ମାଥିଉ 21
21
ଯୀଶୁ ରାଜା ଲେକେ ଯିରୁଶାଲାମ୍ ସହର୍ତାକେ ହାଚାନ୍
(ମାର୍କ. ୧୧:୧-୧୧; ଲୁକ. ୧୯:୨୮-୪୦; ଯୋହନ. ୧୨:୧୨-୧୯)
1ଯୀଶୁ ଆରେ ତା ଚେଲାହିର୍ ଜିତ୍ମାର୍ ମାନି ମାଡ଼ି ଲାଗେନି ବେଥ୍ଫାଗି ସହର୍ତ ଏକାତାର୍। ହେପାଦ୍ନା ଯିରୁଶାଲାମ ସହର୍ ଏକିନିହିଙ୍ଗ୍ ଯୀଶୁ ତା ଚେଲାହିର୍ ବିତ୍ରେତାଙ୍ଗ୍ ରିୟାରିଙ୍ଗ୍ କୁକ୍ଚି ଇବେଣ୍ ୱେଚ୍ଚି ପକ୍ତାନ୍। 2“ମି ଲାଗାୟ୍ନି ନାସ୍କୁକାଙ୍ଗ୍ ହାଲାଟ୍। ଆରେ ହାଚି ଦାପ୍ରେ ର ଗଦତିଙ୍ଗ୍ ଗାଚ୍ଚାକା ହୁଡ଼୍ନାଦେର୍ ଆରେ ତା କଚଣ୍ତ ତା ଗଦହିମ୍ଣା ମାନାତ୍। ହେୱେକିୟାଙ୍ଗ୍ ରିକ୍ଚି ନା ଲାଗେ ତାସିୱାଡୁ। 3ଆରେ ଇନା କିଦେଙ୍ଗ୍ ରିକ୍ନାଦେରା ଇଞ୍ଜି ଇନେର୍ ପା ୱେନ୍ବା ଆଦ୍ନାର୍, ‘ତାଙ୍ଗେଙ୍ଗ୍ ୱେଚ୍ନାଦେର୍, ଇୱାଙ୍ଗ୍ ମା ଯୀଶୁ ମାପୃଙ୍ଗ୍ ଦରକାର୍ ମାନାତ୍।’ ହେଦାପ୍ରେ ହେୱାନ୍ ହେୱେକିୟାଙ୍ଗ୍ ପିସ୍ତିହିଦ୍ନାନ୍।” 4ଭବିଷ୍ଯତବକ୍ତା ୱେଚ୍ଚି କାତା ଇନେସ୍ ଲେକେ ପୁରାଆନାତ୍। ହେଦାଙ୍ଗ୍ କାଜିଙ୍ଗ୍ ଇଦାଙ୍ଗ୍ ଇ ଗଟ୍ନା ଗଟାଆତାତ୍।
5ସିୟୋନ ଦେସ୍ତିଙ୍ଗ୍ ୱେଚ୍ଚାନ୍, ହୁଡ଼ାଟ୍,
ମି ରାଜା ମିବେ ୱାନାନା। ହେୱାନ୍ ଦରମ୍ଆଜି ଗଦଜପି କୁଚ୍ଚି ୱାନାନା।
6ହେବେତାଙ୍ଗ୍ ଚେଲାହିର୍ ହାଲ୍ଜି ଯୀଶୁ ଆଦେସ୍ତିଙ୍ଗ୍ ମାନିକିଜି କାମାୟ୍ କିତାର୍। 7ହେୱାର୍ ଗଦତେୟା ଆରେ ତା ହିମ୍ଣାତିଙ୍ଗ୍ ଆସ୍ତି ଯୀଶୁ ଲାଗାୟ୍ ୱାତାର୍। ହେୱାର୍ ହେ ଗଦଜପି ଜାର୍-ଜାର୍ ହେନ୍ଦ୍ରାଙ୍ଗ୍ ପାସ୍ତାର୍। ପାଚେ ତା ଜପି ଯୀଶୁ କୁଚ୍ଚାନ୍।
