Génesis 18
18
Abaraaun rai leinjiin canaanai siririchaainne biha Cana Coaunerane
1Mamere rai encina necojoaihu ichaoha Abaraaunne jana jetaote, enoto chujutoroha rijiu jacari caje ichanohineein nenaa rai loanari asaae lauhecohane jana jetao, coroatajai letonocuru aina rai ecocoe Cana Coaunera.
2Nitohaneein rai ecoocane jana, coaraane jana jetaote, ecu nichatajaain nacatiha temerecooruhane jaun jetao, nitohaniha acaauru ichaone jaun, nii rijieeoritiin nimichuhin acaauru acatiha atane que nauri turuanacanejeein nenoracaain jetao:
3“Canu Curuaanaa, jiaonriha atiin nesooneein caalai caje amuhine. 4Jereeune aansijieein acau raeratete, que inara tijiaauru culejeein, nii baiha leratojoeein nebetacaaiche taa nuna coforacaa asaaene coinara. 5Inae caa iicha jerei icharaneein neinichaaunne rene turuhichene jaun, cohacorihuchene inara rai chaelainiji ranite, que lenonequichera. Nabana mijitenaanau amuhemuhequichene coataara”, naa Abaraaunne jaun jetaote:
“Saan. Aihujia aihanera”, naaure jetao rai.
6Niritocuruha raina jaun jetaote, soroneein rai loanari asae enohin jetao:
“Chajaain ena erojoeein, coroata choonca quironeein coujunacateein nii arina caohacha caje faancuru jaau”, nae jetao Sara rai Abaraaun.
7Niritiin jetaote, soroneein cuhin, nii niha rai irihurune jaaun turuhin jetao, jataain caohati que tacaajeein baca narejeen janijiin sohin jetao, rai coseenra rai te Abaraaun, nii rijieeoritiin caje lenone jaane coina. 8Nii baca narejeen ichoae tacaain jetaotechu, acaauru rai baca itaari nejerocoina, baca itaari, naaonjoaihunri benateein, nii nuna coforacaa asae lenonecuruhane beraain, ecu acaauru rai teein, acaauru coroaate Abaraaun.
9Inae nainaain lenonecuruhane baiha jetaote:
“Aanca ii sinijiera Sara”, naain Abaraaun caje bajaauruha, nii rene turunacaaurune jana jetaote:
“Nota tau canu loanari asaete nera”, nae jetao acaauru rai. 10Niritoha acaauru raine jana jetaote:
“Leeocha ajaanaa cuhanena nacoaauneein turuhin ichoharaa ureeunnicha. Nii banate, inae leinjiin canaanai siricheein nii ii comasai Sara”, nae jetao nii leinjiin acaauru aina unaa. Niritohane jana jetaote, nii jacari caje nenaa loanari bacuujuaniha Abaraaun janori netiin jetao, nii ereeuruhane aonaje Sara.
11Nii jana, inae Abaraaun aina jiniiquiin biinaa niha nii Sarane jaun jetaote, inae nelauriaane jiane nii Sara. 12Nitohanihane jaun jetaote: “Inasiina ena uhaataain canaanai siririchaanu, inae jiniiquiin jataain biinaanichaanu natiin”, naa suujuane jaun coenaa Sarane jaun jetao, 13Abaraaun rai:
“Chanuna coenae Sara. Inae camotojoenihane jaunte niqui, leinjiin canaanai siririchaainne esenetaenecaihara. 14Nete, canu, inara Curuaanaa inara Coaunera nichaaunne rai, nii caaintaene cha chanaa jerichaaunnera. Nii jaunte, caa ena uujuenaa ajaanaa cuhane, nacoaauneein inara rene turuha uhanune janate, inae leinjiin calaohicheein Sarara”, naa Abaraaun raine jana, 15aonajeein jetao, coasiha:
“Inasiina coenacaaunne coaalanaala”, naain nesuujue Sara. Niritiin nesuujihane aonajeein jetaote:
“Nena coenaaine coarajeeunra”, nae jetao rai Cana Coaunera.
Sodoma cacha caohachaauru ichaonacaauru itajiha Cana Coaunerane jereniha Abaraaunne
16Niritiin Abaraaun aina ereein lenonecuruhane baiha jetaote, jelai caje necoeein, naain Sodoma nese nichaae cuuruha nii rene turunacaaurune jana jetao, acaauru rai nocoihane coina, acaauru caaijie cuujue Abaraaun.
17Nitohaneein acaauru caaijie cuujihane jana jetaote: “Rai quiicha ichanenu bihanunete ne, 18leinjiin acaacha caa atane que, laraajiin ichaohenihuru foerateraneein nerichaainne jaun. Nitohaneein neenenihane jaunne, coreniha satiin belainohineein neeururichaain caa chauratane que lauri lauri nenacaauru cachaaurune coina rai aitoonlu. 19Nitohaneeine janijiin cotijiaain neeunlu, rai calaohichuru niicha foerateeuri, rai inamacooru, naaonjoaihunri rai aitohane, satiin caitoonjoan rijijieein ichaohin, quere tonoraain neeuruhane, acaauru rai satiin aitocoaaunlune jaa nainaain nihanune coinara”, naain suujua cuhane coaaucane baiha jetao, Abaraaun rai:
20“Aonaaun. Taa Sodoma, Gomorra naaonjoaain cocoaichacurute, jataain osaaotiin neein neecha aasaineein neeuruhane que coitucunojoineein neeurera. 21Nii jaunne, esinae erenaaniha, osa que nesarucuruhane que carai aitocuruhane coitucuhanune coina ucuaae cureeunnicha. Nii banane coitucuhin esenetareeunnicha”, naa Abaraaun rai Cana Coaunerane jana jetaote, 22inae ichoaichaniha Sodoma nese nichae cuure nii rai letonocuru coroatajaain aina cunacaauru.
