ମାଥିଉ 27

ଗବର୍‌ନର୍ ପିଲାତ କଚଣ୍‌ତ ଯୀଶୁ

(ମାର୍କ. ୧୫:୧; ଲୁକ. ୨୩:୧-୨; ଯୋହନ. ୧୮:୨୮-୩୨)

1ଅଜଡ଼୍ ଆଉ-ଆଉ ୱିଜୁ ଈଶ୍ୱର ହେବାକିନି ମୁଡ଼୍‌ଦି ପୁଜାରିର୍, ଆରେ ମାନାୟାର୍ ଯିହୁଦିର୍ ଦଳ୍‌ନି ପ୍ରାଚିନ୍‌ ଯୀଶୁଙ୍ଗ୍ ମାର୍ନେ ଅହ୍‌ନି କାଜିଙ୍ଗ୍ ତା ବିରଦ୍‌ତାକେ ନିଙ୍ଗ୍‌ଞ୍ଜି ଉପାୟ୍ କିତାର୍। 2ଆରେ ହେୱାର୍ ଯୀଶୁଙ୍ଗ୍ ହିକ୍‌ଡ଼ିଙ୍ଗ୍ ହୁଦାଙ୍ଗ୍ ଗାଚ୍‌ଚି ଯିହୁଦା ଜିଲ୍ଲାନି ରୋମିୟ ଗବର୍‌ନର୍ ପିଲାତ ରାଜାତାକେ ଅତାର୍।

ଇଷ୍କାରିତିୟ ଯିହୁଦା ହାଃନାକା

(କାମାୟ୍. ୧:୧୮-୧୯)

3ଇଷ୍କାରିତିୟ ଯିହୁଦା ହୁଡ଼୍‌ତାନ୍ ଯେ, ହେୱାର୍ ଯୀଶୁଙ୍ଗ୍ ମାର୍ନେ ଅହ୍‌ନି କାଜିଙ୍ଗ୍ ଉପାୟ୍ କିତାର୍‌ନା। ଯିହୁଦାନେ ଯୀଶୁଙ୍ଗ୍ ହେୱାର୍ ଶାତ୍ରୁ କେଇଦ ହିଜିମାଚାନ୍। ଲାଗିଙ୍ଗ୍ ହେୱାନ୍ ଇ ୱିଜୁଗଟ୍‌ନା ହୁଡ଼୍‌ଜି ଜାର୍ କାମାୟ୍ କାଜିଙ୍ଗ୍ ବେସିଦୁକ୍ ଆତାନ୍। ହେୱାନ୍ ଈଶ୍ୱର ହେବାକିନି ମୁଡ଼୍‌ଦି ପୁଜାରିର୍ ଆରେ ପ୍ରାଚିନ୍‌ ନେତାରିଙ୍ଗ୍ ହେ ତିରିଶ୍ ଗଟା ରୁପା ଡାବୁଙ୍ଗ୍ ଲେଉଟାୟ୍ କିତାନ୍। 4ହେୱାନ୍ ୱେଚ୍‌ଚାନ୍, ଆନେଙ୍ଗ୍ ପାପ୍ କିତାଙ୍ଗ୍‌ନା। ଆନେଙ୍ଗ୍ ଦସ୍ ହିଲ୍‌ୱି ମାନାୟ୍‌ତିଙ୍ଗ୍ ଅସ୍ତେଙ୍ଗ୍ ମି କେଇଦ ଆହିକିଜି ହିତ୍‌ତାଙ୍ଗ୍‌ନା। ଯିହୁଦି ନେତାର୍ ୱେଚ୍‌ଚାର୍, ଇବେ କିଚି ଯାଏ ଆସେ ଆକାୟ୍। ମି କାତା ଏପେଙ୍ଗ୍ ବୁଜାଆଡ। 5ଇଷ୍କାରିତିୟ ଯିହୁଦା ଈଶ୍ୱର ମାନି ମନ୍ଦିର୍‌ ବିତ୍ରେ ହେ ରୁପା ଡାବୁଙ୍ଗ୍ ତୁହିହିତାନ୍। ତାପାଚେ ହେ ବାହା ପିସ୍ତି ଇଷ୍କାରିତିୟ ଯିହୁଦା ହାଚାନ୍, ଆରେ ହେୱାନ୍‌ନେ ପାସିଆଜି ହାଃତାନ୍। 6ଈଶ୍ୱର ହେବାକିନି ମୁଡ଼୍‌ଦି ପୁଜାରିର୍ ମନ୍ଦିର୍‌ ବିତ୍ରେ ହେ ରୁପା ଡାବୁଙ୍ଗ୍ ପେସ୍‌ଦି ଅତାର୍। ହେୱାର୍ ୱେଚ୍‌ଚାର୍, ମନ୍ଦିର୍‌ ଡାବୁଙ୍ଗ୍ ହୁଦାଙ୍ଗ୍ ଇ ଡାବୁଙ୍ଗ୍ ଇଟ୍‌ନାକା ବିରୁଦ୍ ଆନାତ୍। ଇନେସ୍‌କି ଇ ଡାବୁଙ୍ଗ୍ ରକାନିଙ୍ଗ୍ ମାର୍ନେ ଅହ୍‌ନି କାଜିଙ୍ଗ୍ ହିୟାଆତାତ୍‌ନା। 7ବାର୍ତ ଯିରୁଶାଲାମ ସହର୍‌ତାକେ ବୁଲାଆଦେଙ୍ଗ୍ ୱାୱି ମାନାୟାର୍ ହାଃତିସ୍ ହେୱାରିଙ୍ଗ୍ ଦୁଗେର୍ ହିନି କାଜିଙ୍ଗ୍ ହେୱାର୍ ଇ ଡାବୁଙ୍ଗ୍ କୁମାର୍‌ ତର୍‍ଦାଙ୍ଗ୍ ମାନି ଜମି କଡ଼୍‍ଦେଙ୍ଗ୍ ଉପାୟ୍ କିତାର୍। 8ଲାଗିଙ୍ଗ୍ ନଙ୍ଗୟ୍ ପାତେକ୍ ଇ ଜମିତିଙ୍ଗ୍ ନେତେର୍ ଜମି ଇଞ୍ଜି ଇନିୟା ଆନାତା। 9ହେଲେକେ ଭବିଷ୍ଯତବକ୍ତା ଯିରିମିୟ ୱେଚ୍‌ଚି ବେଣ୍ ପୁରା ଆତାତ୍।

