མ་ཏི། 25
25
ངེ་ཅོན་མ་ཁཱན་ ཟ་མིན་སེ་ག་དཔེ་གཏམ།
1ཞིང་ཁམས་ག་རྒྱལ་སྲིད་ཤོ་ ངེ་ཅོན་མ་ཁཱན་ ཟ་མིན་སེ་གི་ རོག་ཏེ་བ་ཀ་ ལ་ཝང་བ་བུ་ཉི་ གཉེན་ཏག་པེ་ག་ ཟ་རུ་མེ་ག་ དི་ཝ་ད་བུ་ཐུར་གི༌ལ། 2རོག་ཏེ་སེ་ག་པོང་ཀེ་ལྔ་ཤོ་ སེ་བུ་མ་ཝ་ཆོ་ཝ༌ལ། ཉི་ཨོམ་ཐུར་ལྔ་ཤོ་ སེ་བུ་ཆོ་ཝ༌ལ། 3ཉི་ཨོ་ཉ་སེ་བུ་མ་ཁཱན་ལྔ་གི་ ལ་ཝང་ཏ་མེན་མ༌ལ། དག་པ་ཀབ་ཉི་ རོག་ཏེ་བ་ཀི་ སི་མ་མེན་མ༌ལ། 4ཉི་ཨོ་ཉ་སེ་བུ་ལྔ་གི་ རོག་ཏེ་བ་ཀ་ ལ་ཝང་ག་དེན་གེ་ སི་ལང་པ་ཨ་ཉི་རང་ མེན་མ་ཅ་གི་ཝ༌ལ། 5ཉི་གཉེན་ཏག་པེ་ག་ཟ་ཁེ་པ་ ཨོ་ཕེ་ག་ཕིད་པ་ཨ་དེན་གེ་ རོག་ཏེ་བ་ ཡིབ་ཉི་མི་ནང་དི་ཝ༌ལ།
6བི་ནང་དོ་ག་ གཉེན་ཏག་པེ་ག་ཟ་ཤེག་པ་ན། རོག་རུ་མེ་ག་ ཨོ་དོ་དག་ཉི་ ཀཱན་ཆི་ལུ་ཨ་ཉི་ཡེག་པ་ག་ ན་ཐ་ཝ༌ལ།
7ཉི་ངེ་ཅོན་མ་ཁཱན་ཟ་མིན་བ་ ཐམས་ཅན་རང་ ཝུན་ཐཱན་ ལ་ཝང་ཐོག་པེ་གོ་ཙུག་པ༌ལ། 8ཨ་ཧ་ལ་ཝང་ག་སི་ ཆུ་མེ་ཅམ་པ༌ཅ། ན་ཧ་སི་ད་སུར་གེ་ཨ་ཉི་ སེ་བུ་མ་ཁཱན་བ་ཀི་ སེ་བུ་བ་ཀ་ཡེག་པ༌ལ།
9ཨ་ཤི་ ན་ཧ་སི་བི་ལེ་མར་བ། ཧང་ཡ་དག་ནེ་ལ་ ཨ་ཧ་སི་ཨ་ཧ་དེན་གེ་ ལང་པ་ཐུར་ཤ༌ཅ། ཨོ་ཉི་ཨ་དེན་གེ་ ན་ཧ་བ་དིན་ཐཱན་ སི་ཙོང་ཁཱན་བ་ཀེ་ ངོ་ཉི་ཕའི་དག་ཉི་ སེ་བུ་བ་ཀི་ཡེག་པ༌ལ།
10རོག་ཏེ་བ་ སི་ངོ་ལེ་དིན་ཆོ་ལ་ཀབ་ཉི་ གཉེན་ཏག་པེ་ག་ ཟ་ཤེག་པ༌ལ། ཉི་ཕྲིག་ཀིན་ཨན་ ཅམ་ཉི་ཆོ་ཁཱན་ཟ་མིན་བ་ རོག་ཀབ་ཉི་ གཉེན་ཕི་ཝ་ག་ མཛར་ཅུམ་ཟ་ལེ་དེན་གེ་ ཕའི་ནང་ཀ་ནུབ་ཐཱན་ ཀོ་དམ་པ་གི་ཝ༌ལ། 11ཨོ་ཉ་ཚི་ངེ་ སེ་བུ་མ་ཁཱན་བ་ ལོག་ཉི་ཤེག་པ༌ལ། ཉི་རོག་ཏེ་བ་ཀི་ ཞུ་ཝ་ལ་ གཙོ་བོ་ གཙོ་བོ་ ཨ་ཧ་དེན་གེ་ ཀོ་ཕེག་ཉི་གནང་ཤོ་དག༌ཉི།
