ଲୁକ 9

ଯୀଶୁ ବାରଜାଣ୍ ବାଚିକିତି ଚେଲାହିରିଙ୍ଗ୍ ପକ୍ତାନ୍

(ମାଥି. ୧୦:୫-୧୫; ମାର୍କ. ୬:୭-୧୩)

1ଯୀଶୁ ତା ବାଚିକିତି ବାରଜାଣ୍ ଚେଲାହିରିଙ୍ଗ୍ ତା ଲାଗାୟ୍ ହିର୍‌ବାତାନ୍। ହେୱାନ୍ ହେୱାରିଙ୍ଗ୍ ବୁତ୍ଆତ୍ମା ପିହିକିଦେଙ୍ଗ୍ ଆରେ ୱିଜୁ ପର୍‌କାର୍ ରଗ୍‌ଦାଙ୍ଗ୍ ହାର୍‌କିନି କାଜିଙ୍ଗ୍ ଶାକ୍ତି ଆରେ ଆଦିକାର୍ ହିତାନ୍। 2ଯୀଶୁ ତା ଚେଲାହିରିଙ୍ଗ୍ ଈଶ୍ୱର ସାସନ୍ କିନି ରାଜିନି ହାର୍ଦିକାବୁର୍ ଶୁଣାୟ୍ କିଦେଙ୍ଗ୍, ଆରେ ରଗିୟାରିଙ୍ଗ୍ ହାର୍‌କିଦେଙ୍ଗ୍ ପକ୍ତାନ୍।

3ଆରେ ହେୱାରିଙ୍ଗ୍ ୱେଚ୍‌ଚାନ୍, “ଏପେଙ୍ଗ୍ ଈଶ୍ୱର ବେଣ୍ ୱେଚ୍‌ଚି ବୁଲାଆନିହିଙ୍ଗ୍, ର କୁତାବେଡ୍‍ଗା କି ମଣା କି କାଦି କି ଡାବୁଙ୍ଗ୍ କି ଇନାକାପା ଅମାଟ୍। ଇନେସ୍‌କି ରିଣ୍ଡାଙ୍ଗ୍ ହେନ୍ଦ୍ରାପାଟା ପା ଅମାଟ୍। 4ଆରେ, ଏଚେପାଦ୍ନା ଏପେଙ୍ଗ୍ ଇମ୍‌ଣି ଇଞ୍ଜ ହାନାଦେର୍, ହେ ଇଞ୍ଜାଙ୍ଗ୍ ହାନିପାତେକ୍ ହେବେ ମାନାଟ୍।

5ଇମ୍‌ଣି ସହର୍‌ତାକେ ମିଙ୍ଗେଙ୍ଗ୍ ହେୱାର୍ ଆସ୍ତୁର୍, ଆରେ ମି ବେଣ୍ ୱେନ୍‌ୱିତିସ୍ ଏପେଙ୍ଗ୍ ହାନିହିଙ୍ଗ୍ କାଲ୍ ପାନାନି ଦୁଡ଼ି ଡ଼ାତାଟ୍। ଇଦାଙ୍ଗ୍ ସହର୍‌ନି ମାନାୟାରିଙ୍ଗ୍ ଚଚ୍‌ନାତ୍‌ କି ଈଶ୍ୱର ହେୱାରିଙ୍ଗ୍ ଦଣ୍ଡ୍ ହିନାନ୍।” 6ହେବେତାଙ୍ଗ୍ ହେ ବାଚିକିଜି ପକ୍ତି ଚେଲାହିର୍ ହସିହାଚାର୍। ହେୱାର୍ ୱିଜାକାର୍ ନାସ୍‌କୁ-ନାସ୍‌କୁକାଙ୍ଗ୍ ବୁଲାଆଜି ହାର୍ଦିକାବୁର୍ ଶୁଣାୟ୍ କିତାର୍, ଆରେ ମାନାୟାରିଙ୍ଗ୍ ହାର୍‌କିତାର୍।

ହେରୋଦ ରାଜା ଯୀଶୁଙ୍ଗ୍ ହୁଡ଼୍‌ଦେଙ୍ଗ୍ ଇଚା କିତାନ୍

(ମାଥି. ୧୪:୧-୧୨; ମାର୍କ. ୬:୧୪-୨୯)

7ହେପାଦ୍ନା ହେରୋଦ ରାଜା ଇ ୱିଜୁଗଟ୍‌ନା ବିଷୟ ୱେନ୍‌ଞ୍ଜି ବେସି ଚିନ୍ତା ଆତାନ୍। ଇନେସ୍‌କି ଡୁବନ୍‌ହିନି ଯୋହନ ହାଃଜି ଆରେରଗ ଜିତାନ୍‌ନା ଇଞ୍ଜି କେତେକ୍ ମାନାୟ୍ ୱେଚ୍‌ଚି ମାଚାର୍। 8ମାତର୍ ଜେକନି ଲକ୍ ୱେଚ୍‌ଚି ମାଚାର୍, “ଇୱାନ୍ ହେ ଭବିଷ୍ଯତବକ୍ତା ଏଲିୟ।” ଆରେ ଜେକନିକାର୍ ଇଞ୍ଜିମାଚାର୍, “ଆଗେ ପୁର୍‌ବେନି ଭବିଷ୍ଯତବକ୍ତାତାଙ୍ଗ୍ ରକାନ୍ ହାଃତିତାଙ୍ଗ୍ ଆରେରଗ ଜିତାନ୍‌ନା ଇଞ୍ଜି ୱେଚ୍‌ଚି ମାଚାର୍।” 9ମାତର୍ ହେରୋଦ ରାଜା ୱେଚ୍‌ଚାନ୍, “ଆନେଙ୍ଗ୍ ତ ଡୁବନ୍‌ହିନି ଯୋହନ କାପ୍‌ଡ଼ା ହଣ୍‌ଜି ମାଚାଙ୍ଗ୍। ଆରେ ଇୱାନ୍ ଇନେର୍? ଏଚେକ୍ ଚାନିଆଆନି କାମାୟ୍ ତା ବିଷୟତାଙ୍ଗ୍ ଆନେଙ୍ଗ୍ ୱେନାଙ୍ଗା।” ହେଦାଙ୍ଗ୍ କାଜିଙ୍ଗ୍ ହେରୋଦ ରାଜା ଯୀଶୁଙ୍ଗ୍ ହୁଡ଼୍‌ଦେଙ୍ଗ୍ ମାନ୍ କିଜି ମାଚାନ୍।

