Matius 20

Anggur awe werop nimiag sunumna tol pina Yesusti ambatsiogha

1Yesusti nen yubu ambarelamsiogti, “Imagne ponekori mog so'oag nimi saelba uhiroba sembe sunumna sumbatsinun. Awe ngainge nhon lukun lambaogti, ‘Anggur awe webatnukang,’ aro nimi elamsiog. 2Ero ipsiogti, ambarelamsiog nena, ‘Sumene awe topmunba, kamna kapsinunne denarius nhon a'ero-a'ero tatsinun,’ seog. Wene seogpa, yubu saekag lebekne agha awe ngainge ponekori, ‘Anggur awe wel pululom,’ aro arukahiog.

3Wene aro arukahiogpa, eldi aweag wel piekpa, heng ko'o wilindi uro yabiogpa, siro peram taog. Awe ngainge poneko nen lambaogti, nimiri sa'a-sa'a payandi, kamna kapto torobag aneko yog nimi etpare awe tomna koma longoro sekameka ipsiog. 4Ipsiogti sinag babe yubu ambatsiogti, ‘A'un pimundi, nari anggur awe welapmunba, kamna nari a'un tatsinepne sunsunum uro tatsinun,’ seog.

5Wene seogpa, sin babe eldi aweag tol piek. Nen ko'o olog piogpa, heng ik mol-mol aloghoghag babe, heng taloro sin tanep peramag babe, awe ngainge poneko lambom agha nimiri sa'a-sa'a payandi, kamna kapto torobag aneko yog nimi awe tomna koma wameka ipsiogti, eldi aweag nika uro pogsiog.

6Nen ko'o olog piogpa, imbaneba peramag yog nimi awe tomna koma sekamekpa, awe ngainge poneko nen lambom agha ipsiog. Ipsiogti sinag hailamsiogti, ‘A'un sumene ane seklamloma kekman ane wamlom. Sa'a sembe awe sa'a-sa'a uan koma ane wamlom?’ aro haibahiog.

7Wene aro haibahiogpa, sin nimi tanekori elag samoro, ‘Nimi nhondi nunag, “Awe naringe toplulom,” aro ambareamsiang kom,’ seek.

Wene seekpa, awe ngainge ponekori, ‘A'undi babe awe naringeag wel pululom,’ seogpa wel piek.

8Wel piekpa, sin awe welamek nimi yae paia uhiropne nhon wamog. Imbaogpa awe ngainge ponekori yae paia uhiropne ponekoag yubu lelamogti, ‘Awe tolamang nimi yopsululam. Amik arukahinba webang nimiag agha alniro kamna tarelamsimendi, samen arukahinba webang nimiag tatto komobahilulam,’ aro ambarog.

9Wene seogpa, awe welamek nimi taneko yopsiogpa, yaekpa amik imbaneba peramag awe wel piek nimi taneko kamna kaptoba denarius nhon a'ero-a'ero tatsiog. 10Tatsiogha ibekti, lukunap awe wel piek nimi tanekori seneraglamekti, ‘Nuna lukunap arukahilba, awe webap ane sembe, nunag kamna phelekto tatsilul,’ sembamek. Wene sembamek aghana, nika uro kamna kaptoba denarius nhon-nhon a'ero-a'ero tatsiog. 11Nhon-nhon tatsiogpa, awe tobek nimi tanekori awe ngainge poneko sembe wharo lelamek. 12Awe ngainge ponekoag yubu lelamekti, ‘Amik awe webang nimi heng ko'o nhonog wel piang. Nunna lukunap alnibaapti, whin seklero welamapba, hengdi babe opsil aghana, kamna sin tatsilam saog uro nu babe nika uro tatsilam,’ seek.

13Wene seekpa, awe ngainge ponekori samoro sin nimi taneko nhonag, ‘Nangkae, nari anag malia uaghen kom. Anam awe weban komag yubu saekag lemnamne, “Ik nhon sum awe topmenne sembe kamna kaptoba denarius nhon tatkenun,” senba saekag lemnam kom te? 14Ane sembe kamna kaptoba andinge topmendi pululam. Nari wanari, “El amik awe toplangeap, an samen awe toplamneap nika-nika uro kamna tatsinun,” sembandi tatsin. 15Naringe aba wamla aghana, naba nari, “Uanun,” senenne uanep kom te? Nari wana walingeag agha nimiag tatsinne sembe haing sek senelamnelam te?’ seog.

16Sunumna sumbatsinne nene saog uro nimi wailagne whingag sip taikpa, nimi whingagne wailag sip taukang,” aro Yesusti ambatsiog.

Yesus el seklero tebanepne sembe ik wilindip sum ambatsiogha

(Markus 10:32-34; Lukas 18:31-34)

17Yesus Yerusalem sip walelamogti, eldi yubu ka'ero neleptop nang aobare nang taneko mo poloro wimbitsiog. Sin mo winip tangto ina palamekag anekoa ambarelamsiogti, 18“Ka'eamlulom! Nu wene Yerusalem sip walero palamap. Yerusalem pina wamebeba, na mog so'oag nimi tahinge nimiri pan khebanelul. Pan khebanelenge, sin memnang Allah sembe palirop nang sikini yaboap, Musari yubu amohirop nangap sikin saeag nenero pan khebanelul. Sindi saeag pan khebaneleba, na sembe, ‘Ya'ag tebalul,’ aro tam karepto pibukang. 19Nimi sisa Yahudi kom nimi saeag nembaneikpa, nimi sisa Yahudi kom nimiri nanag yubu neplamneikti, taeplam-taeplam lopneikti, kalag sipto ya'ag omnukang. Ya'ag omneikpa, olog wamneri, ik wilindip sum eneko nen kamag tanun,” aro ambatsiog.