ଯିରିମିୟ ୱେଚ୍‌ଚାନ୍, “ହେୱାର୍ ତିରିଶ୍ ଗଟା ରୁପା ଡାବୁଙ୍ଗ୍ ଅତାର୍।

ହେ ଏଚେକ୍ ଡାବୁଙ୍ଗ୍ ହୁଦାଙ୍ଗ୍ ରକାନ୍ ଜିବୁନ୍‌ନି ଦାମ୍ ଆନାତ୍ ଇଞ୍ଜି ଇସ୍ରାଏଲନି ମାନାୟାର୍ ରାଜି ଆଜି ମାଚାର୍।

10ମାପୃ ନାଙ୍ଗେଙ୍ଗ୍ ହିତ୍‌ତି ଆଦେସ୍‌ତାଙ୍ଗ୍ ହେୱାର୍ ହେ ଡାବୁଙ୍ଗ୍ ଲାହାଙ୍ଗ୍ କୁମାର୍‌ତି ଜମି ରଞ୍ଜାଙ୍ଗ୍ କଡ଼୍‌ତାର୍।”

ଯୀଶୁଙ୍ଗ୍ ବିଚାର୍

(ମାର୍କ. ୧୫:୨-୫; ଲୁକ. ୨୩:୩-୫; ଯୋହନ. ୧୮:୩୩-୩୮)

11ଇପାଦ୍ନା ଯୀଶୁଙ୍ଗ୍ ରାଜିତିଙ୍ଗ୍ ସାସନ୍ କିନି ଗବର୍‌ନର୍ ପିଲାତ ରାଜା ମୁମ୍‌ଦ ନିଲି କିତାର୍। ଗବର୍‌ନର୍ ପିଲାତ ରାଜା ଯୀଶୁଙ୍ଗ୍ ୱେନ୍‌ବାତାନ୍, ଏନେଙ୍ଗ୍ ଇନାକା ଯିହୁଦିର୍ ରାଜାତି? ଯୀଶୁ ଗବର୍‌ନର୍ ପିଲାତ ରାଜାଙ୍ଗ୍ ୱେଚ୍‌ଚାନ୍, “ଏନେଙ୍ଗ୍ ସତ୍ ୱେଚ୍‌ନାୟା।”

12ମାତର୍ ଏଚେପାଦ୍ନା ଈଶ୍ୱର ହେବାକିନି ମୁଡ଼୍‌ଦି ପୁଜାରିର୍ ଆରେ ପ୍ରାଚିନ୍‌ ବେସି ଦସ୍ ହିଜି ୱେଚ୍‌ଚାର୍, ଯୀଶୁ ଇନାକାପା ୱେଚ୍‌ୱାତାନ୍। 13ହେବେତାଙ୍ଗ୍ ଗବର୍‌ନର୍ ପିଲାତ ରାଜା ଯୀଶୁଙ୍ଗ୍ ୱେନ୍‌ବାତାନ୍, ହେୱାର୍ ନି ବିରୁଦ୍‌ତାକେ କେତେକ୍ କାତା ଇଞ୍ଜ୍‌ରା ହେଦାଙ୍ଗ୍ ଏନେଙ୍ଗ୍ ୱେନାୟା। ଇନା କିଦେଙ୍ଗ୍ ଏନେଙ୍ଗ୍ ୱେଚୁୟା? 14ମାତର୍ ଯୀଶୁ ହେୱାନିଙ୍ଗ୍ ଇନାକାପା ୱେଚ୍‌ୱାତାନ୍। ଇଦାଙ୍ଗ୍ କାଜିଙ୍ଗ୍ ଗବର୍‌ନର୍ ପିଲାତ ବେସି ଚାନିଆ ଆତାନ୍।

ଯୀଶୁଙ୍ଗ୍ ହାଃନି ଦଣ୍ଡ୍ ହିତାର୍

(ମାର୍କ. ୧୫:୬-୧୫; ଲୁକ. ୨୩:୧୩-୨୫; ଯୋହନ. ୧୮:୩୯-୧୯:୧୬)