8ଆରେ କେତେକ୍ ମାନାୟାର୍ ହାଜ୍ଦିଙ୍ଗ୍ ଜାର୍-ଜାର୍ ହେନ୍ଦ୍ରାଙ୍ଗ୍ ହାଜ୍ଦ ପାସ୍ତାର୍ ଆରେ ଜେକନିକାର୍ ମାର୍ତି ଡାଡ଼ିଙ୍ଗ୍ କେନ୍ଦାଙ୍ଗ୍ କାଦ୍ଦି ହାଜ୍ଦ ପାସ୍ତି ହିଦେଙ୍ଗ୍ ଲାଗାତାର୍। 9ଯୀଶୁ ଆଗେ-ଆଗେ କେତେକ୍ ହେନି ମାନାୟାର୍ ହାଲ୍ଜି ମାଚାର୍।
ଆରେ ତା ପାଚେ-ପାଚେ ପା କେତ୍ଜାଣ୍ ହାଲ୍ଜି ମାଚାର୍।
ହେୱାର୍ ୱିଜାକାର୍ ଚେରାଆଜି ୱେଚ୍ଚାର୍,
“ଦାଉଦ ମେହିଙ୍ଗ୍ ଜୟ୍-ଜୟ୍ କିୟାଟ୍। ଇନେର୍ ମାପୃ ତର୍ଦାଙ୍ଗ୍ ୱାନାନା ହେୱାନ୍ ଦନ୍ୟ।
ସରଗ୍ତାକେ ମାନି ଈଶ୍ୱରତିଙ୍ଗ୍ ଜୟ୍-ଜୟ୍ କିୟାଟ୍।”
10ଆରେ ହେୱାନ୍ ଯିରୁଶାଲାମ ସହର୍ତାକେ ହଟିଦାପ୍ରେ, ଦେସ୍ତି ମାନାୟାର୍ ଇୱାନ୍ ଇନେର୍ ଇଞ୍ଜି କାବା ଆତାର୍।
11ହେବେତାଙ୍ଗ୍ ମାନାୟାର୍ ୱେଚ୍ଚାର୍, “ଏ ଗାଲିଲୀ ଜିଲ୍ଲାନି ନାଜରିତନି ଭବିଷ୍ଯତବକ୍ତା ଯୀଶୁ।”
ଯୀଶୁ ଈଶ୍ୱର ମାନି ଇଲ୍ ବିତ୍ରେତାଙ୍ଗ୍ ବେପାର୍ବାଟ୍ କିନାକାରିଙ୍ଗ୍ ହପ୍ତାନ୍
(ମାର୍କ. ୧୧:୧୫-୧୯; ଲୁକ. ୧୯:୪୫-୪୮; ଯୋହନ. ୨:୧୩-୨୨)
12ତାପାଚେ ଯୀଶୁ ଆରେ ତା ଚେଲାହିର୍ ଯିରୁଶାଲାମ ସହର୍ତାକେ ୱାତାର୍। ଆରେ ଯୀଶୁ ଈଶ୍ୱର ମାନି ମନ୍ଦିର୍ନି ହାକ୍ଡ଼ିତାକେ ହାଚାର୍। ହେ ବାହାତାକେ ପଶୁ ଆରେ ପାରୁଆଙ୍ଗ୍ କେତେକ୍ ଜିନିଷ୍ ବେପାର୍ବାଟ୍ କିନାକାରିଙ୍ଗ୍ ଯୀଶୁ ହପ୍ତେଙ୍ଗ୍ ଲାଗାତାନ୍। ଆରେ ହେୱାନ୍ ଡାବୁଙ୍ଗ୍ ବାଦ୍ଲା-ବାଦ୍ଲି କିନି ଟେବୁଲ୍ତିଙ୍ଗ୍ ଉଲ୍ଟାଇ କିତାନ୍। ଆରେ ପାର୍ୱାଙ୍ଗ୍ ପନି ଟେବୁଲ୍ତିଙ୍ଗ୍ ଉଲ୍ଟାଇ କିତାନ୍। 13ଆରେ ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଇଦାଙ୍ଗ୍ ସାସ୍ତର୍ତାକେ ଲେକା ମାନାତ୍, ‘ଈଶ୍ୱର ମାନି ମନ୍ଦିର୍ତିଙ୍ଗ୍ ୱିଜୁଜାତିର୍ ମାନାୟ୍ କାଜିଙ୍ଗ୍ ର ପାର୍ତାନା ଇଲ୍ ଇନାର୍। ମାତର୍ ଏପେଙ୍ଗ୍ ହେଦାଙ୍ଗ୍ ଡାକୁର୍ ମାନି ବାହାଲେକେ କିତାଦେର୍ନା।’
