མ་ཏི། 20
20
ལའི་པ་བ་ཀ་ དཔེ་གཏམ།
1ཞིང་ཁམས་ག་རྒྱལ་སྲིད་ཤོ་ སོ་ངོ་ཐུར་ རོ་ཀ་ཨང་གུར་ཨུང་ནང་ཀ་ ལའི་ཨ་ལེ་དེན་གེ་ ཝུན་བེད་པེ་རང་ ལའི་པ་བ་ ལ་མེ་དི་ཝ་ད་བུ་ཐུར་གི༌ལ། 2ལའི་པ་བ་ཀ་ ངམ་ཐུར་ག་ཉི་ དངུལ་ག་ཐ་ལ་རེ་བི་ལེ་དག་ཉི་ ཁ་ཙི་ཐཱན་ཐཱན་ རོ་ཀི་ རོ་ཀ་ཨུང་ནང་ཀ་ ལའི་ཨ་ལེ་ག་ ཀུན་ཏི་ཝ༌ལ།
3ཆུ་ཚོད་དགུ་ཕང་ དག་པ་ཀབ་ཉི་ རོག་ཚོང་ཕི་ས་གེ་ལེང་ དང་ཉི་དི་ལ་ཀབ་ཉི་ སོ་ངོ་ཚེ་བང་ ལའི་ཧང་རང་མ་ཝ་ ཐིང་ཉི་ཆོ་ཝ་ཨ་ཝ་ ཐོང་མ༌ལ། 4ཉི་རོ་ཀི་ རོག་ཏེ་བ་ཀ་ ཡེག་པ་ལ་ ན་ཧ་བ་ དིན་ཐཱན་ ཇ་ག་ཨུང་ག་ལའི་ཨའི། ཉི་ཇི་གི་ ན་ཧ་ཉི་ཕྲིག་ཀིན་ཨ་ཉི་རང་ བི་ལེ་དག༌ཉི། 5ཉི་རོག་ཏེ་བ་དི་ཝ༌ལ། ཉི་རོག་ཆུ་ཚོད་སོང་ཉིག་ཙིང་དང་ ཆུ་ཚོད་སམ་ཕང་ག་ ཕིས་ཀ་དིན་ཐཱན་ ཨུ་ཉུ་པུརུས་ཀིན་ཨ་ཉི་རང་ ཨ་ཝ༌ལ།
6ཉི་ཨོམ་ཆང་རང་ ཆུ་ཚོད་ལྔ་ཕང་ག་ ཕིས་ཀ་དི་ཉི་གོད་པ་ཀབ་ཉི་བུ་ སོ་ངོ་ཚེ་བང་ ཐིང་ཉི་ཆོ་ཝ་ཐོང་མ༌ལ། ཉི་རོ་ཀི་ རོག་ཏེ་བ་ཀ་ ཇི་མ་ལ་ ན་ཧ་བ་ ལའི་ཧང་རང་མ་ཨ་ལཱན་ ངམ་ཐུར་ཨོ་ཐ་ག་ ཧང་ཨ་ཉི་ ཐིང་ཉི་ཆོན་ཅ་ཡ་དག༌ཉི།
7རོག་ཏེ་བ་ཀི་ཡེག་པ་ལ་ སོ་ངོ་ཐུར་གི་རང་ ཨའི་ཉི་པ་ཨ་ཉི་ མ་རཱན་ཤི་དག༌ཉི།
ཉི་རོ་ཀི་ རོག་ཏེ་བ་ཀ་ཡེག་པ་ལ་ ན་ཧ་བ་བུ་ ཇ་ག་ཨུང་ནང་ཀ་དིན་ཐཱན་ ལའི་ཨའི་དག༌ཉི།
8ཨོ་ཉ་ངེ་རི་ ཨུང་ཡོན་ད་གི་ ལའི་ཇ་པ་ག་ཡེག་པ་ལ་ ལའི་པ་བ་རཱན་ཐཱན་ ཇུ་ཀེ་ཨུ་ཁཱན་བ་ཀེ་ཨ་ཉི་ གོ་ཙུག་ཉི་ རོག་ཏེ་བ་ཀ་ཉི་བི། ཉི་གོ་ཨུ་ཁཱན་ལའི་པ་བ་ཀ་ཉི་ཤོ་ ཇུ་ཀ་ཤ་བི་དག༌ཉི། 9ངེ་རི་ཆུ་ཚོད་ལྔ་ཕང་ག་ཨུ་ཉི་ ལའི་ཨ་ཁཱན་བ་ཀི་ དངུལ་ག་ཐ་ལ་རེ་ཉོང་པ༌ལ། 10ཉི་ཇུ་ཀ་དག་པ་ཀབ་ཉི་ ཐམས་ཅན་གེ་ གོ་མ་ཨུ་ཉི་ ལའི་ཨ་ཁཱན་བ་ཤེག་པ༌ལ། རོག་ཏེ་བ་ཀི་ མི་ཝ་ལ་ ཨ་ཤི་ཏ་མང་པུ་ཉོང་པེ་དག༌ཉི། དག་པ་ཀབ་ཉི་ རོག་ཏེ་བ་ཀི་ དངུལ་ག་ཐ་ལ་རེ་ཤ་ ཉོང་པ༌ལ། 11རོག་ཏེ་བ་ཀི་ ཉི་ཉོང་ཏེན་གེ་ ས་ཡོན་ད་ག་ཏཱན་ བེརེག་ཏོང་ཇིག་ཉི་ ཡེག་པ་ལ་ 12ཇུ་ཀེ་ཨུ་ཉི་ གཱན་དྲ་ཐུར་ཤ་ལའི་ཨ་ཁཱན་ ལའི་པ་བ་ཀ་བུ་ ནཱན་གི་ ཨའི་ཀབ་ཉི་ ཉི་དོ་ལུ་བི་ཝ། ཨ་ཧ་བ་ཏ་ ངམ་ཚ་ལུ་ནང་ཀ་ལའི་ཨ་ཉི་ ངམ་ཐུར་དཀའ་ཝ་ཅཱད་པ་དག༌ཉི།
13དག་པ་ཀབ་ཉི་ རོ་ཀི་ རོག་ཏེ་བ་ཀ་པོང་ཀ་ ཐུར་ག་ཏཱན་ཡེག་པ་ལ་ ཇ་རོ་ ཇི་གི་ ན་ཧ་མགུ་སྐོར་ཕིན་ཅ་མང་གི། ཧང་ན་ཤི་ དངུལ་ག་ཐ་ལ་ཐུར་ག་ ལའི་ཕི་ལེ་དག་ཉི་ ཁ་མ་དོག་ཅི་སྨོ། 14ན་ཧ་ཉི་བུ་ཉི་ཇོང༌ཤོ། ཇུ་ཀེ་ཨུ་ཉི་ལའི་ཨ་ཁཱན་བ་ཀ་བུ་ ན་ཧ་བ་ཀབ་ཉི་ དོ་ལུ་ཨ་ཉི་རང་བི་ལེ་ག་ ཇ་ག་སེམས༌ཅ། 15ཇང་ཏེན་ག་ཏི་རུ་གི་ ཇི་གི་ཧང་ཨ་ལེ་ལ་མ་ཐུར་ ཨ་ལེ་ག་དབང་ཚད་ ཇ་ག་མཱན་ཅ་སྨོ། ཇི་གི་ག་དང་ཡང་པུ་ཨ་ཉི་ རོག་ཏེ་བ་ཀ་ ནའི་ཀབ་ཉི་ དོ་ལུ་བི་ཝ་ཨ་དེན་གེ་ ན་ཧ་བ་ མིང་ཤོག་ཅ་ཏེ་མང་གི་སྨོ།
16ཨོ་ཉི་ཨ་དེན་གེ་ ཇུ་ཀ་ཆོ་ཁཱན་བ་ གོ་མ་ཤེག༌པེ། ཉི་གོ་མ་ཆོ་ཁཱན་བ་ ཇུ་ཀ་ཤེག་པེ་དག་ཉི་ གསུངས་མ༌ལ༎
ཡི་ཤུ་གི་ ཨོམ་ཆང་རང་ རོག་གཤགས་པེ་དག་ཉི་ གསུངས་མ༌ལ།
17ཡི་ཤུ་ ཡ་རུ་ཤ་ལེམ་ག་ བྱོན་ཅ་ཨ་ཉི་ རོ་ཀི་ རོ་ཀ་སློ་མ་སོང་ཉིག་ཙིང་ ལོག་ཐུར་ལོ་ཀ་ཏཱན་བསྣམས་ཐཱན་ གསུངས་མ་ལ་ 18ཨ་ཧ་བ་ ཡ་རུ་ཤ་ལེམ་ག་ཏཱན་དིན༌ཅ། ཉ་ག་ སོ་ངོ་ག་ཟ་ཤོ་ བླ་མ་ཆི་ལུ་བ་དང་ བཀའ་ཁྲིམས་ག་ སློབ་དཔོན་བ་ཀ་ ག་དང་ག་སྤྲོད༌པེ། ཉི་རོག་ཏེ་བ་ཀི་ རོག་ཤེ་ལེ་ག་ཙུག༌པེ། 19ཉི་རོ་ཀ་མེམ་ཅོར་བེ་དེན་གེ་དང་ ཏེ་ཐ་ཀི་ལ་ཕེ་དེན་གེ་ ཉི་ཁྲིམས་ཤིང་ཐུང་ཀ་ཇཱན་མེ་དེན་གེ་ རོག་ཏེ་བ་ཀི་ རོག་དད་པ་མ་ཨ་ཁཱན་བ་ཀ་ ག་དང་ག་རྩིས་སྤྲོད༌པེ། དག་པ་ཀབ་ཉི་ ནོང་སམ་ག་ནོང་ཀ་ རོག་ཤི་ཝ་གེ་ ལོག་ཉི་ཝུ་ལེ་དག་ཉི་ གསུངས་མ༌ལ༎