ପାଞ୍ଚ୍ ଗାଟା ରୁଟି ଆରେ ରିଣ୍ଡାଙ୍ଗ୍ ମିନ୍‌କୁ

(ମାଥି. ୧୪:୧୩-୨୧; ମାର୍କ. ୬:୩୦-୪୪; ଯୋହନ. ୬:୧-୧୪)

10ପାଚେ ଯୀଶୁ ପକ୍ତି ବାଚିକିତି ଚେଲାହିର୍ ଲେଉଟା ଆଜି ଯୀଶୁତାକେ ରୁଣ୍ଡାଆତାର୍। ଆରେ ହେୱାର୍ ଇନା ଇନାକା କିଜି ମାଚାର୍ ହେ ୱିଜୁବେଣ୍ ଯୀଶୁଙ୍ଗ୍ ୱେଚ୍‌ଚାର୍। ତାପାଚେ ଯୀଶୁ ତା ଚେଲାହିର୍ ହୁଦାଙ୍ଗ୍ ହେ ବାହା ପିସ୍ତି ବେଥ୍‍ସାଇଦା ସହର୍‌ତାକେ ହାଚାର୍। 11ମାତର୍ ଯୀଶୁ ଇମେତାକେ ହାଚାନ୍ ଇଦାଙ୍ଗ୍ ମାନାୟାର୍ ପୁନ୍‌ଞ୍ଜି ମାଚାର୍। ଲାଗିଙ୍ଗ୍ ହେୱାର୍ ତାପାଚେ-ପାଚେ ହାଚାର୍। ହେୱାନ୍ ହେୱାରିଙ୍ଗ୍ କୁକ୍‌ତାନ୍ ଆରେ ଈଶ୍ୱର ସାସନ୍ କିନି ରାଜିନି ବିଷୟରେ ହିକ୍ଷା ହିତାନ୍, ଆରେ ରଗିୟାରିଙ୍ଗ୍ ହାର୍‍କିତାନ୍।

12ୱେଡ଼ାଆର୍ଜି ୱାନିହିଙ୍ଗ୍ ବାରଜାଣ୍ ଚେଲାହିର୍ ଯୀଶୁ ଲାଗାୟ୍ ୱାଜି ୱେଚ୍‌ଚାର୍, “ବେସି ବିଲମ୍ ଆତାତେ ଆରେ ଇବାହା ବେସି ଟାଙ୍ଗ୍ରାବାହା। ଇଦାଙ୍ଗ୍ କାଜିଙ୍ଗ୍ ଇୱାରିଙ୍ଗ୍ ପକାମ୍‌ଦେ, ହେୱାର୍ ଲାଗେନି ହିରୁ ନାସ୍‌କୁକାଙ୍ଗ୍ ଆରେ ଜେକନି ନାସ୍‌କୁକାଙ୍ଗ୍ ହାଲ୍‌ଜି କାଦି କଡ଼୍‌ଜି ତିନେର୍। ଆରେ ହେୱାର୍ ମାଞ୍ଜେଙ୍ଗ୍ ବାହା ଦାସ୍ତି ମାନେର୍।” 13ମାତର୍ ଯୀଶୁ ହେୱାରିଙ୍ଗ୍ ୱେଚ୍‌ଚାନ୍, “ଏପେଙ୍ଗ୍ ନିଜେ ଇୱାରିଙ୍ଗ୍ ଇଚ୍‍କେ ତିନାକା ହିୟାଟ୍।” ଚେଲାହିର୍ ୱେଚ୍‌ଚାର୍, ମାବେ ଆପ୍‌କା ପାଞ୍ଚ୍‌ଗଟା ରୁଟିଙ୍ଗ୍ ଆରେ ରିଣ୍ଡି ମିନ୍‌କୁ ମାନିକ୍। ଆପେଙ୍ଗ୍ ହାଲ୍‌ଜି ଇୱିଜୁ ମାନାୟାର୍ କାଜିଙ୍ଗ୍ କାଦି କଡ଼୍‌ଜି ତାନାପ୍ ଇଞ୍ଜି ଏନେଙ୍ଗ୍ ଇଚା କିନାୟା କି? 14ହେବେ ପାଞ୍ଚ୍ ହାଜାର୍ ଆଣ୍ଡ୍ରା ହିମ୍‌ଣାଙ୍ଗ୍ ମାଚାର୍। ଯୀଶୁ ଚେଲାରିଙ୍ଗ୍ ୱେଚ୍‌ଚାନ୍, “ମାନାୟାରିଙ୍ଗ୍ ପଚାସ୍-ପଚାସ୍ ଜାଣ୍‌ତିଙ୍ଗ୍ ବାଗ୍ ବାଗ୍‌କିଜି କୁଚିକିୟାଟ୍।”