14ଆରେ ଈଶ୍ୱର ମାନି ମନ୍ଦିର୍ତାକେ କାଣା ଆରେ ଚଟା ମାନାୟ୍ ଯୀଶୁ ଲାଗାୟ୍ ୱାତାର୍ ହେୱାରିଙ୍ଗ୍ ହାର୍କିତାନ୍। 15ମାତର୍ ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ପଣ୍ଡିତାର୍ ଚାନିଆଆନି କାମାୟ୍ ୱିଜୁ ହୁଡ଼୍ଜି। ଆରେ ଈଶ୍ୱର ମାନି ମନ୍ଦିର୍ ବିତ୍ରେ ଈଶ୍ୱରତିଙ୍ଗ୍ ଜୟ୍-ଜୟ୍ ଆୟେତ୍ ଦାଉଦ ହିମ୍ଣାଇଞ୍ଜି ବିଲ୍କି ଆଜି ତା ହିମ୍ଣାରିଙ୍ଗ୍ ହୁଡ଼୍ଜି ରିସାଆତାର୍।” 16ହେୱାର୍ ଯୀଶୁଙ୍ଗ୍ ୱେନ୍ବାତାର୍, “ଏ ହିମ୍ଣା କାଦେର୍ ଇନାକା ଇଞ୍ଜ୍ନାରା, ଏପେଙ୍ଗ୍ ଇନାକା ହେଦାଙ୍ଗ୍ ୱେଞ୍ଜେଙ୍ଗ୍ ଆଡ୍ନାଦେରା?” ହେଦାଙ୍ଗ୍ ଇନାକା ଏପେଙ୍ଗ୍ ହୁଡ଼୍ନାଦେର୍? ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆଁ ହାଞ୍ଜେଙ୍ଗ୍ ଆଡ୍ନାଦେରା। ଦରମ୍ ସାସ୍ତର୍ତାକେ ଲେକା ମାନାତ୍, ‘ଏପେଙ୍ଗ୍ କାଡ଼୍ଦେ ଆରେ ହିମ୍ଣାରିଙ୍ଗ୍ ଜୟ୍-ଜୟ୍ କିଦେଙ୍ଗ୍ ହିକାଇ କିତାଦେର୍ନା।’ ଇଦାଙ୍ଗ୍ ଇନାକା ଏପେଙ୍ଗ୍ ଦରମ୍ ସାସ୍ତର୍ତାକେ ପଡ଼ି କିୱାତାଦେର୍ନା?” 17ଆରେ ଯୀଶୁ ହେ ବାହା ପିସ୍ତି ଆରେ ସହର୍ତାଙ୍ଗ୍ ବାର୍ତ ହାଚାନ୍। ହେୱାନ୍ ବେଥନିଆ ସହର୍ତାକେ ହାଚାନ୍ ଆରେ ହେ ନାଣା କଟାଇକିତାନ୍।
ତଗାମାର୍ତିଙ୍ଗ୍ ଅବିଶାପ୍
(ମାର୍କ. ୧୧:୧୨-୧୪-୨୦-୨୪)
