Génesis 14
14
Loto ichoteratiha Abaranne
1Nii bana jetaote, Sinar curuaanaaneein nelu Amrafel. Jana Arioc jetaote Elasar curuaanaaneein nelu. Jana Quedorlaomer jetaote, Elam curuaanaaneein nelu. Jana Tidal jetaote, Goim curuaanaaneein nelu. 2Nii jenai curuaanaacuru jetaote, sonaana que neeurelu saoquii curuaanaacuru aina.
Nii saoquii curuaanaacuru jetaote, Sodoma curuaanaa Bera, Gomorra curuaanaa Birsa, Adama curuaanaa Sinab, Zeboim curuaanaa Semeber, Zoar Bela curuaanaa, naaonjoaain nese rai curuaanaacuruneein neeurelu. 3Caa saoquii curuaanaacuru jetaote, Onaaneein acaauruacha curuaatei cucuana jeloon nenaa Sidim ramara macararo netiin jetao rai soondarooru taojiaaure. 4Inae lechoonca coroata jaanacaain acaauru cairichaaeriin acaauru amurijiriin nenaa jeriha itolere bana Quedorlaomerne rautaain coaracurenihane jaun jetaote, lechoonca nichata jaanacane cuhane jetao, ita suujuau tacaaure nii saoquii curuaanaacuru; Quedorlaomer aina sonaana que neeuruhane coina. 5Nii jaun jetaote, lechoonca jena jaanacane cuhane, nii aina nenacaauru curuaanaacuru aina jiniiquiin jetao, Astarot Karnaim batane cue jetao Quedorlaomer. Ecu turuhin jetaote, Refaitacuru amuritiin sonajaauruhane baiha jetao, Ham nenacaauru Zuzitacuru amuritiin sonajaaure. Nii caje cuhin jetaote, Savequiriataihum nenacaauru Emitacuru amuritiin sonajaaure. 6Nii caje cuhin jetaote, Seir bichatane que nenacaauru Horeeocuru amuritiin sonajaain jetao, neniha cachane jaa rohan nenaa Paran batane macararo tiaain sacunajaaure. 7Inae nii caje caauneein jetaote, En-mispat Cades neein acaauruacha curuatei turuha cuure nii aina nenacaauru aina Quedorlaomer. Nitohaneein cuhin jetaote, Amalesitacuru atane situneein acaauruacha eruuri sohin itajenajaain ratirinajaaure. Jerichanejeein jetaote, Hazezontamar batane ichaonacaauru Amoreeocuru sohin itajenajaain ratirinajaaure.
8-9Nii jaun jetaote, Sodoma, Gomorra, Adama, Zeboim, Bela, naaonjoaihunri neseeuru curuaanaacuru jetaote, Sidim bichatane macararo cuurelu; Quedorlaomeecuru aina ita sooruhane coina. Nii janate, nii Quedorlaomer aina neeurelu Tidal, Amrafel, Arioc, naaonjoaihunri. Acaaurute, Elam, Goim, Sinar, Elasar, naaonjoaihunri nenacaauru curuaanaa neeurelu. Nitohaneein jetaote, inae cuu ita eruhin, ita sooruhane jaun jetao, nii saoquii curuaanaacuru amuritiin jetao soore nii Quedorlaomeecuru. 10Nii jaun jetaote, Sidim bichatane macararo sacuritaain niha arajiin murane barunaja atane jachune jaun jetao, sonaana caje nichoteeuruhane coina sorohalaain, nii murane barunaja atane jachu cuhane naluhacoaain ohacoaaure Sodoma, Gomorra, naaonjoaihunri neseeuru curuaanaacuru cachaauru. Jana leeochaauru curuaanaacuru cachaauru tabaauru jetaote, ichatane jana cuhacoaain sorohin jetao nichoteeure.