15ହେବେତାଙ୍ଗ୍ ହେବେ ହେଲେକେ ୱିଜାକାରିଙ୍ଗ୍ କୁଚିକିତାର୍। 16ତାପାଚେ ଯୀଶୁ ପାଞ୍ଚ୍‌ଗଟା ରୁଟିଙ୍ଗ୍ ଆରେ ରିଣ୍ଡାଙ୍ଗ୍ ମିନ୍‌କୁ ଅତାନ୍। ଆରେ ହେୱାନ୍ ସରଗ୍‌ଜପି ହୁଡ଼୍‌ଜି କାଦି କାଜିଙ୍ଗ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିତାନ୍। ହେ ରୁଟିଙ୍ଗ୍ ଗନ୍ଦା-ଗନ୍ଦା କିଜି ଡ୍ରିକ୍‌ଚି ମାନାୟାରିଙ୍ଗ୍ ବୁଲାଇ କିଜି ହିଦେଙ୍ଗ୍ ତା ଚେଲାହିରିଙ୍ଗ୍ ହିତାନ୍। 17ୱିଜାକାର୍ ରୁଟିଙ୍ଗ୍ ତିନ୍‌ଞ୍ଜି ପାଞ୍ଚାର୍। ଆରେ ତିନ୍‌ଞ୍ଜି ଉବ୍ରାଆତି ରୁଟି ଆରେ ମନ୍‌କୁ ବାରଗଟା ଟପାକାଙ୍ଗ୍ ଚେଲାହିର୍ ପେସ୍‌କି ବାର୍ତିକିତାର୍।

ପିତର ଯୀଶୁଙ୍ଗ୍ ଖ୍ରୀଷ୍ଟ ଇଞ୍ଜି ୱେଚ୍‌ଚାନ୍

(ମାଥି. ୧୬:୧୩-୨୦; ମାର୍କ. ୮:୨୭-୩୦)

18ଦିନେକ୍ ଯୀଶୁ ରକାନ୍ ପାର୍ତାନା କିନିହିଙ୍ଗ୍ ତା ଚେଲାହିର୍ ରବେଆଜି ହେବେ ୱାତାର୍, ଯୀଶୁ ଚେଲାହିରିଙ୍ଗ୍ ୱେନ୍‌ବାତାନ୍, “ମାନାୟାର୍ ନାଙ୍ଗେଙ୍ଗ୍ ଇନେର୍ ଇଞ୍ଜି ଇଞ୍ଜ୍‌ନାର୍?” 19ହେୱାର୍ ଯୀଶୁଙ୍ଗ୍ ୱେଚ୍‌ଚାର୍, “କେତେକ୍ ମାନାୟାର୍ ଇନାରା ଡୁବନ୍‌ହିନି ଯୋହନ୍, ଆରେ କେତେକ୍ ହେନି ଇନାରା ଏଲିୟ, ଆରେ କେତେକ୍ ହେନି ଆଗେନି ଭବିଷ୍ଯତବକ୍ତାର୍ ବିତ୍ରେତାଙ୍ଗ୍ ରକାନ୍ ହାଃଜି ଆରେରଗ ନିଙ୍ଗ୍‍ତାନ୍‍ନା।”

20ଯୀଶୁ ହେୱାରିଙ୍ଗ୍ ୱେନ୍‌ବାତାନ୍, “ଏପେଙ୍ଗ୍ ଇନେର୍ ଇଞ୍ଜି ବାବିକିନାଦେରା?” ପିତର ଯୀଶୁଙ୍ଗ୍ ୱେଚ୍‌ଚାନ୍, “ଏନେଙ୍ଗ୍ ଈଶ୍ୱରତାଙ୍ଗ୍ ୱାଜିମାଚି ଖ୍ରୀଷ୍ଟ।” 21ହେବେତାଙ୍ଗ୍ ଯୀଶୁ ହେୱାରିଙ୍ଗ୍ ତା ବିଷୟରେ ଇନେରିଙ୍ଗ୍ ପା ୱେଚ୍‌ମାଟ୍ ଇଞ୍ଜି ଆଦେସ୍ ହିତାନ୍।

ଯୀଶୁ ଜାର୍ ହାଃନି ବିଷୟରେ ୱେଚ୍‌ନି କାତା

(ମାଥି. ୧୬:୨୧-୨୩; ମାର୍କ. ୮:୩୧-୩୩)

22ଆନେଙ୍ଗ୍ ସରଗ୍‌ତାଙ୍ଗ୍ ୱାଜିମାଚି ମାନାୟ୍ ହିମ୍‌ଣା ଚେଲାହିଙ୍ଗ୍ ୱେଚ୍‌ଚାନ୍, “ପ୍ରାଚିନ୍‌, ଈଶ୍ୱର ହେବାକିନି ମୁଡ଼୍‌ଦି ପୁଜାରିର୍ ଆରେ ଯିହୁଦି ଦରମ୍‌ନି ପଣ୍ଡିତାର୍ କାଜିଙ୍ଗ୍ ହିନସ୍ତା ପାୟାଆଜି ହାଃଦେଙ୍ଗ୍ ଆନାତ୍, ଆରେ ହେୱାନ୍ ହାଃଜି ତିନ୍‌ଦିନ୍ ପାଚେ ଆରେରଗ ନିଙ୍ଗ୍‌ନାନ୍।”

