ᐅᐸᓓᑭᔅ ᒫᑎᐤ 6

ᒥᓗᑐᑕᒧᐎᓇ

1ᔮᑾᒥᓰᒃ ᐁᑳ ᑭᒋ ᑐᑕᒣᒃ ᑭ ᒥᓗᑐᑕᒧᐎᓂᐙᐗ ᐅᑎᔥᑲᐤ ᐃᓕᓕᐗᒃ, ᑭᒋ ᐙᐸᒥᑖᑾᒃ; ᑮᔥᐱᓐ ᐁᑳ ᐅᒪ ᐃᔑ ᑐᑕᒣᑴ, ᓇᒪᐎᓚ ᑭᑦ ᐋᔮᓇᐗᐤ ᑎᐸᐊᒫᑯᓯᐎᓐ ᑯᑖᐎᐗᐤ ᐅᒋ ᑭᒋᑭᔑᑯᒃ ᑳ ᐃᑖᑦ᙮

2ᐁᐗᑯ ᐅᒋ ᐃᔅᐱ ᑎᐅᑕᒪᓂ ᑭ ᒥᓗᑐᑕᒧᐎᓇ, ᐁᑳᐎᓚ ᐱᑕᒫ ᓄᑖᑯᑖ ᐳᑖᒋᑲᓐ, ᑖᐱᔅᑯᒡ ᐁ ᑐᑕᑭᒃ ᐅᑖᔭᒥᐁᑳᓱᔅᑲᒃ, ᐋᔭᒥᐁᐎᑲᒥᑯᒃ ᓀᔥᑕ ᐱᒥᑌᔅᑲᓈᒃ, ᑭᒋ ᑭᔅᑌᓕᑖᑯᐃᑯᒋᒃ ᐃᓕᓕᐗ᙮ ᑖᐺ ᑭᑦ ᐃᑎᓈᐗᐤ, ᐋᔭᐗᒃ ᐅ ᑎᐸᐊᒫᑯᓯᐎᓂᐗᐤ᙮ 3ᒫᑲ ᐃᔅᐱ ᑎᐅᑕᒪᓂ ᑭ ᒥᓗᑐᑕᒧᐎᓇ, ᐁᑳᐎᓚ ᑭ ᓇᒪᑎᓂᔉ ᑲᑕ ᑭᔅᑫᓕᑕᒧᒪᑲᓐ ᑳ ᑐᑕᒧᒫᑲᒃ ᑭ ᑭᒋᓂᔉ; 4ᑭ ᒥᓗᑐᑕᒧᐎᓇ ᑭᒋ ᑳᑖᓂᐗᑭ: ᓀᔥᑕ ᑯᑖᐎ ᑳᑕᓄᒃ ᑳ ᐙᐸᑫᑦ ᐎᓚ ᑫᒋᐙᒃ ᒧᔑᔐ ᑭ ᑳ ᑎᐸᐊᒫᒃ᙮

ᒋᓴᔅ ᐁ ᑭᔅᑭᓄᐊᒫᑫᑦ ᐊᔭᒥᐋᐎᓐ ᐅᒋ

(ᓘᒃ 11:2–4)

5ᐃᔅᐱ ᒫᑲ ᐃᐋᔭᒥᐋᔭᓂ, ᐁᑳᐎᓚ ᑭ ᑲ ᓇᔅᐱᑕᐙᐗᒃ ᐅᑖᔭᒥᐁᑳᓱᔅᑲᒃ: ᐌᓴ ᐎᓚᐗᐤ ᓵᑭᑖᐗᒃ ᐁ ᐋᔭᒥᐋᒋᒃ ᐁ ᓂᐸᐎᒋᒃ ᐋᔭᒥᐁᐎᑲᒥᑯᒃ, ᓀᔥᑕ ᐁ ᓕᑭᑕᐗᒧᑭ ᐱᒥᑌᔅᑲᓇᐗ, ᑭᒋ ᐙᐸᒥᑯᒋᒃ ᐃᓕᓕᐗ᙮ ᑖᐺ ᑭᑦ ᐃᑎᓇᐗᐤ ᐋᔭᐗᒃ ᐅ ᑎᐸᐊᒫᑯᓯᐎᓂᐗᐤ᙮ 6ᒫᑲ ᑭᓚ, ᐃᔅᐱ ᐁᔭᒥᐋᔭᓂ, ᐱᑐᑫ ᑭᑭᒃ ᑳ ᐱᔅᑭᒑᒃ, ᐃᔅᐱ ᒫᑲ ᑭ ᑭᐸᐊᒪᓀ ᑭᑦ ᐃᔥᒀᑌᒻ, ᐋᔭᒥᐁᔅᑕᐤ ᑯᑖᐎ ᐁᑳ ᑳ ᐙᐸᒫᑲᓂᐎᑦ; ᑯᑖᐎ ᒫᑲ ᑳᑕᓄᒃ ᑳ ᐙᐸᑫᑦ ᒧᔑᔐ ᑭ ᑲ ᑎᐸᐊᒫᒃ᙮

