लुका 22
22
येसुके धाराइके यहुदा सहमत भइल
(मति २६:१-५; मर्कुस १४:१-२,१०-११; युहन्ना ११:४५-५३)
1सोडा नइजेमेसाल रोटि खइलाहार पाब्नि नजिकइ आइपुग्ल रहइ। इख्राके यहुदिसबेइ निस्तार पाब्नि कताहात्। 2बड्क पुजेहेरिसब र धर्मगुरुसबेइ येसुके कस्के मारिके कइकुन मउका खोज्तिन रहत तर मानुससाङ उसब डारातेरत।
3उहइबेलायँ बाह्र जेना चेलासबमद्धे यहुदा इस्करियोत कलारक मनयँ सइतान पोस्ल। 4उहाइ बड्क पुजेहेरि र मन्दिर रुङ्लार हाकिमसब्कलघि जाइकुन येसुके कस्के धाराइके सक्तम कइकुन सरसल्लाहा कर्ल। 5हसे इसे सुनिकुन् उसब खुसि भइकुन् उख्राके पइसा देइके कबुल कर्ल। 6यहुदा सहमत भइल, र मानुसक भिड निजभइल बेलायँ सुटुक्क येसुके धाराइदेइके मउका खोजिके थाल्ल।
निस्तार पाब्निक लागि तयार कर्ल
(मति २६:१७-३०; मर्कुस १४:१२-२६; युहन्ना १३:२१-३०; १ कोरिन्थि ११:२३-२५)
7सोडा नइजेमेसाल रोटि खइलाहार निस्तार पाब्निक बेलायँ भेडाक पाठाके भोक चाढाइके पोर्तेरहइ। 8हसे येसुइ पत्रुस र युहन्नाके यस्के कइकुन पाठाइकेभइल, “जाइकुन हाम्र लागि निस्तार पाब्निक भोज तयार पारउ।”
9उसबेइ ओनेन्के पुछ्ल, “हामे इसे भोज कुछिका तयार पारिके?”
10ओनेनेइ उसब्के कहिकेभइल, “तोहेसब सहरयँ पोस्लपाछु गाग्रियँ पानि बोकिकुन जाइराख्ल एक जेना मानुस भेट्ताउ र उसे जोनो घरयँ पोसित उछिसमन उक्रइ पाछु-पाछु जाओ। 11जोनो घरयँ उसे पोसित, उहइ घरक मालिकके कहुक्, ‘मेर चेलासाङ बोसिकुन निस्तार पाब्निक भोज खइलाहार पहुना कोठा कुछिका बाटइ?’ कइकुन गुरुइ पुछिकेभइल बाटत। 12उहाइ तेउह्रासब्के उप्रक तालायँ साजाइकुन राख्ल बड्क कोठा देखाइदेइत, उछिका नइ भोज तयार पारउ।”
13हसे उसब जइल र येसुइ कइकेभइलजस्न सभइ कुरा पाउल, उसब निस्तार पाब्निक भोज उछिका नइ तयार पार्ल।
प्रभु-भोज
(मति २६:२६-३०; मर्कुस १४:२२-२६; १ कोरिन्थि ११:२३-२५)
14हसे भोज खइलाहार बेला भइलपाछु येसु आफ्न प्रेरितसबसाङ खाइके बोसिकेभइल। 15येसुइ उसब्के कहिकेभइल, “मोइ दुख भोगिकेकते आघुहिँ तेउह्रसाङ निस्तार पाब्निक इसे भोज खाइके बड्क इच्छा कर्ल रहम। 16किकेकने मोइ तेउह्रासब्के कहतम्, परमेसोरक राज्जेयँ इसे हामे खाइके लाग्ल भोजक अर्थ पुरा नइजेभइलसमन मोइ फेरि नाखाम।”
17उपाछु येसुइ कचुरा लेइकेभइल र परमेसोरके धन्यबाद चाढाइकुन कहिकेभइल, “इसे लेओ र तोहेसब सभुनि बाटिकुन खाओ। 18किकेकने मोइ तेउह्रासब्के कहतम्, परमेसोरक राज्जे नइजेअइलसम्मन आबेसे मोइ फेरि अङ्गुरक मोद नाइपिओम।”
19हसे येसुइ रोटि लिकुन, परमेसोरके धन्यबाद चाढाइकुन रोटि टुक्राइकेभइल र चेलासब्के यस्के कहतिन् देइकेभइल, “तेउह्रासब्के देल इसे रोटि मेर देहि हखइ। आबेसे मेर सम्झनाक लागि खइलाहार करउ।” 20ओसिनकरिकुन खाइ सक्लपाछु ओनेनेइ कचुरा लेइकेभइल र कहिकेभइल, “इसे कचुरा तेउह्रसब्क लागि बोहाल मेर रकतयँ बाध्ल लओ बाचा हखइ।
21“तर चाहुक्, मेराके धाराइदेलार मानुस मेरइसाहिन टेबुलयँ खाइके बोस्ल बाटइ। 22किकेकने परमेसोरक इच्छा अनुसार मानुसक छावा जाइकेइ पोरित, तर धिक्कार उसे मानुसके, जोनेइ मानुसक छावाके धोका देइत।”
23इसे कुरा सुनिकुन् मुक्खे चेलासबेइ यस्न काम कर्लाहार कोनो हखइ? कइकुन एक्टाइ अर्कके पुछिकेथाल्ल।
सभइसे बड्क कोनो हखइ?