15ପାତିବାର୍ହୁ ନିସ୍ତାର୍ ପାର୍ବୁ ନାଞ୍ଜିଙ୍ଗ୍ ରାଜିତିଙ୍ଗ୍ ସାସନ୍ କିନି ଗବର୍‌ନର୍ ପିଲାତ ବନ୍ଦି ମାନାୟ୍‌ତିଙ୍ଗ୍ ପିସ୍ତିହିନି ବିଦି ନିୟମ୍ କିଜି ମାଚାନ୍। ମାନାୟାର୍ ଇମ୍‌ଣାକାନିଙ୍ଗ୍ ପିସ୍ତି ହିନାସ୍ ଇଞ୍ଜି ମାନ୍‌କିତିସ୍, ହେୱାନିଙ୍ଗ୍‌ନେ ପିସ୍ତିହିଜି ମାଚାନ୍। 16-17ହେପାଦ୍ନା ବାରବ୍‌ବା ଇଞ୍ଜି ର ମାନାୟ୍ ଜଇଲ୍ ଇଞ୍ଜ ମାଚାନ୍। ଲାଗିଙ୍ଗ୍ ଏଚେପାଦ୍ନା ମାନାୟାର୍ ରବେ ରୁଣ୍ଡାଆତାର୍, ହେପାଦ୍ନା ଗବର୍‌ନର୍ ପିଲାତ ହେୱାରିଙ୍ଗ୍ ୱେନ୍‌ବାତାନ୍, ଆନେଙ୍ଗ୍ ମି କାଜିଙ୍ଗ୍ ଇନେରିଙ୍ଗ୍ ପିସ୍ତି ହିଦ୍‌ନାଙ୍ଗ୍? ବାରବ୍‌ବା ଆରେ ଯୀଶୁ ଖ୍ରୀଷ୍ଟ ବିତ୍ରେ ଇନେରିଙ୍ଗ୍ ପିସ୍ତିହିଦା ଇଞ୍ଜି ଇଚା କିନାଦେରା। 18ଗବର୍‌ନର୍ ପିଲାତ ପୁନ୍‌ଞ୍ଜି ମାଚାନ୍ ଯେ ମାନାୟାର୍ ଯୀଶୁଙ୍ଗ୍ ରିସା ମାଚାତ୍। ହେଦାଙ୍ଗ୍ କାଜିଙ୍ଗ୍ ହେୱାନ୍ କେଇଦ ହେଲାଇ କିଜି ହିତାର୍‌ନା।

19ଗବର୍‌ନର୍ ପିଲାତ ବିଚାର୍‌କିନି ବାହାତାକେ କୁଚ୍‌ଚିହିଙ୍ଗ୍ ତା କଗ୍‌ଲେ ତା ଲାଗାୟ୍ ୱେଚ୍‌ଚାତ୍। ଇ ଦରମ୍ ମାନାୟ୍‌ତିଙ୍ଗ୍ ଇନାକାପା କିମାଟ୍। ଆନେଙ୍ଗ୍ ତା ବିଷୟରେ ମିକା ର କେଚ୍‌କଣ୍ ହୁଡ଼୍‌ତାଙ୍ଗ୍‌ନା। ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଆଦିକ୍ ଚିନ୍ତା ଆତାଙ୍ଗ୍‌ନା।

20ମାତର୍ ଈଶ୍ୱର ହେବାକିନି ମୁଡ଼୍‌ଦି ପୁଜାରିର୍ ଆରେ ପ୍ରାଚିନ୍‌ ନେତାର୍ ମାନାୟାରିଙ୍ଗ୍ ଉସ୍‌କାଇ କିତାର୍ ଯେ ହେୱାର୍ ବାରବ୍‌ବାଙ୍ଗ୍ ପିସ୍ତି ହିଦେଙ୍ଗ୍ ଆରେ ଯୀଶୁଙ୍ଗ୍ ମାର୍ନେ ଅସ୍ତେଙ୍ଗ୍ ଗୁୱାରି କିୟାଟ୍ ଇଞ୍ଜି। 21ରାଜିତିଙ୍ଗ୍ ସାସନ୍ କିନି ଗବର୍‌ନର୍ ପିଲାତ ୱେନ୍‌ବାତାନ୍, ବାରବ୍‌ବା ଆରେ ଯୀଶୁ ଇ ରିକାର୍ ବିତ୍ରେ ଇନେରିଙ୍ଗ୍ ପିସ୍ତି ହିଦ୍‌ନାଙ୍ଗ୍ ହେୱାର୍ ୱେଚ୍‌ଚାର୍ ବାରବ୍‌ବାଙ୍ଗ୍।

22ତାପାଚେ ଗବର୍‌ନର୍ ପିଲାତ ହେୱାରିଙ୍ଗ୍ ୱେନ୍‌ବାତାନ୍, ଲାଗିଙ୍ଗ୍ ଇମ୍‌ଣି ଯୀଶୁଙ୍ଗ୍ ଖ୍ରୀଷ୍ଟ ଇନିୟାଆନାତ୍ ହେୱାନିଙ୍ଗ୍ ଆନେଙ୍ଗ୍ ଇନାକା କିନାଙ୍ଗ୍? ୱିଜାକାର୍ ୱେଚ୍‌ଚାର୍, ହେୱାନିଙ୍ଗ୍ କୃଶକାଟ୍‌ତାକେ ଦୁପାଟ୍।

23ହେବେତାଙ୍ଗ୍ ଗବର୍‌ନର୍ ପିଲାତ ମାନାୟାରିଙ୍ଗ୍ ଆରେରଗ ୱେନ୍‌ବାତାନ୍, “ଇୱାନ୍ ଇନା ଦସ୍ କିତାନ୍‌ନା?” ମାତର୍ ହେୱାର୍ ଆଦିକ୍‍ହେ ଚେରାଆଜି ୱେଚ୍‌ଚାର୍, “ତାଙ୍ଗେଙ୍ଗ୍ କୃଶକାଟ୍‌ତାକେ ଦୁପ୍‌ଚି ଅହାଟ୍।”

କୃଶକାଟ୍‌ତାକେ ଦୁପ୍‍ତେଙ୍ଗ୍ ଯୀଶୁଙ୍ଗ୍ ହେୱାର୍ କେଇଦ ପିସ୍ତି ହିତାନ୍

(୨ବିବ. ୨୧:୬-୯)