7ᒫᑲ ᐃᔅᐱ ᐁᔭᒥᐋᔦᑯ, ᐁᑳᐎᓚ ᐸᑾᓐᑕᐤ ᐋᐃᑗᐎᓇ ᐋᐸᒋᑖᒃ, ᑖᐱᔅᑯᒡ ᐁ ᑐᑕᑭᒃ ᐋᔭᒡ ᐃᓕᓕᐗᒃ: ᐌᓴ ᐎᓚᐗᐤ ᐃᑌᓕᑕᒶᒃ ᑭᒋ ᐯᑕᐙᑲᓂᐎᒋᒃ ᒥᔅᑕᐃ ᐁ ᐋᔭᒥᒋᒃ᙮ 8ᐁᑳᐎᓚ ᓇᔅᐱᑖᑯᒃ; ᐌᓴ ᑯᑖᐎᐗᐤ ᑭᔅᑫᓕᑕᒻ ᐊᓂᐃ ᑫᒀᓇ ᑳ ᒪᓀᓯᔦᒃ ᐸᒧᔑ ᓇᑐᑕᒪᐌᒃ᙮ 9ᐅᒪ ᐃᔑ ᒫᑲ ᐋᔭᒥᐋᒃ: ᓄᑖᐎᓈᓐ ᑭᒋᑭᔑᑯᒃ ᑳ ᐃᑖᔭᓐ, ᑲᑕ ᐎ ᐸᓓᑫᓕᒋᑳᑌᐤ ᑭᑦ ᐃᔑᓂᑳᓯᐎᓐ᙮ 10ᑭᑦ ᐅᑭᒫᐎᐎᓐ ᑲᑕ ᐎ ᐅᑎᒋᐸᓕᐤ᙮ ᐁ ᐃᑌᓕᑕᒪᓐ ᑲᑕ ᐎ ᑐᒋᑳᑌᐤ ᐅᑕ ᐊᔅᑮᒃ ᑖᐱᔅᑯᒡ ᑭᒋᑭᔑᑯᒃ᙮ 11ᒥᓂᓈᓐ ᐊᓄᒡ ᑳ ᑭᔑᑳᒃ ᑫ ᐅᒋ ᐱᒫᑎᓯᔮᒃ᙮ 12ᐌᐯᓕᑕᒪᐎᓈᓐ ᒫᑲ ᓂ ᒪᓯᓇᐃᑲᓂᓈᓇ, ᐁ ᐃᔑ ᐌᐯᓕᑕᒪᐗᑭᒋᒃ ᐊᓂᑭ ᑳ ᒪᓯᓇᐃᑫᑐᑕᐎᔭᒥᒋᒃ᙮ 13ᐁᑳᐎᓚ ᒫᑲ ᐃᑐᑕᐃᓈᓐ ᑫ ᐃᔑ ᑲᑴᒋᐃᑲᐎᔮᒃ; ᒫᑲ ᒥᑖᑴᓇᒪᐎᓈᓐ ᒪᒋ ᑫᒀᓇ: ᐌᓴ ᑭᓚ ᑭ ᑎᐱᓚᐌᐎᓯᓐ ᐅᑭᒪᐎᐎᓐ, ᓀᔥᑕ ᑲᔥᑭᐅᐎᓐ, ᓀᔥᑕ ᑭᔅᑌᓖᑖᑯᓯᐎᓐ, ᑳᑭᑫ᙮ ᐁᒣᓐ᙮

14ᐌᓴ ᑮᔥᐱᓐ ᐌᐯᓕᑡᒪᐌᑾᐌ ᐃᓕᓕᐗᒃ ᐁ ᐗᓂᑐᑖᑖᑾᒃ, ᑯᑖᐎᐗᐤ ᑭᒋᑭᔑᑯᒃ ᓀᔥᑕ ᑭ ᑳ ᐌᐯᓕᑕᒫᑯᐙᐤ: 15ᒫᑲ ᑮᔥᐱᓐ ᐁᑳ ᐌᐯᓕᑕᒪᐌᑾᐌ ᐃᓕᓕᐗᒃ ᐁ ᐗᓂᑐᑕᑖᑾᒃ, ᓇᒪ ᓀᔥᑕ ᑯᑖᐎᐗᐤ ᑭ ᑳ ᐌᐯᓕᑕᒫᑯᐗᐤ ᐁ ᐗᓂᑐᑕᐌᒃ᙮