ଯୀଶୁତାକେ ଚେଲା ଆନି କାତା

(ମାଥି. ୧୬:୨୪-୨୮; ମାର୍କ. ୮:୩୪-୯:୧)

23ହେପାଦ୍ନା ଯୀଶୁ ୱିଜୁ ମାନାୟାରିଙ୍ଗ୍ ୱେଚ୍‌ଚାନ୍, “ଇନେର୍ ପା ନା ପାଚେ ୱାଜି ଚେଲାଆନାଦେର୍, ଲାଗିଙ୍ଗ୍ ହେୱାନ୍ ଜାର୍ ସୁକ୍ ପିସ୍ତି ଆରେ ଜାର୍ କୃଶ ଆସ୍ତି ୱିଜୁଦିନ୍ ନା ପାଚେ ୱାଡ। 24ଇମ୍‌ଣାକାନ୍ ଜାର୍ ଜିବୁନ୍ ଉଦାର୍ କିଦେଙ୍ଗ୍ ମାନ୍ କିନାନ୍, ହେୱାନ୍ ହେଦାଙ୍ଗ୍ ଆରାଇ କିନାନ୍। ଆରେ ଇମ୍‌ଣାକାର୍ ନା କାଜିଙ୍ଗ୍ ତା ଜିବୁନ୍ ହିନାର୍, ହେୱାନ୍ ହେଦାଙ୍ଗ୍ ରକ୍ଷା କିନାନ୍। 25ଇନେର୍ ପା ୱିଜୁ ଜଗତ୍‍ତିଙ୍ଗ୍ ପାୟାଆଜି ଜାର୍ ଜିବୁନ୍‌ତିଙ୍ଗ୍ ଆରାୟ୍ କିତିସ୍, ହେଦାଙ୍ଗ୍ ତାଦି ଇନା ଲାବ୍?

26ଯଦି ଇନେର୍ ପା ନାଙ୍ଗେଙ୍ଗ୍ ମାପୃ ଇଞ୍ଜେଙ୍ଗ୍ ଲାଜ୍ ଆନାର୍, ଆରେ ନା ହିକ୍ଷାତିଙ୍ଗ୍ ମାନିକିଉର୍, ଆନେଙ୍ଗ୍ ପା ନା ଚେଲା ଆକାୟ୍ ଇଞ୍ଜି ୱେଚ୍‌ନାଙ୍ଗ୍। ଆନେଙ୍ଗ୍ ସରଗ୍‌ତାଙ୍ଗ୍ ୱାଜିମାଚି ମାନାୟ୍ ହିମ୍‌ଣା ଏଚେକାଡ଼୍‌ଦ ସରଗ୍‌ତାଙ୍ଗ୍ ପବିତ୍ର ଦୁତ୍‌କୁ ହୁଦାଙ୍ଗ୍ ପୁର୍ତିତାକେ ଆରେରଗ ୱାନାଙ୍ଗ୍, ମାଞ୍ଜିଆବାଙ୍ଗ୍ ଇନେସ୍ ଗୌରବ ମାନାତ୍ ହେଲେକେ ଆନେଙ୍ଗ୍ ଗୌରବତାଙ୍ଗ୍ ୱାନିହିଙ୍ଗ୍ ୱିଜାକାର୍ ହୁଡ଼୍‌ନାର୍।” 27ଯୀଶୁ ତା ଚେଲାରିଙ୍ଗ୍ ଆରେ ହେବେ ମାଚି ମାନାୟାରିଙ୍ଗ୍ ଇଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍‌ଚାନାଙ୍ଗା, ଈଶ୍ୱର ସାସନ୍ କିନି ରାଜି ଶାକ୍ତିତାଙ୍ଗ୍ ୱାୱି ପାତେକ୍ ଇବେ ମାନି କେତେକ୍ ମାନାୟ୍ ହାଃଉର୍।”

ଯୀଶୁ ରୁପ୍ ବାଦ୍‌ଲା ଆନି ବିଷୟନି କାତା

(ମାଥି. ୧୭:୧-୮; ମାର୍କ. ୯:୨-୮)

28ଇୱିଜୁ ଗଟ୍‌ନାଆତି ଆଟ୍‌ଦିନ୍ ଆତିପାଚେ ଯୀଶୁ, ପିତର, ଯୋହନ୍ ଆରେ ଯାକୁବ ହୁଦାଙ୍ଗ୍ ପାର୍ତାନା କିଦେଙ୍ଗ୍ ମାଡ଼ିଜପି ହାଚାର୍। 29ଏଚେପାଦ୍ନା ହେୱାନ୍ ପାର୍ତାନା କିଜି ମାଚାନ୍, ତା ରୁପ୍ ବାଦ୍‌ଲାଆତାତ୍ ଆରେ ତା ହେନ୍ଦ୍ରା ପା ବେସି ଣିନ୍‌ଞ୍ଜି ଚାକ୍‌ଚାକା ଆତାତ୍।

30ହେପାଦ୍ନା ତିନ୍‌ଜାଣ୍ ଚେଲାହିର୍ ହୁଡ଼୍‌ତାର୍ ଯେ ଏଲିୟ ଆରେ ମୋଶା ଇ ରିୟାର୍ ଯୀଶୁ ହୁଦାଙ୍ଗ୍ ବେଣ୍ କିବାଆନାରା। 31ହେୱାର୍ ମୁମ୍ ପା ଗୌରବତାଙ୍ଗ୍ ହଲ୍‌ଜି ମାଚାତ୍। ଯିରୁଶାଲାମ ସହର୍‌ତାକେ ଯୀଶୁ ହାଃନି ବିଷୟ ହେୱାର୍ ବେଣ୍‌କିବାଆଜି ମାଚାର୍।

