प्रेरित 1
1
1आदरनिय थियोफिलस ज्यु, येसुइ करिकेभइल र सिखाइकेभइल सभइ कामक बारेयँ मोइ मेर पइलाक कितापयँ लेखिसक्ल बाटम। 2आफ्नेन् छानिकेभइल प्रेरितसब्के पबित्र आत्माकमाटे आग्या देइकेभइल र ओनेन्के सोर्गयँ लेजाइकेभइल दिनसमनक सभइ कुरासब उसे कितापयँ लेख्ल बाटइ। 3येसुइ धेरइ दुख भोगिकुन क्रुसयँ मोरिके भइलपाछु चालिस दिन भितर घरिघरि उसब्कलघि देखार पोरिकुन बिभिन्न किसिमक पक्का पर्मानकमाटे आफ्नके जिउतइ बाटम कइकुन देखातिन परमेसोरक राज्जेक बारेयँ उसब्के बाताइकेभइल। 4ओनेन् उसबसाङ खइलाहार कुरा खाइके बोसिकेभइल बेलायँ उसब्के यस्न आदेस देइकेभइल, “बुबाइ करिकेभइल प्रतिग्या पुरा नइजेभइलसमन तोहेसब यरुसलेम छाडिकुन कतेहुन् झुनजाओसब। जोक्र बारेयँ तोहेसब पइला पुनु सुनिसक्ल बाटउ।#लुक २४:४९ 5युहन्नाइ त पानिइ बप्तिस्मा देल, तर केहाउ दिनपाछु तेउह्रसब्क पबित्र आत्माकमाटे बप्तिस्मा भइत।”
येसु सोर्ग लेजाइकेभइल
6जब सभइ प्रेरितसब जम्मा भइल, तब उसबेइ येसुके पुछ्ल, “हे प्रभु, किति तोहे इहइ बेलायँ इस्राएल राज्जेके पइलाक जस्नइ बानाताहाउ?” 7येसुइ उसब्के कहिकेभइल, “इसे कुराक समय त बुबाइ आफ्निक अधिकारकमाटे तोकिके भइल बाटत, जोनो तोहेसब जानिके नापरइ। 8तर तेउह्रउप्र पबित्र आत्मा अइनेपार सक्ति पाउताहाउ, हसे तोहेसब यरुसलेमयँ, जम्मइ यहुदियायँ, सामरियायँ र पिर्थिबिक कोन्धोर-कोन्धोरसमन मेर साछि भइताहाउ।” 9येसुइ इसे कुरा कहिके भइलपाछु, उसबेइ चाहातिन्-चाहातिन् सोर्गयँ लेजाइकेभइल र ओनेन् उसब्क नजरसे बाद्रियँ बिलाइकेभइल। 10जब उसब एकोहोरो भइकुन आकासपटि चाहिराख्ल रहत, तब अन्चक्लइ गोरो लुगा लागाल दुइ जेना बेटा मानुस उसब्कइ आघु ठोडेल। 11हसे उसबेइ कहल, “ए गालिलक मानुससब, किके आकासपटि चाहातिन् ठोडेइरहल बाटउ? येसु त सोर्गयँ लेजाइकेभइल। जस्के येसु सोर्गयँ जाइराखिकेभइल देख्ल बाटउ, ओसिनकरिकुन एक दिन ओनेन् फेरि फर्किकुन अइताहात्।”
यहुदाक ठाउयँ मतियासके छान्ल
12उपाछु चेलासब जइतुन कलाहार डाँडाकमाटे नात्लिक दिनयँ यरुसलेमपटि फर्कल। इसे डाँडा यरुसलेमकमाटे एक किलोमिटर जत्का टाढो पोरित। 13उसब यरुसलेम पुगिकुन आफ्न बोस्लाहार घरक उप्रक तालायँ चढिकुन एक्टा कोठायँ जम्मा भइल। उछिका जम्मा भइलाहार मद्धे पत्रुस, युहन्ना, याकुब, अन्द्रियास, फिलिप, थोमा, बारथोलोमाइ, मति, अल्फयसक छाहोक् याकुब, देसके माया कर्लाहार सिमोन र याकुबक छाहोक् यहुदा रहइ। 14उछिका येसुक उइया मरियम र ओनेन्क भाहिकसब हसे अरु बेटिसबसाङ उसब पुनु एकइ मनक भइकुन पार्थाना कर्तेरहत।
