JA̰A̰ 3

Jeju nin̄ kə Nikodem

1Dan Parijiyḛ gə̄ tə́ ní, deē kógə̄ḿ kə́ dan ngār yā Jipə gə̄ tə́ i noó, rīn na i Nikodem. 2Ni-reē rɔ̄ Jeju tə́ ndɔ̄ɔ́, ba ədan na:

Ngoljí, ḭ̄ i nge kɔjə yá̰á̰ ń Nə́ɓā əlaī tāmən tə́ ní, adə̄ jə-ger̄ majə. Deē kógə̄ḿ kə́ yā rāā yá̰á̰ kə́ yáā gə̄ ń ī-rāā ní gətóo, ré i Nə́ɓā n i seneé tá.

3Anī Jeju tél ədan na:

Ādə̄ m-ə́daī najə̄ kə́ bo ngá̰ý, ré tél ojən̄ deē gogə́ rang aĺ anī, kɔ́ɔ̄ a asə ka̰a̰ Ɓē ko̰o̰ yā Nə́ɓā alé.

4Anī Nikodem ədan na:

Ba deē ń tɔgə ɓə́ga kɔ̄ɔ́ ní, a ojənən̄ gogə́ ɓáý to̰ i ba̰ý? Ni a asə kudə kem kó̰o̰n tə́ nja kə́ ko̰ jōó ɓáý to̰ kadə̄ tél ojənən̄ gogə́ rang a?

5Anī Jeju tél ədan na:

Ādə̄ m-ə́daī najə̄ kə́ bo ngá̰ý, ré ojən̄ deē kə maná aĺ ō, kə Ndílí aĺ ō anī, kɔ́ɔ̄ asə kudə kem Ɓē ko̰o̰ yā Nə́ɓā tə́ alé. 6Nge ń i deē n ojən ní i deē ō, nge ń i Ndíl n ojə ní i Ndíl ō. 7Ī-lōō kadə̄ ɔr kumií dan ń m-ə́daī na i gáŕ kadə̄ a ojən̄sí rang tá ní. 8Tɔdɔ̄ nél a əla kumən i kə̄ loo ń nəkɔ́ ndigə tə́ ní. Ḭ̄ ōō i ká̰a̰n, ba ī-ger̄ loo ń ḭḭ tū tə́ ní alé. Deē ń i Ndíl n ojən ní, kɔ́ɔ̄ i tītə̄ noō ō.

9Anī Nikodem ədan na:

Yá̰a̰ ń noō a rāā yá̰a̰ i ba̰ý?

10Anī Jeju ədan na:

Ḭ̄ i nge kɔjə ngáń Israel gə̄ yá̰a̰, anī ī-ger̄ yá̰a̰ gə̄ ń toō aĺ a? 11Ādə̄ m-ə́daī najə̄ kə́ bo ngá̰ý, jḭḭ j-ɔr̄ i najə̄ kə́ dɔ yá̰a̰ gə̄ ń jə-ger̄ tə́ ní ō, j-əda i yá̰a̰ gə̄ ń jḭḭ i kum tə́ á j-a̰ā̰ kə kumjí ní ō, ba sḭḭ̄ ɔ́diī koō yá̰a̰ gə̄ ń jḭḭ i kum tə́ á j-əda ní alé. 12Ré m-ə́dásí yá̰a̰ gə̄ kə́ dɔ nang tə́ ba ī-taāī kem aĺ anī, yá̰a̰ gə̄ kə́ dɔ rā̰ tə́ ní, ré m-ə́dásí anī ā ī-taāī kem i ba̰ý? 13Deē kógə̄ḿ kə́ ḭḭ dɔ nang tə́ aw̄ dɔ rā̰ tə́ gətóo, ba i ngé ń ḭḭ dɔ rā̰ tə́ reē dɔ nang tə́ á i Ngōn̄ Deē ní tá ngóy. 14Tītə̄ ń Moijə əlań lī dɔɔ́ kem dəla loo tə́ ní, i gáŕ kadə̄ a əlan̄ Ngōn̄ Deē dɔɔ́ tītə̄ ń noō ō, 15yā kadə̄ náā nəkɔ́ ń taā kemən ní, ndi kə kumneé ngándáńg kə kūl̄neé. 16Rɔ̄kum, Nə́ɓā tár de kə́ dɔ nang tə́ gə̄ ngá̰ý, adə̄ un Ngōnən kə́ kal kógə̄ḿ beē adə̄, yā kadə̄ náā nəkɔ́ ń taā kemən anī, kɔ́ɔ̄ udə kɔ̄ɔ́ alé, banī ndi kə kumneé ngándáńg. 17Tɔdɔ̄ Nə́ɓā əla kə Ngōn̄neé dɔ nang tə́ i yā gān̄g sarya dɔ de kə́ dɔ nang tə́ gə̄ tə́ alé, banī i yā kadə̄ de kə́ dɔ nang tə́ gə̄ ajən̄ kə ta kūl̄neé. 18Deē ń taā kemən anī, gāngə̄n̄ sarya dɔn tə́ alé, ba deē ń taā kemən aĺ anī, gāngə̄n̄ sarya dɔn tə́ kɔ̄ɔ́, tɔdɔ̄ ni-taā kem Ngōn̄ Nə́ɓā kə́ kal kógə̄ḿ beē alé. 19Sarya ní n toó:

Loo kə́ unjə̄ kow reē dɔ nang tə́, ba de gə̄ ndigən̄ til tɔȳ loo kə́ unjə̄ kow, tɔdɔ̄ yá̰a̰ rāādə́ i kə́ majaĺ. 20Tɔdɔ̄ náā nəkɔ́ ń ā rāā yá̰á̰ kə́ majaĺ ní, gḛy loo kə́ unjə̄ kow alé. Adə̄ a reē kum loo kə́ unjə̄ kow tə́ alé, najə̄ kadə̄ gír kəla rāān gə̄ teēn̄ dɔɔ́. 21Ba nge ń rāā yá̰á̰ kə́ rɔ̄kum ní a reē kum loo kə́ unjə̄ kow tə́, yā kadə̄ kəla rāān gə̄ ton̄ kə̄ dɔ ndágá wáńg, tɔdɔ̄ yá̰a̰ gə̄ ń ni-rāā ní i gō yā Nə́ɓā tə́.