ᒋᓴᔅ ᐁ ᑭᔅᑭᓄᐊᒫᑫᑦ ᓀᑲᓸᐎᓐ ᐅᒋ

16ᓀᔥᑕ ᒫᑲ ᐃᔅᐱ ᓀᑲᓸᔦᑯ, ᐁᑳᐎᓚ ᓇᔅᐱᑖᑯᒃ ᐅᑖᔭᒥᐁᑳᓱᔅᑲᒃ, ᐁ ᒪᒋᑴᒋᒃ: ᐌᓴ ᐎᓚᐗᐤ ᒪᒋᑴᐃᑎᓯᐗᒃ ᑭᒋ ᐙᐸᒥᑯᒋᒃ ᐃᓕᓕᐗ ᐁ ᓂᑲᓯᒋᒃ᙮ ᑖᐺ ᑭᑦ ᐃᑎᓇᐗᐤ, ᐋᔭᐗᒃ ᐅ ᑎᐸᐊᒫᑯᓯᐎᓂᐗᐤ᙮ 17ᒫᑲ ᑭᓚ, ᐃᔅᐱ ᓀᑲᓸᔭᓂ, ᑐᒥᓇ ᑭᔅᑎᒀᓐ, ᑭᒋᔅᑖᐸᐗᒋᑴᑎᑎᓱ ᒫᑲ; 18ᐁᑳᐎᓚ, ᓂᑲᓱ ᑭᒋ ᐃᑌᓕᒥᔅᑭᒃ ᐃᓕᓕᐗᒃ, ᒫᑲ ᑯᑖᐎ ᐁᑳ ᑳ ᐙᐸᒫᑲᓂᐎᑦ: ᑯᑖᐎ ᒫᑲ ᑳᑕᓄᒃ ᑳ ᐙᐸᑫᑦ, ᒧᔑᔐ ᑭ ᑳ ᑎᐸᐊᒫᒃ᙮

ᓈᐊᔅᑣᓱᒃ ᒥᔕᑭᓯᐎᓐ ᑭᒋᑭᔑᑯᒃ

(ᓘᒃ 12:33–34)

19ᐁᑳᐎᓚ ᓈᐋᔅᑣᓱᒃ ᒥᔕᑭᓯᐎᓇ ᐅᑕ ᐊᔅᑮᒃ, ᐊᓐᑕ ᐁ ᐃᔑ ᓂᔑᐗᓈᒋᑖᑦ ᒪᓂᒍᔥ, ᓀᔥᑕ ᐁ ᐊᒀᒀᐱᔅᑳᒃ, ᐊᓐᑕ ᓀᔥᑕ ᑭᒧᑎᔅᑲᒃ ᑳ ᐸᔅᐱᐱᑯᐊᑭᒃ ᐁ ᑭᒧᑎᒋᒃ: 20ᒫᑲ ᓈᐊᔅᑣᓱᒃ ᒥᔕᑭᓯᐎᓇ ᑭᒋᑭᔑᑯᒃ, ᐊᓐᑕ ᐁᑳ ᐁ ᐃᔑ ᓂᔑᐗᓈᒋᑖᑦ ᒪᓂᒍᔥ, ᐁᑳ ᐁ ᐊᒀᒀᐱᔅᑳᒃ, ᐊᓐᑕ ᓀᔥᑕ ᑭᒧᑎᔅᑲᒃ ᐁᑳ ᑳ ᐸᔅᐱᐱᑯᐊᑭᒃ ᐁ ᑭᒧᑎᒋᒃ: 21ᐌᓴ ᐃᑕ ᐁ ᐃᔑ ᑕᑾᒃ ᑭ ᒥᔕᑭᓯᐎᓐ, ᐁᑯᑕ ᓀᔥᑕ ᑫ ᐃᑕᑾᒃ ᑭᑌᐃ᙮

ᐙᓭᔮᓯᐎᓐ

(ᓘᒃ 11:34–36)

