Matius 2
2
Tau-tauna lako mataeo to nataualu nampahilo tanda-tanda i betue
1Yesus laiote i Betlehem to i tana Yudea tempo Herodes noparenta halaku magau i ria. Tempo ee bahangkua dua tauna lako mataeo narata i Yerusalem. Hira ee mai to nataualu nampahilo tanda-tanda i betue. 2Nepekunera hi todea i Yerusalem, “Rima-'I Ngana to lako iote to mawali magau to Yahudi ee mei? Laihilo kamimi betue-Na nebere mali mataeo. Kami ei tumai mepue hi Hia.”
3Pangepena Magau Herodes nangkambelai lauria, nakonce'i, wee mui humawee tauna i Yerusalem. 4Lauparia laikiona humawee imam to i matana bo to nataualu buku Taurat, pade laipekunenara i rima mei Magau to Pepakahalama to laitipa Alatala raote. 5Laihonoira'i, “I Betlehem to i tana Yudea. Apa naria ami laitulihi nabi, iwei,
6 #
Mi. 5:1 ‘Iko ngata Betlehem to i tana Yehuda,
moma ntotoko ngata to neliu kakodina lako humawee ngata i tana Yehuda,
apa lako hi iko mei maria hadua to pangkeni
to mampaewu todea-Ku Israel.’ ”
7Pangepena lauria, Herodes nangkio bongora to nataualu nampahilo tanda-tanda i betue ee pade nampekune belora bulauma betue ee laihilora. 8Napu ee, Herodes nantudura to nataualu nampahilo tanda-tanda i betue ee rau Betlehem pade iulikanara, “Koimo komi pade pali belo-'I Ngana etu mai. Ane mirata-'I, kewoka'a bona rau mui'akuwo mepue hi Hia.”
9Nangepe to iuli Magau Herodes lauria, rauramo to nataualu nampahilo tanda-tanda i betue ee. Betue to laihilora i mataeo ee, ngkali laihilora nculimi nampoilodokara duuna nentuu hintoto po'ohaa Ngana ee. 10Hangka laihilora betue ee, nagoe mpuu rarara. 11Lauparia, nehuaramo rau i rara hou nampahilo Ngana ee hante Maria tina-Na, pade notingkoduramo nepue hi Ngana ee. Napu ee laibolerami pobolia gagura pade laipopewaira bulawa, kemenyan pade mur. 12Napu ee Alatala nampalingaira rara pangipira bona nemorapa manculi rau hi Herodes, alaana nantuku dala ntaninaramo nanculi rau ngatara.
Nalai rau i Mesir
13Peongkora to nataualu nampahilo tanda-tanda i betue ee, nerawami hadua malaeka Pue hi Yusuf i rara pangipina nangulika'i iwei, “Pematamoko. Keni Ngana etu hante tina-Na pade palaimo komi rau i Mesir. Po'ohamo komi i ria duuna marata mei lolita-Ku hi iko. Apa Herodes mampali Ngana etu napatehi.”
14Lauparia, nematami Yusuf pade ngkawengia ee mui laikeninami Ngana ee hante tina-Na nalai rau Mesir. 15#Hos. 11:1No'oharamo i ria duuna Herodes namate. Lauria nadupa nopaganai lolita Pue to laiparata nabi owi iwei, “Laikio-Ku Ana-Ku mehuwu lako Mesir.”
Ngana-ngana i Betlehem laipatehi
16Laincaninapi Herodes ane to nataualu nampahilo tanda-tanda i betue nangkalowoni'i, nahodo mpuu'i, pade laituduna tantarana rau mampatehi humawee ngana balailo to lako iote duuna to noumuru rompae i ngata Betlehem pade ngata-ngata to i humpiina. Umuru ngana to laipatehi ee laireke nantuku jaritara to nataualu nampahilo tanda-tanda i betue, bulauma'i pamulana laihilora betue ee mai neumba. 17Hante kajadia lauria, laipaganaimi lolita Pue to laiparata nabi Yeremia owi iwei,
18 #
Yer. 31:15 “I ngata Rama laiepemi to potantangi to najuu mpuu rarana.
Rahel nangkakeohi ana-anana pade moma'i nadota laipakawoe rarana
habana ana-anana namateramo laipatehi.”
Nanculi lako Mesir
19Namatepi Herodes, tempo Yusuf i Mesirdipi, naratami hadua malaeka Pue rara pangipina. 20Malaeka ee nangulika'i, “Pematamoko, kenimi Ngana etu hante tina-Na pade panculimo komi rau i tana Israel, apa tauna to mingki mampatehi Ngana etu namateramo.” 21Lauparia, nematami Yusuf pade nangkeni Ngana ee hante tina-Na nanculi rau Israel.
22Pangepena Yusuf ane Arkhelaus nawali to poparenta i tana Yudea nampahambei Herodes tuamana, naeka'i rau i ria. Naupawee Alatala nopatudu'i rara pangipina, alaana rauramo Yusuf i tana Galilea. 23Karatara i ria, no'oharamo i hangu ngata to laikahangai Nazaret. Lauria nopaganai lolita Pue to laiparatara nabi owi to nanguli ane Hia mei rauli to Nazaret.
നിലവിൽ തിരഞ്ഞെടുത്തിരിക്കുന്നു:
Matius 2: MYL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