18ତା ଆର୍କାତ୍ ନାଞ୍ଜ୍ ନାଣାଙ୍ଗେ ହେୱାନ୍ ଯିରୁଶାଲାମ ସହର୍ତାକେ ଲେଉଟା ଆନିହିଙ୍ଗ୍ ନାସ୍କି ଆତାନ୍। 19ହେପାଦ୍ନା ହାଜି ଲାଗେ ଆକିଙ୍ଗ୍ ମାନି ର ତଗାମାର୍ତିଙ୍ଗ୍ ହୁଡ଼୍ତାନ୍। ଆରେ ହେ ତଗାମାର୍ ଲାଗାୟ୍ ହାଚାନ୍। ହେ ମାର୍ତ ଆପ୍କା ଆକିଙ୍ଗ୍ ପିସ୍ତି ଇନାକାପା ଗାଟାଆୱାତାନ୍। ଲାଗିଙ୍ଗ୍ ହେ ତଗାମାର୍ତିଙ୍ଗ୍ ୱେଚ୍ଚାନ୍, “ଆରେ ଇନାୱେଡ଼ାଙ୍ଗ୍ ପା ପାଡ଼୍ଆହ୍ମେତ୍।” ହେବେତାଙ୍ଗ୍ ହେ ତଗାମାର୍ ୱାଚ୍ଜି ହାଚାତ୍।
20ଚେଲାହିର୍ ହେ ତଗାମାର୍ ୱାଚ୍କା ହୁଡ଼୍ଜି କାବାଆଜି ୱେଚ୍ଚାର୍, “ତଗାମାର୍ ଇନେସ୍ କିଜି ହେଦାପ୍ରେ ୱାଚ୍ଚାତ୍?”
21ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଯଦି ଈଶ୍ୱରତାକେ ମି ପାର୍ତି ମାଚିସ୍, ଏପେଙ୍ଗ୍ ଜାର୍ ଗରବ୍ତାକେ ଡାଉଟ୍ କିମାଟ୍। ଲାଗିଙ୍ଗ୍ ଇ ତଗାମାର୍ତାଙ୍ଗ୍ ଇନେସ୍ କିତାଙ୍ଗ୍ ହେଲେକେ ଏପେଙ୍ଗ୍ କିନାଦେର୍। ହେଦାଙ୍ଗ୍ ଆକାୟ୍, ଏପେଙ୍ଗ୍ ଇ ମାଡ଼ିତିଙ୍ଗ୍ ପା ଏନେଙ୍ଗ୍ ନିଙ୍ଗ୍ଞ୍ଜି ହାମ୍ଦୁର୍ତାକେ ହାଲ୍ଜି ଆରା ଇଞ୍ଜି ୱେଚ୍ଚିସ୍ ହେଦାଙ୍ଗ୍ ଆର୍ନାତ୍। 22ଆରେ, ଈଶ୍ୱରତାଙ୍ଗ୍ ପାର୍ତି କିଜି ପାର୍ତାନା କିଜି ଇନାକା ଏନ୍ନାଦେର୍, ହେ ୱିଜୁ ପାୟାଆନାଦେର୍।”
ଯୀଶୁ ଆଦିକାର୍ ବିଷୟରେ କାତା
(ମାର୍କ. ୧୧:୨୭-୩୩; ଲୁକ. ୨୦:୧-୮)
23ଯୀଶୁ ଆରେରଗ ଯିରୁଶାଲାମ ସହର୍ତାକେ ୱାତାନ୍। ଆରେ ଯୀଶୁ ଈଶ୍ୱର ମାନି ମନ୍ଦିର୍ କଚଣ୍ତ ବୁଲାଆନିହିଙ୍ଗ୍ ଈଶ୍ୱର ହେବାକିନି ମୁଡ଼୍ଦି ପୁଜାରିର୍, ଆରେ ଜେକନି ପ୍ରାଚିନାର୍ ପା ତା ଲାଗାୟ୍ ୱାଜି ୱେନ୍ବାତାର୍, “ଏନେଙ୍ଗ୍ ଇନା ଆଦିକାର୍ତାଙ୍ଗ୍ ଇୱିଜୁ କିନାୟ୍? ଆରେ ଇୱିଜୁ କିଦେଙ୍ଗ୍ ନିଙ୍ଗେଙ୍ଗ୍ ଇନେର୍ ଇ ଆଦିକାର୍ ହିତ୍ତାର୍?”
24ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ପା ମିଙ୍ଗେଙ୍ଗ୍ ର ବେଣ୍ ୱେନ୍ବାଆଦ୍ନାଙ୍ଗ୍। ଯଦି ଏପେଙ୍ଗ୍ ନାଙ୍ଗେଙ୍ଗ୍ ହେ ବେଣ୍ନି ଉତର୍ ହିଦେଙ୍ଗ୍ ଆଡ୍ନାଦେର୍, ଲାଗିଙ୍ଗ୍ ଆନେଙ୍ଗ୍ ଇମ୍ଣି ଆଦିକାର୍ତାଙ୍ଗ୍ ହେଲେକେ କାମାୟ୍ କିନାଙ୍ଗା, ହେଦାଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗ୍। 25ଯୋହନ ଡୁବନ୍ହିନି ଆଦିକାର୍ ଇମେତାଙ୍ଗ୍ ୱାଜି ମାଚାତ୍?” ସରଗ୍ତାଙ୍ଗ୍ କି ମାନାୟ୍ ତାକେଣ୍ଡାଙ୍ଗ୍? ହେବେତାଙ୍ଗ୍ ହେୱାର୍ ଜାର୍-ଜାର୍ବିତ୍ରେ ବେଣ୍କିଜି ୱେଚ୍ଚେଙ୍ଗ୍ ଲାଗାତାର୍, “ଯଦି ସରଗ୍ତାଙ୍ଗ୍ ଇଞ୍ଜି ୱେଚ୍ନାସ୍, ‘ଲାଗିଙ୍ଗ୍ ହେୱାନ୍ ମାଙ୍ଗେଙ୍ଗ୍ ଇଞ୍ଜ୍ନାନ୍। ଏପେଙ୍ଗ୍ ଇନା କିଦେଙ୍ଗ୍ ହେୱାନିଙ୍ଗ୍ ପାର୍ତି କିୱାତାଦେର୍?’ 26ଯଦି ମାନାୟ୍ ତାକେଣ୍ଡାଙ୍ଗ୍ ଇଞ୍ଜି ୱେଚ୍ନାପ୍, ଲାଗିଙ୍ଗ୍ ମାନାୟ୍ ମୁମ୍ଦ ପାଣ୍ଡ୍ରାଆଜି ମାଚାର୍। ୱିଜାକାର୍ ଯୋହନତିଙ୍ଗ୍ ହାତ୍ପା ରକାନ୍ ଭବିଷ୍ଯତବକ୍ତା ଇଞ୍ଜି ମାନିକିଜି ମାଚାର୍। 27ଲାଗିଙ୍ଗ୍ ହେୱାର୍ ଯୀଶୁଙ୍ଗ୍ ୱେଚ୍ଚାର୍,” “ମାନାୟ୍ତିଙ୍ଗ୍ ଡୁବନ୍ ହିଦେଙ୍ଗ୍ ଯୋହନତିଙ୍ଗ୍ ଇନେର୍ ପକ୍ତାତାର୍ନା ଆପେଙ୍ଗ୍ ପୁନୁପ୍।” ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଲାଗିଙ୍ଗ୍ ଆନେଙ୍ଗ୍ ଇମ୍ଣି ଆଦିକାର୍ତାଙ୍ଗ୍ ଇୱିଜୁ କାମାୟ୍ କିନାଙ୍ଗା, ହେଦାଙ୍ଗ୍ ଆନେଙ୍ଗ୍ ପା ମିଙ୍ଗେଙ୍ଗ୍ ୱେଚ୍ଚୁଙ୍ଗ୍।”
ରିଣ୍ଡାଙ୍ଗ୍ ହିମ୍ଣାତି କାତା
