མ་ཏི། 10
10
ཡི་ཤུ་གི་ རོ་ཀ་སྐུ་ཚབ་སོང་ཉིག་ཙིང་ ཀུན་ཏི་ཝ༌ལ།
1ཡི་ཤུ་གི་ རོ་ཀ་སློ་མ་སོང་ཉིག་ཙིང་ རོ་ཀ་སྐུན་མདུན་ག་རཱན་ཐཱན་ རྣམ་ཤེས་མ་ཙང་མ་བ་ ཁོན་མེ་ག་དང་ ན་ཚ་མ་འདྲ་ཝ་ཁེ་ཉི་ མར་ཁཱན་བ་དྲག་པེ་ག་ དབང་ཚད་གནང་མ༌ལ། 2སྐུ་ཚབ་བ་ཀ་མཚན་ཤོ་ པ་ཏྲུས་དག་ཉི་ར་ཁཱན་སི་མོན་ ཉི་རོ་ཀ་བོ་ཉིང་ཨན་དྲི་ཡཱས་ ཇབ་དི་ཡ་ག་ཟ་ཡ་ཀུབ་དང་ རོ་ཀ་བོ་ཉིང་ཡུ་ཧན་ན། 3ཕི་ལིབ་དང་ བར་ཐོ་ལོ་མའི་ ཐོ་མ་དང་ ཁྲལ་དུས་ཁཱན་མ་ཏི་ ཨལ་ཕ་ཡཱས་ག་ཟ་ ཡ་ཀུབ་དང་ཐེ་དི་ཡཱས། 4ཉི་རྒྱལ་ཁབ་ཕང་ཁཱན་ སི་མོན་དང་ ཇུ་ཀ་དག་པ་ཀབ་ཉི་ ཡི་ཤུ་ག་མགུ་སྐོར་ཕི་ཁཱན་ ཡ་ཧུ་ད་ཨིས་ཀ་རི་ཡོད་དག་ཁཱན་བ་གི་ཝ་ཆོ་ཝ༌ལ།
5ཡི་ཤུ་གི་ རོག་ཏེ་སོང་ཉིག་ཙིང་ ཀུན་ཏིན་ཅ་ཨ་ཉི་ ཨོ་ཐེན་བཀའ་གནང་མ་ལ་ ན་ཧ་བ་ ཡ་ཧུ་དི་པ་མང་གི་ཁཱན་བ་ཀ་པོང་ཀ་དང་ ས་མ་རི་པ་བ་ཀ་ཁྲོམ་ཁོན་ མ་ནུབ་ཅོ་ན། 6དག་པ་ཀབ་ཉི་ གེ་མ་ག་ཤི་ཤ་བ་ད་བུ་ཆོ་ཁཱན་ ཨིས་རེལ་ག་ སོ་ངོ་བ་ཆོ་ས་ག་ཏཱན་དི། 7ན་ཧ་བ་ དིན་ཐཱན་ ཞིང་ཁམས་ག་རྒྱལ་སྲིད་ ར་ག་ཏེམ་པ་ཅ་དག་ཉི་ གསུང་བཤད་ཅོ། 8མར་ཁཱན་བ་དྲག་ཅོ། ཤི་ཁཱན་བ་ཝུའི། ཀླུ་ན་ཚ་ཁེ་ཁཱན་བ་ ཁམས་སངས་ཀིན་དྲག་ཅོ། ཉི་དོན་ག་བ་ཁོན༌ཤོ། ན་ཤི་ཏོང་པ་གེ་ ཉོང་པ་གི་ཝ་ཨ་དེན་གེ་ ན་ཤི་བུ་ བཱརའ་ག་ཏོང་པ་གེ་ བི་ལེ་ཁེ༌ལེ།
9ན་ཧ་པ་ཀོ་ནང་ཀ་ གསེར་དང་དངུལ་ ཉི་ཟངས་ཧང་རང་ མ་མེན༌ཤོ། 10ན་ཤི་དོ་ཕ་ཙ་ བུ་ལེ་མང་ཕ། ཁེན་ཇ་དང་ བི་དར་སོར་ནང་བུ་མ་བུའི། ཉི་དང་མ་ཀབ་ཉི་ ཏོག་པེ་ག་ཏོ་ཀང་བུ་མ་བུའི། ཧང་ཡ་དག་ནེ་ལ་ ལའི་ཨ་ཁཱན་གི་ ཟ་ལེ་ཇ་མེ་ཆོག༌པེ།
