ମାର୍କ 2

ହିର୍କଲ୍ ରଗ୍‍ତାଙ୍ଗ୍ ହାର୍ ଆନାକା

(ମାଥି. ୯:୧-୮; ଲୁକ. ୫:୧୭-୨୬)

1କେତ୍‌ଦିନ୍ ହାଚି ପାଚେ କପୁର୍‌ନାହୁମ୍‌ ସହର୍‌ତ ଆରେରଗ ଯୀଶୁ ୱାତାନ୍। ହେୱାନ୍ ଇଞ୍ଜ ମାନାନ୍ ଇଞ୍ଜି ମାନାୟ୍ ପୁଚାର୍। 2ହେବେ ବେସିହେନି ମାନାୟ୍ ରୁଣ୍ଡାଆତାର୍ ଯେ, ଇଲ୍ ଦୁୱେର୍‌ତ ଅଲପ୍‌ପା ବାହା ହିଲାତାତ୍, ଆରେ ଯୀଶୁ ହେୱାରିଙ୍ଗ୍ ଈଶ୍ୱର କାତା ୱେଚ୍‌ଚାନ୍। 3ଯୀଶୁ ହେୱାର୍ କଚଣ୍‌ତ ହାର୍ଦିକାବୁର୍ ୱେଚ୍‌ନିହିଙ୍ଗ୍, ଚାରି ଜାଣ୍ ମାନାୟ୍ ହିର୍କଲ୍ ରଗ୍‌କାଟାକାନିଙ୍ଗ୍‌ ପିଣ୍‌ଜି ତାତାର୍। 4ମାତର୍ ମାନାୟ୍ ଗଉଲି କାଜିଙ୍ଗ୍ ଯୀଶୁ ଲାଗାୟ୍ ତାତେଙ୍ଗ୍ ଆଡ୍‌ୱାତାର୍। ଲାଗିଙ୍ଗ୍ ଯୀଶୁ ଇମ୍‌ଣି ବାହାତାକେ ମାଚାନ୍, ହେ ବାହାନି ଚାଉଣି କାଣାକିଜି, ହିର୍କଲ୍ ରଗ୍‌କାଟାକାନିଙ୍ଗ୍‌ ଇମ୍‌ଣି ଟାଟିତାକେ ହୁନ୍‍ଜି ମାଚାନ୍ ହେ ଟାଟିଲାହାଙ୍ଗ୍ ଯୀଶୁ କଚଣ୍‌ତ ଜୁତ୍‍ତାର୍। 5ହେୱାର୍ ପାର୍ତି ହୁଡ଼୍‌ଜି ଯୀଶୁ ହେ ହିର୍କଲ୍ ରଗ୍‌କାଟାକାନିଙ୍ଗ୍‌ ୱେଚ୍‌ଚାନ୍, “ହିମ୍‌ଣା, ଆନେଙ୍ଗ୍ ନି ପାପ୍ ୱିଜୁ କେମା କିତ୍‌ତାଙ୍ଗ୍।”

6ହେ ଇଞ୍ଜ କୁଚ୍‌ଚି ମାଚି ଯିହୁଦି ଦରମ୍‌ନି ପଣ୍ଡିତାର୍ ବିତ୍ରେତାଙ୍ଗ୍ କେତେକ୍ ମାନାୟ୍ ଯୀଶୁ ୱେଚ୍‌ଚି ବେଣ୍ ୱେନ୍‌ଞ୍ଜି ମାନ୍-ମାନ୍ତ ବାବିକିଜି ମାଚାର୍, 7“ଈଶ୍ୱରତିଙ୍ଗ୍ ପିସ୍ତି ଇନେର୍ ପାପ୍ କେମା କିଦେଙ୍ଗ୍ ଆଡ୍‌ନାର୍? ଇୱାନ୍ ଇନେସ୍ ଇବେଣ୍ ୱେଚ୍‌ଚାନ୍? ଇୱାନ୍‌ତ ଈଶ୍ୱର ନିନ୍ଦା କିନାନା।”