28ଯୀଶୁ ହେୱାରିଙ୍ଗ୍ ଇ କାତା ବିଷୟରେ ଇନାକା ବାବିକିନାଦେରା ୱେଚ୍ଚାଟ୍, “ରୱାନ୍ତାକେ ରିୟାର୍ ହିମ୍ଣାର୍ ମାଚାର୍। ଦିନେକ୍ ହେୱାନ୍ ଗାଜାକାନ୍ ମେହିଙ୍ଗ୍ ୱେଚ୍ଚାନ୍, ‘କାଡ଼୍ଦେ ନେଞ୍ଜେଙ୍ଗ୍ ମା ଅଙ୍ଗୁର୍ ବାଡ଼୍ଦ ହାଲ୍ଜି କାମାୟ୍ କିୟା।’ 29ହେ ହିମ୍ଣା ୱେଚ୍ଚାନ୍, ‘ନା ଇଚା ଆକାୟ୍।’ ମାତର୍ ପାଚେ ମାନ୍ବାଦ୍ଲାଇ କିଜି କାମାୟ୍ କିଦେଙ୍ଗ୍ ହାଚାନ୍। 30ଆରେ ହେୱାନ୍ ହିରୁକାନ୍ ମେହିଙ୍ଗ୍ ପା ହେ କାମାୟ୍ କିଦେଙ୍ଗ୍ ୱେଚ୍ଚାନ୍, ‘ଆଁ ଆବା, ଆନେଙ୍ଗ୍ ହାନାଙ୍ଗା ଇଞ୍ଜି ହିରୁକାନ୍ ମେହି ୱେଚ୍ଚାନ୍।’ ମାତର୍ ହେୱାନ୍ କାମାୟ୍ କିଦେଙ୍ଗ୍ ଅଲପ୍ପା ହାଲ୍ୱାତାନ୍। 31ଇ ରିଆର୍ ବିତ୍ରେତାଙ୍ଗ୍ ଇନେର୍ ଆବା କାତା ମାନିକିନାର୍।”
ହେୱାର୍ ୱେଚ୍ଚାର୍, “ଗାଜାକାନ୍ ମେହି।”
ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ଇଞ୍ଜ୍ନାଙ୍ଗା ସିସ୍ତୁଏନ୍ନାକାର୍ ଆରେ ଦାରି କାମାୟ୍ କିନାକାର୍ ମି ତାକେତାଙ୍ଗ୍ ଆଗେ ଇନେର୍ ଈଶ୍ୱର ସାସନ୍ କିନି ରାଜିତାକେ ହାନାର୍। 32ଡୁବନ୍ହିନି ଯୋହନ ମି ଲାଗେ ୱାଜି ଦରମ୍ ହାଜ୍ଦିଙ୍ଗ୍ ହାଲ୍ଜି ହାର୍ଦାଙ୍ଗ୍ ଜିନାକା ଚଚ୍ଚି ମାନ୍ଞ୍ଚାନ୍। ମାତର୍ ଏପେଙ୍ଗ୍ ତାଙ୍ଗେଙ୍ଗ୍ ପାର୍ତି କିୱାତାଦେର୍। ମାତର୍ ସିସ୍ତୁଏନ୍ନାକାର୍ ଆରେ ଦାରି କାମାୟ୍ କିନାକାର୍ ତା କାତାତିଙ୍ଗ୍ ପାର୍ତି କିତାର୍। ଇଦାଙ୍ଗ୍ ହୁଡ଼୍ଜି ପା ଏପେଙ୍ଗ୍ ପାପ୍ କାମାୟ୍ ପିସ୍ତି ମାପୃତାକେ ୱାଜି ତାଙ୍ଗେଙ୍ଗ୍ ପାର୍ତି କିୱାତାଦେର୍।”
ଚାଷି ଆଦି କିଜି ବାଗ୍ ହିୱି କାତା
(ମାର୍କ. ୧୨:୧-୧୨; ଲୁକ. ୨୦:୯-୧୯)