ཨ་མ་གི་ཞུ་ཝ༌ལ།
20ཨོ་ཉ་ཚི་ངེ་ ཇབ་དི་ཡ་ག་ཟ་ཉིག་ཙིང་དང་ རོག་ཉིག་ཙིང་ག་ཨ་མ་ ཡི་ཤུ་ག་སྐུན་མདུན་ག་བཅག་ཐཱན་ ཏོང་ཟིང་ས་ག་ཏེས་ཉི་ ཞུ་ཝ༌ལ། 21ཡི་ཤུ་གི་ རོ་ཀ་གསུངས་མ་ལ་ ནཱན་ཇང་གེ་ ཧང་ཚཱས་པེ་ཡ་དག༌ཉི།
ན་ག་རྒྱལ་སྲིད་ག་ནང་ཀ་ ཇ་ག་ཨོ་ཐ་ཟ་ཉིག་ཙིང་གེ་ཐུར་ ན་ག་ལ་ཉོང་ལོ་ཀ་དང་ ཐུར་ཤོ་མི་ཉོང་ལོ་ཀ་ ལང་མེ་ག་གནང་ཤོ་དག༌ཉི།
22ཡི་ཤུ་གི་ རོག་ཉིག་ཙིང་ག་ ན་ཆིང་གི་ ཧང་ཕུན་ཅ་གི་ལ་སྨོ་ སེན་ཅ་སྨོ། ཇི་གི་ཇ་མེ་ཅམ་ཁཱན་ གུར་བུ་ཀ་ལུ་གེ་ ན་ཆིང་གི་བུ་ ཇ་མེ་རེ་བེ་སྨོ་དག་ཉི་ གསུངས་མ་ཀབ་ཉི་ ཨ་ཆིང་གི་ ཇ་མེ་རེ་བེ་དག་ཉི་ ཞུ་ཝ༌ལ།
23ཡི་ཤུ་གི་ རོག་ཉིག་ཙིང་ག་ གསུངས་མ་ལ་ ན་ཆིང་གི་ཏེན་ཏེན་རང་ ཇ་ག་གུར་བུ་གེ་ཇ༌མེ། དག་པ་ཀབ་ཉི་ ན་ཆིང་ ཇ་ག་ལ་ཉོང་མི་ཉོང་ཨ་ཉི་ ལང་མེ་ག་ཆཱས་ཤོ་ ཇ་ག་དབང་ཚད་ག་ནང་ཀ་མཱན༌ཅ། ཨོ་ཐ་བཱརང་ཉིག་ཙིང་ཤོ་ ཇ་ག་ཡབ་ཀི་ ཅབ་ཉི་ཐ་ཁཱན་བ་ཀ་དེན་གེ་ཤ་ གི་ལ་དག་ཉི་ གསུངས་མ༌ལ།
24ཨོ་ཐ་ཀོར་གེ་ བཱརའ་སློ་མ་སེ་གི་ ན་ཐ་ལ་ཀབ་ཉི་ རོག་ཏེ་བ་ རོག་བོ་ཉིང་ཉིག་ཙིང་ཀབ་ཉི་ རོ་ཙིག་པ༌ལ། 25ཨོ་ཉི་ཨ་དེན་གེ་ ཡི་ཤུ་གི་ རོག་ཏེ་བ་ རོག་བཞུགས་ས་ག་ཏཱན་རཱན་ཐཱན་ གསུངས་མ་ལ་ ན་ཤི་སེན་ཅ་ ཨོ་ཐ་འཛམ་གླིང་ག་ དབང་ཁཱན་བ་ཀི་ རོག་ཏེ་བ་ཀ་ ཕརའ་ཁེ་ཆོ་ཁཱན་བ་ ཏི་བེ་གོད༌ཅ། ཉི་རོག་ཏེ་བ་ཀ་ འགོ་དཔོན་བ་ཀི་ གནམ་མེད་ས་མེད་ དབང་ཚད་གེན་མེ་གོད༌ཅ། 26དག་པ་ཀབ་ཉི་ ན་ཧ་བ་ཤོ་ ཨུ་ཉུ་ད་བུ་མང་གི་ཝ་ ལག་ཏང་ ན་ཧ་པོང་ཀེ་ ཆི་ལུ་རི་ལེ་གོད་ཁཱན་ཁེ་པ་ ན་ཧ་གཡོག་པ་རི་ལེ་ཁེ༌ལེ། 