11Inae nitohaneein acaauru amuritooruhane jaun jetaote, Sodoma, Gomorra, naaonjoaihunri ichaonacaauruhacha sirii, itolere acaauru rucuhele coreti, acaauru lenone, naaonjoaihunri jitariin amaain amuure jelai caje, nii acaauru amuritooreraauru. 12Nii bana Sodoma ichaoha Abaran calaohi riji Lotone jana jetaote, acaentonai mucuhin amaaure, itolere niicha sirii aina curuataain. 13Ne jetaote, Mamere rai niha nuuna ensina neeonjoaine jaun ichaoha rai nichene ebereeocuru foeratera Abaranne jaun jetao, rai biha cue leinjiin cacha, acaauru caje sorohin nichoteein.
Nii Mamere jetaote, Aner, Escol, naaonjoaihunri nejeraneein nelu. Niichuru jetaote, Abaran coroatajaneraauru neein neeurelu.
14Nitohaneein rai calaohi riji Loto mucuhin amaauruhane coitucuuriin jetaote, nichata fasha lechoonca fosani rai cachaauru raotojoeein nere jeracuru nenajau nejanoanacaauru cotijiaain amaain, nii curuaanaacuru sacuhin erunajaa cue Daan neseu Abaran.
15Nitohaneein erunajaain jetaote, rai cachaauru aina, acaauru nenauhene janotiin turuhin, nii curuaanaacuru sohajeein jetao sacunajaaure Damasoco nese uuri cana jaabiji nichajai jeloon nenaa Hoba neseu tiaain.
16Nitohaneein acaauru sohajeein jetaote, jitariin rucuhele acaauruacha amailu cainacure.
Nitohaneein jetaote, rai calaohi riji Loto ichoterateein jetao, jitariin rai rucuhele niicha amaauri cainaain, rai comasai, chaaen leeochaauru cachaauru, enecuru, naaonjoaihunri ichoteratelu Abaran.
Abaran belaain cojiotaa Melquisedeene
17Nitohaneein Quedorlaomer aina curuaecaain, nii aina nenacaaurulu curuaanaacuru amuritiin sonajaane baiha cauha cuha Abaranne jana jetaote, ichatane macararo Saveu jetao, acaauru que tacaain coaranaaca cue Sodoma curuaanaa.
Enenete nii Save bichatane macararote curuaateeure, “Curuaanaa Reey rai ichatane macararo”, neein. 18Chaaen Cana Coaunera aina caohachaain niha cachane coina rucuheraneein saseredoteneein nenaa Saleem curuaanaa Melquisedee netonai jetaote, faan aina vino amaain Abaran que tacaa cue. 19Nitohaneein cuhin que tacaain jetaote:
“Ii coroatajanemiin, dede, cana rai chauratane, naaonjoaain coaunera Cana Coaunerara. 20Chaenchu satiin cachaauru, nii ii que nejeratenacaauru amuritohine coina ii coroatajanera Cana Coaunera coroaecuruhine cachaaurura”, naain jetao Abaran cojiotae nii Melquisedee. Nii jaun jetaote, nii Melquisedee rai lechoonca turineein, nii jelaiha niicha cainai caje leturiin teelu Abaran.
21Nii baiha jetaote, Abaran rai jetao:
“Canu rai, nii cachaauruhacha cainaain icheinu que nii rucuhele raaura”, naa Abaran rai, Sodoma curuaanaane jana jetao:
22-23“Nena cana rai dede, chauratane, naaonjoaain Coauneraneein nenaa Cana Coaunera notaracae, nii leinjiinniji sicho, nii safato ichoreniha natiin raenihanu canu safato ichoranu quene coina aitocoaaunne jaun naineneeun raanunera. Chaaen nabana rijieeoriin bana: ‘Canu corenihate tatohaneein necoriquijiaain ne Abaran’, naain ereeine coataara. 24Canu cachaauruhacha quii lenonena laen cainana naineneeun, inae quihuruhane jaunra. Nii canu coroatajaneraanu que unacaauru Aner, Escol, Mamere, naaojoaihurite laen, leruhin niicha eruuri amaaunrureeincha”, nae jetao Sodoma curuaanaa rai Abaran.
നിലവിൽ തിരഞ്ഞെടുത്തിരിക്കുന്നു:
Génesis 14: URA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2005, 2024, Wycliffe Bible Translators, Inc.