22ᒦᔅᑭᔑᒃ ᐌᒋ ᐙᓭᔮᒃ ᒥᔭᐤ; ᑮᔥᐱᓐ ᒫᑲ ᑭᔅᑭᔑᒃ ᐯᓓᑲᓄᑴ, ᒥᓯᐌ ᑭᔮᐤ ᑲᑕ ᐅᒋ ᓵᑲᔅᑭᓀᐤ ᐙᓭᔮᓯᐎᓐ᙮ 23ᒫᑲ ᑮᔥᐱᓐ ᑭᔅᑭᔑᒃ ᒥᔮᓛᑕᓄᑴ, ᒥᓯᐌ ᑭᔭᐤ ᑲᑕ ᐅᒋ ᓵᑲᔅᑭᓀᐤ ᑎᐱᔅᑭᓯᐎᓐ᙮ ᑮᔥᐱᓐ ᒫᑲ ᐊᓂᒪ ᐙᓭᔮᓯᐎᓐ ᑳ ᐱᒋᔅᑳᑯᔮᓐ ᐌᓂᑎᐱᔅᑭᓯᐎᓂᐎᑴ, ᐙ ᒥᔖᒃ ᐊᓂᒪ ᐗᓂᑎᐱᔅᑭᓯᐎᓐ!

ᐯᔭᒃ ᐱᑯ ᐅᑭᒫᐤ ᑭ ᑳ ᑮ ᐊᑐᔅᑲᐙᐤ

(ᓘᒃ 6:13; 12:22–31)

24ᓇᒪᐎᓚ ᐊᐌᓇ ᐃᓕᓕᐤ ᑲᑕ ᑮ ᐊᑑᔅᑲᐌᐤ ᓂᔓ ᐅᑭᒫᐗ: ᐌᓴ ᐯᔭᒃ ᑲᑕ ᐸᒀᑌᐤ, ᓀᔥᑕ ᑯᑕᑭᔭ ᑲᑕ ᓵᑭᐁᐤ; ᓀᔥᑕᐱᑯ ᐯᔭᒃ ᑲᑕ ᑭᔅᑌᓕᒣᐤ, ᑯᑕᑭᔭ ᒫᑲ ᑲᑕ ᐋᑕᐌᓕᒣᐤ᙮ ᓇᒪᐎᓚ ᑭ ᑳ ᑮ ᐊᑐᔅᑫᔅᑕᐗᐗᐤ ᑭᒋᒪᓂᑐ ᓀᔥᑕ ᒥᔕᑭᓯᐎᓐ᙮

25ᐁᐗᑯ ᐌᒋ ᐃᑎᑖᒀᒃ, ᐁᑳᐎᓚ ᒫᒥᑐᓀᓕᑕᒧᒃ ᑭ ᐱᒫᑎᓯᐎᓂᐗᐤ, ᑫᒀᓐ ᑫ ᒥᒋᔦᒃ, ᓀᔥᑕᐱᑯ ᑫᒀᓐ ᑫ ᒥᓂᑴᔦᒃ; ᐁᑳ ᓀᔥᑕ ᑭᔭᐙᐗ ᑫᒀᓐ ᑫ ᐳᔅᑎᔥᑲᒣᒃ᙮ ᓇᒪ ᓈ ᐊᐗᓯᑌ ᐃᑌᓕᑖᑾᓐ ᐱᒫᑎᓯᐎᓐ ᐃᔥᐱᔥ ᒥᒋᒻ, ᓀᔥᑕ ᒥᔭᐤ ᐃᔥᐱᔥ ᐎᓛᒋᑲᓐ? 26ᑲᓇᐙᐸᒥᑯᒃ ᐱᓓᓯᐗᒃ ᑳ ᐹᐸᒥᓛᒋᒃ: ᐌᓴ ᓇᒪᐎᓚ ᐗᓴᓶᐱᓂᑫᐗᒃ, ᓇᒪ ᓀᔥᑕ ᒪᓂᔑᑫᐗᒃ, ᓇᒪ ᓀᔥᑕ ᑕᒀᐃᑫᐎᑲᒥᑯᒃ ᒪᐗᒋᒋᑫᐗᒃ; ᐁᓕᐌᒃ ᒫᑲ ᐊᔕᒥᑯᐗᒃ ᑯᑖᐎᐙᐗ ᑭᒋᑭᔑᑯᒃ? ᓇᒪ ᓈ ᓈᔅᐱᒡ ᐊᐙᓯᑌ ᑭᑦ ᐃᔅᐱᑌᓕᑖᑯᓯᓇᐗᐤ ᐃᔥᐱᔥ ᐎᓚᐗᐤ? 27ᐊᐌᓇ ᐁ ᐃᑕᔑᔦᒃ ᐁ ᒧᒋ ᒫᒥᑐᓀᓕᑕᒃ, ᑫ ᑮ ᑕᑯᑖᑦ ᐯᔭᒃ ᑭᐤᐱᑦ ᐁ ᐃᔅᑯᑳᐸᐎᑦ?