(मति २०:२५-२८; १९:२८; मर्कुस १०:४२-४५)
24उपाछु चेलासबमद्धे सभइसे बड्क कोनो भइलाहार कइकुन उसब्क माझयँ बिबाद भइके लाग्ल। 25येसुइ उसब्के कहिकेभइल, “सन्सारक राजासबेइ चाहिँ आफ्न जनताउप्र राज्जे कर्ताहात् र जोनेइ उसबउप्र सासन कर्ताहात् अरुइ उसब्के राम्र कर्लाहार मानुस कताहात्। 26तर तोहेसब चाहिँ ओस्नइ भइकेनाभइ। तोहेसबमद्धे सभइसे बड्क भइके खोज्लाहार चाहिँ सभइसे नान्हि भइकेपरित र अगुवा भइलारइ चाहिँ सेवा करुस्। 27किकेकने सभइसे बड्क कोनो हखइ? खाइके बोस्लाहार कि खाइके देलाहार कोनचाहिँ बड्क हखइ? खाइके बोस्लाहार बड्क नइजे से? तर चाहुक्, मोइ त तेउह्रसब्क माझयँ खाइके देलाहार जस्नइ भइल बाटम्।
28“तोहेसब मेर सभइ दुखक बेलायँ मेराके साथ देल। 29जस्के मेर बुबाइ मेराके सासन कर्लाहार अधिकार देइकेभइल र मोइ पुनु तेउह्रासब्के अधिकार देतम। 30मेर राज्जेयँ तोहेसब मेरसाङ टेबुलयँ खइताउ र पिउताउ, हसे सिहासनयँ बोसिकुन इस्राएलक बाह्रइ खलकके न्याय कर्ताहाउ।
पत्रुसेइ येसुके इन्कारकरित कइकुन कहल
(मति २६:३१-३५; मर्कुस १४:२७-३१; युहन्ना १३:३६-३८)
31“उपाछु येसुइ कहिकेभइल, ‘सिमोन, ए सिमोन सुनुक्, गहुँके फट्किकुन भुसा छुटेल जस्नइ, करिकुन तेउह्रासब्के मेरासे छुटेइके लागि सइतानेइ अनुमति माङ्ल बाटइ। 32तर मोइ तेर बिस्वास झुनडगमगाउस कइकुन तेर लागि पार्थाना करिदेल बाटम्। तोइ फेरि मेरलघि फर्कलपाछु तेर भाहिरसब्के पुनु बिस्वासयँ बलियो बानाइकेपरित।’”
33पत्रुसेइ येसुके कहल, “हे प्रभु, मोइ तेउह्रसाङ झेलखानायँ जाइके र मोरिकेसमेत तयार बाटम्।”
34हसे येसुइ कहिकेभइल, “पत्रुस मोइ साच्चिकइ तेह्राके कहतम्, तोइ कालु बेहेन मेराके नाचिनम कइकुन भाले बास्लारकते आघु तिन पल्टसमन इन्कार कर्तस।”
पइसा, झोला र तरबार
35येसुइ चेलासब्के कहिकेभइल, “जब मोइ तेउह्रासब्के झोला, जुत्ता, र पइसा केहाउ पुनु नदेइकुन पाठाल, किति तेउह्रासब्के केहाउ कुराक खाँच भइल?”
