Matyu 2
2
Too' i Som Piris ta Ngga' Muɗu i Ɓwe
1Ka mana ndai, myan ima si al Yeso ta ashwa i Betelehem ta' ti Judya, Herod yis ii makai. Som shangi si mbe' ti ɓyar shini, si yes ta ngga' muɗu i ɓwe, si wa Yerushalima, si lul lul si ni, 2“Makai i som Ju ima si al, mii leya? Ni ɗing ɓyar asus ta ta' ti ngga' muɗu i ɓwe, a yis nai kin ni yes ɓa ni cuhus afut.”
3Myan ima Makai Herod hal findel mai, unai mulut asus ti tirim fwet, andi shak som i Yerushalima hwak si tirim. 4Herod suɓut shak mbayai i kocokak hu som kofiti si Anggut hai, lulus kyel ima si wa al ti Kristi ta. 5Unai si nyus, “A ta ashwa i Betelehem ta' ti Judya, ɓurti angga' ima mashit worong ta nai ni,
6“ ‘A shish, Betelehem ta' ti Juda,
a shish shi ɓin mute ii foyi
na kaitat ti wufen ti Juda,
a na kyel amesh makaitat ma wa mulangya na,
ima ma wa mute ii ma
ɗing ti ɗufal ames Isar'ila.’ ”#2:6 Ɗing huni hwak: Mik 5:2.
7Unai Herod lai som i mbe' ti ɓyari i mufot, ɓa u shangi ta fo yusti myan kiga' ima ɓyari ti matkof. 8Ɗak ti'us wa Betelehem nyus, “Ɓu hu farun mangga' i al mai loo. Na hu wisus hu humkyel hu lakun, ɓurti ɓa yin hwak i wa i cuhus afut.”
9Takfai tima si hal findel i makaiyi, unai si ka' fisel si wis. Ɓyar tima si ɗingut ta muɗu i ɓwe yit ati ta wei yusti, ɗak ti yes ti te mangra ta hai i kyel ima ali mata. 10Myan ima si ɗing ɓyari, si hya ti jakak fwet. 11Ti mulang ta wuri, unai si ɗing ali hu nasus Uryam, si fwar ta wei yusti si cuhus afut. Ɗak si hwet ɗamam ames ya, si fas mal i ugbwirik mujuwi, hu yitat i ngyeshi mafyongi, hu mbar. 12DeeƁwe ti'us ra ta wii i fiɗyat wi nyus, kan si humkyel ta kyel i Herod kwa, unai si sas ta fisel nin si humuskyel ta ashwa ames.
Si Wa Bum ti Hai ta Masar
13Takfai tima si wis, unai malu' i Deembai pwak Josep hai ta fiɗyat wi nyus, “Luka fit, ha zan ali hu nasus, hu wa hu bum hai ta Masar. Tehun ta yes myan ima i wa findel sa. Ɓurti Herod ma far ti ali, ɓa u for ya.” 14Unai Josep luk fit zan ali hu nasus ta saa ti fo'i wi, si wis Masar. 15Tes ta kyeli yes myan ima Herod mot. Mai fur a ɓurti ɓa si hya aɗeng ima Deembai lak ta fo i mashit nyai, “I lai al amen ɓa u lang ya ta Masar.”#2:15 Ɗing huni hwak: Hos 11:1.
16Myan ima Herod ɗingi som i shangi si hat tus ii haling, unai mas futut ti ambas fwet. Kin ɓa si fwar fe muryai ya shak, ima si mata Betelehem hu ashwaha amet. Fe muryai ima si fwar ya, ii ma si ka'i ta wilyal apil yes fisha, ka'i ta si mukonan ima hali ta fo i som i shangi. 17Unai aɗeng ima lang ya ta foi mashit Yeremya hya, nyai,
18“Si hal la nin ta Rama,
yit kawa, yit shaat ti ambas,
Urecel ti kawa ɓurti femet,
ti nggwet i mat ti pweri,
ɓurti si mwatus.”#2:18 Ɗing huni hwak: Irm 31:15.
Muhumkyel ta Masar wa Nazaret
19Takfai tima Herod mot, unai malu' i Deembai pwak Josep hai ta fiɗyat wi yis ta Masar, nyus, 20“Luka fit ha zan ali hu nasus, ha wa ti ta' ti Isar'ila, ɓurti som ima ai sin far ti mupwet i ali, si mwatus.”
21Unai luk fit, zan ali hu nasus, wis ti ta' ti Isar'ila. 22Myan ima hali nyai, Arkelayus mat kop i kaitat ti dees Herod, cu wei ti kaitati ta ta' ti Judya, mwenus i wa ta ta'i. Takfai tima DeeƁwe ti'us ra ta fiɗyat wi, unai wel wis ta' ti Galili. 23Unai wa te ta ashwa nin ma asum Nazaret, ɓurti ɓa si hya laki i som shit nyai, “Si wa laisus ii Manazaret.”
നിലവിൽ തിരഞ്ഞെടുത്തിരിക്കുന്നു:
Matyu 2: AlisIRonNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Wycliffe Bible Translators, Inc. and © The Nigeria Bible Translation Trust 2018