Jeju nin̄ kə Ja̰a̰

22Gō yá̰a̰ gə̄ ń toō tə́ anī, Jeju aw̄ kə ngé ndóō yá̰a̰ yān gēé gō nang kə́ Jude tə́. Ni-ndi sedə́ noō ō, rāā de gə̄ batém ō. 23Dan ngeé ń noō tə́ ní, Ja̰a̰ a rāā de gə̄ batém i Enon tə́, kadə loo kə́ Salim tə́, tɔdɔ̄ man̄ i ngá̰ý loo ní tə́. De gə̄ reēn̄ tū tə́ kadə̄ rāān̄də́ batém. 24Tɔdɔ̄ dan ngeé ń noō tə́ ní, ənīn̄ Ja̰a̰ dəngáyá aĺ ɓáý.

25Anī ngé ndóō yá̰a̰ yā Ja̰a̰ gə̄ nējə̄n̄ naā najə̄ kə Jipə kógə̄ḿ dɔ najə̄ tə́go rɔ̄ kə́ majaĺ tákə̄ tə́, 26adə̄ ɔtə aw̄ əngen̄ Ja̰a̰, ba ədanən̄ na:

Ngoljí, á̰a̰ deē ń ni i seí dan ń ḭ̄ i gidə bā Jurdḛ kə́ nó tə́ á ə́da najə̄ kə́ kum tə́ yān ní, a rāā de gə̄ batém noó, adə̄ de gə̄ malang a aw̄n̄ i rɔ̄n tə́.

27Anī Ja̰a̰ əda na:

Deē kógə̄ḿ kə́ asə taā yá̰a̰ kanjə̄ kadə̄ i Nə́ɓā n adə̄n yá̰á̰ ní gətóo. 28Najə̄ ń m-ə́dá ní sḭḭ̄ kɔ́ gə̄ i de kə́ kum tə́ gə̄, m-ə́da na:

Mā i Kərist#3.28 Kərist, kumən na i mban̄g ń Nə́ɓā gə̄rān ní. Á̰a̰ī Kərist tū Kum najə̄ kə́ Ngón̄g Ngón̄g gə̄ tə́. alé, banī əlamə̄n̄ i mbéé kété non tə́. 29Deē ń taā dəyá̰ ní, kɔ́ɔ̄ i ngaa dəyá̰. Ba balsáa madə̄ ngaa dəyá̰ ń ra noó ba oō ndūn ní, rɔ̄n nelə̄n ngá̰ý dan ń ndū ngaa dəyá̰ əsō mbīn tə́ ní. I yá̰á̰ ń toō n i rɔ̄nel̄ yāḿ mā ní, ba rɔ̄nel̄ ní majə ɔtə̄ kə taá. 30I só tə́ kadə̄ ni-tɔgə kum kə̄ kété, ba kadə̄ mā m̄-tél kə̄ nang tə́.

Ngé ń ḭḭ dɔ rā̰ tə́ reē dɔ nang tə́ ní

31Nge ń ḭḭ dɔ rā̰ tə́ reē ní, ni i dɔ yá̰a̰ gə̄ tə́ malang#3.31 K. 31: …ni i dɔ yá̰a̰ gə̄ tə́ malang… ní, gətóo kem makətūbə̄ yā Ja̰a̰ kə́rēý gə̄ kə́ kété tə́ kə ta Gərek.. Nge ń i de kə́ dɔ nang tə́ ní, ni i yā dɔ nang tə́, adə̄ a ɔr̄ i najə̄ kə́ dɔ nang tə́. 32Nge ń ḭḭ dɔ rā̰ tə́ reē ní, əda i yá̰á̰ ń ni-a̰ā̰ ō, oō ō ní, ba deē kógə̄ḿ kə́ ndigə koō najə̄ kə́ kum tə́ yān gətóo. 33Deē ń ndigə koō najə̄ kə́ kum tə́ yān ní, kɔ́ɔ̄ a ndigə i gōn tə́ kadə̄ Nə́ɓā i nge kəda najə̄ kə́ rɔ̄kum. 34Tɔdɔ̄ nge ń i Nə́ɓā n əlan ní, Nə́ɓā adə̄n Ndíl i kanjə̄ mbɔ̄jə́ ka̰ā̰, adə̄ a əda i najə̄ yā Nə́ɓā. 35Bɔbə̄ Ngōn̄ tár Ngōn̄, adə̄ əya̰ yá̰a̰ malang kem jīn tə́. 36Deē ń taā kem Ngōnən ní, kɔ́ɔ̄ a ndi kə kumneé ngándáńg. Deē ń mbātə́ taā kem Ngōn̄ Nə́ɓā ní, ni a ndi kə kumneé alé, ba wōn̄g yā Nə́ɓā a na̰y dɔn tə́.

നിലവിൽ തിരഞ്ഞെടുത്തിരിക്കുന്നു:

JA̰A̰ 3: SARDC

ഹൈലൈറ്റ് ചെയ്യുക

പങ്ക് വെക്കു

പകർത്തുക