12དག་པ་ཀབ་ཉི་ རོ་ཀི་ལན་ཨ་ཉི་ཡེག་པ་ལ་ ཇི་གི་ཐྲང་ཉི་ཡེག་ཅ་ ཇི་གི་ ན་ཧ་བ་ གུམ་རང་མ་ཡེ་ལ་དག༌ཉི།
13ཨོ་ཉི་ཨ་དེན་གེ་ ཇི་གི་ ན་ཧ་ཡེག་ཅ་ རིག་པ་སྒྲིམ་ཉི་ཆོའི། ཧང་ཡ་དག་ནེ་ལ་ ནོང་དང་ཆུ་ཚོད་ ཧབ་ཏུར་ག་ ཇང་ལོག་པེ་གི་ལ་སྨོ་ ན་ཤི་སེ་ལུ་མཱན༌ཅ༎
གཡོག་པ་སམ་ག་དཔེ་གཏམ།
14ཉི་ཨོམ་ཆང་རང་ ཞིང་ཁམས་ག་རྒྱལ་སྲིད་ཤོ་ སོ་ངོ་ཐུར་ ཇང་ཀིན་ག་ཏཱན་ དི་ཝ་ད་བུ་ཐུར་གི༌ལ། ཉི་རོག་དི་ཉི་ཆོ་ལ་ཀབ་ཉི་ གོད་པེ་དེན་གེ་ རོ་ཀ་རྒྱུ་ག་བ་ རོ་ཀ་གཡོག་པ་བ་ཀ་ ག་དང་ག་སྤྲོད་པ༌ལ། 15རང་རང་ས་ལྕོགས་གྲུབ་དང་ཏུ་ཉི་ གཡོག་པ་ཐུར་ག་ རོ་ཀི་ད་ཡང་ 5000 སྤྲོད་པ༌ལ། ཉི་བཱརའ་གཡོག་པ་ཐུར་ག་ རོ་ཀི་ད་ཡང་ 2000 སྤྲོད་པ༌ལ། ཉི་ཨོམ་ཆང་རང་ བཱརའ་གཡོག་པ་ཐུར་ག་ རོ་ཀི་ད་ཡང་ 1000 སྤྲོད་པ༌ལ། ཉི་རོག་ ལམ་ཇང་ཀིན་ཐུར་ག་ཏཱན་ དི་ཝ༌ལ།
16ད་ཡང་ 5000 ཉོང་ཁཱན་གི་ དི་ཝ་ཐྲེ་ཀེ་རང་ ཚོང་ཕི་ཉི་ 5000 ཐེབ་ཅོད་པ༌ལ། 17ཨུ་ཉུ་པུརུས་ཀིན་ཨ་ཉི་ ད་ཡང་ 2000 ཉོང་ཁཱན་གི་བུ་ ཚོང་ཕི་ཉི་ 2000 ཐེབ་ཅོད་པ༌ལ། 18དག་པ་ཀབ་ཉི་ ད་ཡང་ 1000 ཉོང་ཁཱན་གི་ བུན་ཐཱན་ རོ་ཀི་ རོ་ཀ་སྦྱིན་བདག་ག་ཏི་རུ་ ས་ག་ཝང་ཕི་ཉི་ཐ་ཝ༌ལ།
