LUKAS 20
20
Jesus ta pulwa eenghono daye
1Ndele opa ningwa efiku limwe, Ye eshi a longa motembeli, ndele okwa udifa evaengeli, ovapristeli ovakulunhu novanongo vomishangwa pamwe novakulunhu ve uya mo, 2ndele ve mu pula va tya: “Tu lombwela, okeenghono dilipi ho longo ei ile olyelye e ku pa epangelo eli?” 3Ndele Ye okwe va nyamukula ta ti: “Naame onda hala ndi mu pule ondjovo imwe, lombweleni nge: 4Eshasho eli laJohannes ola dile meulu ile omovanhu?” 5Opo vo va kundafana tava ti: “Ngeenge hatu ti: ‘omeulu,’ opo ye ta ti: Oshike hano inamu mu itavela? 6Ndele ngeenge hatu ti: ‘Omovanhu,’ opo ovanhu aveshe otave tu dipaa nomamanya, osheshi vo ove shi shii, Johannes okwa li omuxunganeki.” 7Opo vo va nyamukula kutya kave shii apa la dja. 8Jesus ta ti kuvo: “Naame yo itandi mu lombwele, okeenghono dilipi handi i longo.”
Ovalongi vepya lomiviinyu
9Ndele Ye okwa hovela okulombwela ovanhu efaneko eli: “Omulumenhu umwe okwa twika epya lomiviinyu, okwe li pa ovalongi ndele okwa ya koilongo a ka menekele ko. 10Ndele efimbo eshi la fika, ye okwa tuma ko omupiya kovalongi ve mu pe oiimati yepya lomiviinyu, ndele ovalongi ove mu denga, ndele ove mu shunifa hamakasha. 11Opo ye a tuma ko omupiya umwe, ndele naye yo ove mu denga ndele ve mu tuka, ndele ove mu shunifa hamakasha. 12Opo ye okwa tumununa ko omutitatu, ndele naye yo ve mu denga noku mu toshaula, ndele ove mu undulila pondje. 13Opo omwene wepya lomiviinyu ta ti: ‘Ohandi ningi ngahelipi? Onda hala ndi tume ko omona wange omuholike, shiimba tave mu tila.’ 14Ndele ovalongi vepya lomiviinyu eshi ve mu mona, ove mu kundafana tava ti: ‘Ou omufyuululi, tu mu dipaeni, efyuululo li ninge letu.’ 15Ndele vo ove mu undulila pondje yepya lomiviinyu ndele ove mu dipaa. Mwene wepya lomiviinyu ote va ningi ngahelipi hano? 16Ote uya ndele ta dipaa po ovalongi vepya lomiviinyu ovo, epya lomiviinyu ote li pe vamwe ve lili. Hano vo eshi va uda odo ova tya: Hasho nande.” 17Ndelenee ye okwe va tala ndele ta ti: “Omushangwa ou otau ti ngahelipi hano:
‘Emanya olo ovatungi ve li ekelashi
olo la ninga omutwe wokolonela’?
18Keshe tuu ou ta pundukile kemanya olo ye ota teka, naau ta wilwa kulo ota nyanyaulwa. 19Ndele ovanongo vomishangwa novapristeli ovakulunhu va hala oku mu kwata efimbo tuu olo, ndele ova tila ovanhu, osheshi va koneka efaneko olo tali va popi.”
Oshimaliwa shefendelo
20Osho nee ve mu nangela, ndele ova tuma ko ovayeleki ve lininga ovayuki, ve mu yule meendjovo, opo va dule oku mu yandja momake epangelo nokovatokoli nokomwene woshilongo. 21Ndele vo ove mu pula tava ti: “Omuhongi, otu ku shii, ove omuyuki mokupopya nomokulonga, ove iho tale oshipala, ndele to longo ondjila yaKalunga moshili. 22Osha wapala tuu, tu yandje komukesari efendelo ile ahowe?” 23Ndele Ye eshi a mona eheka lavo lii, okwe va lombwela: 24“Ulikilei nge ombongo. Efano eli neshangelo eli olalyelye?” Vo ova tya: “Olomukesari.” 25Opo Ye okwe va lombwela: “Peni hano omukesari osho shomukesari, naashi shaKalunga, shi peni Kalunga.” 26Ndele vo ova nyengwa oku mu yula meendjovo moipafi yovanhu, ndele va kuminwa enyamukulo laye, vo va mwena nee.
