ମାର୍କ 15
15
ପିଲାତ ରାଜା ଯୀଶୁଙ୍ଗ୍ ବିଚାର୍ କିତାନ୍
(ମାଥି. ୨୭:୧,୨,୧୧-୧୪; ଲୁକ. ୨୩:୧-୫; ଯୋହନ. ୧୮:୨୮-୩୮)
1ଅଜଡ଼୍ ଆଉ-ଆଉ ଯିହୁଦିର୍ ଦଳ୍ନି ନେତାର୍, ଯିହୁଦି ଦରମ୍ନି ପଣ୍ଡିତାର୍ ଆରେ ପ୍ରାଚିନ୍ନାର୍ ହୁକେ ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଇ ୱିଜାକାର୍ ବିଚାର୍ କିତାର୍। ଆରେ ଯୀଶୁଙ୍ଗ୍ ହିକ୍ଡ଼ିଙ୍ଗ୍ ହୁଦାଙ୍ଗ୍ ଗାଚ୍ଚି ଯିହୁଦା ଜିଲ୍ଲାନି ରୋମିୟ ଗବର୍ନର୍ ପିଲାତ ରାଜାତାକେ ଅତାର୍।
2ପିଲାତ ରାଜା ଯୀଶୁଙ୍ଗ୍ ୱେନ୍ବାତାନ୍, “ଏନେଙ୍ଗ୍ନେ ଯିହୁଦିର୍ ରାଜାତି?” ଯୀଶୁ ପିଲାତଙ୍ଗ୍ ୱେଚ୍ଚାନ୍, “ଏନେଙ୍ଗ୍ ସତ୍ ୱେଚ୍ନାୟା।”
3ଯୀଶୁଙ୍ଗ୍ ବିରଦ୍ କିଜି ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ବେସି ଦସ୍ ହିଜି ୱେଚ୍ଚେଙ୍ଗ୍ ଲାଗାତାର୍। 4ପିଲାତ ରାଜା ଆରେରଗ ହେବେ ଯୀଶୁଙ୍ଗ୍ ୱେନ୍ବାତାନ୍, “ଏନେଙ୍ଗ୍ ଇନାକାପା ୱେଚ୍ଚୁୟା? ହୁଡ଼ା, ନି ବିରଦ୍ତାକେ ଇୱାର୍ କେତେକ୍ ଦସ୍ କିଦ୍ନାରା।” 5ମାତର୍ ଯୀଶୁ ଚିମ୍ରା ଆଜି ମାଚାନ୍, ପିଲାତ ରାଜା ହେବେ ଚାନିଆ ଆତାନ୍।
ପିଲାତ ସର୍କାର୍ ଯୀଶୁଙ୍ଗ୍ ହାଃନି ଦଣ୍ଡ୍ ହିତାନ୍
(ମାଥି. ୨୭:୧୫-୨୬; ଲୁକ. ୨୩:୧୩-୨୫; ଯୋହନ. ୧୮:୩୯-୧୯:୧୬)
6ପାତିବାର୍ହୁ ନିସ୍ତାର୍ ପାର୍ବୁ ନାଞ୍ଜିଙ୍ଗ୍ ପିଲାତ ରାଜା ର ବନ୍ଦି ମାନାୟ୍ତିଙ୍ଗ୍ ପିସ୍ତିହିଜି ମାଚାନ୍, ଇମ୍ଣାକାନିଙ୍ଗ୍ ଏନ୍ତିସ୍, ହେୱାନିଙ୍ଗ୍ ପିଲାତ ସର୍କାର୍ ପିସ୍ତି ମାଚାନ୍। 