11ན་ཧ་བ་ དུང་དང་ཁྲོམ་ཁོན་ ནུ་ཕ་ཀབ་ཉི་ རུང་ཁཱན་སོ་ངོ་ཁེ་པ་ལམ་ཐཱན་ ཨོ་ཉ་ས་ཆ་ཐུབ་ཐ་ཉི་ མ་དི་ཝ་སག་པུ་ ཉ་ག་རང་ཆོའི། 12ན་ཧ་བ་ ཕའི་ནང་ཀ་ནུབ་ཅ་ཨ་ཉི་ ཨོ་ཉ་ཕའི་ག་ དཀོན་མཆོག་ག་སྐྱིད་པུ་ ཨོ་ཉ་ཕའི་ནང་ཀ་ཨུན་ཆེན་དག་ཉི་ཡེག་ཅོ། 13ཨོ་ཉ་ཕའི་ག་ཆོ་ཁཱན་བ་ རུང་ཁཱན་གི་ཝ་ཆོ་ནེ་ལ་ ན་ཧ་སྐྱིད་པུ་ རོག་ཏེ་བ་ཀི་ཉོང༌པེ། དག་པ་ཀབ་ཉི་ ཨོ་ཉ་ཕའི་ག་སོ་ངོ་བ་ རུང་ཁཱན་མ་ནེ་ལ་ ན་ཧ་སྐྱིད་པུ་ ན་ཧ་ཏཱན་ལོག༌པེ། 14ཉི་ན་ཧ་བ་ མ་ཐོག་པཱན་ ན་ཤི་ཡེག་ཁཱན་ཁེ་པ་ མ་ཉཱན་ནེ་ལ་ ཨོ་ཉ་ཕའི་ ཡང་ན་ལ་ ཁྲོམ་ཐུབ་ཐ་ཉི་ དི་ལ་ཀབ་ཉི་ ན་ཧ་བི་ཕརའ་ཁ་ཆོ་ཁཱན་ ས་ཕུར་ཙི་ཁཱན་གེམ༌ཤོ།#10:14 བི་ཕརའ་ཁ་ ས་ཕུར་ཙི་ཁཱན་གེམ་ཁཱན་ཤོ་ ཐུབ་ཐ་ཝ་དག་པ་ག་རྟགས་གི་ཝ༌ལ། 15ཇི་གི་ ན་ཧ་ཐྲང་ཉི་ཡེག་ཅ་ ཁྲིམས་ཅཱད་པེ་ག་ནོང་ཀ་ ཁྲོམ་ས་དོམ་དང་ག་མོ་ར་གི་ ཨོ་ཉ་ཁྲོམ་གེ་ ཁྲིམས་ཡང་པུ་ཉོང༌པེ།
16ཇི་གི་ ན་ཧ་བ་ བོ་རང་ཁུ་བ་ཀ་པོང་ཀ་ ཤི་ཤ་བ་ད་བུ་ཨ་ཉི་ ཀུན་ཏིན༌ཅ། ཨོ་ཉི་ཨ་དེན་གེ་ ན་ཧ་བ་ རུ་གེ་ནང་ད་བུ་རང་ སེ་བུ་ཨོ་ཕེ་ཁེ༌ལེ། ཉི་ཏི་ཏ་ར་ད་བུ་རང་ ཇམ་པུ་ཨོ་ཕེ་ཁེ་ལེ་ན། 17སོ་ངོ་བ་ཀེ་ ན་ཧ་བ་ རིག་པ་སྒྲིམ་ཅོ། རོག་ཏེ་བ་ཀི་ ན་ཧ་བ་ ཁྲིམས་ཁང་ག་ཀེ༌བེ། ཉི་ཆོས་འཛོམས་ཁོན་ རོག་ཏེ་བ་ཀི་ ན་ཧ་བ་ ལ་ཕེ། 18ཇ་ག་ཡོར་ཀེ་ ན་ཧ་བ་ དབང་ཁཱན་བ་དང་ དཔོན་བ་ཀ་གུབ་ཀ་ཀེ༌བེ། ཨུ་ཉུ་གང་ཀ་ ན་ཤི་ རོག་ཏེ་བ་དང་ མི་རིགས་ཐམས་ཅན་ག་ ཇ་ག་ཀོར་གེ་འཛོམས་དཔང་ ཨ་ལེ་ཁེ༌ལེ། 19ན་ཧ་བ་ ཙུང་མ་ཀབ་ཉི་ ཧང་ཡེག་པེ་གི་ས་ཨ་ཉི་ སྡུག་བསྔལ་མ་ཨའི། ཧང་ཡ་དག་ནེ་ལ་ ཨུ་ཉུ་གང་ཀ་ ཧང་ཡེག་པེ་ཁེ་ལེ་སྨོ་ ཨོ་ཉ་ཆཱས་ཁེ་པ་ ཕྲིག་ཕྲིག་ཨ་ཉི་ ན་ཧ་གནང༌མེ། 20ཧང་ཡ་དག་ནེ་ལ་ ཆཱས་ཨ་ཁཱན་ ནཱན་མང་གི་ཝ་ ན་ག་ཐུང་ཀེ་ཨ་ཉི་ གསུང་གྲོས་མཛད་ཉི་གནང་ཁཱན་ ན་ཧ་ཡབ་ག་ཐུགས་ཉིད་གི༌ལ།
21ཡུང་ཟི་བ་ནང་དོ་ ཤེ་ལེ་ག་ཙུག༌པེ། ཨ་པ་གི་ རོ་ཀ་ཝག་ཙ་བ་ཀ་དགྲ་ཨ་ཉི་ ཤེ་ལེ་ག་ཙུག༌པེ། ཉི་ཝག་ཙ་བ་ཀི་ ཕ་མ་ག་དགྲ་ཨ་ཉི་ ཤེ་ལེ་ག་ཙུག༌པེ། 22ཉི་ཇ་ག་མིང་ག་ཡོར་ཀེ་ སོ་ངོ་ཐམས་ཅན་གི་ ན་ཧ་བ་ མ་ཟེས་པ། དག་པ་ཀབ་ཉི་ ཨི་བི་གི་ ཇུ་ཀ་སག་པུ་རང་ ཐེས་པེ་རེ་བ་ཐུར་ ཨོ་ཉ་སོ་ངོ་གི་ ཐར་པ་ཉོང༌པེ། 23ན་ཧ་བ་ ཁྲོམ་ཐུར་ག་ མ་ལེག་པ་ཨ་ནེ་ལ་ ཨོམ་ཐུར་ཁྲོམ་ཐུར་ག་ཏཱན་ གཱན་དི། ཇི་གི་ ན་ཧ་ཐྲང་ཉི་ཡེག་ཅ་ སོ་ངོ་ག་ཟ་ མ་ལོག་པེ་གོ་མ་ ན་ཤི་ཨིས་རེལ་ག་ཁྲོམ་ ཐམས་ཅན་རང་ ཀོར་ཉི་མ་ཆུ་མ།
24སློ་མ་ཤོ་ རོ་ཀ་སློབ་དཔོན་གེ་ ཆི་ལུ་མང་གི། ཉི་གཡོག་པ་བུ་ རོ་ཀ་སྦྱིན་བདག་གེ་ ཆི་ལུ་མང་གི། 25སློ་མ་ཤོ་ རོ་ཀ་སློབ་དཔོན་ད་བུ་ རི་ཝ་ཐུར་གི་དྲིག༌པེ། ཉི་གཡོག་པ་ཤོ་ སྦྱིན་བདག་ད་བུ་ རི་ཝ་ཐུར་གི་དྲིག༌པེ། ཕའི་ནང་ཀ་སོ་ངོ་ཆི་ལུ་ག་རང་ བདུད་སེ་ཏཱན་བལ་ཇི་བུལ་#10:25 བལ་ཇི་བུལ་བུ་ སེ་ཏཱན་ག་ མིང་རང་གི༌ལ། ཨ་ཉི་ར་ནེ་ལ་ ཕའི་ནང་ཀ་ཆོ་ཁཱན་ བཱརའ་སོ་ངོ་བ་ཀ་ཏཱན་ ཧང་ར་ལེ་ཡ༎
སོ་ངོ་བ་ཀེ་མང་གི་ཝ་ དཀོན་མཆོག་གེ་ཡོང་ཁེ།