Enyumuko lovafi
27Ndele ope uya vamwe vomOvasadukai, ovo hava ti kaku nenyumuko, ndele ove mu pula 28tava ti: “Omuhongi, Moses okwe tu shangela: ‘Ngeenge ku na omulumenhu ta filwa mumwaina e nomukainhu ye ke na ounona, opo omumwaina wanakufya e nokuhombola omukainhu ou nokudalela omumwaina oludalo.’ 29Hano okwa li ku novalumenhu ovamwaina vaheyali. Wotete a hombola omukainhu ndele okwa fya ehe na oludalo. 30Nomutivali okwa hombola omukainhu ou ndele okwa fya ehe noludalo, 31nomutitatu e mu hombola nosho tuu aveshe venya vaheyali ndele ova fya inava fiya po ovana. 32Ndele xuuninwa omukainhu a fya yo. 33Hano omukainhu ou ota ningi walyelye womuvo menyumuko? Osheshi aveshe venya vaheyali va hombola omukainhu ou.”
34Opo Jesus okwa tya kuvo: “Ovana vomefimbo lounyuni eli ohava hombola nohava hombolwa. 35Ndele vo otava talwa va wapala okuya mefimbo lounyuni linya nomenyumuko lokovafi, ihava hombola nongaashi ihava hombolwa. 36Osheshi itava dulu vali okufya, osheshi vo va fa ovaengeli, navo ovana vaKalunga, osheshi vo ovana venyumuko. 37Ndelenee Moses yo e shi holola nokutya, ovafi otava ka nyumuka, osheshi mehepaululo loshixwa sheno ota ti: Omwene Oye Kalunga kaAbraham naKalunga kaIsak naKalunga kaJakob. 38Ndele Ye ke fi Kalunga kovafi, ndelenee okovanamwenyo, osheshi aveshe ove nomwenyo moku mu kalela.” 39Ndele ovanongo vomishangwa vamwe ve mu nyamukula tava ti: “Omuhongi, wa tonga wa wapaleka.” 40Ndele vo va tila oku mu pula sha vali.
Kristus Oye omona waDavid nomwene waye
41Opo Ye ta ti kuvo: “Otava dulu ngahelipi okutya: Kristus Oye omona waDavid? 42Ndele David mwene momishangwa domapsalome ta ti:
‘Omwene okwa lombwela omwene wange:
Kala omutumba kolulyo lange,
43fiyo handi ningi ovatondi voye
oshilyatelo shokeemhadi doye.’
44Hano David eshi te mu ifana Omwene, Oye omona waye ngahelipi?”
Elondwelo molwoihelele
45Ndele fimbo ovanhu aveshe va li po tava pwilikine, okwa popya ndele ta ti kovalongwa vaye: 46“Lungameni ovanongo vomishangwa ovo hava endaenda va djala oikutu ile, ndele ve hole okukundilwa pomalandelo, nopeenhele dokomesho moivilo, nomomalukalwa okombada omeeshinagoga, 47ovovo hava li omaumbo ovafiyekadi ndele hava ningi omailikano malemale pamoniko, ovo tuu tava ka mona etokolo lidjuu unene.”
നിലവിൽ തിരഞ്ഞെടുത്തിരിക്കുന്നു:
LUKAS 20: OKYB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Oshikwanyama Bible Revised © Bible Society of Namibia, 2008, 2012.