7ହେପାଦ୍ନା କେତ୍ଜାଣ୍ ମାନାୟ୍ ଲାହାଙ୍ଗ୍ ବାରବ୍ବା ଇଞ୍ଜି ର ମାନାୟ୍ ଜଇଲ୍ ତ ମାଚାନ୍, ଇ ମାନାୟାର୍ ରୋମିୟ୍ ସର୍କାର୍ ବିରଦ୍ତାଙ୍ଗ୍ ନିଙ୍ଗ୍ଞ୍ଜି ମାନାୟାରିଙ୍ଗ୍ ମାର୍ନେ ଅସ୍ତି ମାଚାର୍। 8ମାନାୟ୍ ମାନ୍ଦା ପିଲାତତାକେ ୱାଜି ୱେଚ୍ଚାର୍, “ଏନେଙ୍ଗ୍ ପାତିବାର୍ହୁ ଇନେସ୍ କିଜି ବନ୍ଦି ଲଗାଙ୍ଗ୍ ପିସ୍ତି ମାଚାୟ୍ ହେଲେକେ ନଙ୍ଗୟ୍ ପା ର ମାନାୟ୍ତିଙ୍ଗ୍ ପିସ୍ତିହିଦା ଇଞ୍ଜି ଗୁୱାରି କିତାର୍।” 9ହେବେତାଙ୍ଗ୍ ପିଲାତ ସର୍କାର୍ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଇନେରିଙ୍ଗ୍ ପିସ୍ତିହିଦା ଇଞ୍ଜି ମାନ୍ କିନାଦେରା? ଆନେଙ୍ଗ୍ ଇନାକା ମି କାଜିଙ୍ଗ୍ ଯିହୁଦିନି ରାଜାଙ୍ଗ୍ ପିସ୍ତି ହିଦ୍ନାଙ୍ଗ୍ କି?” 10ପିଲାତ ସର୍କାର୍ ପୁନ୍ଞ୍ଜି ମାଚାନ୍ ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ମାନ୍ତ ଯୀଶୁଙ୍ଗ୍ ରିସା ମାଚାତ୍, ହେଦାଙ୍ଗ୍ କାଜିଙ୍ଗ୍ ହେୱାନ୍ କେଇଦ ହେଲାଇ କିଜି ହିତାର୍ନା। 11ମାତର୍ ଯୀଶୁ ବାଦୁଲ୍ ତାକେ ବାରବ୍ବାଙ୍ଗ୍ ପିସ୍ତିହିଦା ଇଞ୍ଜି ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ମାନାୟାରିଙ୍ଗ୍ ଟିଉଲିକିଜି ୱେଚ୍ଚାର୍। 12ପିଲାତ ସର୍କାର୍ ମାନାୟାରିଙ୍ଗ୍ ଆରେରଗ ୱେଚ୍ଚାନ୍, “ଏପେଙ୍ଗ୍ ଇନେରିଙ୍ଗ୍ ଯିହୁଦିର୍ ରାଜା ଇନାଦେରା, ହେୱାନିଙ୍ଗ୍ ଏପେଙ୍ଗ୍ ଇନାକା କିନାସ୍ ଇଞ୍ଜ୍ନାଦେରା?”
13ହେ ମାନାୟାର୍ ଚେରାଆଜି ପିଲାତ ସରକାର୍ତିଙ୍ଗ୍ ୱେଚ୍ଚାର୍, “ଯୀଶୁଙ୍ଗ୍ କୃଶକାଟ୍ତାକେ ଦୁପ୍ଚି ଅହାଟ୍।”
