MARKUS 16
16
Enyumuko laJesus
(Mat. 28:1-8; Luk. 24:1-12; Joh. 20:1-10)
1Ndele Eshabata eshi la xula, Maria Magdalena naMaria, ina yaJakob naSalome ova landa omuvavo wedimba liwa, ve ke mu vaeke. 2Ndele ongula inene yefiku lotete loshivike, etango eshi tali piti, ove uya kombila. 3Ndele eshi va tongafana: “Olyelye te tu alangatifile ko emanya koshivelo shombila?” 4Ndele eshi va tala ko, ove wete emanya la alangatifwa ko, lo ola li linene unene. 5Hano eshi va ya mombila, ova mona mo omunyasha e li omutumba kolulyo, a djala oshikutu shile, shitoka, ndele ova haluka neenghono. 6Ye okwa tya kuvo: “Inamu tila. Otamu kongo Jesus Omunasareti, omuvalelwa komushiyakano. Ye okwa nyumuka, ke mo omu. Taleni onhele ei apa va li ve mu nangeka. 7Ndelenee indeni mu ka lombwele ovalongwa vaye naPetrus: ‘Ye ote mu tetekelele okuya kuGalilea. Oko tamu ke mu mona, ngaashi e mu lombwela.’ ” 8Ndelenee vo ova dja mo, ndele tava di ko kombila oshikenyauko, osheshi ova kwatwa kekakamo nokehaluko, vo inava tya sha nande okomunhu, osheshi vo ova li va tila.
9Ndelenee Ye eshi a nyumuka efiku lotete loshivike ongula inene, okwa holokela tete Maria Magdalena, mwaau a ta mo eendemoni 7. 10Ndele ye okwa ya, ndele te shi hepaululile ava va kala puye nova li va nyika oluhodi, ndele tava lili. 11Ndelenee eshi va uda kutya, oku na omwenyo, naMaria e mu mona, inave shi itavela. 12Ndele konima okwa holokela vavali vomuvo e nolupe li lili, eshi tava ende tava i komukunda. 13Ava ova ya ndele ova hepaululila vakwao, ndele navo yo eshi inave shi itavela. 14Konima okwa holokela ovo omulongo naumwe fimbo ve li omutumba poshililo nokwe va tanguninina okuhaitavela kwavo noukukutu womitima davo, osheshi inava itavela ovo ve mu mona a nyumuka koufi.
Elombwelo loshilonga shetumo
15Ndele Ye okwa tya kuvo: “Indeni nounyuni aushe, nye mu ka udifile ovashitwa aveshe evaengeli. 16Ou ta itavele ndele ta shashwa, oye ta xupifwa, ndele ou ita itavele, ye ota ka tokolelwa ekano.
17“Noilongadidiliko ei tai shikula ovo va itavela: omedina lange tava te mo eendemoni, otava popi omalaka mape, 18otava ka kwata omayoka nongeenge tava nu oudiyo, itau va ningi sha; otava tenheke omake avo kovanaudu, notava veluka.”
Jesus ta i meulu
19Hano Omwene Jesus eshi a tonga kuvo, okwa tambulwa meulu. Ndele okwa kala omutumba kolulyo laKalunga. 20Ndele vo ova ya, ndele ova udifila akushe, ndele Omwene Jesus okwa li ta longo pamwe navo, ndele ta pameke eendjovo nomadidiliko tae di shikula.
നിലവിൽ തിരഞ്ഞെടുത്തിരിക്കുന്നു:
MARKUS 16: OKYB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Oshikwanyama Bible Revised © Bible Society of Namibia, 2008, 2012.