24ଗବର୍‌ନର୍ ପିଲାତ ହୁଡ଼୍‌ତାନ୍ ଯେ, ହେୱାନ୍ ମାନାୟାର୍ ଇଚା ପୁରା କିଦେଙ୍ଗ୍ ଇନାକା କିଦେଙ୍ଗ୍ ଆଡୁନ୍। ଆରେ ମାନାୟାର୍ ବେଲାତିଙ୍ଗ୍ ବେଲା ଗଣ୍ଡ୍‍ଗଲ୍ ଆଜି ନିଙ୍ଗ୍‌ନାରା। ଗବର୍‌ନର୍ ପିଲାତ ଇଚୁଡ଼ିଙ୍ଗ୍ ଏଜୁଙ୍ଗ୍ ଅତାନ୍, ଆରେ ୱିଜାକାର୍ ମୁମ୍‌ଦ ତା କେଇକୁ ନୁସ୍ତାନ୍। ଆରେ ୱେଚ୍‌ଚାନ୍, ଇୱାନ୍ ହାଃନି ଦାୟି ଆନେଙ୍ଗ୍ ଆକାୟ୍। ଏପେଙ୍ଗ୍ ନେ ଇୱିଜୁ କିନାଦେରା।

25ୱିଜାକାର୍ ୱେଚ୍‌ଚାର୍, ଆପେଙ୍ଗ୍ ଇୱାନ୍ ହାଃନାକା ଦାୟ୍ ମାନାପ୍। ଇୱାନ୍ ହାଃନି କାଜିଙ୍ଗ୍ ଇମ୍‌ଣି ଦଣ୍ଡ୍ ପାୟା ଆଦେଙ୍ଗ୍ ମାନାତ୍, ମା କାଜିଙ୍ଗ୍ ଆରେ ମା ହିମ୍‌ଣାଙ୍ଗ୍ କାଜିଙ୍ଗ୍ ଆୟେତ୍।

26ହେବେତାଙ୍ଗ୍ ଗବର୍‌ନର୍ ପିଲାତ ବାରବ୍‌ବାଙ୍ଗ୍ ମୁକ୍ତି କିତାନ୍। ଆରେ ଯୀଶୁଙ୍ଗ୍ କର୍‌ଡା ହୁଦାଙ୍ଗ୍ ଟ୍ରାକିକିଜି କୃଶକାଟ୍‌ତାକେ ଅସ୍ତେଙ୍ଗ୍ ରମିୟ ସେନାର୍ କେଇଦ ପିସ୍ତି ହିତାନ୍।

ଯୀଶୁଙ୍ଗ୍ ଇନସ୍ତା କିତାର୍

(ମାର୍କ. ୧୫:୧୬-୨୦; ଯୋହନ. ୧୯:୨-୩)

27ତାପାଚେ ପିଲାତ ଗବର୍‌ନର୍ ସେନାହିର୍ ଯୀଶୁଙ୍ଗ୍ ପିଲାତ ରାଜା ହାକ୍‌ଡ଼ିତାକେ ଅସାହାଲ୍‌ଜି ୱିଜୁସେନାର୍ ଯୀଶୁ ଚାରିବେଣ୍‌ତାଙ୍ଗ୍ ରୁଣ୍ଡାଆତାର୍। 28ସେନାହିର୍ ଯୀଶୁ ଉସ୍‌ପିତି ହେନ୍ଦ୍ରା ଉନ୍ଦ୍‌ତାର୍ ଆରେ ହେୱାନିଙ୍ଗ୍ ରାଜା ଇଞ୍ଜି ଇନସ୍ତା କିଦେଙ୍ଗ୍ ୱାଙ୍ଗା କଲର୍ ଆଙ୍ଗି ଉସ୍‍ପିକିତାର୍। 29ଆରେ କାପ୍ଡ଼ାତାକେ ୱାଡ଼ି ମାର୍ ମୁକୁଟ୍‍ରସ୍ତି ତୁଜି କିତାର୍। ଆରେ ତା ତିନାବାଗାୟ୍‌ନି କେଇଦ ରାଜା ଆହ୍‌ନି ବେତ୍ ବେଡ୍‌ଗା ଲେଗ୍‌ଦି ବେଡ୍‌ଗା ହେୱାନିଙ୍ଗ୍ ଆହିକିତାର୍। ତାପାଚେ ତା ଆଗ୍‌ବାଗାୟ୍ ମେଣ୍ଡାକୁନ୍ଦିକିଜି କୁଚ୍‌ଚି ଯୀଶୁଙ୍ଗ୍ ଗ୍ରେଚ୍‌ଚାର୍। ହେୱାର୍ ୱେଚ୍‌ଚାର୍ ଏ ଯିହୁଦିର୍ ରାଜା! ଏନେଙ୍ଗ୍ ବେସି ଦିନ୍‌ତାଙ୍ଗ୍ ଜିଜି ମାନା। 30ତାପାଚେ ହେୱାର୍ ଯୀଶୁ ମୁମ୍‌ଦ ଏଉଡ଼ିଙ୍ଗ୍ ଚୁପ୍‌ଜି ଇନସ୍ତା କିତାର୍ ଆରେ ହେ ବେତ୍ ବେଡ୍‍ଗାତାଙ୍ଗ୍ ତା କାପ୍‌ଡ଼ାତ ଇଡ଼୍‌ଦେଙ୍ଗ୍ ଲାଗାତାର୍। 31ହେୱାର୍ ଯୀଶୁଙ୍ଗ୍ ଇନସ୍ତାକିତି ପାଚେ ହେ ୱାଙ୍ଗା କଲର୍ ଆଙ୍ଗି ରିକ୍‍ଚିଅଜି ତା ଆଙ୍ଗି ଉସ୍‍ପିକିତାର୍। ଆରେ ହେୱାର୍ ତାଙ୍ଗେଙ୍ଗ୍ କୃଶକାଟ୍‌ତାକେ ଦୁପ୍‍ତେଙ୍ଗ୍ ହେ ବାହାତାଙ୍ଗ୍ ଅସାହାଚାର୍।