14ହେବେତାଙ୍ଗ୍ ପିଲାତ ରାଜା ମାନାୟାରିଙ୍ଗ୍ ଆରେରଗ ୱେନ୍ବାତାନ୍, “ହେୱାନ୍ ଇନା ଦସ୍ କିତାନ୍ନା?” ମାତର୍ ହେୱାର୍ ଆଦିକ୍ହେ ଚେରାଆଜି ୱେଚ୍ଚାର୍, “ତାଙ୍ଗେଙ୍ଗ୍ କୃଶକାଟ୍ତାକେ ଦୁପ୍ଚି ଅହାଟ୍।”
15ଲାଗିଙ୍ଗ୍ ପିଲାତ ରାଜା ମାନାୟାରିଙ୍ଗ୍ ମାନ୍ ପୁରାଇ କିଦେଙ୍ଗ୍ ଇଚାକିଜି ମାଚାନ୍। ଲାଗିଙ୍ଗ୍ ପିଲାତ ରାଜା ବାରବ୍ବାତିଙ୍ଗ୍ ମୁକ୍ତି କିତାନ୍। ଆରେ ଯୀଶୁଙ୍ଗ୍ କର୍ଡା ହୁଦାଙ୍ଗ୍ ଟ୍ରାକିକିଜି କୃଶକାଟ୍ତାକେ ଅସ୍ତେଙ୍ଗ୍ ରମିୟ ସେନାର୍ କେଇଦ ପିସ୍ତି ହିତାନ୍।
ରୋମିୟ୍ ସେନାର୍ ଯୀଶୁଙ୍ଗ୍ ଇନସ୍ତା କିତାର୍
(ମାଥି. ୨୭:୨୭-୩୧; ଯୋହନ. ୧୯:୨,୩)
16ତାପାଚେ ପିଲାତ ଗବର୍ନର୍ ସେନାହିର୍ ଯୀଶୁଙ୍ଗ୍ ରୋମିୟ ସର୍କାର୍ ଇଲ୍ନି ହାକ୍ଡ଼ିତାକେ ଅସାହାଚାର୍, ହେବେ ୱିଜୁସେନାର୍ ଦଳ୍ତିଙ୍ଗ୍ କୁକ୍ଚି ରବେ ଆତାର୍। 17ସେନାର୍ ଯୀଶୁଙ୍ଗ୍ ରାଜା ଇଞ୍ଜି ଇନସ୍ତା କିଦେଙ୍ଗ୍ ୱାଙ୍ଗା କଲର୍ ଆଙ୍ଗି ଉସ୍ପିକିତାର୍, ଆରେ କାପ୍ଡ଼ାତାକେ ୱାଡିହାସ୍ ମୁକୁଟ୍ରସ୍ତି ତୁଜି କିତାର୍। 18ତାପାଚେ ଯୀଶୁଙ୍ଗ୍ ସେନାର୍ ଇନସ୍ତା କିଦେଙ୍ଗ୍ ଚେରାଆଜି ୱେଚ୍ଚାର୍, “ଏ ଯିହୁଦିର୍ ରାଜା ନିଙ୍ଗେଙ୍ଗ୍ ଜୱାର୍।” 19ହେୱାର୍ ର ବେତ୍ ବେଡ୍ଗାତାଙ୍ଗ୍ ଯୀଶୁଙ୍ଗ୍ କାପ୍ଡ଼ାତାକେ ବାରମ୍-ବାରମ୍ ଇଡ଼୍ତାର୍, ତାଙ୍ଗେଙ୍ଗ୍ ଚୁପ୍ଜି ଇନସ୍ତା କିତାର୍, ଆରେ ଯୀଶୁଙ୍ଗ୍ ଇନସ୍ତା କିଦେଙ୍ଗ୍ ମେଣ୍ତାକୁନ୍ଦିକିଜି ଜୱାର୍ କିତାର୍। 20ହେୱାର୍ ଯୀଶୁଙ୍ଗ୍ ଇନସ୍ତାକିତି ପାଚେ ହେ ୱାଙ୍ଗା କଲର୍ ଆଙ୍ଗି ରିକ୍ଚିଅଜି ତା ଆଙ୍ଗି ଉସ୍ପିକିତାର୍। ଆରେ, ହେୱାର୍ ତାଙ୍ଗେଙ୍ଗ୍ କୃଶକାଟ୍ତାକେ ଦୁପ୍ତେଙ୍ଗ୍ ସହର୍ ବାର୍ତ ଅତାର୍।
