LUK 20

Loo nəkɔ́ ń Jeju teē kə tɔ́gɔ́ tū tə́ ní i rá?

(Á̰a̰ī Mat 21.23-27; Mark 11.27-33)

1Ndɔ̄ kógə̄ḿ tə́, dan ń Jeju ndi kem kújə yā Kɔ́ɔ̄ɓē tə́ a ndóō de gə̄ yá̰a̰ ō, a ɔjə de gə̄ Najə̄ kə́ Majə ō anī, ngol gə̄ kə́ dɔ ngé tun̄ yá̰a̰ gə̄ tə́ ō, ngé ndóō de gə̄ ndū najə̄ gə̄ ō, nin̄ kə kum kɔɔ̄ gēé, 2reē dəjenən̄ najə̄ na ké i náā n adə̄n tɔ́gə́ ní wa, ké tɔ́gə́ ń a rāāń yá̰a̰ gə̄ ní ké teēń i rá wa.

3Ni-tél ədadə́ na:

Mā m-ā m̄-dəjesí najə̄ kógə̄ḿ ō: 4Ədamī ké batém yā Ja̰a̰ ní ḭḭ i rɔ̄ Nə́ɓā tə́ aké ḭḭ i rɔ̄ de gə̄ tə́ wa?

5Nin̄-nējə̄n̄ naā najə̄ dɔ dáńdə́ tə́ ədan̄ na:

Ń toō ní, ré j-ədaī na ḭḭ na i rɔ̄ Nə́ɓā tə́ anī, ni a tél yā dəjejí na ké i tām̄ rí tə́ á jə-taāī kem Ja̰a̰ aĺ wa. 6Ba ré j-ədaī na ḭḭ na i rɔ̄ de gə̄ tə́ anī, ngán Israel gə̄ malang a tə́nīn̄jí kə mbalá, tɔdɔ̄ nin̄-taān̄ kem mámák kadə̄ Ja̰a̰ i nge koō ta ō.

7Anī tél ədanən̄ na n-gerə̄n̄ loo ń ḭḭ tū tə́ ní alé. 8Adə̄ Jeju tél ədadə́ na: Ɓáa mā m-ā m-ə́dásí loo nəkɔ́ ń m̄-teē kə tɔ́gə́ ń toō tū tə́ á m̄-rāań yá̰a̰ gə̄ ń toō ní aĺ ō.

Kūjə́ najə̄ yā ngé ndɔr̄ kāgə̄ nduú kə́ ngé kem ndul gə̄

(Á̰a̰ī Mat 21.33-46; Mark 12.1-12)

9Anī Jeju un kūjə́ najə̄ ń toō əda ngán Israel gə̄:

Deē kógə̄ḿ əndā kāgə̄ nduú gə̄ kem ndɔr̄ yān tə́, ba əndā ngé ndɔr̄ gə̄ ta tə́ kadə̄ a̰ā̰n̄ gō ō, adə̄nən̄ kanə̄n ō, ba aw̄ mbā kə́ gō ngāl̄ ngá̰ý. 10Loo ń nāā sāā kan̄ kāgə̄ nduú asə anī, ni-əla nge kəla yān kógə̄ḿ rɔ̄ ngé ndɔr̄ gə̄ ní tə́, kadə̄ kə adə̄nən̄ kum yān. Banī ngé ndɔr̄ gə̄ ní əndan̄ nge kəla ní ngá̰ý ba tə̄ɓānən̄ adə̄ tél aw̄ jīn karī. 11Ni-əla nge kəla kə́ rang ɓáý to̰, ba de gə̄ ní tə̄ndānən̄ ō, tájə̄nən̄ ō, tə̄ɓānən̄ adə̄ tél aw̄ jīn karī ō. 12Ni-əla nge kəla kə́ rang kə́ nge ko̰ mətá ɓáý to̰, ba de gə̄ ní adə̄nən̄ do ō, tə̄ɓānən̄ kɔ̄ɔ́ ō. 13Loo ń noō tə́ kɔ́ɔ̄ ndɔr̄ ní əda kə̄ kemən tə́ na: Kə m̄-rāā i rí tā? M-ā m-ə́la ngōn̄ kemḿ mə̄kɔ́ kə́ kó tár yāḿ, na majanī a ɓōlə́n̄ ndílən. 14Ba dan ń ngé ndɔr̄ gə̄ ní a̰a̰nən̄ anī, ədan̄ naā dɔ dáńdə́ tə́ na: Á̰a̰ī, nge kán̄ ta yá̰a̰ ndəbā ní n toó. Jə-tɔ̄līin̄ ɓáa yá̰a̰ ndəbā ní a tél yá̰a̰ yājí. 15Anī un ənīnən̄ gidə ndɔr̄ ní tə́ ndágá, ba tɔ̄l̄nən̄ kɔ̄ɔ́.

