Luke 16

Tjifaniso tje ntjengeti wakatjenjela

1Jesu kabudza badiyiwa babe kati, “Kwakabe kuna mmwe nlume we nfumi ana ntjengeti wakatjetiwa kunli, kuyi unotjinya thundu ya tetshi uwe. 2Ndizo kan'dana, kambhuzwa kati, ‘Ini ikoku kwandinohwa nge kuko kene? Undibikile ngekwe butjengeti gugo, ngobe autowodwilila uli ntjengeti.’ 3Ntjengeti iwoyo kaalakana ali ega eti, ‘Ndowothamani wali? Tetshi wangu unondidusa mu nshingo. Andizosima kwandingatsha kakale ndina shoni dze kukumbila. 4Ndoziba tjandinowothama kuti ndizo nditi ndilashikigwa nge nshingo pano, bathu bandiamutjile mu mizi yabo.’

5“Ndizo kadana mmwe ne mmwe wakabe ana nlandu kuna tetshi uwe. Kabhuzwa we kutanga kati, ‘Una nlandu ngapani kuna tetshi wangu kene?’ 6Kadabila eti, ‘Gabha le mafuta anobhika ali zana (100).’ Ntjengeti kan'dwa kati, ‘Tola lukwalo gugo gwe milandu ugale pasi ukwale tjinyolotjo, makumi ali mashanu (50).’ 7Ipapo kabhuzwa mmwe kati, ‘Ngono iwe una nlandu ungapani?’ Kadabila eti, ‘Hwomo dze mathunde dzili zana ling'ompela (100).’ Kan'dwa kati, ‘Tola lukwalo gugo gwe milandu ukwale makumi ali zhanakadzi (80).’

8“Tetshi kakudza ntjengeti usina malebeswa, ngobe ashinga nge butjenjedu. Bathu be shango iyeyi bakatjenjela mu kushingidzana, kupinda bathu be tjedza.”

9Ndomubudza nditi, “Muzwithamile zwikamu nge fumwa isakalulwama, kuti ndizo ha yapela mowoamutjigwa mu magalo asingapele. 10Iye unogalikabgwe muna zwitukununu unogalikabgwe muna zwikulu, na iye usingagalikebgwe muna zwitukununu, aatogalikabgwe muna zwikulu. 11Ndizo ha musakabe mugalikabgwe mu kushingisa fumwa isakalulwama, ndiani unowomugalabgwe mu kushingisa fumwa ye malebeswa kene? 12Kakale ha musakabe mugalikabgwe muna zwe bamwe, ndiani unowomupa zwinowobe zwenyu.

13 # Matewu 6:24 “Akuna nlanda ungashingila botetshi babili. Ungadwa ebenga mmwe wabo, kada mmwe wabo, kene kabhatilila mmwe wabo, kalamba mmwe wabo. Aungashingile kose Ndzimu ne fumwa.”

Ndebeleko dza Jesu

(Matewu 11:12-13; 5:31-32; Mako 10:11-12)

14 Bafarasi, ibo bakabe beda mari bakahwa kose ikoku, ngono bakaseka Jesu mahanya. 15Koga Jesu kati ku bali, “Imwi mu ibo banozwilulwamisa mu mesho e bathu, koga Ndzimu unoziba mimoyo yenyu, zwinokudziwa mu bathu zoshimisa mu mesho e Ndzimu.

16 # Matewu 11:12, 13 “Hwalo dze nlayo ne dze balebesambeli dzakashingisiwa kuswikila Johani ezha. Tjinga kwa ipapo, ndebo mbuya ye bushe gwe Ndzimu inosumikigwa, ngono mmwe ne mmwe unogwisa nge masimba kungina muguli. 17#Matewu 5:18Kulelu kuti kudzimu ne shango zwipinde, pakuti kulashike shanga ing'ompela ye nlayo, kene ili tukununu kungapani.

18 # Matewu 5:32; 1 Bakorinta 7:10, 11 “Iye unolamba nkadzi uwe elobola mmwe nkadzi, unothama bupombgwe, na iyebo nlume unolobola nkadzi wakalambiwa, unothama bupombgwe.”

Nlume we nfumi na Lazaro

19“Kwakabe kuna mmwe nlume we nfumi, akaambala ngubo ye mbala we bushaba gwakabondelela ne jila lakanaka le themba ipezhugwi, ngono ethama mizano ye zojiwa mazhuba wose egala ali mu ipepkhwe. 20Pa nkoba we nzi uwe kwakabe kuli lele nshayi unodang'wa Lazaro, ali zhele malonda, 21ngono eyemula kuja mamburumburu e zojiwa anowa mu tafuli ye nfumi ne mbgwa dumbu dzakazha dzikanazwa malonda awe.

22“Nshayi iwoyo kafa, ngono batumwa be kudzimu bakansengela pa ifuba tja Abhurahama. Nlume wakafuma na iye kafa ngono kabiganyiwa. 23Kati ali mu bugalo gwe bafi, kwaakabe ali mu kudziyila kukulu, kamilidza mesho kabona Abhurahama ali kule kule, ana Lazaro, pa ifuba tjitje. 24Ndizo kamba kati, ‘Tate Abhurahama, mundihwile ngoni, mutume Lazaro adubike theswi ye tjinyala tjitje mu vula, atothodze lulimi gwangu, ngobe ndimu kuhwa zogwadza kukulu mu moto iwoyu.’

25“Koga Abhurahama kadabila eti, ‘Nkololo wangu, kumbula kuti mu butjilo gugo wakawana zwithu zwizo zwakanaka, koga sa ikoko Lazaro kawana zwakabipa, ndizo ngwenu, unonyaladziwa pano, iwe umu kuhwa zogwadza kukulu kulu. 26Pezhugwi kwa ikoku kose, pakati kwedu nawe, kuna gorokoro gulu linodzibila banoshaka zha ikoko bedwa ngeno, kene banoshaka zha ku tili bedwa ikoko.’ 27Kashandula eti, ‘Ngono ndomukumbila tate, kuti mutume Lazaro, ayende ku ng'umba ya tate bangu, 28ngobe ndina bakololo ba tate bangu bali bashanu. Ngaanobatjenjedza, kuti ndizo basizhebo ku bugalo igogu gwe kuhwa zogwadza.’

29“Koga Abhurahama kadabila kati, ‘Bana Mushe ne balebesambeli ngabahwe ibo.’ 30Koga kati, ‘Aa, Tate Abhurahama, ha mmwe unodwa mu bafi angayenda ku bali, banowoshandukila matjinyo abo.’ 31Abhurahama kati kunli, ‘Ha basingahwilile Mushe ne balebesambeli, abangahwilile kene mmwe angamuka mu bafi.’ ”

നിലവിൽ തിരഞ്ഞെടുത്തിരിക്കുന്നു:

Luke 16: KBTP

ഹൈലൈറ്റ് ചെയ്യുക

പങ്ക് വെക്കു

പകർത്തുക