Nii jana Abaraaun jetaote, aina iriha Cana Coaunerane jaun jetao, ecu aina inacuhin nedae. 23Nitohaneein ecu nedaain jetaote, jeraaen rohan nichuutaain jetao:
“Taa necha ansaineein ichaonacaauru jiniichaain chachu, caohachaain suujua coaraain ichaonacaauru itajeriquiin. 24Jerihanete saoqui chooncajeeincha nii neseu neeure caohachaain suujua coaraain ichaonacaaurura. Nii atiin chachu nii saoqui chooncaain caohachaain suujua coaraain ichaonacaauru que ishuujua acatelanaala, nii nese itajereeite. 25Nitohanei ichana nainihei jerihane. Inasiina nii caohachaain suujua coaaraauru ateinareei, nii necha ansaineein ichaonacaauru jiniichaain. Inasiina jiniiquiin necha ansaineein ichaohin, osa que nesaruhin neeuruhane coaalanaalata. Coa nohane nitohanai ichaara. Tana caa chauratane que itolere curuaanaacuru Curuaanaaneein Cana Coauneraneeine jaun, caohacha ichareeineta”, naa rai Abaraaun ne jaun jetaote:
26“Saan, aihachuhisicha. Aihana jaun chujia, saoqui chooncajeein, caohachaain suujua coaaraauru eruhanu nii Sodoma neseunena, acaauru coreniha satiin nii ecu ichaonacaauru que casuujua acatereeunnicha”, naa Cana Coaunerane jana jetaote, nacoaauneein:
27“Atiin Cana Coaunera neein natiin, ichei caritiin irihanune que ishuujua acateeu caquera. Coatiha niqui nii chaneein nihaaun canu. Canune nechu jataain joaereein leinjiin cachaneein neeunra. 28Nena atiin aitoreeunni icheicha. Chajana saoquijieeincha lanajeeca saoqui chooncaauruha nii caohachaain suujua coaaraauruneta. Nii saoquijieein lanajeecane corenihachachu jitariin taa nese itajeriquiin”, naa Abaraaunne jana jetaote:
“Airihaaunni jerihane. Jena choonca saoquijieeincha caohachaain suujua coaaraauru eruhanu ecune, coatiha nii nese itajerihaaunita”, naa Cana Coaunerane jana jetaote:
29“Jerihanete ne, jena chooncajeeincha caohachaain suujua coaaraaurura”, naain conujiha Abaraaunne jana jetaote:
“Nii jena chooncajeeincha neeuruhane nihanatiin, coatiha nii nese itajerihaaunnita”, naa Cana Coaunerane jana jetao:
30“Jiaonriha atiin nohane caniha obaaequi caa ii conujichaaunne corenihanera. Chajana nichata chooncajeeincha caohachaain suujua coaaraauru eruhineta”, naa Abaraaunne jana jetaote:
“Nichata chooncajeein neeuruhane nihanatiinne, nii neseu ichaonacaauru que casuujua acatereeunnicha”, naa Cana Coaunerane jana jetaote:
31“Atiin caque ishuujua acateeu ichei caritiin irihanune corenihara, itolere Curuaanaaneein nenaa Cana Coaunera. Chatohanereei jana, coroata chooncajeeincha caohachaain suujua coaaraauru eruhineta”, naain conujihajeein sacuha Abaraaunne jaun jetaote:
“Nii coroatachooncajeein neeuruha nii nese quene nihanatiinne, acaauru coreniha casuujua acateein, nii nese itajenereeunnicha”, naa Cana Coaunerane jana jetao, 32nirijieein conujihajeein sacuhin jetao:
“Atiin jiaonriha caniha obaaequinene caa que ichei ena cuhaneecha ereeorite aonaaicha, itolere Curuaanaaneein nenaa Cana Coaunera. Nii baiha nacoaauneein icherojoecarihaaunnita. Chajana ichariquiin acaihaniji lechooncajeeincha erunajaaineta”, naa Abaraaunne jana jetaote:
“Nii lechooncajeein neeuruhane nihanatiin, coatiha nese itajerihaaunnita”, nae jetao Abaraaun rai Cana Coaunera.
33Niritohane baiha, jelai caje amuha Cana Coaunerane jana jetaote, Abaraaun netonai jelaiha jacari caje ichanohin loanari asaae cauha cue.
നിലവിൽ തിരഞ്ഞെടുത്തിരിക്കുന്നു:
Génesis 18: URA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2005, 2024, Wycliffe Bible Translators, Inc.
