MARKUS 13
13
Okungumaunwa po kwaJerusalem nexulilo lounyuni
(Mat. 24:1-36; Luk. 21:5-36)
1Ndele Ye eshi a pita mo motembeli, umwe womovalongwa vaye okwa tya kuye: “Omuhongi, tala omamanya oo nomatungilo aa apa e fike.” 2Jesus okwa tya kuye: “Ove ou wete eengulu edi dinene, itapa ka fiwa apa emanya la tenhekwa kombada yalikwao, inali ngumaunwa po.”
3Ndele eshi a kala omutumba kOmhunda yEemono, a taalela kotembeli, Petrus naJakob naJohannes naAndreas, eshi va li po vo aveke, ove mu pula: 4“Tu lombwela, onaini tashi ka ningwa nedidiliko olashike tali holola okuwanifwa kwoinima aishe?”
5Ndele Jesus okwa hovela oku va lombwela: “Lungameni, muha pukifwe nande komunhu. 6Osheshi vahapu otave ke uya medina lange ndele tava ti: Aame ou, ndele tava ka pukifa vahapu. 7Hano ngeenge tamu udu omalwoodi neendaka doita, inamu tila. Ei oi na okuuya, ndele exulilo inali fika natango. 8Osheshi oiwana otai ka fikamena oiwana, noshilongo otashi fikamene oshilongo, otaku ka ningwa omakakamo edu keembinga neembinga, ondjala tai uya nomapiyaano. Eshi ehovelo lomaudjuu.
9“Ndele lilungameneni nye vene. Otave ke mu yandja koiongalele yovakulunhu, ndele tamu ka dengelwa meeshinagoga, ndele tamu ka twalwa koipala yomalenga noyeehamba molwange mu ninge ondobwedi kuvo. 10Ndele tete evaengeli oli na okuudifilwa oiwana aishe. 11Ndele ngeenge tave mu twala ndele tave mu yandje kovatokoli, inamu kala mu noshisho shaashi tamu ka popya, ndele osho otamu ke shi pewa mokafimbo oko, shi popyeni. Osheshi hanye vene tamu popi, ndelenee Omhepo Iyapuki. 12Mumwaina ota yandje mumwaina mokufya, naxe omona, nounona otava ka twa ondubo novakulunhu vavo, ndele tave va dipaa. 13Nye otamu ka tondwa kwaaveshe omolwedina lange, ndele ou te lididimike fiyo okexulilo, ye ota ka xupifwa.
Oixuna yehanauno novapukifi
14“Ndele eshi tamu mono oixuna yehanauno tai kala poima inai fewa po (omuleshi ne shi didilike), opo nee ava tava hangika muJudea, nava fadukile keemhunda, 15naau ta hangika kombada yongulu, aha londoloke ko, ye ina ya a ka pitule sha meumbo laye, 16naau ta hangika mepya, ina shuna mo a ka tale ko oshikutu shaye. 17Woo ovafimba novamwali opomafiku enya. 18Indileni, shihe mu hange pokufu. 19Osheshi omafiku oo otaku kala oudjuu unene, wa li uhe ko okehovelo loishitwa, Kalunga e i shita nongaashi itau ke uya vali. 20Omwene ngeno ina xupipika omafiku enya, ngeno kaku na nande ombelela tai xupu, ndelenee omolwovahoololwa e va hoolola okwa xupipika omafiku oo.
21“Ndele ngeenge oku na ou te mu lombwele ta ti: ‘Kristus oku li apa’, ile: ‘Tala, oku li kwinya’, inamu itavela. 22Osheshi otaku holoka ookristus ovanaipupulu novaxunganeki ovanaipupulu, ndele tava longo omadidiliko noikumwifalonga va pukife yo ovahoololwa, ngeenge tashi dulika. 23Litaleni nee. Onda tetekela oku mu lombwela aishe.
Ealuko laJesus
24“Ndele momafiku enya oudjuu winya ngeenge wa xula po, etango tali laula nohani itai eta ouyelele wayo, 25neenyofi otadi u ko keulu, neenghono domomaulu otadi ka kakamifwa. 26Opo nee vo otava mono Omona wOmunhu te uya moilemo neenghono dinene noshinge. 27Ndele Ye ota tumu ovaengeli vaye, ndele tava ongele ovahoololwa vaye okeemhepo dokeembinga nhee okexulilo ledu fiyo okexulilo leulu.
28“Ndele lilongeni efaneko komukwiyu: Oshitai shao ngeenge sha eta eembeyo ndele tau hape, opo nee omu shi shii, okwenye okwa fika. 29Nosho nanye yo, ngeenge tamu mono ei tai uya, shiiveni, Ye oku li popepi, oposhivelo. 30Oshili handi mu lombwele: Epupi olo itali xulu po, fimbo aishe ei inai wanifwa. 31Eulu nedu otali xulu po, ndele eendjovo dange itadi xulu po. 32Ndele efiku olo, ile otundi ei kaku na ou e i shii, nande ovaengeli meulu ile Omona, Tate Oye aeke. 33Kaleni mwa lungama, pashukeni nye mu ilikane, osheshi inamu shiiva efimbo olo onaini tali uya. 34Otaku kala ngaashi omunhu a ya koilongo: eshi a fiya po eumbo laye, ndele okwa pa ovanhu vaye epangelo, keshe tuu ou oshilonga shaye, okwa lombwela yo omunangeli woposhivelo a kale a pashuka. 35Hano osho kaleni mwa pashuka, osheshi kamu shi shii onaini mwene weumbo te uya, ngeenge onguloshi ile opokati koufiku ile opekweno lekondombolo ile ongula, 36ehe mu hange mwa kofa, eshi te uya ohangelela, te mu faukile. 37Osho handi shi mu lombwele, ohandi shi lombwele aveshe: kaleni oupafi.”
നിലവിൽ തിരഞ്ഞെടുത്തിരിക്കുന്നു:
MARKUS 13: OKYB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Oshikwanyama Bible Revised © Bible Society of Namibia, 2008, 2012.