ଯୀଶୁଙ୍ଗ୍ କୃଶକାଟ୍ତାକେ ଅସ୍ତାର୍
(ମାଥି. ୨୭:୩୨-୪୪; ଲୁକ. ୨୩:୨୬-୪୩; ଯୋହନ. ୧୯:୧୭-୨୭)
21ହେପାଦ୍ନା ଶିମୋନ ତର୍ଦାକାନ୍ ରକାନ୍ କୁରିଣିୟ ସହର୍ ହିରୁନାସ୍ତାଙ୍ଗ୍ ଯିରୁଶାଲାମ ସହର୍ତାକେ ୱାଜିମାଚାନ୍, ଆରେ ତା ମେହିର୍ ରିୟାର୍ ମାଚାର୍ ଆଲେକ୍ଜାଣ୍ଡ୍ରିଆ ଆରେ ରୁପ୍। ସେନାର୍ ଶିମୋନତିଙ୍ଗ୍ ଆଦେସ୍ ହିତାର୍ ଇମେତାକେ କୃଶକାଟ୍ ରୁଜ୍ନାର୍ ହେବେଅଦେଙ୍ଗ୍ ପିଣ୍ଡିକିତାର୍। 22ଆରେ ସେନାର୍ ଯୀଶୁଙ୍ଗ୍ ଗଲ୍ଗତା, ତର୍ଦି ବାହାତ ଅସିହାଚାର୍ ତା ଅର୍ତ କାପ୍ଡ଼ାନି କପ୍ରି ଲେକେ ଚଞ୍ଜ୍ନିବାହା। 23ତାପାଚେ ହେୱାର୍ ଯୀଶୁଙ୍ଗ୍ ନନାକା ପୁନ୍ମେନ୍ମା ଇଞ୍ଜି ଅଙ୍ଗୁର୍ ରାସ୍ତାକେ ଅହ ମେହାଇକିଜି ଉଣ୍ଡେଙ୍ଗ୍ ହିତାର୍। ମାତର୍ ଯୀଶୁ ହେ ଅଙ୍ଗୁର୍ ରାସ୍ ଉଣ୍ଡେଙ୍ଗ୍ କାୱାତାନ୍। 24ତାପାଚେ ହେୱାର୍ ଯୀଶୁଙ୍ଗ୍ କୃଶକାଟ୍ତାକେ କୁଟିଙ୍ଗ୍ ଇଡ଼୍ଜି ଦୁପ୍ତାର୍, ହେୱାନ୍ ଉସ୍ପିତି ହେନ୍ଦ୍ରାତିଙ୍ଗ୍ ଇନେର୍ ଇନାକା ଅନାର୍ ଇଞ୍ଜି ଲାଟ୍ରିପୁଟାୟ୍ କିତାର୍, ଆରେ ଜାର୍ ଜାର୍ବିତ୍ରେ ବାଗ୍କିଜି ଅତାର୍।
25ହେପାଦ୍ନା ୱେଡ଼ା ନଅଟା ଆଜିମାଚାତ୍, ହେୱାର୍ ଯୀଶୁଙ୍ଗ୍ କୃଶକାଟ୍ତାକେ ଦୁପ୍ତାର୍। 26ଆରେ ମାର୍ ପାଟା ରସ୍ତି ଯୀଶୁଙ୍ଗ୍ ଦୁପ୍ତି କୃଶକାଟ୍ ଜପି ବଡ୍ ଇଡ଼୍ତାର୍। ହେ ପାଟାତାକେ ଇଲେକେ ଲେକାଆଜି ମାଚାତ୍, “ଇୱାନ୍ ଯିହୁଦିର୍ନି ରାଜା।” 27ଆରେ, ଯୀଶୁଙ୍ଗ୍ କୃଶକାଟ୍ତାକେ ଦୁପ୍ତାର୍। ଆରେ ହେ ରିକାର୍ ଚର୍କୁକାଙ୍ଗ୍ ପା ରକାନିଙ୍ଗ୍ ତା ତିନା ବାଗାଇ ଆରେ ରକାନିଙ୍ଗ୍ ଆରେ ଡେବା ବାଗାଇ କୃଶକାଟ୍ତାକେ ଦୁପ୍ତାର୍। 