La nangtum kethek-long an, atheke lahei hei a-arlong isinatta mo arni isi ke non adim bibedetji; kadokave a-arlongta var-etji.”
Kesung Lapen Kechenek Kevangji Alam
(Mat 24.3-14; Mar 13.3-13)
7Halatum alangliphan arjulo, “Thanbang la komantu plangjima? lapen la plangji dokdok ahut pi pi cheplangjima?”
8Jisu pulo, “Cherenon, nangtum aphan nangpamanghu longri. Ne men pen penang atum vangsi pupo, ‘Ne helo alanglilo, lapen ahut nangletang-lo!’ Bonta nangtum halatum along dunri. 9Nangtum ron kechedan lapen kehorisei alam hei hei karjulong ahut phereri, aphrangke lahei hei plangvek nangjilang. Bonta lahei hei apot-le kejut tebok-het-lo, lapu kali.”
10Ansi Jisu halatum aphan pulo, “Det ahotur det, lapen rat ahotur rat chethurji. 11Kepherememe achikli hei hei vangji, akhim thurji, lapen adim pen adim mavur doji. Kephere meme lapen angthek kethe hei hei sining angsong pen nangklangji. 12La kadokave chekok ke ako halatum nanglitum aphan aling pen setta nangnepji lapen nangchenekji. Nangtum aphan sinagog hei hei along nangkepangsaiji aphan hodaidetji, lapen nangtum aphan phatek nangbengji. Ne pen apot nangtum aphan recho atum angno lapen det keja atum angno nangpondetji. 13Nangtum aphan lake Birta Keme kethanji aphan apor keme cheplangji. 14Nangtum kopusi chethakdun thek-jima pura aphrang pen ning biri; nangtum aning chepathirnon.#Luk 12.11-12 15Pima nangtum keningje alam nangtum ahotur atum baduta khang un-e, lapen nangchethakdun thekthe, lason alamthe lapen agian ne nangtum aphan nangpiji.#Luk 12.11-12 16Nangtum api apo, nangtum akorte atum, chepho chero atum, lapen nangtum ajirpo atum nangtum aphan hotur arideng nanghodaiji: lapen nangtum angbong manene aphan pathiji. 17Ne pen apot abangphutinta nangtum aphan hijimji. 18Bonta nangtum achu ejengnatta ingbobedetji. 19Nangtum dothipnon, lapen nangtum reng-longji.
Jisu Jerusalem Kepavirji Alam Keningje
(Mat 24.15-21; Mar 13.14-19)
20“Chedanbang armu atum Jerusalem kekompet nangtum thek-long-lo tangte, bangso arongsopi pavir dapprangpo pu nangtum chiniji. 21Anke Judia adet kedo atum inglong kat nangji; Jerusalem arlo kedo atum nangbar vek nangji, lapen ke rit-le kedo atum rongsopi palut-le nang. 22Pima hastro alam kechekokji aphan halabangso arni hei hei ‘Aduk kepi arni’, plangji.#Hos 9.7 23Halabangso arni areng angsesedet a-arlosomar atum lapen oso thi-i kedo apei atum ko-an kepherememe akesung pho nangpo! Pima labangso adet aphan pherememe akesung vangji, lapen labangso arat atum aphuthak Arnam aduk-kepi vangji. 24Penang atum aphan nokjir pen pathi-etji, lapen penang atum aphan phatek kebengji aphan adet kaprek kaprek pondetji; lapen ahut chokche tik ke akaprek atum Jerusalem dongthipji.
Monit Asopo Kevang
(Mat 24.29-31; Mar 13.24-37)
25“Arni, chiklo, lapen chiklo longso athak manghumeme angthek klangji. Pirthe athak kadokave adet hei hei aning runhupji, lapen lang thepi arki lapen angsum kethur arki ingreng klung klang apotsi phere-oji.#Isa 13.10; Eze 32.7; Jol 2.31; Kepa 6.12-13 26Pirthe athak pi cheplangjima pu kephere pen ajok monit atum a-ok ainiruisi kliji, pima sining ajakong hei hei aphan hijukji. 27Anke Monit a-Sopo aphan ajakong kethe pen lapen adak atur akethe pen inghun athak kecheklang halatum thek longji.#Dan 7.13; Kepa 1.7 28Lapen la hei hei keplang kecheng ahut, nangtum thurra nangphu chingthur non, pima nangtum akejok tebok-het-lo.”
Thebo Arong Pen Kecharli Alam
(Mat 24.32-35; Mar 13.28-31)
29Ansi Jisu halatum aphan bangso alamlir thanlo: “Thebo arong lapen kadokave athengpi aphan mathatha. 30Arvo kechingjokmi kethek long pen barla apor tebok-het-lo pu nangtum chinilo. 31Lasonthotsi lahei hei keplang nangtum thek-long-lote, Arnam Arat tebok-het-lo pusi nangtum chiniji.
32“La hei hei kadokave chekok ketik ke labangso a-ove dojilang pura ning chebinon. 33Sining lapen pirthe avedetji, bonta nelam hei hei ke kaiketa doverji.
Honding Nangji
34“Cherehurnon! Kecho kejun-o lapen pirthe aningbi an pen nangtum aning chepabuiklui hak huk-ri, kalite halabangso arni pham ketot ason thakthak nangtum aphan padan chekji. 35Pima pirthe adang monit an aphuthak la vangji. 36Mo kechekokji alam an pen kejokji ajakong kelongji lapen Monit a-Sopo angno karjapji aphan nangtum chesikding non, lapen kai ahutta Arnam ardomvernon.”
37Halabangso arni ahut Jisu Kardom ahem alongsi lam thanbom, lapen arni ingsam lote, alangli Oliv pu anglong damsi ajojo hadaksi dokok titilo. 38Lapen adapvang rat atum Jisu alam karjuji aphan Kardom ahem damlo.#Luk 19.47
നിലവിൽ തിരഞ്ഞെടുത്തിരിക്കുന്നു:
LUK 21: KARBIBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Karbi Holy Bible © Bible Society of India, 2010.
Used by permission. All rights reserved worldwide.
