BOTHUBO 3
3
Ikiqive keu
1 Ampeu Alhou no aluza lo tüghashi lho keqo kümtsü dolo apighi no amqükiniue. Pa no totimi vilo pi, “Kuchou no Alhou ye nokujo vilo, ‘Nokujo ye aghutu lo kiu sübo lonomu chukevilo’ ipi keshea?” 2Totimi huno apighi vilo pi, “Nokujo ye aghutu lo axathibo akeqo xathi chulu nanie, 3ikemu Alhou no pi, ‘Nokujo ye aghutu mta lo axathibo akeu xathi ye chukevilo, tike kumono tipau bu kevilo, tishimo aye thive nani.’” 4Ikemu apighi no atotiu vilo pi, “Mtsüqheino nokujo ye thimo nani. 5Kughengu Alhou no ithi anike kughou nokujo no hipau chuni keno, nokujo nhethi ye khaqhive nani, eno nokujo ye Alhou toi, akivi ngo alhoksa ithive nani.” 6Ikehu kughou atotiu no asübo huye achuqupu kivi, anhethi lo jukighilepu, eno alokütsü shilu kepu anie pi ithulu keno, li no tipau xathi ikhipe chuve, eno hami ikhipe li kimi, khuu ghi li gholo ngo akeno tsü, eno pa no chuve. 7Tithiu pama nhethi xükhove, eno pama ye aphikümsa shi akeu ithive. Pama no mubuni jikime küqhano nhapuve.
8Atsala kümtsha dolo Ampeu Alhou no aghutu lo cheghi keu sütsa pama no chilu, eno timi ngo pa nipu pama ye aghutu lo asüboqo dolo Ampeu Alhou zütshüve. 9Ikemu Ampeu Alhou no timi kuno pa vilo pi, “No ye khile ani kea?” 10Eno pa no pi, “Ni ye aghutu lo O sütsa chilu no msave, kughengu ni ye aphikümsa shi ani kehu itshüve ke.” 11Pa no pi, “Khuu no no ye aphikümsa pi o vilo pi kea? No ye I no o vilo chu kevilo pi azah tsükeu sübo lono chuve keshea?” 12Timi huno pi, “Nono I gholo ngo peniye tsükeu totimi huno asübo tipau xathi I tsüno ni ye chuveke.” 13Tileno Ampeu Alhou no totimi vilo pi, “No ye hi ye kiu shive akea?” Totimi huno pi, “Apighi no I pishiqhive, eno ni ye chuveke.”
14 Ampeu Alhou no apighi vilo pi,
“Nono hipau shiveke ghenguno,
tüghashi tikishi kümtsü nguno
alau no ye müsüinivae,
o pono kiyi ghi no ye itiwuni,
eno o küxü kupuju no ye
ayeghimkhu chuni.
15Atotiu ngo nokujo dolo eno
o nuli ngo li nuli dolo I no kimthikile keu sütsüni;
pa no o kütsü chisheda nani, eno
nono pa phitsü mighi nani.”
16Totimi vilo Pa no pi,
“I no mtsüqheino o punu küsü küghüsüve tsüni; no ye
aküsü lono atianuli punu nani.
Tishimu nono o kimi jumine nani,
eno pa no o shou ayepe nani.”
17Adam vilo Pa no pi,
“Nono o nipu tsau inive no asübo
khikhi, ‘No ye hipau lono chu
kevilo,’ ipi I no azah o tsü keno,
tipau xathi chuveke ghenguno,
ayeghi ye o ghenguno müsüinivae;
o küxü kupuju no ye aghime shi mlano chuniae;
18tipau lono asahu ngo ashuyebo o ghenguno ipeghi nani;
no ye aluza lo atsüni chu nani.
19Nono ayeghi lo idewo moke
kutolo o tsünhizü o gi lono
ijiqi ghi no ye achuqupu chuni,
kughengu tipau lono o lhophe;
kughengu no ye ayeghimkhu eno
ayeghimkhu lo idewove nani.”
20Timi huno pa nipu je Eve kuvetsü, kughengu li ye aküxüküa kümtsü paza ke. 21Eno Ampeu Alhou no Adam ngo pa nipu pama ghenguno ashiyiko phimini mla tsü eno pama pipe.
22Tishino Ampeu Alhou no pi, “Julo, timi huye akivi ngo aküsa ithikeu lo ningu paphi shivae. Pa no itaghi pa u chhopuwo aküxüpu sübo lono xope chuve, eno pülhapuju xü auve nosae—” 23tighenguno ayeghi khipau lono pa lhophe keno tipau mlaphe peniye Ampeu Alhou no Eden ghutu lono pa puwuve. 24Pa no Timi hu hapheve, eno aküxüpu sübo laghi khekuto penike Pa no cherubim eno amiküiqü zütakikihi pesü Eden ghutu kipelau qhive.
നിലവിൽ തിരഞ്ഞെടുത്തിരിക്കുന്നു:
BOTHUBO 3: SUMRVBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The Bible Society of India
© 2023, Used by permission. All rights reserved. More