8ଯୀଶୁ ହେଦାପ୍ରେ ହେୱାର୍ ମାନ୍ତି ବାବ୍‌ନା ପୁନ୍‌ଞ୍ଜି ହେୱାରିଙ୍ଗ୍ ୱେନ୍‌ବାତାନ୍, “ଏପେଙ୍ଗ୍ ଇନା କିଦେଙ୍ଗ୍ ଏଲେଙ୍ଗ୍ ଲେଗ୍‌ଦି ବେଣ୍ ଜାର୍-ଜାର୍ ମାନ୍ତ ବାବିକିନାଦେରା? 9ଏପେଙ୍ଗ୍ ଅଲପ୍ ବାବିକିଜି ହୁଡ଼ାଟ୍, ‘ଆନେଙ୍ଗ୍ ହିର୍କଲ୍ ରଗ୍‌କାଟାକାନିଙ୍ଗ୍‌ ପାପ୍ ୱିଜୁ କେମା କିତ୍‌ତାଙ୍ଗ୍ ଇଦାଙ୍ଗ୍ ୱେଚ୍‌ଚେଙ୍ଗ୍ ଆଡ଼୍‌ୱା, କି ନିଙ୍ଗା ନି ଟାଟି ଆସ୍ତି ଇଞ୍ଜ ହାଲା ଇଞ୍ଜି ୱେଚ୍‌ନାକା ଆଡ଼୍‌ୱା?’ 10ମାତର୍ ପୁର୍ତିତାକେ ପାପ୍ କେମା କିଦେଙ୍ଗ୍ ସରଗ୍‌ତାଙ୍ଗ୍ ୱାଜିମାଚି ମାନାୟ୍ ମେହିତି ଆଦିକାର୍ ମାନାତ୍।” ଇଦାଙ୍ଗ୍ ହେଲେକେ ଏପେଙ୍ଗ୍ ପୁନାଦେର୍, ଇଦାଙ୍ଗ୍ କାଜିଙ୍ଗ୍ ଯୀଶୁ ହିର୍କଲ୍ ରଗ୍‌ଦାକାନିଙ୍ଗ୍ ୱେଚ୍‌ଚାନ୍, 11“ଆନେଙ୍ଗ୍ ନିଙ୍ଗେଙ୍ଗ୍ ୱେଚ୍‌ଚାନାଙ୍ଗା, ନିଙ୍ଗା! ନି ଟାଟି ଆସ୍ତି ମିଞ୍ଜ ହାଲା।”

12ହେଦାପ୍ରେ ୱିଜାର୍ ହୁଡ଼୍‌ନିହିଙ୍ଗ୍ ହିର୍କଲ୍ ରଗ୍‌କାଟାକାନ୍ ନିଙ୍ଗ୍‌ଞ୍ଜି ଟାଟି ଆସ୍ତି ୱିଜାକାର୍ ମୁମ୍‌ଦ ହସିହାଚାନ୍। ଇଦାଙ୍ଗ୍ ହୁଡ଼୍‌ଜି ୱିଜାକାର୍ କାବାଆଜି ଈଶ୍ୱରତିଙ୍ଗ୍ ଜୟ୍-ଜୟକିଜି ୱାରି କିଜି ୱେଚ୍‌ଚାର୍, “ଏଲେଙ୍ଗ୍ ଲେଗ୍‌ଦି କାମାୟ୍ ଆପେଙ୍ଗ୍ ଇନାୱେଡ଼ାଙ୍ଗ୍ ପା ହୁଡ଼୍‌ୱାଦାଙ୍ଗ୍ ମାଚାପ୍!”

ଯୀଶୁ ଲେବିଙ୍ଗ୍ ଚେଲା ଆଦେଙ୍ଗ୍ ହିର୍‌ବାତାନ୍

(ମାଥି. ୯:୯-୧୩; ଲୁକ. ୫:୨୭-୩୨)