Yakobusap Yohanesap sikinindi molbaogha

(Markus 10:35-45)

20Zebedeus elmabo wamdekpa, sikinin kel enekori, “Yesusag molona molbanun,” aro elmabo enero poa pihiogti, Yesus whingag yabu sanukto u amupto pulingkiog. 21Yabu sanukto pulingkiogpa Yesusti, “Kain, ‘Sa'a molbanun,’ sembalamdi yalam?” aro haibaog.

Wene aro haibaogpa kel enekori, “Nari sembamnange, an yubu sia lero saelbamsimen sum eneko nari mabo phende abene nhon an sae sirik sip, nhon an sae waneng sip pukamtukangne mololangken,” aro molbatsiog.

22Wene aro molbatsiogpa, Yesusti sinag samoro yubu lelamogti, “A'undi molbanelom nena, ekonne agha molbanelom. Nanag uro yabinepne nanag tebatnenep mag aneko a'undi babe tenep te?” aro haibahiog. Haibahiogpa sindina, “Nuri babe nelepto tenep,” serek.

23Wene serekpa Yesusti, “Nanag uro yabinepne mag tebatnenep mag aneko a'undi babe toro tururom. Aghana a'un sembe, ‘Nhon na sae sirik sip, nhon na sae waneng sip pularurom,’ aro ambatsinepne naringe kom. Ot na tara-tara pukamnep nena, Nani eldamneri wero o'oropne sunsunum uro tatsilul,” seog.

24Wene aro molbarekpa, Yesus yubu ka'ero neleptop nang yogne sa'obare nang tanekori ka'ebaekti, eldo ilipsae abenekoag wabahiek. 25Walamsiekpa Yesusti sin yopsiogti ambarelamsiogti, “Nimi sisa Yahudi kom nimi sembe saelba uhirop nangdi nimi luknuhiro salelamsiang. Sin anabiag agha nubunang taek nimiri yo uro mikipne agha ulamsiang. Undo ulamsianga ene a'un el wamlom. 26Undo ulamang aghana, a'undi unuahiseng kom. Nimi etneri a'un anabiag agha, ‘Na nubunge tanun,’ sembale tanena, arukna nenep taleri, nimi yepsinne agha talul. 27A'un nimi etneri, ‘Na whingagne tanun,’ sembale tanena, a'un sembe arukna talul. 28Na mog so'oag nimi tahi aghana, ‘Na yepnukang,’ aro mog so'oag yahi kom. ‘Nimi yepsinun,’ aro yahinge saog uro ulamlulom. Na mog so'oag yahingena, ‘Mog so'oag nimiri mali-malia uropne sembe lunuro tebane andarina, nimi maikno sae lopsinun,’ aro yahi,” seog.

Yesusti haing urop nimi phende wali nembahiogha

(Markus 10:46-52; Lukas 18:35-43)

29Yesusap eldi yubu ka'ero neleptop nangap Yerikho asag aneko laploa lanalamekpa, nimi maikno longoro Yesusag neleplamek. 30Palamek ina abolag aneko haing urop nimi phende puka ulamdek. Pukamdekti ka'elamdekpa, “Yesus poneko ina ane toman pinual,” alameka ka'ebarek. Ka'ebarekti sin haing urop nimi abenekori yubu nubu uro haum aro lelamdekti, “Nu Saelba Uhiropne an Daud sisange mangap talumne. Nu yareag sembahi,” aro yoplamdek.

31Wene alamdekne sembe nimi maikno longolamek nimi tanekori, “Yubu kom tae,” aro wenelamsiek aghana, nen ma'aro mikip uro haum aro lelamdekti, “Nu Saelba Uhiropne an Daud sisange mangap talumne. Nu yareag sembahi,” aro haum alamdek.

32Wene alamdeka ka'ebahiogti Yesus ina palamogha pabom seogti yopsiog. Yopsiogti hailamsiogti, “A'undi sembarom nena, ‘Sa'a agha nunag uahiso,’ sembaromdi yopnerom?” aro Yesusti haibahiog.

33Wene aro haibahiogpa, sin phenderi, “Nai nu saelbamsilamne, ‘Nuri haing kwelekahiso,’ senelamnamdi yopkenam,” serek.

34Wene serekpa, Yesusti sin sembe yareag sembahiog. Yareag sembahiogti, sindi haingag sae pipsiog abeneko pere haing kwelekahiog. Haing kwelekahiogpa, Yesusag neleplamdek.

നിലവിൽ തിരഞ്ഞെടുത്തിരിക്കുന്നു:

Matius 20: kklKOS

ഹൈലൈറ്റ് ചെയ്യുക

പങ്ക് വെക്കു

പകർത്തുക