32ହେପାଦ୍ନା ପିତର ଆରେ ତା ହାଙ୍ଗ୍‌କାର୍ ବେସି ହୁନ୍‍‍ଞ୍ଜି ମାଚାର୍। ହେୱାର୍ ନିଙ୍ଗ୍‍ତାର୍ ଆରେ ଯୀଶୁଙ୍ଗ୍ ଗୌରବ ଆତାକା ହୁଡ଼୍‌ତାର୍, ଆରେ ଯୀଶୁ ହୁଦାଙ୍ଗ୍ ନିଲ୍‌ଚିମାନି ରିକାରିଙ୍ଗ୍ ପା ହୁଡ଼୍‌ତାର୍। 33ହେୱାର୍ ତାବେଡାଙ୍ଗ୍ ହସିହାନିହିଙ୍ଗ୍ ପିତର ଯୀଶୁଙ୍ଗ୍ ୱେଚ୍‌ଚାନ୍, “ଏ ଗୁରୁ, ଆପେଙ୍ଗ୍ ଯେ ଇ ବାହାତାକେ ମାନାକା ହାର୍! ଆପେଙ୍ଗ୍ ତିନ୍‌ଗଟା ପୁଟ୍‌କୁ ରହ୍‌ନାପ୍, ନି କାଜିଙ୍ଗ୍ ରଞ୍ଜାଙ୍ଗ୍ ମୋଶା କାଜିଙ୍ଗ୍ ରଞ୍ଜାଙ୍ଗ୍ ଆରେ ଏଲିୟ କାଜିଙ୍ଗ୍ ରଞ୍ଜାଙ୍ଗ୍।” ମାତର୍ ହେୱାନ୍ ଇନାକା ୱେଚ୍‌ଚାନାନା ହେଦାଙ୍ଗ୍ ପୁୱାଦାଙ୍ଗ୍ ମାଚାନ୍।

34ହେୱାନ୍ ଇବେଣ୍ ୱେଚୁ-ୱେଚୁ ଅଲପ୍ ବାଦାଡ଼୍ ୱାଜି ହେୱାରିଙ୍ଗ୍ ଡାବାଇ କିତାତ୍। ହେଦାଙ୍ଗ୍ କାଜିଙ୍ଗ୍ ଚେଲାହିର୍ ପାଣ୍ଡ୍ରା ଆତାର୍। 35ହେ ବାଦାଡ଼୍‌ତାଙ୍ଗ୍ ଈଶ୍ୱର ୱେଚ୍‌ଚାନ୍, “ଏ ନା ଲାଡ୍ ମାଜି। ଆନେଙ୍ଗ୍ ଇୱାନିଙ୍ଗ୍ ବାଚିକିତାଙ୍ଗ୍। ଇୱାନ୍ ବେଣ୍‌ତିଙ୍ଗ୍ ମାନ୍‌ଦିୟାନ୍ କିଜି ୱେନା!” 36ହେ ବେଣ୍ ୱେଚି ପାଚେ ଯୀଶୁ ରକାନ୍ ନେ ଚଞ୍ଜିଆତାନ୍। ଆରେ ହେୱାର୍ ଇନା ଇନାକା ହୁଡ଼୍‌ତାର୍, ହେ ୱିଜୁ ଇନେରିଙ୍ଗ୍ ପା ୱେଚ୍‌ୱାତାର୍।

ଯୀଶୁ ବୁତ୍ଆତ୍ମା ଡୁୟାଆତି କାଡ଼୍‍ଦେଙ୍ଗ୍‌ ହାର୍‍କିତାନ୍

(ମାଥି. ୧୭:୧୪-୧୮; ମାର୍କ. ୯:୧୪-୧୭)

37ଆର୍‌କାତ୍ ନାଞ୍ଜିଙ୍ଗ୍ ଯୀଶୁ ଆରେ ତିନ୍‌ଜାଣ୍ ଚେଲାହିର୍ ମାଡ଼ିତାଙ୍ଗ୍ ଜୁତ୍‌ତାର୍‌। ହେପାଦ୍ନା ବେସିହେନି ମାନାୟ୍ ଯୀଶୁଙ୍ଗ୍ ମେହାଆତାର୍। 38ମାନାୟାର୍ ବିତ୍ରେତାଙ୍ଗ୍ ରକାନ୍ ଯୀଶୁଙ୍ଗ୍ ଚେରାଆଜି ୱେଚ୍‌ଚାନ୍, “ଏ ଗୁରୁ, ନିଙ୍ଗେଙ୍ଗ୍ ଆନେଙ୍ଗ୍ ଗୁୱାରି କିଦ୍‌ନାଙ୍ଗା ନା ହିମ୍‌ଣା କାଜିଙ୍ଗ୍ ଦୟାକିଦା, ଇନେସ୍‌କି ହେୱାନ୍ ନା ରକାନ୍ ଇଞ୍ଜି ହିମ୍‌ଣା। 39ହେୱାନିଙ୍ଗ୍ ର ବୁତ୍ଆତ୍ମା ଆହ୍‌ନାତ୍। ହେୱାନିଙ୍ଗ୍ ବୁତ୍ଆତ୍ମା ଆସ୍ତିସ୍ ତିପ୍‌କୁ ଚେରାଆନାନ୍। ଆରେ ହେୱାନିଙ୍ଗ୍ ଇଲେକେ ମଡ଼ିକିନାତ୍ ଯେ ହେୱାନ୍ ତା ୱେଇଦାଙ୍ଗ୍ ପେପୁଲ୍ ହନାତ୍। ହେୱାନିଙ୍ଗ୍ ଚିତ୍ରା କାବ୍ରା କିଜି ହେୱାନ୍‌ତାଙ୍ଗ୍ ବେସି କଷ୍ଟ ହିଜି ହସିହାନାତ୍।” 40ବୁତ୍ ପିହିକିଦେଙ୍ଗ୍ ଆନେଙ୍ଗ୍ ନି ଚେଲାରିଙ୍ଗ୍ ୱେଚ୍‌ଚି ମାଚାଙ୍ଗ୍, ମାତର୍ ହେୱାର୍ ଇନାକାପା କିଦେଙ୍ଗ୍ ଆଡ୍‌ୱାତାର୍।

