Mateo 6

U Toldu ni Jesus Tungkul tu Pángngatád

1Kinagi pa ni Jesus “Siguraduwán moy a dyan kam la maggimet ti maganda para la ipeta tu tolay tánni puriyán di kam. Dipo awan kam ti gantimpala a maalap tu Ama moy ti langet. 2Kanya ni mangatád kam tu mágkahirap hide ay dyan moy ihambug tu agum. Ina u gággimitán nu mapagkunware hide a tolay tu sinagoga hide sakay tu kakarsada tánni puriyán hide nu katolayan. Ikagi ko nikam a talaga natanggap di dán u gantimpala de. Awan dán hide ti gantimpala a gábwat tu Diyos. 3Kanya hikam ni mangatád kam dyan moy ikagi maski ni ti deya. 4Gimitán moy la iye a sekreto sakay gantimpalaan kam nu Ama moy ti langet a naketa nikam.”

U Toldu ni Jesus Tungkol tu Págdasal

(Lukas 11:2-4)

5Sakay kinagi pa ni Jesus “Ni magdasal kam ay dyan moy ahigán u gimet nu mapagkunware hide. Gugustu de a magdasal a nakataknág tu sinagoga sakay tu kakarsada tánni ketan hide nu katolayan. Ikagi ku nikam a talaga naalap di dán u gantimpala de. 6Pero hikam, ni magdasal kam ay angay kam tu awan ti tolay a lugar sakay magdasal kam tu Ama moy a awan tam ketan. Sakay siya a naketa nikam u mangatád nikam ti gantimpala.”

7Tu págdasal moy ay dyan kam magupos ti makpal a upos a awan ti kahulugan konna tu págdasal nu awan hide maniwala tu Diyos. Dipo isipán de a tábbegán hide nu Diyos dipo makpal dán hide a inyupos. 8Dyan moy hide ahigán dipo tukoy dán nu Ama moy i kailangan moyay bagu kam a mangaged.

9Kanya magdasal kam a te kahulugan a konna he “Amáng a Diyos ti langet, ilangkaw nakwa nu tolay hide u ngahan mo. 10Masoh kami a hiko u maghari tu atanan a tolay ti munduwáy. Nakwa sunudán nu atanan a tolay u kagustuwan mu he ti munduwáy a konna tu págsunud de hina ti langet. 11Atádden mo kami ped tu pangangailangan me aldew aldew. 12Patawadán mu kame tu kasalanan me a konna tu págpatawad me tu nagkasala nikame. 13Sakay dyan ka pumayag a matoksu kame tu kasalanan nan iyadeyo mu kami ni Satanas. Dipo u kahariyan sakay u kapangyariyan ay kao mo hangganhanggan. Sakay hiko u mapuri tu atanan hangganhanggan. Amen.”

14Ni patawadán moy u nagkasala nikam ay patawadán kam be nu Ama moy ti langet. 15Pero ni awan moy hide patawadán ay awan kam be patawadán nu Ama moy ti langet.

U Toldu ni Jesus Tungkul tu Págkulasyon

16Sakay kinagi pa ni Jesus “Ni magkulasyon kam ay dyan moy ipeta a malungkut kam konna tu gággimitán nu mapagkunware hide. Awan dán hide magayus tu sadi-sadili de tán matukuyan nu agum a nagkulasyon hide sakay puriyán de hide. Kagiyán ku nikam a talaga natanggap di dán u gantimpala de hide. 17Kanya ni hikam u magkulasyon ay magsuklay sakay magidemos kam 18para awan mapospusan nu tolay hide a nagkulasyon kam. Nan u nakatukoy la ay u Ama moy la ti langet a awan ketan. Sakay siya u mangatád nikam tu gantimpala moy.”

U Tunay a Kayamanan

(Lukas 12:33-34)

19Sakay kinagi pa ni Jesus “Dyan kam magpuhon ti kayamanan he ti munduwáy dipo u kayamanan he ay anayán, simangán sakay matakaw nu mágtakaw hide. 20Nan magpuhon kam ti kayamanan hod ti langet. Awan hod anayán, simangán sakay matakaw. 21Dipo ni hádya u kayamanan mo hod be u isip mo.”

U Simbu nu Bággi

(Lukas 11:34-36)

22Sakay intoldu pa ni Jesus “U mata u pinakasimbuwan nu bággi, kaya ni awan ti diperensiya u mata moy ay mademlagan be u atanan a bággi moy. 23Pero ni te diperensiya u mata moy ay madihaman u atanan a bággi moy. Kanya ni u simbuwan a atoy niko ay madukás, ay grabe a tahod u kadukássan mo.”

Págserbiyan U Diyos Sakay Dyan Mabalisa

(Lukas 12:22-34; 16:13)

24Sakay kinagi pa ni Jesus “Awan ti makapagserbi ti duwwa a amo dipo kaiyamután na u essa sakay mahalán na u essa oni mas magin matapat siya tu essa nan tu essa. Awan moy maare a sabayán a pagserbiyan u Diyos sakay u kayamanan. 25Kaya itoldu ko nikam a dyan kam maligalig tu pangangailangan nu biyag moy a konna ti kanán, inumán, sakay badu. Awan beman mas mahalaga u biyag nan tu makan sakay mas mahalaga u bággi nan tu badu? 26Isipán moy la u manok hide, awan hide magsabug o maggapas sakay magdátton tu págsalansanan pero pakanán hide nu Ama moy ti langet. Awan beman mas mahalaga kam nikuna nan tu manok hide? 27Sakay maare beman pakatakdugán nu balisa u biyag moy? 28Umesa pa, bakin a mabalisa kam ni ánya u isulot moy? Isipán ped ni kodya dumakál u bulaklak hide tu araduwan. Awan hide makagimet ti badu 29pero mas maganda pa hide a ilingán nan tu pinakamayaman a hare tu itod a ti Solomon. 30Ni konna hod u págpospos nu Diyos tu bulaklak a alisto a matay sakay tutudán la, hikam pa wád kaya u awan na atádden ti badu? Ánya rámben ti kabadit u pánniwala moy. 31Kanya dyan kam mabalisa tu kanán, inumán sakay tu isulot moy. 32Dipo sa itod hide u ehyokán nu awan maniwala tu Diyos. Pero tukoy nu Ama moy ti langet u atanan a kailangan moy hide. 33Kanya hikam ay idipalongu moy u pághare nu Diyos tu biyag moy sakay sunudán u atanan a kautusan na. Dipo ni gimitán moy ina ay iyatád be nu Diyos u atanan a kailangan moy. 34Kanya dyan kam mabalisa tu pangangailangan moy para ni ilaw dipo bahala be u Diyos hod. Dyan moy dán dagdagen pa u problema moy kada aldew.”

നിലവിൽ തിരഞ്ഞെടുത്തിരിക്കുന്നു:

Mateo 6: MBJC

ഹൈലൈറ്റ് ചെയ്യുക

പങ്ക് വെക്കു

പകർത്തുക