लुका 14

येसु फरिसिक घरयँ

1येसु एक नात्‍लिक-दिनयँ नेउता पाइकुन फरिसिसब्‍क एक जेना अगुवाक घरयँ खाइके जाइकेभइल। उछिका ओनेन्‌के जम्‍मा भइल फरिसिसबेइ झकेइकुन चाहातिन् रहत। 2उछिका येसुक आघु एक जेना हात-गोड फुल्‍ल मानुस बसिराख्‍ल रहइ। 3येसुइ फरिसि र धर्‌मगुरुसब्‍के पुछिकेभइल, “किति धर्‌म-कानुन अनुसार नात्‍लिक-दिनयँ मन्‍देलके निक पारिके भइत कि नाभओइ?”

4तर उसबेइ केहाउ निजकल। हसे ओनेनेइ मन्‍देलके छिइकुन, निक पारिकुन पाठाइकेभइल। 5उपाछु येसुइ उसब्‍के कहिकेभइल, “नात्‍लिक-दिनयँ तोहेसब मद्‌धे कोक्रउ छाहोक-छाहिक वा गाइ-बरत इनारयँ पोर्‌नेपार किति उख्राके ओख्‍निहिँ नानिस्‍काओ र?”

6हसे उसबेइ केहाउ जबाफ देइके निजसक्‍ल।

आफुके बड्‌क नाठानिके

7येसुइ उछिका अइलाहार पहुनासबेइ मुक्‍खे-मुक्‍खे ठाउ छान्‍ल देखिकुन काथाकमाटे कहिकेभइल, 8“कोक्रउ बिहायँ तोहेसब जइनेपार मुक्‍खे ठाउ छानिकुन झुनबोसुक। तहेसबकते बड्‌क मानुसके पुनु नेउतल हबाहाइ। 9उसे आइपुग्‍तेखना नेउता देलाहारइ ‘इनेन्‌के ठाउ देओ’ कइकुन तेह्राके बोस्‍ल ठाउकमाटे उठानेपार, उसे बेलायँ तोइ लाजेइ रक्‍तार भइकुन सभइसे तर बसिकेपरित। 10बिहायँ जइनेपार पाछुपटि जाइकुन बसुक हसे तेउह्रासब्‍के नेउता देलाहारइ आइकुन ‘ए साङ्‌घाति, आघु आइकुन बोसिके हबखाइ’ कइकुन राम्र ठाउयँ बोसाइत। उसे बेलायँ तेर सभइक आघु बड्‌क इजेत भइत। 11किकेकने जोनेइ आफ्‍नके बड्‌क ठानित उसे नान्‍हि भइके पोरित हसे आफ्‍नके नान्‍हि ठान्‍लारइ चाहिँ बड्‌क भइत।”

12येसुइ आफ्नेन्‌के नेउतलार अगुवाके कहिकेभइल, “तोइ भोज कर्‌तेखना आफन्‍त, दाजुभाइ, इस्‍टमित्‍र हसे धनि छरछिमेकिसब्‍के नेउता नादेइके। किकेकने उसबेइ पइचा तिरिके तेह्राके पुनु बोलाइहालित। 13बुरु तोइ भोज कर्‌तेखना गरिब, लुलो-लङ्‌गडा र अन्‍धासब्‍के बोलाओ। 14हसे तोइ आसिक पाउतस, किकेकने तेर गुन उसबेइ फर्‌काइके नासकइ। तर मोर्‌लकमाटे धर्‌मातिसब जिउनेपार उक्र इनाम तोइ पाउतस।”

बड्‌क भोजक काथा

(मति २२:१-१०)

15येसुक कुरा सुनिकुन ओनेन्‌साङ खाइके बोस्‍लाहार एक जेनाइ उनेहेनके कहल, “परमेसोरक राज्‍जेयँ भोज खाइके पाइके नइ मानुसक लागि बड्‌क आसिसक कुरा हखइ।”