19ནོང་མང་པུ་ཐུར་ག་ཚི་ངེ་ སྦྱིན་བདག་ཨུན་ཐཱན་ རོག་ཏེ་བ་ཀེ་ ཏི་རུ་ག་རྩིས་ལ་ཝ༌ལ། 20ད་ཡང་ 5000 ཉོང་ཁཱན་གི་ ཨུན་ཐཱན་ཞུ་ཝ་ལ་ སྦྱིན་བདག་ ནཱན་གི་ ཇ་ག་ད་ཡང་ 5000 གནང་ཁཱན་གི་ ཇི་གི་ཚོང་ཕི་ཉི་ 5000 ཐེབ་ཅོད་པ་ཅ་དག༌ཉི།
21སྦྱིན་བདག་གི་ གཡོག་པ་ག་ཡེག་པ་ལ་ ལེག་པུ་གི་ཝ༌ལ། ནཱན་གི་ དམ་ཚིག་ཙུང་ཉི་ ལེག་པུ་ཨ་ཉི་ ལའི་ལེག་པུ་ཨ་ཝ༌ལ། ནཱན་གི་ ཉུང་པུ་ཐུར་ག་ དམ་ཚིག་ཙུང་མ་ཨ་དེན་གེ་ ཇི་གི་ ན་ག་མང་པུ་བི༌ལེ། ཇང་ཀབ་ཉི་ དགའ་སྤྲོ་ཙི་ཁེ་ཨ༌ཉི།
22ད་ཡང་ 2000 ཉོང་ཁཱན་གི་ ཨུན་ཐཱན་ཞུ་ཝ་ལ་ སྦྱིན་བདག་ ནཱན་གི་ ཇ་ག་ད་ཡང་ 2000 གནང་ཁཱན་གི་ ཇི་གི་ཚོང་ཕི་ཉི་ 2000 ཐེབ་ཅོད་པ་ཅ་དག༌ཉི།
23སྦྱིན་བདག་གི་ རོ་ཀ་ཡེག་པ་ལ་ ལེག་པུ་གི་ཝ༌ལ། ནཱན་གི་ དམ་ཚིག་ཙུང་ཉི་ ལེག་པུ་ཨ་ཉི་ ལའི་ལེག་པུ་ཨ་ཝ༌ལ། ནཱན་གི་ ཉུང་པུ་ཐུར་ག་ དམ་ཚིག་ཙུང་མ་ཨ་དེན་གེ་ ཇི་གི་ ན་ག་མང་པུ་བི༌ལེ། ཇང་ཀབ་ཉི་དགའ་སྤྲོ་ཙི་ཁེ་ཨ༌ཉི།
24ཉི་ད་ཡང་ 1000 ཉོང་ཁཱན་གི་ ཨུན་ཐཱན་ཞུ་ཝ་ལ་ སྦྱིན་བདག་ ནཱན་གནམ་མེད་ས་མེད་ ཀག་ཏར༌ཅ། ནཱན་གི་ མ་ཆེ་ཁཱན་ཐོག་ཁེ་པ་ ནཱན་གི་དུང༌ཅ། ཉི་ནཱན་གི་ མ་ཚབ་ཁཱན་བུ་དང་ ནཱན་གི་དུས་ཅ་ཨ་ཉི་ ཇི་གི་སེན༌ཅ། 25ཨོ་ཉི་ཨ་དེན་གེ་ ཇང་ནཱན་གེ་ཡོང་ཁེ་ཉི་ ཇི་གི་དིན་ཐཱན་ ན་ག་ད་ཡང་ 1000 ས་ག་ཝང་ཕི་ཉི་ ཐ་ཝ་ཆོ་ཝ། ཡ་ ཨུ་ཐུ་ཤོ་ ན་ག་ད་ཡང་ 1000 གི་ལ་དག༌ཉི།