41ଯୀଶୁ ହେୱାରିଙ୍ଗ୍ ୱେଚ୍‌ଚାନ୍, “ଏପେଙ୍ଗ୍ ଈଶ୍ୱରତିଙ୍ଗ୍ ପାର୍ତି କିୱାକାଦେର୍, ଆରେ ଏପେଙ୍ଗ୍ ପାପ୍‌ତାକେ ମାନାଦେର୍। ଏପେଙ୍ଗ୍ ପାର୍ତିକିନି ପାତେକ୍ ଆନେଙ୍ଗ୍ ମିହୁଦାଙ୍ଗ୍ ଏଚେକ୍ ଦିନ୍ ମାନାଙ୍ଗ୍? ନି ହିମ୍‌ଣାଙ୍ଗ୍ ତାହିୱା।” 42ହେୱାନ୍ ୱାଉ-ୱାଉ ବୁତ୍ ହେୱାନିଙ୍ଗ୍ ତାରେନ୍ ଗୁତ୍‍ତି ଅପ୍ରାବଲ୍ ମଡ଼ିକିତାତ୍। ମାତର୍ ଯୀଶୁ ବୁତ୍ଆତ୍ମାକାଙ୍ଗ୍ ଦମ୍‌କାଇ କିତାନ୍। ଆରେ ହିମ୍‌ଣାଙ୍ଗ୍ ହାର୍ କିଜି ହେୱାନିଙ୍ଗ୍ ଲାତ୍ରାହି କେଇଦ ଆହିକିତାନ୍।

43ହେପାଦ୍ନା ୱିଜାକାର୍ ଚେଲାହିର୍ ଈଶ୍ୱରକିତି କାମାୟ୍‌ତିଙ୍ଗ୍ ହୁଡ଼୍‌ଜି କାବା ଆତାର୍।

ଯୀଶୁ ଆରେରଗ ଜାର୍ ହାଃନି ବିଷୟରେ ୱେଚ୍‌ଚାନ୍

(ମାଥି. ୧୭:୨୨-୨୩; ମାର୍କ. ୯:୩୦-୩୨)

44ଯୀଶୁ ଇନା ଇନାକା କାମାୟ୍ କିଜି ମାଚାନ୍ ମାନାୟାର୍ ହେଦାଙ୍ଗ୍ ହୁଡ଼୍‌ଜି କାବାଆଜି ମାଚାର୍। ହେପାଦ୍ନା ହେୱାନ୍ ଜାର୍ ଚେଲାହିରିଙ୍ଗ୍ ୱେଚ୍‌ଚାନ୍, “ନଙ୍ଗୟ୍ ଆନେଙ୍ଗ୍ ମିଙ୍ଗେଙ୍ଗ୍ ଇନାକା ୱେଚ୍‌ଚାନାଙ୍ଗ୍, ହେଦାଙ୍ଗ୍ ବାଣା ଆମାଟ୍। ସରଗ୍‌ତାଙ୍ଗ୍ ୱାଜିମାଚି ମାନାୟ୍ ହିମ୍‌ଣାତିଙ୍ଗ୍ ର ମାନାୟ୍ ଶାତ୍ରୁ କେଇଦ ଆହିକିନାନ୍।” 45ମାତର୍ ତା ଚେଲାହିର୍ ଇ ବେଣ୍‌ତିଙ୍ଗ୍ ଅଲପ୍‌ପା ବୁଜାଆୱାତାର୍। ଈଶ୍ୱର ଇବେଣ୍ ଡ଼ୁକ୍‌ଚି ମାଚାନ୍, ହେଦାଙ୍ଗ୍ କାଜିଙ୍ଗ୍ ହେୱାର୍ ତା ଅର୍ତ ବୁଜାଆୱାତାର୍। ଆରେ ହେୱାର୍ ହେ ବେଣ୍ ବିଷୟରେ ହେୱାନିଙ୍ଗ୍ ୱେନ୍‌ବେଦେଙ୍ଗ୍ ପାଣ୍ଡ୍ରାଆଜି ମାଚାର୍।

ଈଶ୍ୱର ସାସନ୍ କିନିତାକେ ଇନେର୍ ଗାଜାକାନ୍

(ମାଥି. ୧୮:୧-୫; ମାର୍କ. ୯:୩୩-୩୭)