उसबेइ कहल, “अहँ, निजभइल।”
36येसुइ कहिकेभइल, “आबे चाहिँ पइसा भइलारइ पइसाक थइलि बोकुस, झोला भइलारइ झोला बोकुस हसे तरबार नइजे भइलारइ आफ्नि होर्लार लुगा बेचिकुन एक्टा तरबार किनुस्। 37किकेकने मोइ तेउह्रासब्के कहतम्, धर्मक कितापयँ ‘ओनेन् अपराधिसाङ गनिकेभइल’ कइकुन लेख्ल कुरा मेर जिबनयँ पुरा भइके नइ पोरित। साच्चिकइ मेर बारेयँ लेख्ल कुरा पुरा भइराख्ते बाटइ।”#यसइ ५३:१२
38तब चेलासबेइ कहल, “हे प्रभु, चाओ, इछिका दुक्टा तरबार बाटइ।”
येसुइ कहिकेभइल, “यत्का भइने पुगित।”
जइतुन डाँडायँ येसुक पार्थाना
(मति २६:३६-४६; मर्कुस १४:३२-४२)
39सद्देहुन जस्नइ येसु बाहार निस्किकुन जइतुन डाँडायँ जाइकेभइल र चेलासब पुनु ओनेन्साङ पाछु-पाछु जइल। 40उसे ठाउयँ पुग्लपाछु ओनेनेइ उसब्के कहिकेभइल, “जाँचयँ झुनपरुस कइकुन तोहेसब पार्थाना करिरहो।”
41येसु लगभग तिस मिटर टाढो जाइकुन ठेउनो धसिकुन पार्थाना करिकेभइल। 42ओनेन् कहिकेभइल “हे बुबा, तेउह्र इच्छा भइने, इसे दुखक कचुरा मेराकमाटे हाटाइदेओ। मेर इच्छायँ नइजे, तर तेउह्र इच्छा पुरा भउस्।” 43हसे सोर्गकमाटे एक्टा सोर्गदुत आइकुन येसुके सहलार सक्ति देल। 44ओनेन्क मन दुखइ भरिलगुनेइ ओनेन् झन धेरइ पार्थाना करिकेभइल। ओनेन्क पसिना रकतक बड्क-बड्क थोपाजस्नइ भुइयँ झर्ल।
45येसु पार्थाना सकाइकुन चेलासब भइल ठाउयँ फर्किकुन अइतेखना उसब्के सोकेइ हरेइकुन निन्दाइराख्ल भेटिकेभइल। 46ओनेनेइ उसब्के कहिकेभइल, “तोहेसब किके सुतिराख्ल बाटउ? उठउ र जाँचयँ नाइपरिके लागि पार्थाना करउ।”
येसुके धर्ल
(मति २६:४७-५६; मर्कुस १४:४३-५०; युहन्ना १८:३-११)
47येसु बोरातिन-बोरातिन मानुसक एक्टा भिड उछिका आइपुग्ल। बाह्र जेना चेलामद्धे एक जेना यहुदा इस्करियोतचाहिँ उसब्क आघु-आघु अइल। हसे येसुके चुमिके ओनेन्क नजिकइ जइल। 48येसुइ उख्राके कहिकेभइल, “यहुदा, किति तोइ मानुसक छावाके चुमिकुन धोका देतस?”