16येसुइ उख्राके काथाकमाटे जबाफ देइकेभइल, “एक जेना मानुसेइ बड्‌क भोजक तयारि करिकुन धेरइ मानुससब्‍के नेउता देल। 17उहाइ भोज खइलाहार बेला भइलपाछु आफ्‍न नेउताहारसब्‍के ‘खाइके बेला भइल’ कइकुन आफ्‍न नोकरके बोलाइके पाठाल। 18तर नेउतहरेइ, एक्‍टा-एक्‍टा बाहाना बानाइकुन आइके निजमान्‍ल। एक्‍टाइ कहल, ‘मोइ खेत किन्‍ल बाटम, उहइ चाँइके जाइकेबाटइ। मेराके माफ करउ, मोइ आइके नासकम।’ 19हसे अर्‌कइ कहल, ‘मोइ पाँच हल बरत किन्‍ल बाटम र आजु उसब्‍क काम जाँचिके लागि चाँइके जइतिन् बाटम्। मेराके माफ करिदेओ।’ 20अर्‌कइ कहल, ‘मोइ भर्‌खरइ बिहा कर्‌ल बाटम्। उहइगुनेइ मोइ आइके नासकम।’ 21हसे नोकरेइ फर्‌किकुन सभइ कुरा मालिकके सुनाल। मालिकेइ रिसाइकुन आफ्‍न नोकरके कहल, ‘चाडइ सहरक पायड र गल्‍लिसबयँ जाउक्। उछिसे गरिब, लुलो-लङ्‌गडा र अन्‍धासब्‍के बोलाइकुन इछिका आन्।’ 22ओसिनकरिकुन नोकरेइ फेरि फर्‌किकुन मालिकके कहल, ‘मालिक, तोहे आग्‍या देइकेभइल अनुसार मोइ सभइके बोलाइकुन आन्‍ल। तइपुनु अझइ खालि ठाउ बाटइ।’ 23फेरि मालिकेइ कहल, ‘मानुससब्‍के अरु पायड र गल्‍लिसब्‍कमाटे कर लागाइकुन आनुक् र मेर घर भरुस! 24मोइ तेउह्रासब्‍के कहतम्, पइला नेउतलसबमद्‌ध्‍ये कोलोउ पुनु मेर भोजक स्‍वाद चाखिके नापाओत!’”

चेला भइतेखना तिरिकेपर्‌लार मोल

(मति १०:३७-३८)

25एक दिन येसुसाङ मानुससब्‍क बड्‌क भिड जइतिन् रहइ। येसुइ उप्रपट्‌टि फर्‌किकुन कहिकेभइल, 26“जोनो मेर पाछु आइके मन करित् उहाइ आफ्‍न उइया-बुबा, दुलिहि, छाहोक-छाहिक, दाजुभाइ, दिदिबइनि र आफ्‍नके कते बढि मेराके माया करिकेपोरित नत्‍र कने मेर चेला भइके नासकइ। 27आफ्‍न क्रुस बोकिकुन मेर पाछु निजलाग्‍लारचाहिँ मेर चेला भइके नासकइ। 28कोलोउ धरहरा बानाइके खोज्‍तात् कने पइला पइसा पुगित कि नापुगइ, कत्‍का खर्‌च लागित, सभइ हिसाब करिकेपोरित, नइजे र? 29तर उहाइ धरहराक जग बोसाइकुन काम पुरा करिके नासकइ कने मानुससबेइ उख्राके गिल्‍ला कर्‌तिन कताहात्, 30‘इसे मानुसेइ बानाइके त थाल्‍ल, तर पुरा करिके निजसक्‍ल!’ 31फेरि, कोनो राजा हबाहाइ जोनेइ अर्‌क राजासाङ लडाइ करिके जइतेखना ‘मोइ दस हजार सेना लेइकुन बिस हजार सेना भइल मेर बिरोधयँ अइलाहार राजासाङ लडिके सक्‍तम कि नासकम’ कइकुन पइला नइ बोसिकुन नासोचइ र? 32यदि लडिके निजसक्‍लार भइने उहाइ पइला नइ आफ्‍न समचार लेज्‍लारके कस्‍के मिलिके सक्‍ताहिँ कइकुन बुझिके पाठाइत। 33ओसिनकरिकुन नइ तोहेसबमद्‌धे जोनेइ मेर लागि सभइ कुरा नाछाडइ, उसे मेर चेला भइके नासकइ।”

काम निजलाग्‍लार नुन जस्‍न

(मति ५:१३; मर्‌कुस ९:५०)

34“नुन राम्र चिज हखइ, तर नुन सिट्‌ठो भइनेपार फेरि केहाइ नुनायो बानाइके? 35न त इसे जिमिनके काम लागित न मोल नइ भइत। ओस्‍न नुनके मानुसेइ घुघाइदेताहात्। जक्र कान बाटइ, उहाइ सुनुस।”

നിലവിൽ തിരഞ്ഞെടുത്തിരിക്കുന്നു:

लुका 14: DRY

ഹൈലൈറ്റ് ചെയ്യുക

പങ്ക് വെക്കു

പകർത്തുക