Lke 20

Wapi sika katukaka bumfumu ya Yesu

(Mat 21.23-27; Mke 11.27-33)

1Kilumbu mosi, Yesu vwandaka longisa bantu na kati ya Yinzo ya Nzambi*, mpe vwandaka zabisa bawu Nsangu ya Mbote*. Bamfumu ya banganga-Nzambi* mpe milongisi ya Misiku* kwizaka kintwadi na bakuluntu ya ba-Zwife, mpe 2yufulaka yandi: «Zabisa beto, na lutumu ya nani nge ke salaka mambu yayi, to nani ke pesaka nge lutumu ya kusala yawu?» 3Yesu vutulaka: «Munu mpe, mu ke yufula beno kyuvu kaka mosi. Beno zabisa munu: 4Nani fidisaka Yowane na kubotika bantu? Nzambi to bantu?» 5Kasi bawu bandaka na kusolola bawu na bawu na kutuba: «Kana beto tuba ti ni Nzambi fidisaka Yowane, yandi ke yufula beto: samu na yinki beno kwikilaka yandi ve?» 6Kana beto tuba ti ni bantu fidisaka yandi, bantu nyonso ke kufwa beto na matadi samu ti bawu kwikilaka ti Yowane vwandaka mumbikudi*. 7Na yina, bawu vutulaka: «Beto zaba ve nani fidisaka yandi.» 8Yesu mpe zabisaka bawu: «Munu mpe, mu ke zabisa beno ve na lutumu ya nani mu ke salaka mambu yayi.»

Kingana ya bisadi-bilanga ya vinu ya ntima ya yimbi

(Mat 21.33-46; Mke 12.1-12)

9Na manima, Yesu zabisaka bantu kingana yayi: «Bakala mosi kunaka bilanga ya bayinti ya vinu. Yandi bikaka yawu na maboko ya bisadi-bilanga ya vinu, mpe kwendaka na nzyetolo ya yinda. 10Na ntangu ya kubuka bambuma ya vinu, yandi fidisaka kisadi mosi na sika ya bisadi-bilanga ya vinu samu na kuzwa kikunku ya yandi ya bambuma ya vinu. Kasi bisadi-bilanga ya vinu bulaka kisadi yina, mpe vutulaka yandi maboko mpamba. 11Mfumu ya bilanga ya vinu fidisaka dyaka kisadi ya nkaka. Kasi bisadi-bilanga ya vinu bulaka kisadi yina, fingaka yandi, mpe vutulaka yandi maboko mpamba. 12Yandi fidisaka dyaka kisadi ya tatu. Bawu lwalisaka kisadi yina, mpe bingisaka yandi. 13Na yina, mfumu ya bilanga ya vinu tubaka na kati ya ntima: “Yinki mu ke sala? Mu ke fidisa mwana ya munu yina mu ke zolaka mingi. Mu banza ti bawu ke zitisa yandi.” 14Kasi ntangu bisadi-bilanga ya vinu talaka mwana yina, bawu tubaka bawu na bawu: “Ni yandi ke kuzwa difwa ya bilanga yayi ya vinu. Beto kufwa yandi samu ti bilanga yayi vwanda ya beto.” 15Bawu losaka yandi na ngaanda ya bilanga ya vinu, mpe kufwaka yandi.

«Na yina, yinki mfumu ya bilanga ya vinu ke sala bawu? 16Yandi ke kwiza, mpe ke kufwa bisadi-bilanga yayi ya vinu. Na manima, yandi ke pesa bilanga ya vinu na bisadi-bilanga ya nkaka.»

Ntangu bantu kuwaka mambu yina, bawu tubaka: «Ve, mambu yayi ke salama ve!» 17Kasi Yesu sikikaka meso ya yandi na bawu, mpe tubaka: «Yinki zola kutuba mambu yayi ya Dibuku ya Nzambi:

«“Ditadi yina bitungi-bayinzo losaka

me kuma ditadi ya kulutila mfunu

yina ke na kusimba yinzo nyonso#Mga 118.22.”

18Konso muntu yina ke kubwa na zulu ya ditadi yayi ke pasuka, mpe kana yawu kubwa na zulu ya muntu, yawu ke mwangisa yandi.»

Mpaku ya kufuta na ntinu Sezale

(Mat 22.15-22; Mke 12.13-17)

19Milongisi ya Misiku* mpe bamfumu ya banganga-Nzambi* sosaka na kukanga Yesu na nswalu nyonso, samu ti bawu zabaka ti Yesu tubaka kingana yina samu na bawu. Kasi bawu vwandaka na boma ya bantu. 20Na yina, bawu bandaka na kulanda Yesu bisika nyonso, mpe fidisaka bantu yina vwandaka talana mutindu bantu ya kukwikama na Nzambi. Bantu yina vwandaka sosa na kuzwa dyambu ya yimbi na bampova ya Yesu samu na kuyekula yandi na maboko ya bantu ya luyalu, mpe na mfumu ya kizunga. 21Bawu yufulaka yandi: «Mulongisi, beto zaba ti mambu yina nge ke zonzaka mpe nge ke longisaka kele ya tsyelika. Nge ke swasikisaka bantu ve. Nge ke longisaka na butsyelika nyonso mambu yina Nzambi ke zolaka ti beto sala. 22Na yina, zabisa beto: Beto kele na luve ya kufuta mpaku to ve na ntinu ya Loma?» 23Kasi Yesu bakulaka mutambu ya bawu, mpe zabisaka bawu: 24«Beno lakisa munu Denalya mosi#Mat 18.28. Kizizi mpe nkumbu yina kele ya kusonama na mbongo yayi, kele ya nani?» Bawu vutulaka: «Yawu kele ya ntinu Sezale*.» 25Na yina, Yesu zabisaka bawu: «Beno pesa na ntinu Sezale bima yina kele ya Sezale, mpe na Nzambi bima yina kele ya Nzambi.» 26Bawu lembanaka na kuzwa dyambu ya yimbi na mambu yina yandi zonzaka na ntwala ya bantu nyonso. Kasi bawu yitukaka mingi mpe lendaka dyaka ve na kuzonza samu na mvutu yina Yesu pesaka.