13ଆରେରଗ ଯୀଶୁ ଗାଲିଲୀ ଜିଲ୍ଲାନି ହାମ୍‌ଦୁର୍ କାଣ୍ଡିତ ହାଚାନ୍, ଆରେ ମାନାୟାର୍ ତା ଲାଗାୟ୍ ୱାତିଲେ ଯୀଶୁ ଈଶ୍ୱର ବେଣ୍ ହେୱାରିଙ୍ଗ୍ ହିକ୍ଷାହିଦେଙ୍ଗ୍ ଲାଗାତାନ୍। 14ଯୀଶୁ ହେବେତାଙ୍ଗ୍ ହାନିହିଙ୍ଗ୍ ଆଲ୍‌ପି ମେହି ଲେବିଙ୍ଗ୍ ହୁଡ଼୍‌ଜି, ଇୱାନିଙ୍ଗ୍ ମାଥିଉ ପା ଇଞ୍ଜିମାଚାର୍। ହେୱାନ୍ ସିସ୍ତୁଏନ୍‌ନି ବାହାତାକେ କୁଚ୍‌ଚି ମାଚାନ୍। ଯୀଶୁ ହେୱାନିଙ୍ଗ୍ ୱେଚ୍‌ଚାନ୍, “ନା ପାଚେ ୱା।” ହେବେତାଙ୍ଗ୍ ହେୱାନ୍ ତା କାମାୟ୍ ପିସ୍ତି ତାପାଚେ ହାଚାନ୍।

15ତାପାଚେ ଯୀଶୁ ଲେବିର୍ ଇଞ୍ଜ ଚିଞ୍ଜେଙ୍ଗ୍ କୁଚ୍‍ଚାର୍, ହେପାଦ୍ନା କେତେକ୍ ସିସ୍ତୁଏନ୍‌ନାକାର୍, ଆରେ ଇନେରିଙ୍ଗ୍ ପାପିର୍ ଇଞ୍ଜିମାଚାର୍ ଆରେ ତା ଚେଲାହିର୍ ହୁଦାଙ୍ଗ୍ କୁଚ୍‍ଚାର୍, ମାତର୍ ହେୱାର୍ ବେସିହେନି ମାଚାର୍, ଆରେ ତାପାଚେ ହାଲ୍‌ଜି ମାଚାର୍। 16ଇଦାଙ୍ଗ୍ ହୁଡ଼୍‌ଜି ପାରୁସିଦଳ୍‍ନି କେତେକ୍ ଯିହୁଦି ଦରମ୍‌ନି ପଣ୍ଡିତାର୍ ଯୀଶୁ ଚେଲାହିରିଙ୍ଗ୍ ୱେଚ୍‌ଚାର୍, “ଇଦାଙ୍ଗ୍ ଇନେସ୍? ପାପି ଆରେ ସିସ୍ତୁଏନ୍‌ନାକାର୍ ହୁଦାଙ୍ଗ୍ ହେୱାନ୍ ଇନେସ୍‌କିଜି କୁଚ୍‌ଚି ତିନାନା!”

17ଯୀଶୁ ଇବେଣ୍ ୱେନ୍‌ଞ୍ଜି, ହେୱାରିଙ୍ଗ୍ ୱେଚ୍‌ଚାନ୍, “ହାର୍ଦି ମାନାୟ୍ ଡାକ୍‍ଟର୍ ତାକେ ହାଲୁର୍, ମାତର୍ ବେମାର୍ ନିକାର୍ ଡାକ୍‍ଟର୍ ତାକେ ହାନାର୍। ଆନେଙ୍ଗ୍ ଦରମ୍ ମାନାୟାର୍ କାଜିଙ୍ଗ୍ ୱାୱାତାଙ୍ଗ୍‌ନା, ମାତର୍ ପାପିରିଙ୍ଗ୍ ହିର୍‌ବେଦେଙ୍ଗ୍ ୱାତାଙ୍ଗ୍‌ନା।”

ଯୀଶୁ ଉପାସ୍ କିନି ବିଷୟରେ ହିକ୍ଷା

(ମାଥି. ୯:୧୪-୧୭; ଲୁକ. ୫:୩୩-୩୯)

18ଡୁବନ୍‌ହିନି ଯୋହନ ଚେଲାହିର୍ ଆରେ ପାରୁସିଦଳ୍‍ ଉପାସ୍ କିଜି ମାଚାର୍। ରଦିନ୍ କେତ୍‌ଜାଣ୍ ମାନାୟ୍ ଯୀଶୁ ଲାଗାୟ୍ ହାଲ୍‌ଜି ୱେନ୍‌ବାତାର୍, “ଯୋହନ ଚେଲାହିର୍ ଆରେ ପାରୁସିଦଳ୍‍ନି ଚେଲାହିର୍ ଉପାସ୍ କିନାର୍, ମାତର୍ ମି ଚେଲାର୍ ଇନା କିଦେଙ୍ଗ୍ ଉପାସ୍ କିଉରା?”