28ଇଲେକେ ରକ୍ଷାକିଦ୍ନାକାନ୍ ବିଷୟ ଦରମ୍ ସାସ୍ତର୍ ଲେକାମାଚାତ୍ ହେଦାଙ୍ଗ୍ ସତ୍ ଆତାତ୍, “ହେୱାନ୍ ର ଦସି ମାନାୟ୍ ଲେକେ ଆଜି ଗାଣାକିୟା ଆତାନ୍।” 29ହେ ହାଜ୍ଦିଙ୍ଗ୍ ହାନିମାନାୟ୍ ଜାର୍-ଜାର୍ କାପ୍ଡ଼ାଙ୍ଗ୍ ଲେପ୍ଚି ଯୀଶୁଙ୍ଗ୍ ନିନ୍ଦାକିଜି ୱେଚ୍ଚାର୍, “ବା! ମନ୍ଦିର୍ ଡ୍ରିକ୍ଚି ଆରେ ତିନ୍ଦିନ୍ତାଙ୍ଗ୍ ରହ୍ନାକାନ୍, 30କୃଶକାଟ୍ତାଙ୍ଗ୍ ଜୁଜିୱାଜି ଜାର୍ତିଙ୍ଗ୍ ଉଦାର୍ କିୟା।”
31ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ଯିହୁଦି ଦରମ୍ନି ପଣ୍ଡିତାର୍ ଇନସ୍ତାକିଜି ଇଚାର୍, “ଜେକନିକାରିଙ୍ଗ୍ ଉଦାର୍ କିତାନ୍, ଜାର୍ତିଙ୍ଗ୍ ଉଦାର୍ କିଦେଙ୍ଗ୍ ଆଡୁନା! 32ଇୱାନ୍ ନିଜେ ଖ୍ରୀଷ୍ଟ ଇଞ୍ଜି ୱେଚ୍ଚି ମାଚାନ୍, ଆରେ ଇସ୍ରାଏଲନି ରାଜା ଇଞ୍ଜି ମାଚାନ୍ ନଙ୍ଗୟ୍ କୃଶକାଟ୍ତାଙ୍ଗ୍ ଜୁଜିୱା, ଲାଗିଙ୍ଗ୍ ହୁଡ଼୍ଜି ପାର୍ତିକିଦ୍ନାପ୍, ଆରେ ମା ରାଜା ଇଞ୍ଜି ପାର୍ତିକିଦ୍ନାପ୍।” ତା ହୁଦାଙ୍ଗ୍ କୃଶକାଟ୍ତାକେ ଦୁପିଆଜି ମାଚାର୍, ହେୱାର୍ ପା ତାଙ୍ଗେଙ୍ଗ୍ ନିନ୍ଦା କିତାର୍।
ଯୀଶୁ ହାଃତାକା
(ମାଥି. ୨୭:୪୫-୫୬; ଲୁକ. ୨୩:୪୪-୪୯; ଯୋହନ. ୧୯:୨୮-୩୦)
33ୱେଡ଼ା ବାର୍ଟା ୱେଡ଼ାଙ୍ଗ୍ ୱିଜୁ ଦେସ୍ ନିପଣ୍ ମାଜ୍ଗା ଆଜି ତିନ୍ ଘଣ୍ଟା ପାତେକ୍ ମାଚାତ୍। 34ତିନ୍ଟା ୱେଡ଼ାଙ୍ଗ୍ ଯୀଶୁ ଗାଜା କାଟ୍ତାଙ୍ଗ୍ ୱେଚ୍ଚାନ୍, “ଏଲି, ଏଲି, ଲାମା ସବକ୍ଥାନି? ଇଚିସ୍, ଏ ନା ଈଶ୍ୱର, ଏ ନା ଈଶ୍ୱର, ଏନେଙ୍ଗ୍ ନାଙ୍ଗେଙ୍ଗ୍ ଇନା କିଦେଙ୍ଗ୍ ପିସ୍ତାତାଇ?”