26དག་པ་ཀབ་ཉི་ རོག་ཏེ་བ་ཀེ་ ཡོང་མ་ཁེ། མ་ཐོང་མ་ཨ་ཉི་ བུག་ཉི་ཐ་ལེ་རེ་ཁཱན་ ཧང་རང་མཱན༌ཅ། ཉི་མ་སེ་ཝ་ཨ་ཉི་ གུམ་ཉི་ཐ་ལེ་རེ་ཁཱན་བུ་ ཧང་རང་མཱན༌ཅ། 27ཇི་གི་མེར་བུ་ནང་ཀ་ ཡེག་ཁཱན་ཁེ་པ་ ངབ་ཀ་ཝང་ཝང་ཆོ་ལེ་གང་ཀ་ ཆཱས་ཨའི། ཉི་ཇི་གི་ ན་ཧ་ན་ག་ས་བ་སུ་བུ་ཨ་ཉི་ ཡེག་ཁཱན་ཁེ་པ་ ཕའི་ཐུང་ཀ་དིན་ཐཱན་ཀཱད་ཅོ།
28ན་ཧ་བ་ ཤེ་ལེ་མིག་པ་ཕི་ཁཱན་བ་ཀེ་ ཡོང་མ་ཁེ། ཧང་ཡ་དག་ནེ་ལ་ རོག་ཏེ་བ་ཀི་ ན་ཧ་ལུས་པུ་ཤ་ཤེ༌ལེ། དག་པ་ཀབ་ཉི་ ན་ཧ་རྣམ་ཤེས་ ཧང་རང་ཨ་ལེ་མར་བ། ལག་ཏང་ ལུས་པུ་དང་ རྣམ་ཤེས་ཉིག་ཙིང་རང་ དམྱལ་བ་ནང་ཀ་ཀུན་ཏི་ཉི་ ཇཝ་ཆུ་མེ་རིག་ཁཱན་གེ་ཡོང་ཁེ། 29ཆུ་ཁ་ཉིག་ཙིང་ ཐ་ལ་ཐུར་ཨ་ཉི་མ་ཙོང་ཤི་སྨོ། ཡབ་ག་ཐུགས་བཞེད་མ་ཝ་ག་ ཆུ་ཁ་ཐུར་བུ་ ས་ག་ཞུད་མ་ཁེ༌ལ། 30དག་པ་ཀབ་ཉི་ ན་ཧ་ཤ་རང་ག་ཚམ་ཆང་ དྲང་ཨ་ཉི་ཆུ་མ༌ཅ། 31ཨོ་ཉི་ཨ་དེན་གེ་ ཡོང་མ་ཁེ། ཧང་ཡ་དག་ནེ་ལ་ ན་ཧ་བ་ཤོ་ ཆུ་ཁ་མང་པུ་གེ་ལག་ཉི་ ཁག་ཆི་ལུ་གི༌ལ༎
སོ་ངོ་བ་ཀ་གུབ་ཀ་ ཁིརིས་ཙི་ལེ་ཁེ༌ལེ།
32ཨི་བི་གི་ ཐ་འཛམ་གླིང་ག་ སོ་ངོ་བ་ཀ་གུབ་ཀ་ ཇང་ཙིན་ཅ་གི་ལ་སྨོ་ ཇི་གི་བུ་ ཞིང་ཁམས་ག་བཞུགས་ཁཱན་ ཇ་ག་ཡབ་ག་སྐུན་མདུན་ག་ ཨོ་ཉ་སོ་ངོ་ཁེ་པ་ཙི༌ལེ། 33དག་པ་ཀབ་ཉི་ ཨི་བི་གི་ སོ་ངོ་བ་ཀ་གུབ་ཀ་ ཇང་མ་ཙི་ཝ་ཐུར་ ཇི་གི་བུ་ ཞིང་ཁམས་ག་བཞུགས་ཁཱན་ ཇ་ག་ཡབ་ག་སྐུན་མདུན་ག་ ཨོ་ཉ་སོ་ངོ་མ་ཙི༌ལ།
34ཇང་འཛམ་གླིང་ག་ སྐྱིད་པུ་ཕ་ལེ་དེན་གེ་ ཨོ་ཕ་གི་ཝ་ལ་དག་ཉི་ མ་མི། ཇང་ཤོ་ སྐྱིད་པུ་ཕ་ལེ་དེན་གེ་ མང་གི་ཝ་ གི་རིང་ཕ་ལེ་དེན་གེ་ ཨོ་ཕ་གི༌ལ།