46ଯୀଶୁ ଚେଲାହିର୍ ୱେଚ୍‌ପା ୱେଚ୍‌ପି ଆତାର୍‌ ମା ବିତ୍ରେତାଙ୍ଗ୍ ଇନେର୍ ଗାଜାକାନ୍, 47ମାତର୍ ଯୀଶୁ ହେୱାର୍ ମାନ୍ତି କାତା ପୁନ୍‌ଞ୍ଜି, ର ହିରୁ ହିମ୍‌ଣାତିଙ୍ଗ୍ କୁକ୍‌ଚି ତା ଲାଗାୟ୍ ନିଲି କିତାନ୍। 48ଯୀଶୁ ତା ଚେଲାହିରିଙ୍ଗ୍ ୱେଚ୍‌ଚାନ୍, “ଇନେର୍ ପା ନା ତର୍‍ଦାଙ୍ଗ୍ ଇ ହିରୁ ହିମ୍‌ଣାକାଙ୍ଗ୍ ଆହ୍‌ନାନ୍, ହେୱାନ୍ ନାଙ୍ଗେଙ୍ଗ୍ ଆସ୍ତାନାନ୍। ଆରେ ଇନେର୍ ନାଙ୍ଗେଙ୍ଗ୍ ଆସ୍ତାନାନ୍, ହେୱାନ୍ ନାଙ୍ଗେଙ୍ଗ୍ ପକ୍ତିତି ଆବାଙ୍ଗ୍ ଆହ୍‌ନାନ୍। ଲାଗିଙ୍ଗ୍ ମି ବିତ୍ରେତାଙ୍ଗ୍ ଇନେର୍ ଦରମ୍‌ଆଜି ହିରୁକାନ୍ ଆନାନ୍ ହେୱାନ୍‌ନେ ଗାଜାକାନ୍ ଆନାନ୍।”

ଇନେର୍ ମି ଶାତ୍ରୁ ଆକାୟ୍, ହେୱାନ୍ ମି ମିତ୍ର।

(ମାର୍କ. ୯:୩୮-୪୦)

49ତା ଚେଲାହି ଯୋହନ ଯୀଶୁଙ୍ଗ୍ ୱେଚ୍‌ଚାନ୍, “ଏ ଗୁରୁ, ନି ତର୍‌ ଅଜି ରକାନ୍ ମାନାୟ୍ ବୁତ୍ଆତ୍ମା ପିହିକିନାକା ଆପେଙ୍ଗ୍ ହୁଡ଼୍‌ତାପ୍, ହେୱାନ୍ ମା ବିତ୍ରେ ନିକାନ୍ ଆକାଇ ଲାଗିଙ୍ଗ୍ ହେୱାନିଙ୍ଗ୍ ମୁନାକିତାପ୍।” 50ମାତର୍ ଯୀଶୁ ୱେଚ୍‌ଚାନ୍, “ହେୱାନିଙ୍ଗ୍ ମୁନା କିମାଟ୍, ଲାଗିଙ୍ଗ୍ ଇନେର୍ ମା ବିରଦ୍ କିଦୁନା, ହେୱାନ୍ ମା ମିତ୍ର।”

ଶମିରଣିୟ ନାସ୍‌ନି ମାନାୟାର୍ ଯୀଶୁଙ୍ଗ୍ ଆହ୍‌ୱାତାର୍

51ଯୀଶୁ ପୁର୍ତି ପିସ୍ତି ସରଗ୍‌ଜପି ହାନି ସମୟ୍ ଲାଗେ ୱାତିଲେ। ହେଦାଙ୍ଗ୍ କାଜିଙ୍ଗ୍ ଯୀଶୁ ଯିରୁଶାଲାମ ସହର୍‌ତାକେ ହାଞ୍ଜେଙ୍ଗ୍ ମାନ୍‌କିତାନ୍। 52ଯୀଶୁ ଶମିରଣିୟ ନାସ୍ ଏକିତି ପାଚେ ହେୱାନ୍ କେତ୍‌ଜାଣ୍ ଡାଣ୍ଡାସିରିଙ୍ଗ୍ ହେ ସହର୍‌ତାକେ ପକ୍ତାନ୍। ଇନେସ୍‌କି ହେୱାର୍ ମାଞ୍ଜେଙ୍ଗ୍ ଆଡ୍‌ନାର୍। 53ମାତର୍ ଯୀଶୁ ଯିରୁଶାଲାମ୍‌ତାକେ ହାନାକା ହୁଡ଼୍‌ଜି ହେବେନି ମାନାୟାର୍ ଯୀଶୁଙ୍ଗ୍ ଇନେର୍ ପା ଆହ୍‌ୱାତାର୍।

