Lke 22

Bamfumu ya ba-Zwife salaka mfundu ya kufwa Yesu

(Mat 26.1-5; Mke 14.1-2; Yne 11.45-53)

1Mukembo ya Mampa yina ba ke funisaka ve*, yina ba ke bokilaka mukembo ya Paki*, kumaka pene-pene. 2Bamfumu ya banganga-Nzambi* mpe milongisi ya Misiku* vwandaka sosa wapi mutindu bawu ke kufwa Yesu. Kasi bawu vwandaka na boma ya bantu nyonso.

Yuda bakaka lukanu ya kuyekula Yesu

(Mat 26.14-16; Mke 14.10-11)

3Na yina, Satana kotaka na ntima ya Yuda, yina ba ke bokilaka Isekayote, mosi na kati ya bilandi* kumi na zole. 4Yuda kwendaka wisana na bamfumu ya banganga-Nzambi* mpe bamfumu ya mikengi ya Yinzo ya Nzambi* na mutindu yandi lendaka yekula bawu Yesu. 5Bawu kumaka na kilengi mingi, mpe pesaka yandi nsilulu ya kupesa yandi mbongo. 6Yuda ndimaka mpe bandaka na kusosa mayela ya kuyekula Yesu na ntangu ya mbote yina bantu lenda kuzaba ve.

Yesu kudyaka madya ya Paki na bilandi ya yandi

(Mat 26.17-25; Mke 14.12-21; Yne 13.21-30)

7Mukembo ya Mampa yina ba ke funisaka ve* bandaka. Na kilumbu yina bantu ke kufwaka mameme ya fyoti samu na kudya Paki*, 8Yesu fidisaka Pyele na Yowane, mpe zabisaka bawu: «Beno kwenda kubika madya ya Paki yina beto ke kudya.» 9Bawu yufulaka yandi: «Wapi sika nge zola ti beto kwenda kuyidika yawu?» 10Yesu zabisaka bawu: «Ntangu beno ke kota na mbanza, beno ke bwabana bakala mosi yina ke na kunata diyuki ya maza. Beno landa yandi tii na yinzo yina yandi ke kota, 11mpe beno tuba na mfumu ya yinzo ti Mulongisi ke na kuyufula nge: “Wapi sika kele kivinga yina mu ke kudya Paki na bilandi* ya munu?” 12Yandi ke lakisa beno na kibandu ya yinzo, kivinga ya nene yina kele na bima nyonso ya kukubama. Ni kuna beno ke yidika bima nyonso samu na madya ya Paki.» 13Bawu kwendaka mpe talaka mambu nyonso mutindu Yesu zabisaka bawu, mpe bawu yidikaka bima nyonso samu na madya ya Paki.

Madya ya Mfumu

(Mat 26.26-30; Mke 14.22-26; 1Ko 11.23-25)

14Ntangu ngunga lungaka, Yesu kwendaka vwanda na mesa na bantumwa*. 15Yandi zabisaka bawu: «Mu zolaka mingi na kudya madya ya mukembo yayi ya Paki* kintwadi na beno, ntete mu tala mpasi! 16Ya tsyelika, mu ke na kuzabisa beno: Mu ke kudya dyaka yawu ve tii ntangu yawu ke lunga na Kimfumu ya Nzambi.» 17Na yina, yandi bakaka mbungu, tondaka Nzambi, mpe tubaka: «Beno baka mbungu yayi ya vinu, mpe beno kabula yawu beno na beno. 18Ya tsyelika, mu ke na kuzabisa beno: Katuka ntangu yayi, mu ke kunwa dyaka ve vinu tii ntangu Kimfumu ya Nzambi ke kwiza.» 19Na manima, yandi bakaka dimpa. Yandi tondaka Nzambi, bukunaka dimpa, mpe pesaka bawu yawu na kutuba: «Yayi ni nzutu ya munu yina mu me pesa samu na beno. Beno sala mutindu yayi samu na kubambuka munu moyo.» 20Mutindu mosi mpe, na manima ya kudya, yandi pesaka bawu mbungu ya vinu, mpe tubaka: «Mbungu yayi kele ngwisani ya malu-malu yina me salama na menga ya munu yina me mwangana samu na beno. 21Beno tala! Muntu yina ke na kuyekula munu, ke na kudya kintwadi na munu awa na mesa! 22Mwana ya Muntu* ke kufwa mutindu kele luzolo ya Nzambi. Kasi kyadi na muntu yina ke na kuyekula yandi!» 23Na yina, bawu bandaka na kuyufula bawu na bawu, nani na kati ya bawu zolaka sala mambu yina.

Nani me lutila mfunu?

