Génesis 12
12
Txocbil te Abram tu'n Dios
1Tma Kman te Abram cyja': Tetz tuj ttanmiya, cyxol ke t-xjalila ex tuj tja tmana, ex txi'ya tuj tx'otx' cxel nyec'une teya. 2Ti'ja cbel nbincha'ne jun nasyon ma'xix, cbel nk'o'ne ncy'iwbile tibaja, cjawil nnimsa'ne tbiya, ex c'oquela te jun cy'iwbil cye mastl xjal. 3Che bel ncy'iwla'ne keju che bel cy'iwlante teya, ex ctzajel nk'o'ne mya ba'n cyibaj keju che tzajel kaninte mya ba'n tibaja; ex nok ti'ja che cy'iwlanjtzel cycyakil xjal twitz tx'otx', chi Kman.
4Etztzun Abram tuj tnam Harán ic tza'nx otok tma Kman te; ex tuc'ix Lot etz tuc'il. Otok japun Abram twi' 75 abk'i tej tetz tuj tnam Harán. 5Tzaj ti'n Sarai tuc'il, aju t-xu'jil, tuc'ix Lot aju tcy'ajal terman, ex xi cyi'n tcyakil cyk'inumabl aju otok cnet cyu'n, cyuc'ix ke cymajen akeju otok che cnet tuj tnam Harán. Cubtzun be cyu'n tu'n cyul tuj tx'otx' Canaán, ex tuj tx'otx' Canaán e ul. 6Tzajtzun bet Abram tuj tx'otx' lu ex ul tuj Siquem, canun t-xe' jun wi' tze' c'ol tuj lugar More. Tuj tk'ijlalil lu atzun najltok ke aj Canaán. 7Atzun cub tyec'un tib Kman twitz Abram ex xi tma'n te cyja': Atzun tx'otx' lu cxel nk'o'ne cye tiyjila, chi Kman.
Tujtzun lugar lu jaw tbincha'n Abram jun altar twitz Kman aju cub tyec'un tib twitz.
8Ic'tzun tuj lugar lu tu'n tul twi' jun witz ttxlaj tnam Betel tuj tjawitz k'ij. Atzun cub tk'o'n tja, xbalun ja, t-xol cabe tnam; atzun tcub tnam Betel tuj telex k'ij, atzunte tnam Hai tcub tuj tjawitz k'ij. Tujtzun lugar lu jaw tbincha'n Abram juntl altar tu'n tc'ulun te Dios, ex o cubsan twitz Kman. 9Tzajtzun bet Abram tuj lugar lu tu'n tul tuj tx'otx' Néguev.
Pon Abram tuj Ejipt
10Tujtzun tk'ijlalil lu tzaj nim we'yaj tuj tx'otx' Canaán. Xi'tzun Abram tuj Ejipt tu'n tnajan nic'xi k'ij ma chixin, tu'nju nimxix we'yaj tzaj jatum najltok. 11Tejtzun ch'ixtok tpon tuj Ejipt xi tma'n te Sarai aju t-xu'jil: Ba'n wu'ne tbanilxix que'yina, 12ex oc toc que'yina cyu'n ke aj Ejipt oclo cyma': T-xu'jil xinak lu aju xu'j lu, che chilo. Oclo chin bel byo'ne cyu'n, atzun teya mlay cub byo'na cyu'n. 13Tu'ntzun jlu, binchama xtalbil, bix txi tma'na: Tanb xjal lu kine, chicuya, tu'ntzun ntene ba'n ex tu'n mi'n ncub byo'ne tu'n tlaja.
14Tejtzun tpon Abram tuj Ejipt, oc cyque'yin ke aj Ejipt tbanilxix que'yin t-xu'jil. 15Ax icx oc cyque'yin ke aj sanjelal ate'c ttxlaj Faraón. E je'xtzun k'malte te: Tbanilxix que'yin xu'j lu, che chi. Xitzun cyi'n tuj tja Faraón.
16Tu'n tlaj Sarai tbincha Faraón nimxix xtalbil te Abram, ex xi tk'o'n ke ẍne'l te, cyuc'ix wacẍ, bur, chej camey, majen xinak ex majen xu'j. 17Pero tu'n tlaj Sarai cub tcastiw Faraón tu'n Kman, ex cyuc'ix keju ate'tok tuj tja, tzaj nimxix yabil cyi'j. 18Tzajtzun ttxco'n Faraón Abram ex xi tma'n te cyja': ¿Tiku'n ma tbinchaya jlu wi'je? ¿Tiku'n mi tzaj tma'na weye ka t-xu'jila aju xu'j lu? 19¿Tiku'n o tmaya ka tanba xu'j lu? Cyja'tzun tzaj wi'ne tu'n toc te nxu'jile. Ja'lotzun, lu t-xu'jila lu. K'inxa ex txi'ya, chi Faraón. 20Xitzun tma'n Faraón cye t-xjalil tu'n tex cyi'n Abram tuj Ejipt junx tuc'il t-xu'jil ex tcyakilju attok te.
നിലവിൽ തിരഞ്ഞെടുത്തിരിക്കുന്നു:
Génesis 12: MAMH
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Mam del Norte © Sociedades Bíblicas Unidas 1993
