Mateus 1
1
Oro hwanana nucun Jeju Cristo
Lucas 3.23-38
1Je i ca' ca xirao' to xine wixicocon oro hwanana nucun Jeju Cristo pane. Judeu nana. Hwanana ne non taramaxicon Davi cara pane, hwanana ne non Abraão cara pane quem.
2Abraão ma', wanxi' ac con na Isaque.
Isaque ma', wanxi' ac con na Jacó.
Jacó ma', wanxi' ac con na Judá cocon oro xurucun.
3Judá ma', wanxi' ac con na Peres con Zera. Wiricam Tamar co wijima non Peres con Zera.
Peres ma', wanxi' ac con na Esrom.
Esrom ma', wanxi' ac con na Arão.
4Arão ma', wanxi' ac con na Aminadabe.
Aminadabe ma', wanxi' ac con na Nasom.
Nasom ma', wanxi' ac con na Salmom.
5Salmom ma', wanxi' ac con na Boaz. Wiricam Raabe co wijima non Boaz.
Boaz ma', wanxi' ac con na Obede. Wiricam Rute co wijima non Obede.
Obede ma', wanxi' ac con na Jessé.
6Jessé ma', wanxi' ac con na Davi co taramaxicon pane.
Davi ma', wanxi' ac con na Salomão. Wiricam wara manacon Urias co wijima non Salomão.
7Salomão ma', wanxi' ac con na Roboão.
Roboão ma', wanxi' ac con na Abias.
Abias ma', wanxi' ac con na Asa.
8Asa ma', wanxi' ac con na Josafá.
Josafá ma', wanxi' ac con na Jorão.
Jorão ma', wanxi' ac con na Uzias.
9Uzias ma', wanxi' ac con na Jotão.
Jotão ma', wanxi' ac con na Acaz.
Acaz ma', wanxi' ac con na Ezequias.
10Ezequias ma', wanxi' ac con na Manassés.
Manassés ma', wanxi' ac con na Amom.
Amom ma', wanxi' ac con na Josias.
11Josias ma', wanxi' ac con na Jeconias cocon xurucun.
Je i ma' oro xec nein ca quep tococwa oro wari' nein Israel pane, pain ca cut mama' qui' tococwa pain macarain Babilônia pane. 12Cut mama' pin iri tata pain Babilônia ne,
wanxi' ac con na Salatiel Jeconias.
Salatiel ma', wanxi' ac con na Zorobabel.
13Zorobabel ma', wanxi' ac con na Abiúde.
Abiúde ma', wanxi' ac con na Eliaquim.
Eliaquim ma', wanxi' ac con na Azor.
14Azor ma', wanxi' ac con na Sadoque.
Sadoque ma', wanxi' ac con na Aquim.
Aquim ma', wanxi' ac con na Eliúde.
15Eliúde ma', wanxi' ac con na Eleazar.
Eleazar ma', wanxi' ac con na Matã.
Matã ma', wanxi' ac con na Jacó.
16Jacó ma', wanxi' ac con na José.
José ma', an ac cam na Maria co wijima non Jeju.
Jeju ma', wirico co Cristo ma', ac i ma' na ca tomi' cocon oro wari' quem#1.16 Ca' na ca tomi' mao nein ca Cristo wa cocon oro judeu pane. Iri' wari' co wara tora' ca Iri' Jam pane ta nonon. Iri' Taramaxicon tara, wirico tara co to' witan toton nonon oro wari' ta nonon. .
17Ac i ma' nana oro hwanana nucun Jeju pane. Ma' 3 na ca cut in to ni cut in to ni xam' xucucun oro waram winacocon hwanana nucun. Wanxi' cain' non Isaque Abraão, wanxi' tiquin' wanxi' tiquin', ma' 14 pin iri na ca wanxi' tiquin' nucucun waram winacocon ne, hwet ac cocon na Davi. Wanxi' ac con Salomão na Davi. Wanxi' tiquin' wanxi' tiquin', ma' 14 pin iri na ca wanxi' tiquin' nucucun ne, hwet ac cocon na Jeconias cocon oro win ma' ca co cut mama' wawa pain Babilônia. Caram ma' iri nana ne, wanxi' tiquin' wanxi' tiquin', ma' 14 pin iri na ca wanxi' tiquin' nucucun ne, hwet ac cacam na Maria co wijima non Cristo pane.
Ca pan' qui' nucun Jeju
Lucas 2.1-7
18Ca' na ca pan' qui' nucun Jeju Cristo pane. Jicon ma', Maria ma', an tam na José ira. Om ca an querec xequequem, tomi' xo' e' xequequem, nam' ac cama na. Je Tamataracon Iri' Jam ca mi' nam pain ca nam' nequem ma'. 19He ac ca na taxicam. Xut xo' taxipa' na taxicam pane. Tomi' ha' taxipa' nain ca xirao' nucun Moisés quem. Je ca an pe pin tam paxi' cam ma' ira. Xi nam' pe ara cama ta na. An pe e' tam, ma' ta om hwet ne wixicam ta na. Om ta tomi' hwet toton oro wari' cam ta na.
20Pain ca coromicat coromicat wet cain i ma' ne, tohwein' ac con na jam co taramaja mi' non Iri' Jam. Wirico jam co hwet pan non pain ca tohwein' nucun José. José winacon taramaxicon Davi ac con na. Ta hehe ma cam me ta. An ram narima' nem ma', Maria ma'. Je Tamataracon Iri' Jam ca mi' nam pain ca nam' nequem ta na ca tomi' con ma'. 21Pan' qui' ac ca tara cawinacam. O' ma' ac mon tara, Jeju ac mon tara#1.21 Ma' na ca tomi' mao ne wixicon Jeju ma'. Co to' witan ta na ca tomi' mao ne wixicon. . To' witan toton ara xi' nonon oro win ma' ca ma', mi' toton ara xi' nonon pain ca witan ca' cacain ca wap wa pain ca caracat nucucun quem na ca tomi' con ma'.
22Je Tamataracon Iri' Jam ca mi' nam pain ca nam' wa pane. Ma' ta hwet ne capija ca wara tomi' pe ta' pane, pain ca tomi' hwet rain ta ton profeta#1.22 Wari' co profeta ma', tomi' hwet taxipa' nain capijacon Iri' Jam ca an hwet mi' non Tamataracon. pane na Iri' Jam. Ca' na con:
23Nam' tara xojam' co om tape.
Pan' qui' ac ca tara cawinacam.
O' ma' ac cocon tara, Emanuel ac cocon tara ta.
Ac i ma' na ca wara tomi' pe nucun pane. Pain ca Emanuel cocon ma', je i ma' wixicon pain capijaxut pain ca judeu urut ca'. Pe ho' napari' Iri' Jam ta na ca tomi' mao nein.
24Querec iri na José ne, tomi' ha' ac con na jam co taramaja mi' non Iri' Jam. An ac cam na. 25An paxi' nam, ane om quep cam ne. Pain ca om pan' querec ca cawinacam ma', om ca quep cam. Om om, pan' qui' ho' na cawinacam. O' ma' ac con na, Jeju ac con na quem.
നിലവിൽ തിരഞ്ഞെടുത്തിരിക്കുന്നു:
Mateus 1: TBPN
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright 2023 Missão Novos Tribos do Brasil
