Wenía 1
1
Mai shoviti ivo yoã
1Txitavíki, Yové Koĩni naí shavá, mai shavá akápari shovimakĩ. 2Mai tanatĩpa rakáa, ãwẽ awe yama, vakíchise tsaóa. Askánamã Yové Koĩni Chinã waka matxise ronóa. 3Askánamãsho Yové Koĩ, “shaváiná”, ãwẽ imaĩnõ, shaváinái. 4Aská ashõ ãwẽ oĩa, roaka oĩki. Shavá, vakíchi aká ãwẽ pashkavakĩa. 5Aská ashõ, shavá aneki “variké”, akĩ aneki. Vakíchi anekiro “yamé”, akĩ aneóki. Askámaĩnõ, yamékawãvai, shavákawãti, anõsho shavá txitavía ivo iti.#1.5 Hebraicõ vana “yamékawãvai shavákawãti” ikíro shavá westíkase tanáti.
6Askávai txipo, vanainaói. “Anõ verák ati nẽenõ, waka ave teanõ. Waka wetsaro, aa matxi rakãi, wetsaro aa teró rakãi avévakĩnõ”, ikí vanai. 7Aská akĩ anõ verák ati nẽeki. Anõsho waka wetsa aa matxi rakãi, wetsaro aa teró rakãi avévakĩki. Ãwẽ aská aká, askái. 8Aská ashõ anõ verák ati ivo aneki, “naí shavá”, akĩ aneki. Askámaĩnõ, yamékawãvai, shavákawãti, anõsho shavá ravévakĩ ivo iti.
9Askávai vanainaói. “Naa mai shavapa waka rakákoĩkéna. Waka, mai aká ave pesokoĩkénõ”, ikí. Askái ãwẽ vanamaĩnõse, ãwẽ chinã keskái iyakéi. 10Aská avaikĩ “mai”, akĩ aneki. Askámaĩnõ waka rakãkoĩkevaíki anekiro “waka kayarasĩ”, akĩ aneóki. Aská ashõ ãwẽ oĩa, roaka oĩki. 11Askávai, “Maĩsho koayavo õsi õsipa ave shovinõ”, ikí. Askái ãwẽ vanamaĩnõse, ãwẽ chinã keskái iyakéi. 12Maĩsho koayavo õsi õsipa shovii. Aská akĩ shovimashõ ãwẽ oĩa, roaka oĩki. 13Askámaĩnõ, yamékawãvai, shavákawãti, anõsho 3 shavá ivo iti.
14Askávai, Yové Koĩ vanainaói. “Naĩ masosho naóyavorasĩ masõnõ, anõsho shavá, yamé, shavá tekía, vari shavá tekía aká tanati.#1.14 Hebraicõ vanaro wanĩ txinĩ, vari txinĩ, oi txinĩ, vimi txinĩ aká keská ã yoã. Wetsã chinãro Israel yorarasĩ anõ saí iti ivo 15Askásevi akĩ mai shavá naómái ave anõvo”, ikí. Askái ãwẽ vanamaĩnõse, ãwẽ chinã keskái iyakéi. 16Askáki naóya ravévakĩ anipa shovimakĩ, naó anipa ivoro shavá naómái, naó animase ivoro yamé naómái akĩ. Aská akĩ ichirasĩ shovimaói. 17Aská akĩ katsése shovimashõ, naí shavapa masõki, anõsho mai shavá naómái, 18shavá, yamé, shavá tekía, varishava tekía aatii tanati. Aská ashõ ãwẽ oĩa, roaka oĩki. 19Askámaĩnõ, yamékawãvai, shavákawãti, anõsho 4 shavá ivo iti.
20Askávai vanainaói. “Enẽ yoinavorasĩ wakateãtimanõ. Peiyavo shovimaónõ”, ikí. 21Aská akĩ enẽ yoini venepavo shovimaí, ãwẽ potochta shovimaí akĩ. Askávaíki yoini peiyavorasĩ õsi õsipa shovimaóki. Aská ashõ ãwẽ oĩa, roaka oĩki. 22Aská avaikĩ vana roapa atomẽ netãki. “Revoi, ene shavátiótsoma. Yoini peiyavorasĩní, revoótsoma”, akĩ. 23Askámaĩnõ, yamékawãvai, shavákawãti, anõsho 5 shavá ivo iti.
24Askávai, “naa mai shavapa shokoa yoini õsi õsipavo, iná ati, nĩi shokoya, maĩ noyõ ikiyavo, maĩ meshoyavo akárasĩ ave shovinõvo”, akĩ. Askái ãwẽ vanamaĩnõse, ãwẽ chinã keskái iyakéi. 25Aská akĩ nĩi yoini, iná ati ivo yoini, maĩ noyõ ikiyavo, maĩ meshoyavo, aká õsi õsipakĩ shovimakĩ. Aská ashõ ãwẽ oĩa, roaka oĩki.
26Askávai, “ramaro yora nokẽ yora vimaki, noke keská akĩ nõ shovimanõ. Ãatõ enẽ yoinavo, yoini peiyavo, iná ati, maĩ noyõ ikiya, maĩ meshoya akárasĩ katseki ave ivonõ”, ikí. 27Aská akĩ ãwẽ yora vimaki, yora shovimakĩ. Aa keská akĩ vene, aĩvo aká shovimakĩ.
28Aská akĩ, shovimakĩ mashtevaĩvaíki vana roapa ivo atomẽ netãki. “Revotsoma. Maitioi peás itsoma. Enẽ yoinavo, yoini peiyavo, maĩ noyõ ikiyavo, maĩ meshoyavo, aká vesosho shokotsoma”, ato akĩ. 29Aská ashõ ato vana aoki. “Maĩsho koayavo õsi õsipa mato ẽ ashõai, naaro matõ pitivere. 30Askámaĩnõ, mani peirasĩro, maĩ yoinavo, yoini peiyavo, maĩ noyõ ikiya, maĩ meshoya akárasĩni pitivere”, ato akĩ. Askái ãwẽ vanamaĩnõse, ãwẽ chinã keskái iyakéi. 31Aská akĩ mashtevaíki ãwẽ oĩa, roa roaka oĩki. Askámaĩnõ, yamékawãvai, shavákawãti, anõsho 6 shavá ivo iti.
നിലവിൽ തിരഞ്ഞെടുത്തിരിക്കുന്നു:
Wenía 1: YKV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Active: © Wycliffe Bible Translators, Inc. All rights reserved