27ཉི་ན་ཧ་པོང་ཀེ་ གོ་དང་པ་ཤོ་ལེ་གོད་ཁཱན་ཁེ་པ་ བཱརའ་ག་ཟ་པ་རི་ལེ་ཁེ༌ལེ། 28སོ་ངོ་ག་ཟ་ཆང་ བཱརའ་གི་ རོ་ཀ་གཡོག་ཨན་ཆེན་དག་པ་གི་ མང་གི་ཝ་ བཱརའ་ག་གཡོག་ཨ་ལེ་དེན་གེ་དང་ མང་པུ་ཐུར་ སྡིག་པ་གེ་ཤོག་པེ་དེན་གེ་ རོ་ཀ་ཚེ་བི་ལེ་ག་ ཨོ་ཕ་གི་ལ་དག༌ཉི༎
མིང་ཀ་ན་ཉིག་ཙིང་ དྲག་པ༌ལ།
29ཡི་ཤུ་དང་ རོ་ཀ་སློ་མ་བ་ ཁྲོམ་ཆེན་ཡ་རི་ཧོ་ཐུབ་ཐ་ཉི་ བྱོན་ཅ་ཨ་ཉི་ སོ་ངོ་མང་པུ་གི་ རོ་ཀ་ཕྱག་ཞུ་ཉི་ དི་ཝ༌ལ། 30མིང་ཀ་ན་ཉིག་ཙིང་ ལམ་ཟུར་ཀ་ལང་ཉི་ ཆོ་ཝ་ཅ་གི་ཝ༌ལ། ཡི་ཤུ་ ཨོ་ཉ་ལམ་གེ་ བྱོན་ལ་དག་ ན་ཐ་ལ་ཀབ་ཉི་ རོག་ཉིག་ཙིང་གི་ ཤ་དར་ཕི་ཉི་ ཞུ་ཝ་ལ་ གཙོ་བོ་ ད་ཝུད་ག་སྲས་ ཨ་ཆིང་ག་ཐུང་ཀ་ སྙིང་རྗེ་ཨ་ཉི་གནང་ཤོ་དག༌ཉི།
31སོ་ངོ་མང་པུ་ཨ་ཉི་ ཛོམ་ཁཱན་བ་ཀི་ རོག་ཉིག་ཙིང་ག་ བཱརག་ཉི་ ཙང་ཀེན་ཆོའི་དག་ཉི་ ཡེག་པ༌ལ།
དག་པ་ཀབ་ཉི་ རོག་ཉིག་ཙིང་གི་ ལག་ཏང་ ཤ་དར་ཆི་ལུ་ཕི་ཉི་ ཞུ་ཝ་ལ་ གཙོ་བོ་ ད་ཝུད་ག་སྲས་ ཨ་ཆིང་ག་ཐུང་ཀ་ སྙིང་རྗེ་ཨ་ཉི་གནང་ཤོ་དག༌ཉི།
32ཡི་ཤུ་གི་ནོང་ཐཱན་ རོག་ཉིག་ཙིང་ག་ གསུངས་མ་ལ་ ཇི་གི་ ན་ཆིང་ག་དེན་གེ་ ཧང་ཨ་ལེ་ཁེ་ལེ་ཡ་དག༌ཉི།
33གཙོ་བོ་ ཨ་ཆིང་ག་ མིང་ཆོག་ཉི་གནང་ཤོ་དག་ཉི་ རོག་ཉིག་ཙིང་གི་ ཞུ་ཝ༌ལ། 34ཉི་ཡི་ཤུ་གི་ རོག་ཉིག་ཙིང་ཕང་པེ་ཨུ་ཉི་ རོག་ཉིག་ཙིང་ག་མིང་ ཐོབ་ཉི་གནང་མ༌ལ། ཉི་ཨོ་ཉ་ཐྲེ་ཀེ་རང་ རོག་ཉིག་ཙིང་གི་ ཐོང་མེ་རེ་བ་རི་ཉི་ རོ་ཀ་ཚིང་ཚིང་དི་ཝ༌ལ༎
നിലവിൽ തിരഞ്ഞെടുത്തിരിക്കുന്നു:
མ་ཏི། 20: TNTB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Tshangla New Testament
© 2023, The Bible Society of India
all rights reserved