Beé ní kɔ́ɔ̄ ndɔr̄ ní a rāā i rí sedə́? 16Ni a reē yā tɔ̄l̄ ngé ndɔr̄ gə̄ ní, ba a əndā de kə́ rang gə̄ ta kāgə̄ nduú yān tə́. Dan ń nin̄-oōn̄ tītə̄ ń noō anī, ədan̄ na:

Ādə̄ yá̰á̰ kə́ tītə̄ ń noō rāā yá̰a̰ aĺ ɓɔ́ nəkɔ́ tá.

17Anī Jeju əndā kumən dɔdə́ tə́ ba ədadə́ na:

Ɔ́jəmī kum najə̄ ń ndangən̄ ədan̄ na:

I mbal̄ ń ngé kəndā kújə gə̄ mbātə́n̄ kété ní

n tél mbal̄ kíĺ kújə́ ní.

18Deē ń əsō dɔ mbal̄ ń noō tə́ anī a tétə̄ rák rák ō, deē ń mbal̄ ń noō əsō dɔn tə́ anī, mbal̄ ní a rējə̄n kɔ̄ɔ́ ō.

Najə̄ kə́ dɔ lambóó tə́

(Á̰a̰ī 22.15-22; Mark 12.13-17)

19Ngé ndóō de gə̄ ndū najə̄ gə̄ kə ngol gə̄ kə́ dɔ ngé tun̄ yá̰a̰ gə̄ tə́ a sāān̄ kəhɔ Jeju kə̄ ta jī tə́ beē, ba nin̄-ɓōlə́n̄ ngán Israel gə̄. Tɔdɔ̄ nin̄-gerə̄n̄ majə kadə̄ kūjə́ najə̄ ń Jeju əda ní sɔɔ̄ i dɔdə́ nin̄. 20Loo ń noō tə́ ní, nin̄-əlan̄ gír kum̄ loo, adə̄ əlan̄ de kə́ ngé kəndā ma̰ȳ loo gə̄ rɔ̄ Jeju tə́. Nin̄-sēmə̄n̄ kumdə́ séḿ séḿ, adə̄ rāān̄ yá̰a̰ tītə̄ kə́ nin̄ i de kə́ súmūú gə̄, yā kadə̄ ré Jeju əda najə̄ kə́ majaĺ ɓáa kə n-əhɔnən̄ dɔ tə́ yā kəlan jī ngé ko̰o̰ ɓē gə̄ tə́ kadə̄ rāānən̄ kə gō ndū ń nin̄-ənīn̄ ní. 21Anī dəjen̄ Jeju najə̄ ədan̄ na:

Ngol, jə-ger̄ kadə̄ najə̄ kɔrīí ō, yá̰á̰ ndóō yāí ō i gōtə́, tá ḭ̄ ī-rāā yá̰a̰ loo ger̄ ta kum deē tə́ alé, ba ā ī-ndóō de gə̄ gō róbə gə̄ yā Nə́ɓā i kə najə̄ kə́ rɔ̄kum. 22Ní ə́dájí, jḭḭ ní ndū najə̄ adə̄jí ta róbə kadə̄ Sejar lambóo aké ɔgə̄jí ḿ?