33ଆରେ ର କାତା ୱେନାଟ୍, “ରକାନ୍ ଇଲ୍ନି ମାଲିକ୍ ମାଚାନ୍, ହେୱାନ୍ ର ବାଡ୍ଦ ଅଙ୍ଗୁର୍ ରୁସ୍ତାନ୍। ଆରେ ତା ଚାରିବେଣ୍ତାଙ୍ଗ୍ ବାଡ଼୍ ମୁକ୍ତାନ୍। ଆରେ ହେବେ ପା ଅଙ୍ଗୁର୍ ଉହ୍ନି କୁଣ୍ଡି ରସ୍ତାନ୍। ଆରେ ହେବେ ଜାଗୁୱାଡ଼ି ଇଲ୍ ରଞ୍ଜି ରସ୍ତାନ୍। ତାପାଚେ ହେ ଅଙ୍ଗୁର୍ ବାଡ଼୍ଦିଙ୍ଗ୍ ଆଦି ହିଜି ବିଦେସ୍ ହାଚାନ୍। 34ପାଚେ ଅଙ୍ଗୁର୍ ବାଡ଼୍ଦ ଅଙ୍ଗୁର୍ ଏଚ୍ନିହିଙ୍ଗ୍ ମାଲିକ୍ ତା ବାଗ୍ ତାତେଙ୍ଗ୍ ତା ହଲିଆହିଙ୍ଗ୍ ହେୱାନ୍ତାକେ ପକ୍ତାନ୍। 35ମାତର୍ ହେ ବାଡ଼୍ ଆଦି କିତାକାର୍ ହେ ହଲିଆଙ୍ଗ୍ ଆସ୍ତି ମାଡ୍ ହିତାର୍। ଆରେ ରକାନିଙ୍ଗ୍ ମାର୍ନେ ଅସ୍ତାର୍। ଆରେ ରକାନିଙ୍ଗ୍ କାଲ୍କୁ ଲାହାଙ୍ଗ୍ ଟ୍ରାକ୍ତାର୍। 36ଆରେରଗ ହେ ଆଦି ହିତି ମାଲିକ୍ ଆରେ କେତ୍ଜାଣ୍ ହଲିଆରିଙ୍ଗ୍ ପକ୍ତାତାନ୍। ଆରେ ହେୱାର୍ ହେୱାରିଙ୍ଗ୍ ପା ହେଲେକେ କିତାର୍।
37ମାତର୍ ନା ହିମ୍ଣାତିଙ୍ଗ୍ ହେ ଅଙ୍ଗୁର୍ ବାଡ଼୍ ଆଦି ଆସ୍ତାକାର୍ ମାନିକିନାର୍ ଇଞ୍ଜି, ହେ ଆଦି ହିତି ମାଲିକ୍ ତା ହିମ୍ଣାତିଙ୍ଗ୍ ହେୱାର୍ତାକେ ପକ୍ତାନ୍।
38ମାତର୍ ହେ ଆଦି ଆସ୍ତାକାର୍ ବାଡ଼୍ ମାଲିକ୍ନି ହିମ୍ଣାଙ୍ଗ୍ ହୁଡ଼୍ଜି ଜାର୍-ଜାର୍ବିତ୍ରେ ବେଣ୍କିବାଆଜି ୱେଚ୍ପାଆତାର୍, ‘ଇୱାନ୍ତ ମାଲିକ୍ ମେହି, ଇୱାନିଙ୍ଗ୍ ମାର୍ନେ ଅସ୍ତିସ୍ ଇ ଅଙ୍ଗୁର୍ ବାଡ଼୍ ମାଦି ଆନାତ୍।’ 39ଲାଗିଙ୍ଗ୍ ହେୱାର୍ ହେୱାନିଙ୍ଗ୍ ଅଙ୍ଗୁର୍ ବାଡ଼୍ ବାର୍ତ ତୁଇଜି ମାର୍ନେ ଅସ୍ତାର୍।
40ଲାଗିଙ୍ଗ୍ ଏଚେକାଡ଼୍ଦ ହେ ଅଙ୍ଗୁର୍ ବାଡ଼୍ଦି ମାଲିକ୍ ୱାନାନ୍, ହେପାଦ୍ନା ହେୱାନ୍ ବାଡ଼୍ ଆଦି ଆସ୍ତାକାରିଙ୍ଗ୍ ହେୱାନ୍ ଇନାକା କିନାନ୍?” 41ଈଶ୍ୱର ହେବାକିନି ମୁଡ଼୍ଦି ପୁଜାରି ଆରେ ନାୟକ୍ ନେତାର୍ ହେୱାନିଙ୍ଗ୍ ୱେଚ୍ଚାର୍, “ହେ ବାଡ଼୍ଦି ମାଲିକ୍ତିଙ୍ଗ୍ ଆଦି ଆସ୍ତାକାନିଙ୍ଗ୍ ଅପ୍ରାବଲ୍ ଆର୍ଲା କିଜି ଟ୍ରାକ୍ନାନ୍। ଆରେ ତାପାଚେ ହେ ଅଙ୍ଗୁର୍ ବାଡ଼୍ଦିଙ୍ଗ୍ ଜେକନିକାରିଙ୍ଗ୍ ବାଡ଼୍ ଆଦି ହିନାନ୍। ଇମ୍ଣାକାର୍ ଅଙ୍ଗୁର୍ ଆତିସ୍ ତା ବାଗ୍ ହେୱାନିଙ୍ଗ୍ ହିନାନ୍।”
