Lioka 21

Ny nideran’i Jesosy ilay mpitondratena nandatsaka farantsakely roa.

Mar. 12.41-44.

1ARY Jesosy nanopy ny masony ka nahita ny mpanan-karena mandatsa-drakitra tao amin’ny fandatsahan-drakitra; 2ary nahita mpitondratena malahelo anankiray koa mandatsaka farantsakely roa#21.2 Gr. lepta roa, dia farantsakely varahina izany = kodranta iray, tokony ho variroaventy. teo Izy. 3Dia hoy Izy: Lazaiko aminareo marina tokoa fa io mpitondratena malahelo io no efa nandatsaka be noho izy rehetra. 4Fa ireo rehetra ireo, dia tamin’ny haben’ny fananany no nandatsahany tao amin’ny rakitra; fa izy kosa tamin’ny fahantrany no nandatsahany ny fivelomany rehetra izay nananany.

Ny nanambaran’i Jesosy ny handravana an’i Jerosalama, sy ny hihaviany indray.

Mat. 24.1-51; Mar. 13.1-37.

5ARY nisy nilaza ny tempoly, fa voaravaka vato tsara sy fanatitra izy; fa hoy Jesosy: 6Ny amin’ireo zavatra hitanareo ireo, dia ho avy ny andro, ka tsy havela hisy vato hifanongoa eto ka tsy horavana.

7Ary izy ireo nanontany Azy hoe: Mpampianatra ô, rahoviana no ho avy izany? ary inona no ho famantarana, rehefa ho tonga izany? 8Ary hoy Izy: Mitandrema, fandrao ho voafitaka hianareo; fa maro no ho avy amin’ny anarako sady hanao hoe: Izaho no Izy; ary koa: Efa akaiky ny andro; koa aza manaraka azy. 9Ary raha handre ady sy tabataba hianareo, aza matahotra; fa tsy maintsy ho tonga aloha izany, nefa tsy dia miaraka amin’izay ny farany.

10Ary hoy Izy taminy: Hisy firenena hitsangana hamely firenena, ary hisy fanjakana hitsangana hamely fanjakana. 11Ary hisy horohorontany lehibe ary mosary sy areti-mandringana any amin’ny tany samy hafa, ary hisy zava-mahatahotra sy famantarana lehibe avy any an-danitra.

12Ary raha tsy mbola tonga izany rehetra izany, dia hisambotra anareo izy ka hanenjika ary hanolotra anareo ao amin’ny synagoga sy ao an-trano-maizina, ka ho entina eo anatrehan’ny mpanjaka sy ny mpanapaka hianareo noho ny anarako. 13Dia ho tonga ho vavolombelona aminareo izany. 14Koa aoreno ao am-ponareo ny tsy hihevitra rahateo izay havalinareo; 15fa Izaho no hanome anareo vava sy saina, izay tsy ho azon’ny fahavalonareo rehetra valiana na resena. 16Ary hatolotry ny ray sy ny reny sy ny rahalahy ary ny havana aman-tsakaiza hianareo, koa ny sasany aminareo dia hovonoiny. 17Ary ho halan’ny olona rehetra hianareo noho ny anarako. 18Nefa tsy hisy ho very na dia singam-bolo iray eo amin’ny lohanareo aza. 19Amin’ny faharetanareo no hahatananareo ny ainareo.

20Ary raha mahita an’i Jerosalema voahodidin’ny miaramila hianareo, dia aoka ho fantatrareo fa efa mby akaiky ny fandravana azy. 21Ary izay any Jodia amin’izany andro izany aoka handositra ho any an-tendrombohitra; ary izay ao Jerosalema aoka handositra ho any ivelany; ary izay any an-tsaha aoka tsy hiditra ao an-tanàna intsony. 22Fa ireo dia andro famaliana mba hahatanteraka izay rehetra voasoratra. 23Fa lozan’ny bevohoka sy ny mitaiza kely amin’izany andro izany! satria hisy fahoriana lehibe eo amin’ny tany ary fahatezerana amin’ity firenena ity. 24Dia ho ringana amin’ny lelan-tsabatra izy ka ho entina ho babon’ny firenena rehetra, ary Jerosalema hohitsahin’ny jentilisa mandra-pahatanteraky ny andron’ny jentilisa.

25Ary hisy famantarana eo amin’ny masoandro sy ny volana ary ny kintana, ary etỳ ambonin’ny tany dia hisy fahorian’ny firenena amin’ny fahaverezan-kevitra noho ny firohondrohon’ny ranomasina sy ny fanonjany, 26ka ho reraka ny fon’#21.26 Na: ka hisy ho faty aza. ny olona noho ny fahatahorany sy ny fiandrasany izay zavatra ho tonga ambonin’ny tany; fa ny herin’ny lanitra dia hohozongozonina. 27Ary amin’izany andro izany dia hahita ny Zanak’olona avy eo amin’ny rahona amin-kery sy voninahitra lehibe izy. 28Ary raha vao miandoha izany zavatra izany dia miandrandrà, ka asandrato ny lohanareo; fa manakaiky ny fanavotana anareo.

29Ary Izy nanao fanoharana taminy hoe: Jereo ny aviavy sy ny hazo rehetra. 30Raha hitanareo fa vao manaroka ireo, dia fantatrareo ihany fa efa akaiky sahady ny lohataona. 31Dia tahaka izany koa hianareo, raha vao hitanareo fa tonga izany zavatra izany, dia aoka ho fantatrareo fa akaiky ny fanjakan’Andriamanitra. 32Lazaiko aminareo marina tokoa fa tsy ho lany ity taranaka ity mandra-pahatongan’izany rehetra izany. 33Ny lanitra sy ny tany ho levona, fa ny teniko tsy mba ho levona.

34Ary mitandrema, fandrao ny fonareo hovesaran’ny vokatry ny fisotroan-toaka sy ny fahamamoana ary ny fiahiahian’izao fiainana izao, ka ho avy tampoka aminareo tahaka ny fandrika izany andro izany. 35Fa hihatra amin’izay rehetra mitoetra etỳ ambonin’ny tany rehetra izany. 36Fa miambena#21.36 Gr. miareta tory. ka mivavaha mandra-kariva, mba hahery hianareo ka handositra izany zavatra ho avy rehetra izany ary hitsangana eo anatrehan’ny Zanak’olona.

37Ary nony antoandro dia nampianatra teo an-kianjan’ny tempoly Izy; ary nony alina dia nivoaka Izy ka nitoetra teo an-tendrombohitra atao hoe Oliva. 38Ary ny vahoaka rehetra nankeo aminy maraina koa teo an-kianjan’ny tempoly hihaino Azy.

നിലവിൽ തിരഞ്ഞെടുത്തിരിക്കുന്നു:

Lioka 21: MBP

ഹൈലൈറ്റ് ചെയ്യുക

പങ്ക് വെക്കു

പകർത്തുക