Wenía 4
4
Caimni ã take yamamati ivo yoã
1Adão, ãwẽ aĩ tasakoĩanamãsho, tooinái. Askái ãwẽ venevake pakémaĩnõ “Caim” akĩ aneki.#4.1 Hebraicõ vana “Caim” ikíro “viá” keská “Yavepa ea take akatõsho, vake venevake ẽ via”, ikí vanai Eva. 2Askásho txipo venevake wetsa meraósho, “Abel” akĩ aneki, Caimni take. Abelro txivo vesoya kanii, askámaĩnõ, Caimro piti merámaiya kanii akávo.
3Askávai txipo shavá wetsã, Caimni Yavé piti vaná ãwẽ merámarasĩ anõ mekímanõ iinã vishõvaĩki. 4Askámaĩnõ, ãwẽ take ivõro txivo vake vevoke ivorasĩ richkivaíki nami sheniyãwa kavẽsho kawivaĩshokĩ. Aská ashõatõsho, Yavé, Abel, ãwẽ ashõa akámẽ mekíi. 5Askámaĩnõ Caim, ãwẽ ashõa aká ivomẽro mekíma. Aská oĩinã vesó ichnákesho nii.
6Ãwẽ aská oĩinã Yavepa nĩkãki. “Awesainã vesó ichnákesho mĩ niárá? 7Roai mĩ nimaĩnõ mia ẽ atirvi roa akĩ. Askámaĩnõ anõ itima ivo chinãne ikí mĩ niáro oĩtso, ichnátõ mia manáai, mĩ chinã ichná atximaroa”, akĩ.
8Anosho ãwẽ aská akasmẽkĩ, ãwẽ take “wai matxi nõ oĩnõ”, iinã parãsho ewevaĩki. Askávaíki, wai matxi nokókaĩsho ãwẽ take yamamakĩ.
9Ãwẽ aská amaĩnõ Yavepa nĩkãki. “Mĩ takerõ?” ãwẽ aská akatõsho, “aavĩ ea oĩmakatá, ẽ take vesosho niámarívi ea”, akĩ revíki.
10Ãwẽ askámaĩnõ vanaóki. “Mĩ aweskárá? Mĩ takẽ imi maĩ rakásho txakar iki vanaai. Ea ãwẽ kenáa ẽ nĩkãaikatá. 11Mĩ take mĩ aská akatõsho, ramaro naaivo mai shavapashõ mia ma veí netãnáai, maĩ mĩ takẽ imi peavenãtõsho. 12Ramaro aská. Ãatõ mia ishõotĩpá, piti mĩ merámaa. Onésho, shavapa nikõnkoĩsma ivo yora mia niá ikatsai”, akĩ.
13Caim Yavepa aská akatõsho, vanai. “Ea mĩ veí netãmaĩnõ, ea tenetĩpa. 14Naaivo mai shavapashõ ea mĩ kayãkõai, ramaro kayakavi ea niotĩpa. Yora onéshoi, mia onéshoi akí ẽ nikatsai. Askái ẽ niánamãsho, yora wetsãse merasho ea yamamakatsai”, ikí.
15Askái ãwẽ vanamaĩnõ Yavepa revíki. “Askáma, mia askátĩpa. Yora mia yamamaiya ivoro, minõsho aapa yorarasĩ 7 vezes kopitaókatsavo”, akĩ. Aská ashõ, anõsho onãti kene netãsho eneki, yorã yamamamísi iinã. 16Anosho, Yavé enevaíki, Node#4.16 Hebraicõ vana “Node” ikíro “anõ nikonkoĩma ivo mai” maikiri niakei kati, Eden wainamãsho vari oátõ.
17Askái aaivo maĩ niakei kashõ, ãwẽ vake merasho “Enoque” akĩ aneki. Askái ano nikĩ aaivo cidade ãwẽ vakẽ anesevi netãki “Enoque”, akĩ. 18Askámaĩnõ, Enoquero Irade meraya. Iradero Meujael meraya. Meujaelro Metusael meraya. Metusaelro Lameque meraya aká.
19Askánamãsho, Lamequẽ shavo ravé ashõ ninivarãki. Ãwẽ aĩ wetsã anero “Ada”, wetsa ivõ anero “Zilá” aká. 20Anosho Ada toáyai, Jabal meraki. Naaivo Jabalro, ãatõpari peshé akátõ ato yosĩi, iná revomatõ ato yosĩi akĩ. 21Askámaĩnõ ãwẽ take txipokéro Jubal. Aaro ãatõpari rewe maneatõ ato yosĩi, harpa maneatõ ato yosĩi akaya. 22Askávai Zilá toáyaói, Tubalcaim meraki. Ãatõ mee itiro mane awerasĩ shovimaiya. Ãwẽ aweshavõ anero “Naamá.”
23Anosho Lamequẽ ãwẽ aĩvorasĩ, Ada, Zilá aká kenasho ato yoãshokĩ. “Ẽ aĩvorasĩní, mato ẽ yoãshonõ nĩkãi verína. Yorã ea tsewe amaĩnõ ẽ yamamaai, veronechtamẽkĩ. 24Caim yamamashõ, yora 7 vezes kopitái atõ keyómaĩnõ, ea yamamashõro yora 77 vezes kopitái keyóorívi”, ato akĩ.
Sete vakemtá ivo yoã
25Askávai txipo, Adãonĩ Evã vake venevake wetsa meraósho, ãwẽ pakémaĩnõ “Sete”, akĩ anesho, vanai. “Yové Koĩni vake wetsa ea inãóai. Caimni ea yamamakãchna ivo ẽ vená aoai”, ikí Eva.#4.25 Hebraicõ vana “Sete” ikíro “Yavepa inãai” keská 26Anosho Setẽ arí venevake merasho, Enos akĩ aneki. Askái aatiã yorarasĩ Yavepa anemẽ kenái txitavíi.
നിലവിൽ തിരഞ്ഞെടുത്തിരിക്കുന്നു:
Wenía 4: YKV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Active: © Wycliffe Bible Translators, Inc. All rights reserved