19ଯୀଶୁ ହେୱାରିଙ୍ଗ୍ ୱେଚ୍‌ଚାନ୍, “ବର ନିପ୍‍ଣାକାର୍ ହୁଦାଙ୍ଗ୍ ବର ନାନିହିଙ୍ଗ୍ ହେୱାର୍ ଇନାକା ତିନ୍‌ୱାଦାଙ୍ଗ୍ ଉଣ୍‌ୱାଦାଙ୍ଗ୍ ଉପାସ୍ କିଦେଙ୍ଗ୍ ଆଡ୍‌ନାର୍? ବର ଏଚେପାଦ୍ନା ହେୱାର୍ ହୁଦାଙ୍ଗ୍ ମାନାନ୍, ହେପାଦ୍ନା ପାତେକ୍ ହେୱାର୍ ତିନ୍‌ୱାଦାଙ୍ଗ୍ ଉଣ୍‌ୱାଦାଙ୍ଗ୍ ଉପାସ୍ କିଦେଙ୍ଗ୍ ଆଡୁର୍। 20ମାତର୍ ଦିନ୍ ୱାନାତ୍, ଏଚେକାଡ଼୍‌ଦ ହେୱାର୍‌ତାଙ୍ଗ୍ ବରଙ୍ଗ୍ ବିନେକିନାର୍, ହେପାଦ୍ନା ହେୱାର୍ ଉପାସ୍ କିନାର୍। 21ଇନେର୍ ପୁଃନିହେନ୍ଦ୍ରାନି ଅଟିବାନା ପାନିହେନ୍ଦ୍ରାତାକେ ମେହାଇକିଜି ସିଲାଇ କିଉର୍, ମାତର୍ ପୁଃନିଅଟିବାନା ପାନିହେନ୍ଦ୍ରାତାକେ ମେହାଇକିଜି ସିଲାଇ କିତିସ୍ କେଞ୍ଜ୍‍ନାତ୍, ତାପାଚେ ମେହାଇକିତି ଅଟିବାନା ଯବର୍ କେଞ୍ଜ୍‍ନାତ୍। 22ହେଲେକେ ଆରେ ଇନେର୍ ପୁଃନି ଅଙ୍ଗୁର୍ ରାସ୍ ପାନି ତଲ୍‌ମଣାତାକେ ଇଟୁର୍। ହେ ଅଙ୍ଗୁର୍ ରାସ୍ ଇଡ଼୍‌ତିସ୍ ତଲ୍‌ମଣା ପୁଲାଆଜି କେଞ୍ଜ୍‍ନାତ୍, ଆରେ ଅଙ୍ଗୁର୍ ରାସ୍ ଆରେ ତଲ୍‌ମଣା ରିଣ୍ଡାଙ୍ଗ୍ ପା ନଷ୍ଟ ଆନିକ୍। ମାତର୍ ପୁଃନି ଅଙ୍ଗୁର୍ ରାସ୍ ପୁନି ତଲ୍‌ମଣା ତ ଇଟ୍‌ନି ଦର୍‌କାର୍।”

ଜମ୍‌ନିଦିନ୍‌ ବିଷୟତିଙ୍ଗ୍ ଯୀଶୁ ବୁଜାଇକିତି କାତା

(ମାଥି. ୧୨:୧-୮; ଲୁକ. ୬:୧-୫)