28ᑖᓀᑭ ᐌᒋ ᓀᔥᑕ ᒥᑐᓀᓕᑕᒣᒃ ᐎᓛᒋᑲᓐ? ᑲᓇᐙᐸᒥᑯᒃ ᐅᔅᑭᑌᐸᑾᒃ ᓂᑖᐎᑭᒋᑲᓂᒃ, ᐁ ᐃᔑ ᐅᐱᑭᒋᒃ; ᓇᒪᐎᓚ ᐊᑑᔅᑫᐗᒃ, ᓇᒪ ᓀᔥᑕ ᐱᒫᐃᑫᐗᒃ; 29ᐁᓕᐌᒃ ᒫᑲ ᑭᑦ ᐃᑎᓇᐗᐤ, ᓇᒪᐎᓚ ᐙᐙᒡ ᓴᓚᒪᓐ ᒥᓯᐌ ᐁ ᐃᔑ ᑭᔅᑌᓕᑖᑯᓯᑦ ᑭ ᐃᔑᐅ ᑖᐱᔅᑯᒡ ᐯᔭᒃ ᐅᑯ᙮ 30ᐁᐗᑯ ᐅᒋ, ᑮᔥᐱᓐ ᑭᒋᒪᓂᑐ ᐅᒪ ᐃᔑ ᐁᒀᓇᐊᒧᑴ ᒪᔅᑯᔑᔭ ᓂᑖᐎᑭᒋᑲᓂᒃ, ᐊᓄᒡ ᐁ ᑭᔑᑳᒃ ᑳ ᐃᑕᑾᑭ, ᐙᐸᑫ ᒫᑲ ᐃᔥᑯᑌᐎᑲᒥᑯᒃ ᐃᔑᐌᐱᓂᑳᑌᒃ, ᓇᒪ ᓈ ᐊᐙᓯᑌ ᑭ ᑳ ᐎᓛᑕᑺᐗᐤ ᑭᓚᐗᐤ, ᐅ ᑭᓚᐗᐤ ᐋᐱᔒᔥ ᐱᑯ ᑎᐋᐺᔦᓕᑕᒬᒃ?

31ᐁᐗᑯ ᐅᒋ ᒫᑲ ᐁᑳᐎᓚ ᒫᒥᑐᓀᓕᑕᒧᒃ, ᐁ ᐃᑗᔦᒃ, ᑫᒀᓐ ᑫ ᒥᒋᔭᒃ? ᓀᔥᑕᐱᑯ ᑫᒀᓐ ᑫ ᒥᓂᑴᔭᒃ? ᓀᔥᑕᐱᑯ, ᑫᒀᓐ ᑫ ᐎᓛᒋᑲᓂᔭᒃ 32ᐁᐗᒀᓂᐃ ᒥᓯᐌ ᐅᐅ ᓂᐋᓇᑕᐌᓕᑕᑭᒃ ᒉᓐᑖᐃᓚᒃ: ᐌᓴ ᑯᑖᐎᐗᐤ ᑭᒋᑭᔑᑯ ᑭᔅᑫᓕᑕᒻ ᐁ ᓇᑕᐌᓕᑕᒣᒃ ᒥᓯᐌ ᐅᐅ ᑫᒀᓇ᙮ 33ᓃᔥᑕᒻ ᒫᑲ ᓈᓇᑕᐌᓕᑕᒸᒃ ᑭᒋᒪᓂᑐ ᐅᑦ ᐅᑭᒫᐎᐎᓐ, ᓀᔥᑕ ᐅ ᒀᔭᔅᑭᑖᑎᓯᐎᓐ; ᒥᓯᐌ ᐅᐅ ᑫᒀᓇ ᒫᑲ ᑭ ᑳ ᐊᓯᒋ ᒥᓕᑲᐎᓇᐗᐤ᙮ 34ᐁᑳᐎᓚ ᒫᒥᑐᓀᓕᑕᒧᒃ ᑫ ᐙᐸᒃ; ᐌᓴ ᑫ ᐙᐸᒃ ᑲᑕ ᒥᑐᓀᓕᑕᒫᓱᒪᑲᓐ᙮ ᑌᐱᓕᑯᒃ ᑲᑕ ᐋᓕᒪᓐ ᐁ ᑭᔑᑳᒃ᙮

നിലവിൽ തിരഞ്ഞെടുത്തിരിക്കുന്നു:

ᐅᐸᓓᑭᔅ ᒫᑎᐤ 6: MCNT91

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

The text of the Bible in Moose Cree is in the public domain.

ᐅᔅᑭ ᑎᔅᑌᒥᓐᑦ നെക്കുറിച്ച് കൂടുതലറിയുക