ଯୀଶୁଙ୍ଗ୍ କୃଶକାଟ୍‌ତାକେ ଅସ୍ତାର୍

(ମାର୍କ. ୧୫:୨୧-୩୨; ଲୁକ. ୨୩:୨୬-୪୩; ଯୋହନ. ୧୯:୧୭-୨୭)

32ତାପାଚେ ସେନାହିର୍ ଯୀଶୁଙ୍ଗ୍ ଅଜି ଦେସ୍ ବାର୍ତ ହାନିହିଙ୍ଗ୍ ଶିମୋନ ତର୍‍ଦାକାନ୍ ରକାନ୍ କୁରିଣିୟ ସହର୍‌ନି ମାନାୟ୍‌ତିଙ୍ଗ୍ ହୁଡ଼୍‌ଜି ଯୀଶୁ କୃଶକାଟ୍‌ତିଙ୍ଗ୍ ପିଣ୍‌ଜି ଅଦେଙ୍ଗ୍ ଜବର୍‌ଦସ୍ତି କିତାର୍। 33ହେୱାର୍ କାପ୍‌ଡ଼ାନି କପ୍‌ରି ଲେକେ ଚଞ୍ଜ୍‌ନିବାହାତାକେ ଅସିହାଚାର୍। ହେ ବାହାତିଙ୍ଗ୍ ଗଲ୍‍ଗତା ଇନାର୍। 34ହେୱାର୍ ଯୀଶୁଙ୍ଗ୍ କେନାକା ମେହାଇକିତି ଅଙ୍ଗୁର୍ ରାସ୍ ଉଣ୍ଡେଙ୍ଗ୍ ହିତାର୍। ମାତର୍ ଯୀଶୁ ହେ ଅଙ୍ଗୁର୍ ରାସ୍ ୱେଣ୍‌ତି ପାଚେ ଉଣ୍ଡେଙ୍ଗ୍ କାୱାତାନ୍।

35ହେୱାର୍ ଯୀଶୁଙ୍ଗ୍ କୃଶକାଟ୍‌ତାକେ କୁଟିଙ୍ଗ୍ ଇଡ଼୍‌ଜି ୱିସ୍ତି ପାଚେ। ହେୱାନ୍ ଉସ୍‌ପିତି ହେନ୍ଦ୍ରାତିଙ୍ଗ୍ ଇନେର୍ ଇନାକା ଅନାର୍ ଇଞ୍ଜି ଲାଟ୍ରିପୁଟାୟ୍ କିତାର୍। ଆରେ ଜାର୍ ଜାର୍‌ବିତ୍ରେ ବାଗ୍‌କିଜି ଅତାର୍। 36ତାପାଚେ ସେନାହିର୍ ଯୀଶୁଙ୍ଗ୍ କାତେଙ୍ଗ୍ ହେବେ କୁଚ୍‍ଚାର୍। 37ସେନାର୍ ଯୀଶୁ ବିରୁଦ୍‌ତାକେ ର ମାର୍ ପାଟା ରସ୍ତି ଯୀଶୁଙ୍ଗ୍ ଦୁପ୍‌ତି କୃଶକାଟ୍ ଜପି ବଡ୍ ଇଡ଼୍‌ତାର୍। ହେ ପାଟାତାକେ ଇଲେକେ ଲେକାଆଜି ମାଚାତ୍, “ଏ ଯିହୁଦିର୍ ରାଜା ଯୀଶୁ।”

38ହେପାଦ୍ନା ଯୀଶୁଙ୍ଗ୍ କୃଶକାଟ୍‌ତାକେ ଦୁପ୍‌ତାର୍। ଆରେ ହେ ରି ଚର୍‌କୁକାଙ୍ଗ୍ ପା ରକାନିଙ୍ଗ୍ ତା ତିନା ବାଗାଇ ଆରେ ରକାନିଙ୍ଗ୍ ତା ଡେବା ବାଗାଇ କୃଶକାଟ୍‌ତାକେ ଦୁପ୍‌ତାର୍। 39ହେ ହାଜ୍‌ଦିଙ୍ଗ୍ ହାନି ମାନାୟ୍ ଜାର୍-ଜାର୍ କାପ୍‍ଡ଼ାଙ୍ଗ୍ ଲେପ୍‍ଚି ଯୀଶୁଙ୍ଗ୍ ଇନସ୍ତାକିଜି ୱେଚ୍‌ଚାର୍। 40“ଏଡ଼େ ମନ୍ଦିର୍‌ ଡ୍ରିକ୍‌ଚି ଆରେ ତିନ୍‌ଦିନ୍‌ତାଙ୍ଗ୍ ରହ୍‍ନାକାନ୍, ଏନେଙ୍ଗ୍ ଯଦି ଈଶ୍ୱର ମେହି, ଲାଗିଙ୍ଗ୍ କୃଶକାଟ୍‌ତାଙ୍ଗ୍ ଜୁଜିୱାଜି ଜାର୍‌ତିଙ୍ଗ୍ ରକ୍ଷା କିୟା।”