26དག་པ་ཀབ་ཉི་ སྦྱིན་བདག་གི་ རོ་ཀ་ཡེག་པ་ལ་ ནཱན་ཤོ་ ཏེ་ངན་དང་ གནམ་མེད་ས་མེད་ ཀ་ཤི་གཡོག་པ་གི་ཝ༌ལ། ཇི་གི་མ་ཆེ་ཁཱན་ཐོག་ཁེ་པ་ ཇི་གི་དུང༌ཅ། ཉི་ཇི་གི་མ་ཚབ་ཁཱན་ བུ་དང་ཁེ་པ་ ཇི་གི་དུས་ཅ་དག་ཉི་ ནཱན་གི་སེ་ཝ༌ལ། 27ཉི་ནཱན་གི་ ཇ་ག་ཏི་རུ་ དངུལ་ཁང་ག་ཙུག་ཉི་ ཐ་ལེ་ག་མ་སེན་ཤི་སྨོ། ཇང་ལོག་པ་ཀབ་ཉི་ སྐྱེད་དང་དྲག་ཉི་ ལོག་ཉི་ཤོ་ལེ་ཆོ་ཝ།
28ཨོ་ཉ་སོ་ངོ་ག་ ག་དང་ག་ཆོ་ཁཱན་ ད་ཡང་ 1000 ཁེ་པ་ བུན་ཐཱན་ 10000 ཆོ་ཁཱན་ག་བི། 29ཧང་ཡ་དག་ནེ་ལ་ ཨི་བི་ག་ཆོ་ཝ་ཐུར་ མང་པུ་བི༌ལེ། ཉི་རོ་ཀ་ཇོབ་ཇོབ་རི༌ལེ། དག་པ་ཀབ་ཉི་ ཨི་བི་ག་མ་ཝ་ཐུར་ རོ་ཀ་ད་སུར་ཆོ་ཁཱན་བུ་ རོ་ཀེ་རུ་ཉི་བུ༌ལེ། 30ཨོ་ཐ་ གོ་མ་ཆོད་ཁཱན་ གཡོག་པ་ཁེ་པ་ ཕིས་ཀ་མེར་བུ་ནང་ཀ་ཏཱན་ ཐུབ་གེམ་ཀུན་ཏི། ཨོ་ཉ་མེར་བུ་ནང་ཀ་ གེབ་ཉི་ ཤ་ཟེང་ཉི་ཆོ་ལེ་ཁེ༌ལེ༎
ཤི་ཤ་དང་ར་བ་བ།
31སོ་ངོ་ག་ཟ་ རོ་ཀ་གཟི་བརྗིད་ག་ནང་ཀ་ རོ་ཀ་ཞིང་ཁམས་ག་འཐེན་པ་ ཐམས་ཅན་ཀབ་ཉི་ལོག་ཐཱན་ རོ་ཀ་གཟི་བརྗིད་ག་ གསེར་ཁྲི་ཐུང་ཀ་བཞུགས༌པེ། 32མི་རིགས་ཐམས་ཅན་ག་སོ་ངོ་བ་ རོ་ཀ་གུབ་ཀ་ཛོ་མ་ཨོ་ཕེ། ཉི་ཤི་ཤ་དི་པ་གི་ རོ་ཀ་ཤི་ཤ་བ་ ར་བ་བ་ཀེ་སོ་སུ་ཨ་ཉི་ པེ་བ་པུརུས་ཀིན་ཨ་ཉི་ རོ་ཀི་ རོ་ཀ་སོ་ངོ་བ་ ཐམས་ཅན་རང་པེ༌བེ། 33ཉི་རོ་ཀི་ཤི་ཤ་བ་ རོ་ཀ་ལ་ཉོང་ལོ་ཀ་ཏཱན་ཐ༌ལེ། ཉི་ར་བ་བ་ཤོ་ རོ་ཀ་མི་ཉོང་ལོ་ཀ་ཏཱན་ཐ༌ལེ།