35ହେବେ ନିଲ୍ଚିମାଚି ମାନାୟାର୍ ବିତ୍ରେତାଙ୍ଗ୍ ଇନେର୍-ଇନେର୍ ଯୀଶୁ ୱେଚ୍ଚି ବେଣ୍ତିଙ୍ଗ୍ ବୁଲ୍ବୁଜାଆଜି ୱେଚ୍ଚାର୍, “ୱେନାଟ୍! ଇୱାନ୍ ଭବିଷ୍ଯତବକ୍ତା ଏଲିୟଙ୍ଗ୍ କୁକ୍ନାନା ସରଗ୍ତାଙ୍ଗ୍ ୱାଜି ସାଇଜକିଦା ଇଞ୍ଜି।” 36ହେବେତାଙ୍ଗ୍ ରକାନ୍ ହନ୍ଚି ହାଲ୍ଜି ର ସ୍ପଞ୍ଜ୍ ତାକେ ହଇନି ଅଙ୍ଗୁର୍ ରାସ୍ ବାର୍ତିକିଜି ର ବେତ୍ ବେଡ୍ଗା ନାଡ଼ାତାକେ ଚାନ୍ଞ୍ଜି ଉଣେନ୍ଇଞ୍ଜି ଯୀଶୁଙ୍ଗ୍ ୱେଇଦ ଡୁପ୍ତାର୍। ହେ ମାନାୟ୍ ଇଚାନ୍ ଇନାକା କିମାଟ୍, “ଆସେଙ୍ଗ୍ ହୁଡ଼୍ନାସ୍ ଏଲିୟ ଭବିଷ୍ୟତବକ୍ତା ୱାଜି ଇୱାନିଙ୍ଗ୍ କୃଶକାଟ୍ତାଙ୍ଗ୍ ଜୁତ୍ତି ରକ୍ଷା କିନାନ୍ କି ଆକାୟ୍।”
37ମାତର୍ ଯୀଶୁ ଗାଜାକାଟ୍ କିଜି ହାଃତାନ୍। 38ହେପାଦ୍ନା ଈଶ୍ୱର ମାନି ମନ୍ଦିର୍ତାକେ ଡ଼ସିମାଚି ବୱାଡ଼୍ପାର୍ଦା ଜପିତାଙ୍ଗ୍ ତାରେନ୍ ପାତେକ୍ କେଞ୍ଚାତ୍, ହେ ପାର୍ଦାକାଜିଙ୍ଗ୍ ଈଶ୍ୱର ମାନି ପବିତ୍ର ବାହାତ ମାନାୟାର୍ ହାଞ୍ଜେଙ୍ଗ୍ ଆଡ୍ୱାଦାଙ୍ଗ୍ ମାଚାର୍। 39ଆରେ ଯୀଶୁ ମୁମ୍ଦ ନିଲ୍ତି ଶହେଜାଣ୍ ସେନାର୍ତାଙ୍ଗ୍ ମୁଡ଼୍ଦାକାନ୍ ଚେରାଆଜି ଯୀଶୁ ହାତାକା ହୁଡ଼୍ଜି ୱେଚ୍ଚାନ୍, “ହାତ୍ପା, ଇୱାନ୍ ରକାନ୍ ଈଶ୍ୱର ମେହି ମାଚାନ୍।”
40କେତେକ୍ କଗ୍ଲେକ୍ ପା ଦେହାତାଙ୍ଗ୍ ହୁଡ଼୍ଜି ମାଚିକ୍। ହେୱେକ୍ ବିତ୍ରେତାଙ୍ଗ୍ ମଗ୍ଦଲିନି ସହରନି ମରିୟମ, ହିରୁ ଯାକୁବ ଆରେ ଯୋଶି ତେହି ମରିୟମ, ଆରେ, ଶଲମି ମାଚିକ୍। 41ଇ ତିନ୍ଜାଣ୍ କଗ୍ଲେକ୍, ଯୀଶୁ ପାଚେ ବୁଲାଆଜି ତା ହେବାକିଜି ମାଚିକ୍, ଏଚେପାଦ୍ନା ଗାଲିଲୀ ଜିଲ୍ଲା ୱିଜୁ ନିପଣ୍ ବୁଲାଆଜି ହାର୍ଦିକାବୁର୍ ୱେଚ୍ଚି ମାଚାନ୍, ଆରେ ଗାଲିଲୀ ଜିଲ୍ଲାତାକେ କେତେକ୍ ହେନି କଗ୍ଲେକ୍ ପା ମାଚିକ୍। ହେୱାର୍ ହୁଦାଙ୍ଗ୍ ଯିରୁଶାଲାମ୍ତାକେ ୱାଜିମାଚିକ୍, ହେ କଗ୍ଲେକ୍ ଦେହା ନିଲ୍ଚି ହେ ୱିଜୁଗଟ୍ନା ହୁଡ଼୍ଜି ମାଚିକ୍।