41ଈଶ୍ୱର ହେବାକିନି ମୁଡ଼୍‌ଦି ପୁଜାରିର୍ ପଣ୍ଡିତ୍‌ ଆରେ ପ୍ରାଚିନ୍‌ ହେବେ ମାଚାର୍। ହେୱାର୍ ପା ଯୀଶୁଙ୍ଗ୍ କିଜ୍ରାଇ କିଜି ମାଚାର୍। 42ହେୱାର୍ ୱେଚ୍‌ଚି ମାଚାର୍, “ହେୱାନ୍ ଜେକନିକାରିଙ୍ଗ୍ ଉଦାର୍ କିଜି ମାଚାନ୍। ନଙ୍ଗୟ୍ ମାତର୍ ଜାର୍‌ତିଙ୍ଗ୍ ଉଦାର୍ କିଦେଙ୍ଗ୍ ଆଡୁନା। ମାନାୟାର୍ ୱେଚ୍‌ନାର୍ ଯେ ହେୱାନ୍ ଇସ୍ରାଏଲନି ରାଜା। ଇ କାତା ଯଦି ସତ୍, ଲାଗିଙ୍ଗ୍ ହେୱାନ୍ ନଙ୍ଗୟ୍ କୃଶକାଟ୍‌ତାଙ୍ଗ୍ ତାରେନ୍ ଜୁଦେନ୍। ଲାଗିଙ୍ଗ୍ ଆପେଙ୍ଗ୍ ହୁଡ଼୍‌ଜି ମା ରାଜା ଇଞ୍ଜି ପାର୍ତିକିନାପ୍। 43ହେୱାନ୍ ଈଶ୍ୱରତାକେ ପାର୍ତି କିଜି ମାଚାନ୍। ଯଦି ଈଶ୍ୱର ହେୱାନିଙ୍ଗ୍ ମାନ୍ କିଜିମାଚିସ୍, ଲାଗିଙ୍ଗ୍ ହେୱାନ୍ ତାଙ୍ଗେଙ୍ଗ୍ ନଙ୍ଗୟ୍ ରକ୍ଷା କିୟେନ୍। ହେୱାନ୍ ନିଜେ ୱେଚ୍‌ଚି ମାଚାନ୍, ‘ଆନେଙ୍ଗ୍ ଈଶ୍ୱର ମେହି।’ ” 44ଇମ୍‌ଣି ଚର୍‌କୁରିଙ୍ଗ୍ ଯୀଶୁ ଲାଗାୟ୍ କୃଶକାଟ୍‌ତାକେ ଦୁପ୍‌ଚି ମାଚାର୍, ହେୱାର୍ ପା ଯୀଶୁଙ୍ଗ୍ ଇନସ୍ତା କିତାର୍।

ଯୀଶୁ ହାଃତାନ୍

(ମାର୍କ. ୧୫:୩୩-୪୧; ଲୁକ. ୨୩:୪୪-୪୯; ଯୋହନ. ୧୯:୨୮-୩୦)

45ତାପାଚେ ୱେଡ଼ା ବାର୍‍ଟା ୱେଡ଼ାଙ୍ଗ୍ ୱିଜୁ ଦେସ୍ ନିପଣ୍ ମାଜ୍‌ଗା ଆଜି ତିନ୍ ଘଣ୍ଟା ପାତେକ୍ ମାଚାତ୍। 46ତାପାଚେ ତିନ୍‌ଟା ୱେଡ଼ାଙ୍ଗ୍ ଯୀଶୁ ଗାଜା କାଟ୍‌ତାଙ୍ଗ୍ ୱେଚ୍‌ଚାନ୍, “ଏଲି, ଏଲି, ଲାମା ସବକ୍‌ଥାନି? ଇଚିସ୍, ଏ ନା ଈଶ୍ୱର, ଏ ନା ଈଶ୍ୱର, ଏନେଙ୍ଗ୍ ନାଙ୍ଗେଙ୍ଗ୍ ଇନା କିଦେଙ୍ଗ୍ ପିସ୍ତାତାଇ?”

47ହେବେ ନିଲ୍‌ଚିମାଚି ମାନାୟାର୍ ବିତ୍ରେତାଙ୍ଗ୍ ଇନେର୍-ଇନେର୍ ଯୀଶୁ ୱେଚ୍‌ଚି ବେଣ୍‌ତିଙ୍ଗ୍ ବୁଲ୍‍ବୁଜାଆଜି ୱେଚ୍‌ଚାର୍, “ୱେନାଟ୍! ଇୱାନ୍ ଭବିଷ୍ଯତବକ୍ତା ଏଲିୟଙ୍ଗ୍ କୁକ୍‍ନାନା ସରଗ୍‌ତାଙ୍ଗ୍ ୱାଜି ସାଇଜକିଦା ଇଞ୍ଜି।” 48ହେଦାପ୍ରେ ହେ ମାନାୟାର୍ ବିତ୍ରେତାଙ୍ଗ୍ ରକାନ୍ ହନ୍‍ଚି ହାଲ୍‌ଜି ସ୍ପଞ୍ଜ୍ ତାକେ ହଇନି ଅଙ୍ଗୁର୍ ରାସ୍ ବାର୍ତିକିଜି ର ବେତ୍ ବେଡ୍‌ଗାତାକେ ଚାନ୍‌ଞ୍ଜି ଉଣେନ୍ଇଞ୍ଜି ଯୀଶୁଙ୍ଗ୍ ହିତାନ୍। 49ମାତର୍ ଜେକନିକାର୍ ୱେଚ୍‌ଚାର୍, “ମାନାଟ୍! ଭବିଷ୍ଯତବକ୍ତା ଏଲିୟ ୱାଜି ଇୱାନିଙ୍ଗ୍ ଉଦାର୍ କିନାନା କି ଆକାୟ୍ ନଙ୍ଗୟ୍ ହୁଡ଼୍‌ନାସ୍।”