24Bilandi* bandaka na kusolola bawu na bawu na ngolo nyonso samu na kuzaba nani na kati ya bawu lutilaka bampangi mfunu. 25Yesu zabisaka bawu: «Bantinu ya bayinsi ke yalaka bantu ya bayinsi ya bawu, mpe bantu yina kele na bumfumu na bayinsi yina, ke zolaka ti ba bokila bawu “Bantu ya mbote”. 26Kasi ya fwana kuvwanda ve mutindu yina samu na beno. Muntu yina me lutila mfunu na kati ya beno, fwana kuvwanda mutindu muntu yina me lutila ntwenya, mpe muntu yina ke na kutwadisa, fwana kuvwanda mutindu kisadi. 27Nani me lutila mfunu na kati ya muntu yina me vwanda na mesa, mpe muntu yina ke na kusadila bampangi? Mu banza ti ni muntu yina me vwanda na mesa. Kasi munu, mu kele na kati ya beno mutindu muntu yina ke na kusadila beno! 28Beno kele bayina me tatamana kintwadi na munu na bampasi nyonso yina mu talaka. 29Mutindu Tata pesaka munu Kimfumu, munu mpe, mu ke na kupesa beno yawu. 30Na yina, beno ke kudya mpe ke kunwa na mesa ya munu na kati ya Kimfumu ya munu. Beno ke vwanda na bakiti ya kintinu samu na kufundisa bifumba kumi na zole ya Isayeli.»

Yesu zabisaka ti Pyele ke manga yandi

(Mat 26.31-35; Mke 14.27-31; Yne 13.36-38)

31«Simoni, Simoni, kuwa munu! Satana me lomba na kuningisa beno mutindu ba ke ningisaka bambuma ya faline na kati ya kiyengoso. 32Kasi mu me sambidila nge samu ti nge kondwa ve kiminu, mpe ntangu nge ke vutuka na sika ya munu, nge kindisa bampangi ya nge.» 33Pyele zabisaka Yesu: «Mfumu, mu kele ya kukubama na kukwenda kintwadi na nge na boloko, mpe na kufwa kintwadi na nge.» 34Yesu vutulaka: «Pyele, mu ke na kuzabisa nge: Bubu yayi ntete nsusu kuba, nge ke manga munu bambala tatu.»

Mbongo, nkutu mpe mbele ya mvita

35Na manima, Yesu zabisaka bawu: «Ntangu mu fidisaka beno ata kupesa beno mbongo, nkutu, mpe mapapa, yinki kondwaka beno?» Bawu vutulaka: «Ata kima kondwaka beto.» 36Na yina, yandi zabisaka bawu: «Kasi ntangu yayi, muntu yina kele na mbongo fwana kubaka yawu. Mutindu mosi mpe, muntu yina ke na nkutu fwana kubaka yawu, mpe muntu yina ke na mbele ve fwana kutekisa kiyunga ya yandi samu na kusumba mbele. 37Mu ke na kuzabisa beno ti mambu yayi ya Dibuku ya Nzambi fwana kusalama na nzutu ya munu: “Ba tulaka yandi na lutangu ya bimpumbulu.” Ya tsyelika, mambu yina me tadila munu ke na kusalama.» 38Bilandi* tubaka: «Mfumu, tala bambele zole.» Yesu vutulaka: «Ya me lunga.»

Yesu sambilaka na mongo ya bayinti ya olive

(Mat 26.36-46; Mke 14.32-42)

39Yesu basikaka mpe kwendaka na mongo ya bayinti ya olive mutindu vwandaka kifu ya yandi, mpe bilandi ya yandi landaka yandi. 40Ntangu yandi kumaka kuna, yandi zabisaka bawu: «Beno sambila samu ti beno kubwa ve na ntontolo.» 41Na manima, yandi katukaka pene-pene ya bawu, mpe kwendaka mwa ntama. Yandi fukamaka mpe sambilaka 42mutindu yayi: «Tata, kana nge zola, katula munu mbungu yayi ya mpasi#Mat 20.22. Sala luzolo ya nge, kasi luzolo ya munu ve.» [ 43Na yina, mbazi* mosi ya mazulu kwizaka talana na yandi samu na kukindisa yandi. 44Yandi talaka mpasi na ntima mpe sambilaka dyaka na ngolo ya kulutila. Mitoki ya nzutu ya yandi kumaka mutindu mabete ya menga yina vwandaka kubwa na ntoto#22.44 Na babibiliya ya nkaka ya ntama, bibuku 43 tii na 44 kele ve..]

45Ntangu yandi manisaka na kusambila, yandi telamaka mpe vutukaka kisika vwandaka bilandi ya yandi. Yandi kutaka bawu ya kulala samu na kyadi. 46Yandi zabisaka bawu: «Samu na yinki beno ke na kulala? Beno telama mpe beno sambila samu ti beno kubwa ve na ntontolo.»