23Ba Jeju ger̄ ngam yādə́ adə̄ tél ədadə́ na:

24Ɔ́jəmī njáŕ sə́lē arjā̰a̰ kógə̄ḿ ādə̄ m-á̰a̰ā̰. I dɔ náā n i tū tə́ toō? Najə̄ ń ndangən̄ dɔ tə́ toō i najə̄ kə́ sɔɔ̄ dɔ náā? Nin̄-ədan̄ na i dɔ Sejar.

25Anī ni-ədadə́ na:

Ī-tél ādī Sejar yá̰á̰ ń i yā Sejar ní ō, ādī Nə́ɓā yá̰á̰ ń i yā Nə́ɓā ní ō.

26Nin̄-əngen̄ loo kəhɔn dɔ najə̄ kə́ majaĺ tə́ sḛ́ý ta kum ngán Israel gə̄ tə́ alé, tá najə̄ ń ni-tél tūr̄ ədadə́ ní ɔr kumdə́ ngá̰ý, adə̄ tél ndin̄ tadə́ mbóo.

Ngé koy gə̄ a ndólə̄n̄ i ba̰ý?

(Á̰a̰ī Mat 22.23-33; Mark 12.18-27)

27 Sadusiyḛ gə̄ nējə̄n̄ na de kə́ koy gə̄ na a ndólə̄n̄ bəlo yo tə́ alé, adə̄ ngé kə́rēý gə̄ dɔ dáńdə́ tə́ ndɔ́tə̄n̄ kə̄ rɔ̄ Jeju tə́ ngɔr, 28ba dəjenən̄ najə̄, ədan̄ na:

Ngoljí, Moijə ndang makətūbə̄ adə̄jí, əda na: Ré deē kógə̄ḿ taā dəyá̰ ba oy kanjə̄ kojə ngōn̄ anī, ngōkó̰o̰n ń kə taā dəyá̰ ní kə ojəń ngōn̄ kadə̄ ra kum gotən. 29Tá jóó ní, ngákó̰o̰ naā kə́ dəngam gə̄ i sīrí. Kə́ nga tɔ́gə taā dəyá̰ ba oy kanjə̄ kojə ngōn̄. 30Anī nge kə́ nge ko̰ jōó, 31tá nge kə́ nge ko̰ mətá ɓáý to̰, taān̄ dəyá̰ ní. Nin̄ sīrí malang ní rāān̄ tītə̄ ń noō. Nin̄-oyn̄ malang kanjə̄ kojə ngōn̄ ō. 32Ba ta tɔ̄l̄ tadə́ malang anī, dəyá̰ ní oy ō. 33Ní, dəyá̰ ń toō ní, dan ń de gə̄ a ndólə̄n̄ ní, i náā dan ngákó̰o̰ naā gə̄ ń toō tə́ n ni a tél nə̄yá̰n ní, tɔdɔ̄ nin̄ sīrí mbak ní taānən̄ i kə́ nə̄yá̰də́ tə́?

34Jeju tél ədadə́ na:

De gə̄ kə́ kem ndɔ̄ kə́ ngɔlaā ń toō tə́ a taān̄ naā. 35Ba ngé gə̄ ń Nə́ɓā a̰a̰də́ á ton̄ kadə̄ a ugə̄n̄ dɔ nang kə́ kijə kə́ ndɔ̄ń tə́ ō, ndɔ̄ ń de kə́ koy gə̄ a ndólə̄n̄neé bəlo yo tə́ ō ní, a taān̄ naā alé, 36tɔdɔ̄ nin̄ a oyn̄ alé, tām̄ nin̄-ton̄ tītə̄ de kə́ dɔ rā̰ tə́ gə̄ beé ō, nin̄ i ngáń Nə́ɓā gə̄ tām̄ nin̄ i de kə́ ngé ndól̄ bāá yo tə́ gə̄ ō. 37Tá kadə̄ de kə́ koy gə̄ a ndólə̄n̄ ní, ni ń noō i yá̰á̰ kə́ Moijə ɔjəsí gō kété kɔ̄ɔ́, dan ń ɔr̄sí gotə najə̄ yā Nə́ɓā ń ndɔ̄bən dan túpə́ kámbə́ tə́ ní, tām̄ ni-ɓāŕ Kɔ́ɔ̄ɓē na i

