Johana 2

Harusi Kana ya Galilaya

1Nao ijua lya katatu koluo na harusi Kana ya Galilaya, na mee Jesu oluo awoenyi, 2na Jesu na wairimi wake wewaliko kele harusi. 3Nao divei ighenda idua, Mee Jesu kamuza, “Siwawesi divei.” 4Nao Jesu kamtumbulila, “Mawe, Uwo na undu muni nemi? Saa yangu yanakaile.” 5Nao mee kawauza watumishi “Icho chose amuza mdee, deeni.”

6Nao koluo na mbuta za mawe ndandatu za meji ziikilo kwa undu ghwa ada ya Wayahudi ya kuogha, kila moju ingiza lita ighana. 7Jesu kawauza watumishi, “Juzeni mbuta meji.” Nao wakazijuza mbuta ndii. 8Naye kawauza, “Tekeni agho meji na mumghenzele mubwaa wa harusi.” Nawo wakamghenzela. 9Naye mubwaa wa harusi aghenda atoa meji ghaghaluka divei, naye samanyile andu ghafumile, (ela watumishi waghatekile meji wemanyile), kamwita bwana harusi, 10na kamuza, “Kila mundu wanadyowagha afunye divei yaloli jako, hata ilyi wandu wanwa iketi, waleta divei iwase. Ela uwe waika divei yaloli hata hung'u!”

11Uyu niyo mwakilimbita wa hambiri, Jesu adeile Kana ya Galilaya, kaonyeza ubwaa ghwake, nawo wairimi wake wakamudumusa.

12Agha ghaghenda ghadua, Jesu kaghenda noko isi Kapernaumu, ngila mojori na mee, wana wakwawe na wairimi wake; na alye wakakala kwa majua machache.

Jesu kughenda Hekaluni

(Matayo 21:12-13; Marko 11:15-17; Luka 19:45-46)

13Nao Pasaka ya Wayahudi ighenda ifika avui, Jesu kajoka Jerusalemu. 14Naye aghenda angila Hekaluni kadoka wandu weketagha ng'ombe na ng'onzi na maringo, na wamoju weindana pesa wakala kele meza zawe. 15Nao kadea changu cha mirinzi, na kawagusa shighati ya Hekalu ngila mojori na ng'onzi na ng'ombe zawe; kabingilisha meza za waindani pesa na pesa zikatika putu. 16Na walye weluo weketagha maringo kawauza, “Ghafunyeni aha, Simwadee nyumba ya Aba kukala soko.” 17Wairimi wakakumbuka mawandiko gheghambagha, “Ushayo ghwa nyumba yako ghwanilya.”

18Nao vilongozi va Wayahudi wakamuza, “Ni mwakilimbita muni utionyezagha uwo na hachi kudea hung'u?” 19Jesu kawatumbulila, “Fuchuleni iyi Hekalu, nemi nijeiwaghala kwa majua matatu.” 20Nao vilongozi va Wayahudi wakamuza, “Hekalu iyi yanawaghalo kwa miaka mirongo mine na mitandatu, nawe waghamba uiwaghalagha kwa majua matatu?”

21Ela Jesu oluo keghora ighulu ya hekalu iyi iwo muli ghwake. 22Naye aghenda azuka kufuma kwa wafwa, wairimi wake wakakumbuka selyi aghorire; nawo wakadumusa mawandiko na selyi Jesu eghorire.

Jesu kumanya ngolo za wandu

23Nao ilyi Jesu eluo Jerusalemu kele karamu ya Pasaka, wandu wengi wakamdumusa, kwa kukala weonile wana mwakilimbita awadeile; 24ela Jesu sawadumusile kungi, kwa kukala owamanyile wose, 25hata seshaile mundungi amughorere ighulu yawe, kwani oweni ngolo za wandu.

നിലവിൽ തിരഞ്ഞെടുത്തിരിക്കുന്നു:

Johana 2: SAGALLANT

ഹൈലൈറ്റ് ചെയ്യുക

പങ്ക് വെക്കു

പകർത്തുക