Mateo 2

U Págdalaw nu Mágkalalaki Hide a Tolay ni Jesus

1Nadid tu panahun ni Hari Herodes, káttapos a neenak ti Jesus tu banuwan a Betlehem a sakup nu Judea ay te dummemát a sasangan a mágkalalaki a tolay#2:1 Maari a pinagadalan de ay u biton hide, bulan sakay aldew. ti Jerusalem a gábwat ti Sikatan. 2Nágtatanungán hide tu tolay hide a mágyan hod “Hádya a neenak u anak a magin Hari nu Judio hide? Netan me hod ti Sikatan a lummitaw u biton a tanda nu kákkaenak na. Kanya inumangay kami he para ipeta mi u págsamba me nikuna.”

3Nikuna a nabaheta iye ni Hari Herodes ay naligalig siya pati be u katolayan ti Jerusalem. 4Kanya pinisan na u atanan a pupuno nu saserdote hide sakay u maistu hide nu Kautusan ni Moises. Sakay tinanung na hide “Hádya beman a meenak u Cristo a inpanatu nu Diyos a magin hare nu tolay na hide?” 5Tinábbeg de siya “Tu lugar a Betlehem a sakup ni Judea. Dipo konna he u kinagi nu Diyos tu itod a insulat nu essa a propeta, 6‘U lugar a Betlehem a sakup ti Juda ay mas tanyag nan tu agum a banuwan ti Juda, dipo hod a meenak u puno a mamahala sakay magpospos tu tolay ko hide a Israelita#2:6 Basaán u Micas 5:2. Tu panahun ni propeta Micas u luta a Judea ay nginahanan a Juda.’ ”

7Káttapos a natukuyan iye ni Hari Herodes ay lihim na a pinadulaw u mágkalalaki hide a tolay a gábwat ti Sikatan. Tinukoy na nide ni nikan a lummitaw u biton tánni matukuyan na ni nikan a neenak u anak. 8Sakay pinaangay na hide ti Betlehem sakay imbilin na nide “Kad moy dán, ehyukán moy ti hustu u anak. Pákketa moy nikuna ay ipakapospos moy nikán a pagdaka tánni angay ku be siya bisitaán sakay ipeta ko u págsamba ko nikuna.”

9Káttapos ay limmakad hide. U biton a netan de ti hod tu Sikatan ay netan de dámman. Dimmipalongo u biton nide hanggan immimang tu tapat nu págyanan nu anak. 10Tunay ti saya u mágkalalaki hide a tolay a gábwat ti Sikatan nikuna netan de a immimang u biton. 11Kássáddáp de tu bilay ay netan de u anak a kaguman nu ina na a ti Maria. Limmuhud hide sakay dinumapa bilang pággalang de nikuna. Káttapos ay inluwas de u regaregaro de sakay inyatád de nikuna u regaregaro de a ginto, pasáppot a suub sakay mira#2:11 Tu panahon ni Jesus iye hide a regaregaro ay karapatdapat a iregaro tu essa a hare.. 12Nadid linakad de u iba a dilan a soli tu bansa de dipo binawalan hide nu Diyos tu pamamagitan nu tagináp a dyan dán hide soli ni Herodes.

Gimminan ti Jose ti Egipto a Kaguman u Pamilya Na

13Nadid nikuna nakahektat dán u Mágkalalaki hide a tolay ay pinumeta u essa a anghel nu Panginoon ni Jose tu tagináp na. Sakay kinagi na “Umikát ka dán Jose. Iyangay mo ti Egipto u matina mo sakay dyan kam lumakad hod hanggan awan ko kagiyán niko. Dipo ehyukán ni Herodes u anak para bunuwán.” 14Kanya inumikat ti Jose sakay linumakad hide ti itona a gibi sakay inyangay na u matina na ti Egipto. 15Sakay nágyan hide hod hanggan natay ti Herodes. Nangyari iye para matupad u impekagi nu Panginoon tu propeta na tu itod pa a “Dinulawan ko u anak ko a lumakad ti Egipto#2:15 Basaan tu Oseas 11:1”.

Impabuno ni Herodes U Bábbadit Hide a Anak a Lállake

16Nadid nikuna biyag padla ti Herodes sakay nakalakad dán di Jose ti Betlehem, natukuyan ni Herodes a naessaan siya nu bisita hide a gábwat ti Sikatan. Naiyamut siya a tahod. Kanya inutusan na u sundalo na hide a bunuwán de u atanan a anak a lállake a te idad a duwwa a taon sakay pababa a mágyan ti Betlehem sakay tu palebut na hide a lugar. U nagin giya na tu idad nu anak hide a bunuwán ay ayun tu natukuyan na a kinagi nu mágkalalake hide a tolay tu panahun nu kállitaw nu biton. 17Kanya natupad u kinagi ni propeta Jeremias tu itod a 18“Masaneg tu banuwan a Rama#2:18 U banuwan a Rama ay adeni ti Jerusalem. u mabegsák a sangetan. Sangitan nu apo hide ni Raquel#2:18 Ti Raquel ay u essa a kabanga ni Jacob a ina ni Jose sakay ni Benjamin. Siya u tengiyan nu Judio hide a ina nu banuwan de. u aanak de. Sala de a pahapahaán hide dipo nágkatay dán u anak de hide#2:18 Basaan tu Jeremias 31:15.”

Nagsoli di Jose ti Israel

19Nadid nikuna a natay ti Herodes, ay te essa a anghel nu Panginoon a pinumeta tu tagináp ni Jose hod ti Egipto. 20Kinagi na “Jose umikat ka dán. Angay mu dán isole u páttena mo ti Israel dipo natay dán u gusto a mangbuno tu anak.” 21Kanya inumikat ti Jose sakay nagsoli hide a máttama ti Israel. 22Pero nikuna nabaheta ni Jose a u pinumalit ni Herodes bilang hare ti Judea ay u anak na a ti Arquelao ay nanteng siya a sumoli hod. Sakay binawalan siya nu Panginoon tu pamamagitan nu tagináp kanya immangay siya ti Galilea#2:22 U sakup hide a probinsiya nu bansa a Israel ay Samaria, Galilea sakay Judea.. 23Sakay nágyan hide ti Nazaret a sakup ni Galilea tánni matupad u kinagi nu propeta tu itod pa a “Mangahanan siya a taga Nazaret.”

നിലവിൽ തിരഞ്ഞെടുത്തിരിക്കുന്നു:

Mateo 2: MBJC

ഹൈലൈറ്റ് ചെയ്യുക

പങ്ക് വെക്കു

പകർത്തുക