Nə́ɓā yā Abəraham ō yā Isaak ō yā Jakob ō.

38Banī Nə́ɓā i Nə́ɓā yā de kə́ koy gə̄ alé, ba i Nə́ɓā yā de gə̄ kə́ ndin̄ kə kumdə́ gə̄, tɔdɔ̄ nin̄ malang ndin̄ kə kumdə́ i kə kūl̄neé.

39Loo ń noō tə́ ngé ndóō de gə̄ ndū najə̄ kə́rēý gə̄ unən̄ najə̄ ədanən̄ na: Ngoljí, najə̄ ń ɔ̄r̄ ní majə ngá̰ý.

40Tɔdɔ̄ nin̄-ɓōlə́n̄ dəjen najə̄ dɔ yá̰á̰ kógə̄ḿ kə́ rang tə́ kɔ̄ɔ́.

Kərist ō, Dabid ō

(Á̰a̰ī Mat 22.41-46; Mark 12.35-37)

41Anī Jeju dəjedə́ najə̄ əda na:

I ba̰ý á de gə̄ ədan̄ na Kərist ní i ngōn̄ kaa Dabid ní? 42Tɔdɔ̄ Dabid nəkɔ́ əda kem makətūbə̄ Pā gə̄ tə́ na:

Najə̄ ń Kɔ́ɔ̄ɓē əda Kɔ́ɔ̄ɓē gə̄ yāḿ ní n toó:

Ī-ndi dɔ jī ko̰ḿ tə́,

43bátə́ kadə̄ m̄-rāā adə̄ madə̄ ba̰ā̰í gə̄ télən̄ yá̰a̰ kəndā nja yāí.

44Ní, dan ń Dabid a ɓārə́n na i Kɔ́ɔ̄ɓē ní, loo kadə̄ ni i ngōn̄ kaan ɓáý to̰ ní i ba̰ý?

Ādī kumsí gól̄sí kə ngé ndóō de gə̄ ndū najə̄ gēé alé

(Á̰a̰ī Mat 23.1-36; Mark 12.38-40)

45Dan ń ngán Israel gə̄ malang a oōn̄ najə̄ yā Jeju anī, ni-tél əda ngé ndóō yá̰a̰ yān gə̄ na:

46Ī-lōōī kadə̄ kumsí gól̄sí kə ngé ndóō de gə̄ ndū najə̄ gēé. Nin̄ a gḛyn̄ njə̄rā kə kūbə̄ kə́ ngāl̄ gēé ō, nel̄də́ kadə̄ de gə̄ rāān̄də́ lápə́ya ndágə loo kə́ bo gə̄ tə́ ō. A nel̄də́ ndi loo kə́ to ngol tə́ gíŕ kújə́ kán̄ naā gə̄ tə́ ō, loo kəsa yá̰a̰ gə̄ tə́ ō. 47A əsan̄ jī dəyá̰ kə́ ngaa koy gə̄ yā təgā ō. Nin̄ ní, sarya kə́ bo ngá̰ý a əsō dɔdə́ tə́.

നിലവിൽ തിരഞ്ഞെടുത്തിരിക്കുന്നു:

LUK 20: SARDC

ഹൈലൈറ്റ് ചെയ്യുക

പങ്ക് വെക്കു

പകർത്തുക