42ଯୀଶୁ ହେୱାରିଙ୍ଗ୍ ୱେଚ୍ଚାନ୍,
“ଏପେଙ୍ଗ୍ ଇନାକା ଇନାୱେଡ଼ାଙ୍ଗ୍ ପା ସାସ୍ତର୍ତାକେ ଇ କାତା ପଡ଼ି କିୱାତାଦେର୍ନା?
ଇମ୍ଣି କାଲ୍ତିଙ୍ଗ୍ ଇଲ୍ ଗାଚ୍ନାକାର୍ ବେକାରେ ଇଞ୍ଜି ବାବିକିତାର୍,
ହେ କାଲ୍ନେ ୱିଜୁତାଙ୍ଗ୍ ବାଡ଼୍କାସ୍ କାଲ୍ ଆତାତ୍। ଈଶ୍ୱର ଇଲେକେ କିତାନ୍।
ମା କାଜିଙ୍ଗ୍ ଇଦାଙ୍ଗ୍ ଚାନିଆଆନି କାମାୟ୍।
43ଲାଗିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ‘ଈଶ୍ୱର ସାସନ୍ କିନି ରାଜି ମି ତାକେତାଙ୍ଗ୍ କିସ୍ତି ଅନାର୍। ଆରେ ଈଶ୍ୱର ତା ରାଜିତାକେ ଇନାକା ହିଦେଙ୍ଗ୍ ଇଚା କିନାନା। ଇମ୍ଣି ଜାତିର୍ତାକେ ହେଲେକେ କିନାର୍ ହେୱାରିଙ୍ଗ୍ ଈଶ୍ୱର ତା ସାସନ୍ କିନି ରାଜି ହିନାନ୍।’ 44ଆରେ ଇ କାଲ୍ ଇନେର୍ ଜପି ଆର୍ତିସ୍ ହେୱାନ୍ ଗନ୍ଦା-ଗନ୍ଦା ଆନାନ୍। ଆରେ ଇ କାଲ୍ ଇନେର୍ ଜପି ଆର୍ତିସ୍ ହେୱାନିଙ୍ଗ୍ ଚିନ୍ବିନ୍ କିନାତ୍।”
45ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ପାରୁସିଦଳ୍ନି ମାନାୟାର୍ ତା ଇୱିଜୁ କାତା ୱେନ୍ଞ୍ଜି, ହେୱାନ୍ ହେୱାରିଙ୍ଗ୍ ୱେଚ୍ନାନା ଇଞ୍ଜି ବୁଜାଆତାର୍। 46ଆରେ ହେୱାର୍ ଯୀଶୁଙ୍ଗ୍ ଆସ୍ତେଙ୍ଗ୍ ଉପାୟ୍ କିତାର୍। ମାତର୍ ମାନାୟ୍ ମୁମ୍ଦ ପାଣ୍ଡ୍ରା ଆତାର୍। ଇନେସ୍କି ହେୱାର୍ ଯୀଶୁଙ୍ଗ୍ ଭବିଷ୍ଯତବକ୍ତା ଇଞ୍ଜି ମାନିକିଜି ମାଚାର୍।
നിലവിൽ തിരഞ്ഞെടുത്തിരിക്കുന്നു:
ମାଥିଉ 21: PEGNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
