Génesis 16
16
Calaohi Isamaeli siriha Acarane
1Abaran aina canaanai sirisiniha Saraine jana, niha leinjiin rai coseenra Egipto bene Acarane jaun jetaote, Abaran rai jetao:
2“Aonaaun. Cana Coaunerate, ii aina canaanai sirichaaunne jerene. Nii jaunne ichei aitoon, taa cana coseenra Acara raain, aina canaanai siriine, canu beree rijijieein teein sirichaaunne coina”, naa Saraine jana jeriha Abaranne jaun jetaote, inae lechoonca jaanacaneein Canaan ichaooru baiha jetao, nii acaauru coseenra 3Egipto bene Acara mucuhin, Abaran comasainu que te Sarai.
4Nitohaneein Abaran aina ita raauruhane baiha neein jetaote, inae canaanai siriin, Sarai coseenraniha natiin, aca nerotohin que jaolequiin cotaairiin Sarai coarae Acara.
5Nitohaneein que nejeratiha nii rai coseenra Acarane jaun jetaote, Abaran rai jetao:
“Iite, cacotaairiin cacoharaain canu que jaolecoha Acarane ujuaihoneein neei. Canune caraajenihane ii comasainu que teeunlu. Nete leinjiin canaanai siririchaain ii ainane jaun, camurijiriin jataain nenaa jereein ne. Cana Coauneraachate, ii nii ujuaihoneneeine, canu nii ujuaihonihanune coitucue”, naa Abaran rai Saraine jaun jetaote:
6“Aonaaun. Taa ii coseenrate ii aina ne. Nainereei que iicha jerei ichaainera”, naa nii Abaranne jaun, inae cotaairiin coaraain que nererojoecaa nii Saraine jaun jetao soroe Acara. 7Ne jetaote, leinjiin Cana Coaunera letono anjera jetao, Shur coero rohan cacha areroo acau ajiarojoeriti mitunajaau eruhin jetao: 8“Chaa caje uhite, Sarai coseenra Acara. Chute cuhita”, naain bajaane jana jetaote:
“Sarai coseenraneein nihanune cajene soroon, cacotaairiin cacoharaane jaunra”, naane jaun jetao:
9“Jelaiha rene cauhin, jerichanejeein rai coseenraneein itolere que nere tonoraain nenihura”, nae jetao rai Cana Coaunera letono anjera.
10Niritiin jetaote:
“Janiinacajelanaalate arajiin nefaacuurureein ii inamacoorura.
11Inae canaanai siriicha.
Inae nerichaain ichei canaanaicha.
Chaentechu nererojoecaaine coaraje Cana Coaunerara.
Nii jaun inae nejanoaa nii ichei canaanaine bana Isamaelineein curuaateeunicha.
12Acate aiha leinjiin edaaena nuunaanau nenaane rijijieein niha cureeincha.
Nii jaunte leeochaauru que nejerateein acaauru sohane, acaauru netonai que nejerateein acaentonai soorureeincha.
Nete aca ichaoha cureein niicha rautaihu, rautaaureniha jelai cocoaichacurune nihanatiincha”,
naain jetao Acara rausiajeein cojiotae Cana Coaunera letono anjera.
13Nii aina iriha Cana Coaunerane jaun jetaote: “Canu coaraera Cana Coaunera”, naain Cana Coaunera curuaate Acara. “Inae canu jaberoconeein Cana Coaunera aina irihanune saijieeinne, jaiti ichaaojoeeun”, naa suujuane jaun.
14Nii jaun jetaotechu: “Ichaohin canu coaaraneein nenaa rai acau mitunaja”, naain jetao, jelai curuaateeure. Nii acau mitunaja jetaote, Cade aina Bered cataaun nenaane.
15Niritoha rai Cana Coaunera letono anjerane jaun jetaote, jelaiha Abaran rene cauhin, nii rai beree janoaelu Acara. Nitohaneein Acara aina leinjiin canaanai siriin jetaote, inae nejanoaane jana Isamaelineein curuaate Abaran.
16Nitohaneein jetaote, fosa choonca saota jaanacaniha Abaranne jana, nejanoaelu nii rai calaohi Isamaeli.
നിലവിൽ തിരഞ്ഞെടുത്തിരിക്കുന്നു:
Génesis 16: URA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2005, 2024, Wycliffe Bible Translators, Inc.