Kyuvu na yina me tadila mvumbukulu ya bantu ya kufwa

(Mat 22.23-33; Mke 12.18-27)

27Mwa ndambu ya ba-Saduse* kwizaka na sika ya Yesu. (Ba-Saduse kele bantu yina ke tubaka ti bantu ya kufwa ke vumbuka ve na lufwa.) Bawu yufulaka yandi mutindu yayi: 28«Mulongisi, Moyize pesaka beto musiku yayi: Kana bakala ya kukwela kufwa ata kubuta bana na kento ya yandi, leki to yaya ya yandi fwana kukwela mufwidi yina samu na kubutila yandi bana#Mba 38.8; 2Mu 25.5-6. 29Kasi ya vwandaka na bampangi nsambwadi. Mpangi ya ntete kwelaka kento mpe kufwaka ata kubuta bana na kento yina. 30Mpangi ya zole mpe kwelaka kento yina, mpe kufwaka ata kubuta mwana, 31mutindu mosi mpe mpangi ya tatu mpe bampangi ya nkaka yina bikanaka, kufwaka ata kubuta mwana. 32Na manima, kento mpe kufwaka. 33Na yina, ntangu bantu ya kufwa ke vumbuka na lufwa, yandi ke vwanda kento ya nani na bawu nyonso nsambwadi, samu ti bawu nyonso kwelaka yandi?» 34Yesu vutulaka: «Babakala mpe bakento ya yinza yayi ke kwelanaka. 35Kasi babakala mpe bakento yina Nzambi ke tala ya kulunga na kuvumbuka na lufwa mpe na kuzinga na yinza yina ke kwiza, ke kwelana ve. 36Bawu lenda kufwa dyaka ve samu ti bawu me kuma mutindu bambazi*. Bawu kele bana ya Nzambi samu ti bawu me vumbuka na lufwa. 37Moyize lakisaka na pwelele nyonso ti bantu ya kufwa ke vumbuka na lufwa ntangu yandi vwandaka zabisa mambu yina lutaka na divunda ya tiya. Yandi bokilaka Mfumu* na “Nzambi ya Abalayami, Nzambi ya Isaaki, mpe Nzambi ya Yakobi#Kbk 3.2,6.”» 38Yesu tubaka dyaka: «Nzambi kele ve Nzambi ya bantu ya kufwa, kasi ya bantu ya moyo samu ti bawu nyonso kele moyo samu na yandi.» 39Na yina, mwa ndambu ya milongisi ya Misiku* bakaka kinzonzi, mpe tubaka: «Mulongisi, nge me zonza mbote.» 40Bawu vwandaka dyaka ve na ngolo ya kuyufula yandi byuvu ya nkaka.

Masiya mpe Davidi

(Mat 22.41-46; Mke 12.35-37)

41Yesu zabisaka bawu: «Wapi mutindu bantu lenda kutuba ti Masiya* kele mwana ya Davidi? 42Ya tsyelika, yandi mosi Davidi sonikaka na kati ya Dibuku ya Mikunga:

«“Mfumu* Nzambi me tuba na Mfumu ya munu:

Vwanda na lubakala ya munu

43tii ntangu mu ke kumisa bambeni ya nge

kisika ya kutula makulu ya nge#Mga 110.1.”»

44«Kana yandi mosi Davidi ke na kubokila yandi “Mfumu”, wapi mutindu Masiya lenda kuvwanda dyaka mwana ya Davidi?»

Bankebosolo samu na milongisi ya Misiku

(Mat 23.1-36; Mke 12.38-40)

45Mutindu bantu nyonso vwandaka kuwa yandi, Yesu tubaka na bilandi ya yandi: 46«Beno sala keba na milongisi ya Misiku*. Bawu ke zolaka na kutambula na binkuti ya yinda, mpe ti bantu pesa bawu bambote ya buzitu na bisika ya mfunu ya mbanza. Bawu ke zolaka na kuvwanda na bakiti ya ntete na bayinzo ya lusambulu ya ba-Zwife*, mpe bakiti ya buzitu na mikembo ya nene. 47Bawu ke bakaka bimvwama nyonso ya mifwidi ya bakento, mpe ke salaka lusambulu ya yinda samu ti bantu tala bawu. Nzambi ke pesa bawu kitumbu ya ngolo.»

നിലവിൽ തിരഞ്ഞെടുത്തിരിക്കുന്നു:

Lke 20: BNT

ഹൈലൈറ്റ് ചെയ്യുക

പങ്ക് വെക്കു

പകർത്തുക