34ཉི་དཔོན་གི་ རོ་ཀ་ལ་ཉོང་ལོ་ཀ་ཆོ་ཁཱན་བ་ཀ་ ཡེག་པེ་ ན་ཧ་བ་ཤོ་ ཇ་ག་ཡབ་གི་ བྱིན་རླབས་གནང་ཁཱན་བ་གི༌ལ། འཛམ་གླིང་བཀོད་པེ་གང་ཀེ་རང་ ན་ཧ་དེན་གེ་ཅམ་ཁཱན་ རྒྱལ་སྲིད་ནང་ཀ་ ཨོ་དོ་དག༌ཉི། 35ཧང་ཡ་དག་ནེ་ལ་ ཇང་བི་ནང་ཁུ་ཉི་ཆོ་ལེ་གང་ཀ་ ན་ཤི་ ཇ་ག་ལྟོ་ག་ཝ། ཇང་རི་ནང་སོ་ཕེ་གང་ཀ་ ན་ཤི་ ཇ་ག་རི་ག་ཝ། ཉི་ཇང་གུམ་མ་ཡེ་ཁཱན་ཨ་ཉི་ ཨོ་ཕ་ཀབ་ཉི་ ན་ཤི་ ཇང་ན་ཧ་ཕའི་ག་ཐོག་པ། 36ཇང་ཙ་ཏི་ལིང་པ་ཆོ་ལེ་གང་ཀ་ ན་ཤི་ ཇ་ག་ཁ་མུང་ག་ཝ། ཇང་མར་བེ་གང་ཀ་ ན་ཤི་ ཇ་ག་ན་ཡོང་པ་ཨ་ཝ། ཉི་ཇང་བཙོན་ག་ཆོ་ལེ་གང་ཀ་ ན་ཧ་བ་ཤོན་གོད་པེ་ག་ ཤེག་པ་དག༌ཉི།
37ཉི་སོ་ངོ་དྲང་པུ་བ་ཀི་ཞུ་ལེ་ གཙོ་བོ་ ཨ་ཤི་ནཱན་ ཧ་ལ་གསོལཝ་ཀིད་པ་ག་ཐོང་ཉི་ ན་ག་ལྟོ་དྲང་མ་ཅ་ཡ། ཉི་ནཱན་རི་ནང་སོ་ཕ་ཐོང་ཉི་ ཨ་ཤི་ ན་ག་རི་ཧ་ལ་དྲང་མ་ཅ་ཡ། 38ཨ་ཤི་ནཱན་ གུམ་མ་ཡེ་ཁཱན་སོ་ངོ་ཨ་ཉི་ ཨོ་ཕ་ཐོང་ཉི་ ཨ་ཤི་ནཱན་ཧ་ལ་ ཨ་ཧ་ཕའི་ག་ ཞུ་ཝ་ཅ་ཡ། ཉི་ཨ་ཤི་ནཱན་ ཙ་ཏི་ལིང་པ་ཐོང་ཉི་ ཨ་ཤི་ ན་ག་ནམ་བཟའ་ ཧ་ལ་ཕུལ་བ་ཅ་ཡ། 39ཨ་ཤི་ནཱན་ བཙོན་ག་ནུ་ཕ་ཐོང་ཉི་ ཡང་ན་ལ་ ནཱན་བསྙུངས་པ་ཐོང་ཉི་ ཨ་ཤི་ནཱན་ བཞུགས་ས་ག་ ཧ་ལ་ཤོན་གོད་པེ་ ཨོ་ཕ་ཅ་ཡ་དག༌ཉི།
40དཔོན་གི་ རོག་ཏེ་བ་ཀ་ལན་བི་ཉི་ ཡེག་པེ་ ཇི་གི་ ན་ཧ་ཐྲང་ཉི་ཡེག་ཅ་ ཨི་བི་གི་ ཇ་ག་ ཨོ་ཐ་ཡུང་ཟི་ ཟེ་མུ་ཐུར་ག་བུ་ རུམ་པ་ཅ་གི་ལ་སྨོ་ ཨོ་ཉ་སོ་ངོ་གི་ ཇ་ག་རུམ་པ་གི༌ལ།
41ཉི་དཔོན་གི་ རོ་ཀ་མི་ཉོང་ལོ་ཀ་ཆོ་ཁཱན་བ་ཀ་ ཡེག་པེ་ ན་ཧ་བ་ཤོ་ སྨོན་ལམ་ཕོག་ཁཱན་ སོ་ངོ་བ་གི༌ལ། ཉི་ན་ཧ་བ་ཤོ་ ཇང་གེ་ཇང་ཀིན་ག་ བདུད་དང་ རོ་ཀ་འཐེན་པ་བ་ཀ་དེན་གེ་ ཅམ་ཁཱན་མ་འགྱུར་བརྟན་པ་ག་ དམྱལ་བ་ནང་ཀ་ཏཱན་དི། 42ཧང་ཡ་དག་ནེ་ལ་ ཇང་བི་ནང་ཁུ་ལེ་གང་ཀ་ ན་ཤི་ ཇ་ག་ལྟོ་མ་གཱན་ཤི། ཇང་རི་ནང་སོབ་ཉི་ ཆོ་ལེ་གང་ཀ་ ན་ཤི་ ཇ་ག་རི་མ་གཱན་ཤི། 43ཇང་གུམ་མ་ཡེ་ཁཱན་ སོ་ངོ་ཨ་ཉི་ཨོ་ཕ་ཆོ་ཝ། དག་པ་ཀབ་ཉི་ ན་ཤི་ ཇང་ན་ཧ་ཕའི་ག་མ་ཐོག་ཅི། ཇང་ཙ་ཏི་ལིང་པ་ཆོ་ཝ་ ཉི་ན་ཤི་ ཇ་ག་ཁ་མུང་མ་གཱན་ཤི། ཇང་མར་ཉི་ཆོ་ལེ་གང་ཀ་དང་ བཙོན་ག་ཆོ་ལེ་གང་ཀ་ ན་ཤི་ ཇང་ཤོན་གོད་པེ་མང་ཆི་དག༌ཉི།
44ཉི་རོ་ཀ་མི་ཉོང་ལོ་ཀ་ ཆོ་ཁཱན་བ་ཀི་ ཡེག་པེ་ གཙོ་བོ་ ཨ་ཤི་ནཱན་ བི་ནང་ཁུ་ཝ་ག་དང་ རི་ནང་སོ་ཕ་ག་ ཧ་ལ་རང་མ་ཐོང་ཤི། ཉི་ཨ་ཤི་ནཱན་ གུམ་མ་ཡེ་ཁཱན་ཨ་ཉི་ ཨོ་ཕ་ག་བུ་མ་ཐོང་ཤི། ཉི་ནཱན་ ཙ་ཏི་ལིང་པ་བུ་ མ་ཐོང་ཤི། ཉི་ནཱན་ བསྙུངས་པ་ག་བུ་ མ་ཐོང་ཤི། ཨུ་ཉུ་མ་ཚཱད་པ་ བཙོན་ག་ཁེ་ཝ་ག་བུ་ མ་ཐོང་ཤི། ཨ་ཤི་ཧང་ཏེན་ཨ་ཉི་ ན་ག་རུམ་པེ་ཡ་དག༌ཉི།
45ཉི་དཔོན་གི་ རོག་ཏེ་བ་ཀ་ ཡེག་པེ་ ཇི་གི་ ན་ཧ་ཐྲང་ཉི་ཡེག་ཅ་ ན་ཤི་ ཨོ་ཐ་ཟེ་མུ་བ་ཀ་ ཇ་རོ་མ་ཨ་ཁཱན་ཁེ་པ་ ན་ཤི་ ཇ་ག་ཇ་རོ་མ་ཨ་ཝ་གི་ལ་དག༌ཉི།
46མི་ཉོང་ལོ་ཀ་ཆོ་ཁཱན་བ་ དུས་ཏ་བུ་ག་དེན་གེ་ ཁྲིམས་བང་མེ་ག་ དི་ལེ་ཁེ༌ལེ། དག་པ་ཀབ་ཉི་ དྲང་པུ་བ་ཤོ་ ཚེ་མ་འགྱུར་བརྟན་པ་ནང་ཀ་ ནུ་ཕེ་དག༌ཉི༎
നിലവിൽ തിരഞ്ഞെടുത്തിരിക്കുന്നു:
མ་ཏི། 25: TNTB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Tshangla New Testament
© 2023, The Bible Society of India
all rights reserved