50ମାତର୍ ଆରେରଗ ଯୀଶୁ ଗାଜାକାଟ୍ କିଜି ହାଃତାନ୍। 51ହେପାଦ୍ନା ଈଶ୍ୱର ମାନି ମନ୍ଦିର୍‌ତାକେ ଡ଼ସିମାଚି ବୱାଡ଼୍‌ପାର୍‍ଦା ଜପିତାଙ୍ଗ୍ ତାରେନ୍ ପାତେକ୍ କେଞ୍ଚାତ୍। ଆରେ ବୁମିକମ୍ପ୍ ଆତାତ୍ ଆରେ ଗାଜା-ଗାଜା କାଲ୍‌କୁ ୱିଜୁ ଚିନ୍‌ବିନ୍ ଆତିକ୍। 52ଦୁଗେର୍ ୱିଜୁ ଜେୟା ଆତାତ୍। ଆଗେ ହାଃଜି ମାଚି ଦରମ୍ ମାନାୟାର୍ ହାଃତାକାର୍ ଜିବୁନ୍ ଆତାର୍। ହେୱାର୍ ଦୁଗେର୍‌ତାଙ୍ଗ୍ ହତାର୍। 53ଯୀଶୁ ହାଃଜି ଆରେରଗ ଜିବୁନ୍‌ଆଜି ନିଙ୍ଗ୍‌ତି ପାଚେ ହେୱାର୍ ପବିତ୍ର ଦେସ୍‌ତ ଯିରୁଶାଲାମ୍‌ତାକେ ହାଲ୍‌ଜି ବେସିହେନି ମାନାୟାରିଙ୍ଗ୍ ଚଞ୍ଜିଆତାନ୍।

54ରୋମିୟ ସେନାର୍ ଆରେ ଯୀଶୁଙ୍ଗ୍ କାସିମାଚି ସେନାର୍ ବୁମିକମ୍ପ୍ ଆରେ ଜେକୱିଜୁ ଗଟ୍‌ନା ଗଟାଆନାକା ହୁଡ଼୍‌ତାର୍। ହେୱାର୍ ବେସି ପାଣ୍ଡ୍ରା ଆତାର୍ ଆରେ ହେୱାର୍ ୱେଚ୍‌ଚାର୍, “ହାତ୍‌ପା ଇୱାନ୍ ରକାନ୍ ଈଶ୍ୱର ମେହି ମାଚାନ୍।”

55ଅଲପ୍ ଦେହା କେତେକ୍ କଗ୍‌ଲେ ହିମ୍‌ଣାକ୍ ଇୱିଜୁ ହୁଡ଼୍‌ଜି ମାଚିକ୍। ଇ କଗ୍‌ଲେ ହିମ୍‌ଣାକ୍ ଯୀଶୁଙ୍ଗ୍ ଜାତୁନ୍ ଅଦେଙ୍ଗ୍ ଗାଲିଲୀ ଜିଲ୍ଲାତାଙ୍ଗ୍ ତା ହୁଦାଙ୍ଗ୍ ୱାଜିମାଚିକ୍। 56ହେୱେକ୍ ବିତ୍ରେତାଙ୍ଗ୍ ମଗ୍‌ଦଲିନି ସହରନି ମରିୟମ, ଯାକୁବ ଆରେ ଯୋଷେପ ତେହି ମରିୟମ ଜେବଦି ହିମ୍‌ଣାଙ୍ଗ୍ ତେହି ମାଚାତ୍।

ଯୀଶୁ ଦୁଗେର୍ ହିନାକା

(ମାର୍କ. ୧୫:୪୨-୪୭; ଲୁକ. ୨୩:୫୦-୫୬; ଯୋହନ. ୧୯:୩୮-୪୨)

57ମିକାହାରେସ୍ ଆନିହିଙ୍ଗ୍ ଯୋଷେପ ତର୍‍ଦାକାନ୍ ହାରାମାତିଆ ସହର୍ ନିକାନ୍ ରକାନ୍ ସାଉକାର୍ ମାନାୟ୍ ଯିରୁଶାଲାମ ସହର୍‌ତାକେ ୱାଜି ଏକାତାନ୍। ହେୱାନ୍ ପା ରକାନ୍ ଯୀଶୁ ଚେଲାହି ମାଚାନ୍। 58ହେୱାନ୍ ପାଣ୍ଡ୍ରା ଆୱାଦାଙ୍ଗ୍ ରୋମିୟ ସର୍‌କାର୍ ପିଲାତତାକେ ହାଲ୍‌ଜି ଯୀଶୁ ହାଃତି ମାଡ଼ାତିଙ୍ଗ୍ କୃଶକାଟ୍‌ତାଙ୍ଗ୍ ଜୁତ୍‌ତି ମୁଚ୍‍ଚେଙ୍ଗ୍ ଅନୁମତି ଏନ୍ତାନ୍। ହେବେତାଙ୍ଗ୍ ପିଲାତ ହେଦାଙ୍ଗ୍ ହିଦେଙ୍ଗ୍ ଆଦେସ୍ ହିତାନ୍। 59ଯୋଷେପ ଯୀଶୁ ଗାଗାଡ଼୍ ଅତାନ୍। ଆରେ ହେ ଗାଗାଡ଼୍‌ତିଙ୍ଗ୍ ପୁନି ପାତାଡ଼୍‌ ହେନ୍ଦ୍ରାତାଙ୍ଗ୍ ହୁର୍‍ପାତାନ୍। 60ତାପାଚେ ଯୋଷେପ ଯୀଶୁଙ୍ଗ୍ ତା ପୁନି ଦୁଗେର୍‌ତାକେ ଇଡ଼୍‌ତାନ୍। ହେ ଦୁଗେର୍‌ କାଲ୍‌କୁକାଙ୍ଗ୍ ପତ୍‌ତି ରହିୟାଆଜି ମାଚାତ୍। ହେବେ ତା ହାଃତି ଗାଗାଡ଼୍‌ତିଙ୍ଗ୍ ଇଡ଼୍‌ତାନ୍। ଆରେ ଦୁଗେର୍ ଦୁୱେର୍ ମୁମ୍‌ଦ ଗାଜାକାଲ୍ ଡାବାଇ କିଜି ହାଚାନ୍।। 61ମଗ୍‌ଦଲିନି ସହର୍‌ନି ମରିୟମ ଆରେ ମରିୟମ ତର୍‌ଦି ଜେକନି କଗ୍‍ଲେକ୍ ହେ ଦୁଗେର୍ କଚଣ୍‌ତ କୁଚ୍‌ଚି ମାଚିକ୍।