Binwani kangaka Yesu

(Mat 26.47-56; Mke 14.43-50; Yne 18.3-11)

47Yesu vwandaka zonza ntete ntangu nkonga ya bantu basikaka na ntwala ya yandi. Ni Yuda, mosi na kati ya bilandi* kumi na zole, nataka nkonga yina. Yandi kwendaka pene-pene ya Yesu samu na kufiba yandi. 48Kasi Yesu zabisaka yandi: «Yuda ni na kufiba Mwana ya Muntu* nge ke na kuyekula yandi?» 49Ntangu bayina vwandaka na Yesu talaka mambu yina zolaka salama, bawu yufulaka yandi: «Mfumu, beto lenda kunwana na bambele ya beto?» 50Mosi na kati ya bawu bulaka mbele na kisadi ya nganga-Nzambi ya ntete*, mpe zengaka yandi dikutu ya lubakala. 51Kasi Yesu tubaka: «Beno bika! Ya me lunga.» Yandi simbaka dikutu ya muntu yina, mpe belusaka yandi. 52Na manima, Yesu tubaka na bamfumu ya banganga-Nzambi*, bamfumu ya mikengi ya Yinzo ya Nzambi* mpe bakuluntu ya ba-Zwife yina kwizaka samu na kukanga yandi: «Beno me nata bambele mpe bayinti mutindu ti mu vwandaka kimpumbulu. 53Bilumbu nyonso, mu vwandaka na beno na kati ya Yinzo ya Nzambi*, mpe beno sosaka ve na kukanga munu. Kasi ngunga yayi kele ya beno, mpe ya lulendo ya mpimpa.»

Pyele mangaka Yesu

(Mat 26.57-58,69-75; Mke 14.53-54,66-72; Yne 18.12-18,25-27)

54Na yina, bawu kangaka Yesu. Bawu nataka yandi, mpe kotisaka yandi na yinzo ya nganga-Nzambi ya ntete*. Pyele vwandaka landa bawu mwa manima. 55Ba yidikaka tiya na kati-kati ya ngaanda ya lupangu, mpe Pyele kwendaka vwanda kintwadi na bayina vwandaka yotila tiya. 56Kisadi mosi ya kento talaka Pyele ya kuvwanda pene-pene ya tiya. Yandi sikikaka Pyele meso, mpe tubaka: «Muntu yayi mpe vwandaka kintwadi na Yesu!» 57Kasi Pyele mangaka mpe tubaka: «Kento, mu zaba yandi ve!» 58Na manima ya mwa ntangu, muntu ya nkaka talaka Pyele, mpe tubaka: «Nge mpe, nge vwandaka na bawu!» Kasi Pyele vutulaka: «Ve, ya kele munu ve.» 59Na manima ya ngunga mosi, muntu ya nkaka dyaka tubaka na ngolo nyonso: «Ya tsyelika, muntu yayi vwandaka na Yesu samu ti yandi kele muntu ya Ngalili.» 60Kasi Pyele vutulaka: «Mu zaba ve yinki nge ke na zola kutuba.»

Kaka na ntangu yina, nsusu kubaka. 61Mfumu* balukaka mpe talaka Pyele. Na yina, Pyele bambukaka moyo na mambu yina Mfumu zabisaka yandi: «Bubu yayi, ntete nsusu kuba, nge ke manga munu bambala tatu.» 62Pyele basikaka mpe dilaka mingi.

Ba fingaka mpe bulaka Yesu bikoti

(Mat 26.67-68; Mke 14.65)

63Bantu yina vwandaka keba Yesu vwandaka seka mpe bula yandi. 64Bawu vwandaka kanga yandi lele na kizizi, mpe vwandaka yufula yandi: «Bikula! Nani me bula nge?» 65Bawu vwandaka finga dyaka yandi mingi.

Yesu na ntwala ya kimvuka ya bakuluntu ya ba-Zwife

(Mat 26.59-66; Mke 14.55-64; Yne 18.19-24)

66Ntangu bwisi kutsyaka, bakuluntu ya ba-Zwife, bamfumu ya banganga-Nzambi*, mpe milongisi ya Misiku* vukanaka kisika mosi. Bawu tumisaka ti ba nata Yesu na ntwala ya kimvuka ya bawu ya bakuluntu, 67mpe yufulaka yandi: «Zabisa beto: nge kele Masiya*?» Yesu vutulaka: «Kana mu zabisa beno yawu, beno ke kwikila munu ve, 68mpe kana mu yufula beno kyuvu, beno ke pesa munu mvutu ve. 69Kasi katuka ntangu yayi, Mwana ya Muntu* ke vwanda na lubakala ya Nzambi-Mpungu.» 70Bawu nyonso tubaka: «Na yina, nge kele Mwana ya Nzambi?» Yesu vutulaka: «Beno me tuba yawu, ni munu.» 71Na yina, bawu tubaka: «Beto ke dyaka ve na nsatu ya bambangi! Beto mosi me kuwa mambu yina me basika na yinwa ya yandi!»

നിലവിൽ തിരഞ്ഞെടുത്തിരിക്കുന്നു:

Lke 22: BNT

ഹൈലൈറ്റ് ചെയ്യുക

പങ്ക് വെക്കു

പകർത്തുക