49जब येसुसाङ भइल चेलासबेइ उछिका भइलाहार डाराउनो देखिकुन कहल, “प्रभु, किति हामे तरबार चालाहुँ?” 50हसे उसबमद्धे एक जेनाइ सभइसे बड्क पुजेहेरिक नोकरके तरबारेइ हानिकुन उक्र दाइने कान च्वाट्टइ काटिदेल।
51तर येसुइ कहिकेभइल, “भइल, यस्न झुनकर!” हसे ओनेनेइ उसे मानुसक कान छिइकुन निक पारिकेभइल।
52येसुक बिरोद्धयँ अइलाहार चाहिँ बड्क पुजेहेरिसब, मन्दिर रुङ्लार हाकिमसब र अगुवासब्के ओनेन् कहिकेभइल, “किति मोइ डाकु हखम से? तोहेसब मेराके धरिके लउह्रि र तरबार लिकुन अइल बाटउ? 53मन्दिरयँ तेउरसबसाङ मोइ दिन-दिननइ रहम। त तोहेसब मेर बिरोधयँ धरिके उसे बेलायँ त आँट नइजेकर्ल! तर आबे तेउह्रसब्क काम कर्लाहार बेला अइल र आन्धारघुसक सक्तिइ राज्जे करित्।”
पत्रुसेइ येसुके इन्कार कर्ल
(मति २६:५७-५८,६९-७५; मर्कुस १४:५३-५४,६६-७२; युहन्ना १८:१२-१८,२५-२७)
54मानुससबेइ येसुके धरिकुन सभइसे बड्क पुजेहेरिक घरयँ लेज्ल। पत्रुस पुनु टाढोहिँसे ओनेन्क पाछु-पाछु लाग्ल। 55उछिका मानुससब आङ्नाक माझयँ आगि बारिकुन ताप्तिन बसिराख्ल रहत। पत्रुस पुनु उसबसाङ जाइकुन बोस्ल। 56पत्रुसके आगि तापिराख्ते देखिकुन एक्टि नोकर्निइ झकेइकुन चाहातिन् कहलि, “इ मानुस पुनु येसुसाङ रहइ।”
57तर पत्रुसेइ यस्के कइकुन इन्कार कर्ल, “ए बइनि, मोइ ओनेन्के नाचिनम।”
58फेरि एकछिनपाछु अर्क एक जेनाइ उख्राके देखिकुन कहल, “तोइ त उसब्क साङ्घाति हखस् नि?”
तर पत्रुसेइ कहल, “ए भाइ, अहँ, मोइ त नइजे!”
59लगभग एक घन्टा पाछु अर्क एक जेना मानुसेइ यस्के कहल, “पक्का पुनु इसे मानुस येसुसाङ रहइ, किकेकने इसे पुनु गालिलि रलाइ।”
60तर पत्रुसेइ कहल, “ए मानुस तोइ किति कतस, मोइ त नाचिनम!”
उसे बोरातिन-बोरातिन भाले बाज्ल।
61हसे येसु प्रभुइ फर्किकुन पत्रुसके चाहिकेभइल। “आजु भाले बाजिकेकते आघु तोइ मेराके तिन पल्ट इन्कार कर्तस” प्रभुइ कहिकेभइल बचन पत्रुसेइ सम्झल। 62हसे उसे बाहार निस्किकुन धुरु-धुरु रोउल।
येसुके अपमान कर्ल
(मति २६:५८-६८; मर्कुस १४:५५-६५; युहन्ना १८:१९-२४)
63येसुके रुङ्लार मानुससबेइ ओनेन्के गिजेल, र पिट्ल 64हसे ओनेन्क आँखि ढाकिदिकुन पिट्तिन पुछ्ल, “तोइ अगमबक्ता हखसकने ल कहुक्, तेह्राके कोनेइ पिट्ल?” 65यसिन करिकुन् उसबेइ ओनेन्क बिजेत कर्तिन धेरइ निजराम्र कुराइ हप्काल।
बड्क सभायँ येसुके आन्ल
(मति २६:५९-६६; मर्कुस १४:५५-६४; युहन्ना १८:१९-२४)
66उजुङ भइल बित्थिकइ यहुदि अगुवासब, धर्मगुरु र बड्क पुजेहेरिसब जम्मा भइल। उसबेइ येसुके बड्क सभायँ लेज्ल र कहल, 67“तोइ मुक्ति देलाहार राजा ख्रिस्ट हखस कने हाम्राके कहुक्।”
येसुइ जबाफ देइकेभइल, “मोइ कने पुनु तोहेसब नापत्तेओ, 68हसे मोइ प्रस्न कर्ते पुनु तोहे जबाफ नादेओ। 69तर आबेसे मानुसक छावा सर्बसक्तिमान परमेसोरक सक्तिक दाइनेपट्टि बोसित।”
70उसब सभुनि कहल, “ओसेकने किति तोइ परमेसोरक छावा हखस त?”
ओनेनेइ जबाफ देइकेभइल, “तोहेसब कहल जस्नइ मोइ उहइ हखम।”
71येसुक कुरा सुनिकुन् उसबेइ कहल, “अरु मानुसक साछि आबे हाम्राके किति करिके चाहित र? इक्रइ मुहुकमाटे सुनिसक्ल।”
നിലവിൽ തിരഞ്ഞെടുത്തിരിക്കുന്നു:
लुका 22: DRY
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2024 (Active), Mother Tongue Translators Society and Wycliffe Bible Translators, Inc. All rights reserved.