54ଯୀଶୁ ଚେଲାହି ଯାକୁବ ଆରେ ଯୋହନ ଇଦାଙ୍ଗ୍ ହୁଡ଼୍‌ତାର୍। ହେ ଚେଲାହିର୍ ୱେଚ୍‌ଚାର୍, “ମାପୃ ସରଗ୍‌ତାଙ୍ଗ୍ ନାଣି ବାର୍ହା କିଜି ହେୱାରିଙ୍ଗ୍ ବୁଡାୟ୍‌କିନି କାଜିଙ୍ଗ୍ ଆପେଙ୍ଗ୍ ଆଦେସ୍ ହିନାପ୍ ଇଞ୍ଜି ଇନାକା ଏନେଙ୍ଗ୍ ଇଚା କିନାୟା?” 55ମାତର୍ ଯୀଶୁ ହେୱାର୍ ନିପଣ୍ ବୁଲାଆଜି ହେୱାରିଙ୍ଗ୍ ଦମ୍‍କାଇକିଜି ୱେଚ୍‌ଚାନ୍, “ଏପେଙ୍ଗ୍ ଇନାକା ମାନ୍ତ ବାବିକିନାଦେରା। ହେଦାଙ୍ଗ୍ ପୁନୁଦେର୍, ଇନେସ୍‌କି ଆନେଙ୍ଗ୍ ସରଗ୍‌ତାଙ୍ଗ୍ ୱାଜିମାଚି ମାନାୟ୍ ହିମ୍‌ଣା ମାନାୟାର୍ ଜିବୁନ୍ ବୁଡାୟ୍ କିଦେଙ୍ଗ୍ ୱାୱାତାଙ୍ଗ୍‌ନା, ମାତର୍ ରକ୍ଷା କିଦେଙ୍ଗ୍ ୱାତାଙ୍ଗ୍‌ନ୍‌ନା।” 56ତାପାଚେ ଯୀଶୁ ଆରେ ତା ଚେଲାହିର୍ ଜେକନି ନାସ୍ ହାଚାର୍।

ଯୀଶୁଙ୍ଗ୍ ଚେଲା ଆନି କାତା

(ମାଥି. ୮:୧୯-୨୨)

57ହେୱାର୍ ହାଜ୍‌ଦ ଆଗେ ତାଙ୍ଗ୍‌ଜି ହାଲ୍‌ଜି ମାଚାର୍। ରକାନ୍ ମାନାୟ୍ ଯୀଶୁଙ୍ଗ୍ ୱେଚ୍‌ଚାନ୍, “ଏନେଙ୍ଗ୍ ଇମ୍‌ଣି ବାହାତାକେ ହାନାୟ୍, ଆନେଙ୍ଗ୍ ନି ଚେଲା ଆଦେଙ୍ଗ୍ ନି ପାଚେ ୱାନାଙ୍ଗ୍।” 58ଯୀଶୁ ହେୱାନିଙ୍ଗ୍ ୱେଚ୍‌ଚାନ୍, “କଲିଆ ମାଞ୍ଜେଙ୍ଗ୍ କଡ଼ି ମାନାତ୍। ବାଦାଡ଼୍‌ନି ପଟିକାଙ୍ଗ୍ ମାଞ୍ଜେଙ୍ଗ୍ ଗୁଡା ମାନାତ୍, ମାତର୍ ଆନେଙ୍ଗ୍ ସରଗ୍‌ତାଙ୍ଗ୍ ୱାଜିମାଚି ମାନାୟ୍ ହିମ୍‌ଣାତଙ୍ଗ୍‌ ଆନେଙ୍ଗ୍ (ଯୀଶୁ) ମାଞ୍ଜେଙ୍ଗ୍ ବାହା ହିଲେତ୍।”

59ତାପାଚେ ଯୀଶୁ ଆରେ ରକାନିଙ୍ଗ୍ ୱେଚ୍‌ଚାନ୍, “ନା ପାଚେ ୱା।” ମାତର୍ ହେ ମାନାୟ୍ ୱେଚ୍‌ଚାନ୍, “ମାପୃ ନାଙ୍ଗେଙ୍ଗ୍ ଆଗେ ନା ଆବାଙ୍ଗ୍ ମୁଚ୍‍ଚେଙ୍ଗ୍ ଆଦେସ୍ ହିଦା।” 60ମାତର୍ ଯୀଶୁ ହେୱାନିଙ୍ଗ୍ ୱେଚ୍‌ଚାନ୍, “ହାଃତାକାର୍ ହାଃତି ମାନାୟ୍‌ତିଙ୍ଗ୍ ମୁଚେର୍‌। ମାତର୍ ଏପେଙ୍ଗ୍ ହାଲ୍‌ଜି ଈଶ୍ୱର ସାସନ୍ କିନି ରାଜିନି ବିଷୟରେ ମାନାୟାରିଙ୍ଗ୍ ଶୁଣାୟ୍ କିୟାଟ୍।”

61ଆରେ ରକାନ୍ ପା ୱେଚ୍‌ଚାନ୍, “ମାପୃ ଆନେଙ୍ଗ୍ ନି ପାଚେ ୱାନାଙ୍ଗ୍। ମାତର୍ ପାର୍ତୁମ୍ ନାଙ୍ଗେଙ୍ଗ୍ ନା ପରିବାର୍ ମାନାୟ୍‌ତାକେ ୱେଚ୍‌ଚି ୱାଦେଙ୍ଗ୍ ଆଦେସ୍ ହିଦା।” 62ମାତର୍ ଯୀଶୁ ହେୱାନିଙ୍ଗ୍ ୱେଚ୍‌ଚାନ୍, “ଇମ୍‌ଣି ମାନାୟ୍ ନାଙ୍ଗେଲ୍‌ଜପି କେଇ ଇଡ଼୍‌ଜି ପାଚ୍‌ବାଗାୟ୍ ହୁଡ଼୍‌ତାନ୍, ହେୱାନ୍ ଈଶ୍ୱର ସାସନ୍ କିନି ରାଜି କାଜିଙ୍ଗ୍ ଆଦିକାର୍ ଆକାଇ।”

നിലവിൽ തിരഞ്ഞെടുത്തിരിക്കുന്നു:

ଲୁକ 9: PEGNT

ഹൈലൈറ്റ് ചെയ്യുക

പങ്ക് വെക്കു

പകർത്തുക