ଦୁଗେର୍ ଜାଗୁୱାଡ଼ି

62ହେ ଦିନ୍ ଜମ୍‌ନିଦିନ୍‌ ମାଚାତ୍। ହେ ଶୁକୁର୍‌ବାର୍‌ନି ଆର୍‌କାତ୍ ନାଞ୍ଜିଙ୍ଗ୍ ଈଶ୍ୱର ହେବାକିନି ମୁଡ଼୍‌ଦି ପୁଜାରିର୍ ଆରେ ପାରୁସିଦଳ୍‍ ଗବର୍‌ନର୍ ପିଲାତଙ୍ଗ୍ ଗିଟାଆତାର୍। 63ହେୱାର୍ ୱେଚ୍‌ଚାର୍, ମାପୃ ମା ମାନ୍ତ ମାନାତ୍ ଯେ ମିଚ୍ ୱେଚ୍‌ନାକାନ୍ ହେୱାନ୍ ଜିଜି ମାନିହିଙ୍ଗ୍ ୱେଚ୍‌ଚି ମାନ୍‌ଞ୍ଚାନ୍, ତିନ୍‌ଦିନ୍ ପାଚେ ଆନେଙ୍ଗ୍ ଆରେ ଜିବୁନ୍‌ଆଜି ନିଙ୍ଗ୍‌ନାଙ୍ଗ୍। 64ଲାଗିଙ୍ଗ୍ ତିନ୍‌ଦିନ୍ ପାତେକ୍ ଦୁଗେର୍‌ତିଙ୍ଗ୍ କାସିମାଞ୍ଜେଙ୍ଗ୍ ଏନେଙ୍ଗ୍ ମାଙ୍ଗେଙ୍ଗ୍ ଆଦେସ୍ କିୟା। ନଇଲେ ତା ଚେଲାହିର୍ ହେବେ ୱାଜି ତା ହାଃତି ଗାଗାଡ଼୍‌ତିଙ୍ଗ୍ ଚର୍‌ଚି ଅନାର୍। ତାପାଚେ ହେୱାର୍ ମାନାୟାରିଙ୍ଗ୍ ୱେଚ୍‌ନାର୍ ଯେ, ହେୱାନ୍ ହାଃଜି ଜିତାନ୍‌ନା। ହେଦାଙ୍ଗ୍ କାଜିଙ୍ଗ୍ ଇ ପାଚେନି ମିଚ୍ ୱେଚ୍‌ନାକାନ୍ ଆଗେନି ମିଚ୍ ୱେଚ୍‌ନାକାନ୍ ତାଙ୍ଗ୍ ଆଦିକ୍ ବାନ୍ୟା ଆନାନ୍।

65ଗବର୍‌ନର୍ ପିଲାତ ହେୱାରିଙ୍ଗ୍ ୱେଚ୍‌ଚାନ୍, “ଏପେଙ୍ଗ୍ ଦୁଗେର୍ କାତେଙ୍ଗ୍ ର ଦଳ୍ ସେନାରିଙ୍ଗ୍ ଅୱାଟ୍। ଆରେ ଏପେଙ୍ଗ୍ ଇନେସ୍ ହାର୍ ଇଞ୍ଜି ବାବିକିନାଦେରା ହେଲେକେ ଦୁଗେର୍ ବାହାତାକେ କାସିମାନାଟ୍।” 66ତାପାଚେ ହେୱାର୍ ଦୁଗେର୍ ଲାଗାୟ୍ ହାଚାର୍ ଆରେ ଦୁଗେର୍ ମୁମ୍‌ଦ ସିଲ୍ ଇଡ଼୍‌ତାର୍। ହେବେ ସେନାହିରିଙ୍ଗ୍ କାସିମାଞ୍ଜେଙ୍ଗ୍ ଆଦେସ୍ ହିଜି ଚର୍‌କୁତାଙ୍ଗ୍ ଯୀଶୁ ହାଃତି ଗାଗାଡ଼୍‌ତିଙ୍ଗ୍ ରକ୍ଷା କିଜି ଇଡ଼୍‍ଦେଙ୍ଗ୍ ଉପାୟ୍ କିତାର୍।

നിലവിൽ തിരഞ്ഞെടുത്തിരിക്കുന്നു:

ମାଥିଉ 27: PEGNT

ഹൈലൈറ്റ് ചെയ്യുക

പങ്ക് വെക്കു

പകർത്തുക