23ଦିନେକ୍ ଯିହୁଦିର୍ ଜମ୍‌ନିଦିନ୍‌ ନାଞ୍ଜିଙ୍ଗ୍ ଯୀଶୁ ଆରେ ତା ଚେଲାହିର୍ ତାସ୍ ୱିତ୍‍ତି ଜମି ନିପଣ୍ ହାଲ୍‌ଜି ମାଚାର୍, ଆରେ ହାଲୁ-ହାଲୁ ତା ଚେଲାହିର୍ ତାସ୍‌ନି କେରାଙ୍ଗ୍ ଚିଞ୍ଜେଙ୍ଗ୍ ନାଡ଼୍‍ତେଙ୍ଗ୍ ଲାଗାତାର୍। 24ଇବେତାଙ୍ଗ୍ ଯିହୁଦି ଦରମ୍ ପାରୁସିଦଳ୍‍ନି ମାନାୟାର୍ ହେଦାଙ୍ଗ୍ ହୁଡ଼୍‌ଜି, ହେୱାନିଙ୍ଗ୍ ୱେଚ୍‌ଚାର୍, “ଯିହୁଦି ଜମ୍‌ନିଦିନ୍‌ ନାଞ୍ଜିଙ୍ଗ୍ ଇମ୍‌ଣି କାମାୟ୍ ପା କିଦେଙ୍ଗ୍ ବିଦି ହିଲେତ୍, ଇନେକିଦେଙ୍ଗ୍ ମି ଚେଲାର୍ ହେଦାଙ୍ଗ୍ କିନାରା?”

25ଯୀଶୁ ହେୱାରିଙ୍ଗ୍ ୱେଚ୍‌ଚାନ୍, “ଏପେଙ୍ଗ୍ ସାସ୍ତର୍ ତା କେଇ ବିଷୟରେ ପଡ଼ି କିୱାତାଦେର୍‍ନା କି ଦାଉଦ ଇନାକା ହିଲିହିଙ୍ଗ୍ ହେୱାନ୍ ଇନାକା କିଜି ମାଚାନ୍? ହେପାଦ୍ନା ହେୱାନ୍ ଆରେ ତା ହାଙ୍ଗ୍‌ଦାକାର୍ ନାସ୍‌କି ମାଚାର୍। 26ହେପାଦ୍ନା ଅବିୟାଥର୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍‌ଦି ପୁଜାରି ମାଚାନ୍, ଦାଉଦ ଈଶ୍ୱର ମାନି ପୁଟ୍‍ତ ହାଚାନ୍, ଆରେ ଈଶ୍ୱରତିଙ୍ଗ୍ ପୁଜାକିତି ରୁଟିତିଙ୍ଗ୍ ଦାଉଦ ଚିଚାନ୍, ଆରେ ତା ହାଙ୍ଗ୍‌ଦାକାରିଙ୍ଗ୍ ପା ଚିଞ୍ଜେଙ୍ଗ୍ ହିତାନ୍। ମାତର୍ ଏପେଙ୍ଗ୍ ପୁନାଟ୍ କି ମୋଶା ନିୟମ୍ ସାସ୍ତର୍‌ତାକେ ଲେକା ମାନାତ୍, ହେ ପୁଜାକିତି ରୁଟିତିଙ୍ଗ୍ ଈଶ୍ୱର ହେବାକିନି ମୁଡ଼୍‌ଦି ପୁଜାରିର୍‌ନେ ତିନାର୍।” 27ଆରେ ଯୀଶୁ ହେୱାରିଙ୍ଗ୍ ୱେଚ୍‌ଚାନ୍, “ଯିହୁଦୀର ଜମ୍‌ନିଦିନ୍‌ ମାନାୟାର୍ ହାର୍ କାଜିଙ୍ଗ୍ ରସ୍ତାନ୍‌ନା, ମାତର୍ ଜମ୍‌ନିଦିନ୍‌ ମାନାୟ୍‌ତିଙ୍ଗ୍ କଷ୍ଟ ହିଦେଙ୍ଗ୍ ରହ୍‌ୱାତାନ୍‌ନା। 28ହେଦାଙ୍ଗ୍ କାଜିଙ୍ଗ୍ ଯିହୁଦିର୍ ଜମ୍‌ନିଦିନ୍‌ ପା ସରଗ୍‌ତାଙ୍ଗ୍ ୱାଜିମାଚି ମାନାୟ୍ ହିମ୍‍ଣାତି ଆଦିକାର୍ ମାନାତ୍।”

നിലവിൽ തിരഞ്ഞെടുത്തിരിക്കുന്നു:

ମାର୍କ 2: PEGNT

ഹൈലൈറ്റ് ചെയ്യുക

പങ്ക് വെക്കു

പകർത്തുക