35ཧང་ཡ་དག་ནེ་ལ་ ཇང་ཤོ་ ཨ་པ་དང་ཟ་ག་བར་ཀ་ དགྲ་ཅོད་པེ་དེན་གེ་དང་ ཨ་མ་དང་ ཟ་མིན་ག་བར་ཀ་ དགྲ་ཅོད་པེ་དེན་གེ་ ཉི་ཨ་ཉི་དང་ཆི་མིན་ག་བར་ཀ་ དགྲ་ཅོད་པེ་དེན་གེ་ ཨོ་ཕ་གི༌ལ། 36ན་ཧ་དགྲ་བྱང་ཕིཤི་ཁེ་པ་ ན་ཧ་ཕའི་ནང་ཀ་རང་ཨོ་ཕེ།#10:36 མི་ཀ་ག་དཔེ་ཆ་ 7:6
37ཨི་བི་གི་ ཨ་པ་དང་ཨ་མ་ ཇང་གེ་ལག་ཉི་ཕང་པ་ཐུར་ ཇ་ག་སློ་མ་ཨ་ལེ་མ་རུང་པ། ཉི་ཨི་བི་གི་ ཟ་དང་ཟ་མིན་ ཇང་གེ་ལག་ཉི་ཕང་པ་ཐུར་ ཇ་ག་སློ་མ་ཨ་ལེ་མ་རུང་པ། 38ཨི་བི་གི་ རོ་ཀ་ཁྲིམས་ཤིང་བང་ཐཱན་ ཇ་ག་ཚིང་ཚིང་མང་ཕ་ཐུར་ ཨོ་ཉ་སོ་ངོ་གི་ ཇ་ག་སློ་མ་ཨ་ལེ་ མ་རུང་པ། 39ཨི་བི་གི་ རོ་ཀ་ཚེ་ཉོང་པེ་གོད་པ་ཐུར་ ཨོ་ཉ་སོ་ངོ་གི་ རོ་ཀ་ཚེ་གེམ་ཅ་གི༌ལ། ཉི་ཨི་བི་གི་ ཇ་ག་ཡོར་ཀེ་ ཚེ་གེ་མ་ཐུར་ ཨོ་ཉ་སོ་ངོ་གི་ ཚེ་ཉོང་ཅ་གི༌ལ།
40ཨི་བི་གི་ ན་ཧ་བ་ ཐོག་པ་ཐུར་ ཇང་ཞུན་ཅ་གི༌ལ། ཉི་ཇང་ཞུ་ཁཱན་གི་ ཇང་ཀུན་ཏི་ཁཱན་ ཞུན་ཅ་གི༌ལ། 41ལུང་བསྟན་པ་གི་ཝ་ཨ་དེན་གེ་ ལུང་བསྟན་པ་ཞུ་ཁཱན་སོ་ངོ་གི་ ལུང་བསྟན་པ་ག་ སེ་རབ་ཉོང༌པེ། ཉི་སོ་ངོ་དྲང་པུ་གི་ཝ་ཨ་དེན་གེ་ སོ་ངོ་དྲང་པུ་ཞུ་ཁཱན་གི་ སོ་ངོ་དྲང་པུ་ག་ སེ་རབ་ཉོང༌པེ། 42ཇི་གི་ ན་ཧ་ཐྲང་ཉི་ཡེག་ཅ་ ཇ་ག་ཕྱག་ཞུ་ཁཱན་གི་ཝ་ཨ་དེན་གེ་ ཇ་ག་སློ་མ་ཟེ་མུ་ཐུར་ག་བུ་ ཨི་བི་གི་ རི་ཆང་པུ་གུར་བུ་ཐུར་ཨ་ཝ་ བི་ནེ་ཆང་ ཨོ་ཉ་སོ་ངོ་གི་ ཐེ་རི་བ་རི་རང་ སེ་རབ་ཉོང་པེ་དག༌ཉི༎
നിലവിൽ തിരഞ്ഞെടുത്തിരിക്കുന്നു:
མ་ཏི། 10: TNTB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Tshangla New Testament
© 2023, The Bible Society of India
all rights reserved