15केहाउ दिनपाछु पत्रुस एक सय बिस जेना जत्का बिस्वासिसब्क माझयँ ठोडेइकुन बोराइके थाल्ल, 16“भाइसब, धर्मक कितापक बचन पुरा भइके पोर्लाहारइ, जोनो बचन येसुके धर्लाहारसब्क अगुवा यहुदाक बारेयँ राजा दाउदक मुहुकमाटे आघुहिँ नइ पबित्र आत्माइ बोराइके भइल रहत। 17प्रभुक बाह्र प्रेरितमद्धे एक जेना यहुदा पुनु रहइ। हामे जस्नइ उसे पुनु प्रभुक काम करिके चुनिल रहइ।” 18यहुदाक अधर्मइ कामाल पइसाइ एक्टा जग्घा किन्ल रहइ। उसे घोप्टो खसिकुन मोर्ल हसे उक्र भुडि फुटिकुन सभइ पोटि निस्कल। 19इसे कुरा यरुसलेमक मानुससबेइ थाहा पाइकुन उसे खेतक नाउ उसबेइ आफ्नइ भासायँ “आखेल्दायँ” राख्ल, जोक्र अर्थ चाहिँ “रकतक खेत” भइत।
20पत्रुसेइ फेरि कहल, “भजनसंग्रहक कितापयँ यस्न लेख्ल बाटइ,
“‘उक्र घरबार उजाड भउस्,
उछिका बास बोस्लाहार कोलोउ पुनु झुनभउस,’
‘हसे उहाइ कर्लाहार कामक अधिकार अरुइ लेउस्।’
21“उहइगुनेइ हाम्रसाङ रहलार मानुससब मद्धे यस्न एक जेना छानिके पोरित कि, जोनो चाहिँ प्रभु येसु हाम्र माझयँ भितर-बाहार कर्तेखना जइह्या पुनु हाम्रसाङ रहत, 22अथबा उसे मानुस यस्न भइकेपोरित, जोनो युहन्नाइ देल बप्तिस्माक बेलासे प्रभु येसु मोर्लकमाटे जिउत भइकुन सोर्गयँ लेजाइकेभइल दिनसमनक कुरा बाताइके सक्लाहार भउस्।” 23इसे कुरा सुन्लपाछु उछिका जम्मा भइल मानुससबेइ दुइ जेनाक नाउ देल। एक जेना बारसाबास कलाहार योसेफ, जोख्राके युस्तस पुनु कहते रहत कने अर्क चाहिँ मतियास रहइ। 24उसबेइ यस्के पार्थाना कर्ल, “हे प्रभु, तोहे त सभइ मानुसक मनक कुरा देखिके भइताहाउ। इसे दुइ जेनामद्धे कोख्राके छानिके भइल बाटउ, हाम्राके पुनु देखाइदेओ। 25जोनेइ सेवाकाइयँ प्रेरितक कामयँ भाग लेइके सकुस्, किकेकने यहुदाइ त इसे काम छाडिकुन जोनो ठाउयँ जाइके पोर्लाहारइ उछिन् जाइकुन मोर्ल।” 26उपाछु उसबेइ दुइ जेनाक नाउयँ चिट्ठा घाल्तेखना मतियासक नाउयँ पोर्ल, यस्के उसे पुनु एघार प्रेरितसबसाङ गनिल।
നിലവിൽ തിരഞ്ഞെടുത്തിരിക്കുന്നു:
प्रेरित 1: DRY
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2024 (Active), Mother Tongue Translators Society and Wycliffe Bible Translators, Inc. All rights reserved.