ଯୀଶୁ ଦୁଗେର୍
(ମାଥି. ୨୭:୫୭-୬୧; ଲୁକ. ୨୩:୫୦-୫୬; ଯୋହନ. ୧୯:୩୯-୪୨)
42ଜମ୍ନିଦିନ୍ କାଜିଙ୍ଗ୍ ଜଗାଡ଼୍ କିନି ମିକାହାରେସ୍ ଆନିହିଙ୍ଗ୍, 43ହାରାମାତିଆ ସହର୍ନି ଯୋଷେପ୍ ଇନେର୍କି ଯିହୁଦିର୍ ଦଳ୍ନି ମୁକ୍ୟା ମାନାୟ୍ ମାଚାନ୍, ଆରେ ହେୱାନ୍ ପା ଈଶ୍ୱର ସାସନ୍ କିନି ରାଜି ଜଲ୍ଦି ୱାନାତ୍ ଇଞ୍ଜି କାସି ମାଚାନ୍। ହେୱାନ୍ ପାଣ୍ଡ୍ରା ଆୱାଦାଙ୍ଗ୍ ରୋମିୟ ସର୍କାର୍ ପିଲାତତାକେ ହାଲ୍ଜି ଯୀଶୁ ହାଃତି ମାଡ଼ାତିଙ୍ଗ୍ କୃଶକାଟ୍ତାଙ୍ଗ୍ ଜୁତ୍ତି ମୁଚ୍ଚେଙ୍ଗ୍ ଅନୁମତି ଏନ୍ତାନ୍। 44ଯୀଶୁ ହାଃତି କାବୁର୍ ୱେନ୍ଞ୍ଜି ରୋମିୟ ସରକାର୍ ପିଲାତ କାବା ଆତାନ୍, ଆରେ ଶହେଜାଣ୍ ସେନାର୍ନି ମୁକ୍ୟାଙ୍ଗ୍ କୁକ୍ଚି ହେୱାନିଙ୍ଗ୍ ୱେନ୍ବାତାନ୍, “ହେୱାନ୍ ହାତ୍ପା ହାଃତାନେ କି?” 45ଶହେଜାଣ୍ ସେନାର୍ନି ମୁକ୍ୟା ୱେଚ୍ଚାନ୍, “ଆଁ ହେୱାନ୍ ହାଃତାନେ।” ତାପାଚେ ରୋମିୟ ସର୍କାର୍ ପିଲାତ ଯୋଷେପତିଙ୍ଗ୍ ତା ହାଃତି ଗାଗାଡ଼୍ତିଙ୍ଗ୍ ଅଦେଙ୍ଗ୍ ଅନୁମତି ହିତାନ୍। 46ଯଷେପ ତା ହାଃତି ଗାଗାଡ଼୍ତିଙ୍ଗ୍ କୃଶକାଟ୍ତାଙ୍ଗ୍ ଜୁତ୍ତି ପାଚେ ହେ ଗାଗାଡ଼୍ତିଙ୍ଗ୍ ର ହାର୍ଦି ପାତାଡ଼୍ ହେନ୍ଦ୍ରାତାଙ୍ଗ୍ ହୁର୍ପାତାନ୍।, ଆରେ ହେ ଦୁଗେର୍ତିଙ୍ଗ୍ କାଲ୍କୁକାଙ୍ଗ୍ ପତ୍ତି ରହିୟାଆଜି ମାଚାତ୍। ହେ ଦୁଗେର୍ତାକେ ହେୱାନିଙ୍ଗ୍ ଇଡ଼୍ତାର୍। ତାପାଚେ ହେ ଦୁଗେର୍ ଦୁୱେର୍ ମୁମ୍ଦ ର ଗାଜାକାଲ୍ ଡାବାଇ କିତାନ୍। 47ହେୱାନିଙ୍ଗ୍ ଇମ୍ଣି ବାହାତାକେ ଇଡ଼୍ତାକା, ହେଦାଙ୍ଗ୍ ମଗ୍ଦଲିନି ସହର୍ନି ମରିୟମ, ହିରୁ ଯାକୁବ ଆରେ ଯୋଶି ତେହି ମରିୟମ ହୁଡ଼୍ତିକ୍।
നിലവിൽ തിരഞ്ഞെടുത്തിരിക്കുന്നു:
ମାର୍କ 15: PEGNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
