ଲୁକ 2

ଯୀଶୁ ଖ୍ରୀଷ୍ଟ ଜନମ୍

(ମାଥି. ୧:୧୮-୨୫)

1ହେପାଦ୍ନା ମହା ରାଜା କାଇସର୍ ଅଗଷ୍ଟସ୍ ରମିୟ ଦେସ୍‌ତାକେ ମାନି ମାନାୟାରିଙ୍ଗ୍ ତର୍‌ ଲେକାଇ କିଦେଙ୍ଗ୍ ଆଦେସ୍ ହିତାନ୍। 2ରୋମିୟ ଦେସ୍‌ତାକେ ପାର୍ତୁମ୍ ହଟ୍ ସର୍ବେ କିନାକା ମାଚାତ୍। ହେପାଦ୍ନା କୁରିଣିୟ ତର୍‌ଦାକାନ୍‌ ରକାନ୍ ସିରିୟା ଜିଲ୍ଲାତାକେ ଗବର୍‌ନର୍ ମାଚାନ୍। 3ହେଦାଙ୍ଗ୍ କାଜିଙ୍ଗ୍ ୱିଜାକାର୍ ମାନାୟ୍ ଜାର୍-ଜାର୍ ସହର୍‌ତାକେ ତର୍‌ ଲେକାଇ କିଦେଙ୍ଗ୍ ହାଚାର୍।

4ଯୋଷେପ୍‌ ଦାଉଦ ରାଜାନି ଲାତ୍ରା ଆଜି ମାଚିଲେ ହେୱାନ୍ ଗାଲିଲୀ ଜିଲ୍ଲାନି ନାଜରିତ ସହର୍‌ତାଙ୍ଗ୍ ଯିହୁଦା ଦେସ୍ତି ବେତଲିହିମ୍ ସହର୍‌ତାକେ ହାଚାର୍। ବେତଲିହିମ୍ ସହର୍‌ତାକେ ଦାଉଦ ରାଜା ଜନମ୍ ଆଜି ମାଚାନ୍। 5ଯୋଷେପ୍‌ ମାଲାକିତି ଡକ୍ରୁହି ମରିୟମ ହୁଦାଙ୍ଗ୍ ତର୍‌ ଲେକାଇ କିଦେଙ୍ଗ୍ ହାଚାର୍। ମରିୟମ ହେପାଦ୍ନା ଗାଗାଡ଼୍‌ତ ମାଚାତ୍।

6-7ହେୱାର୍ ବେତଲିହିମ୍ ସହର୍‌ତାକେ ମାଞ୍ଜେଙ୍ଗ୍ ଲର୍ଜ ପା ଗାଟାଆୱାତାତ୍। ଲାଗିଙ୍ଗ୍ ହେୱାର୍ ର କଡିହାଡ଼ାତାକେ ହାଲ୍‌ଜି ମାଚାର୍। ଯୋଷେପ୍‌ ଆରେ ମରିୟମ ହିମ୍‌ଣା ଜନମ୍‍କିନି ସମୟ୍ ୱାତାତ୍। ଆରେ ତା ପାର୍ତୁମ୍ ହିମ୍‌ଣାତିଙ୍ଗ୍ ଜନମ୍ କିତାତ୍। ମରିୟମ ହେ ହିମ୍‌ଣାତିଙ୍ଗ୍ ର ହେନ୍ଦ୍ରାତାକେ ହୁର୍‌ପିସ୍ କଡିକାଙ୍ଗ୍ ହିନି କୁଣ୍ଡିତାକେ ଇଡ଼୍‌ତାତ୍‌।

ସରଗ୍‌ଦୁତ୍ ମେଣ୍ଢାଗଡ଼ିଆରିଙ୍ଗ୍ ଯୀଶୁ ଜନମ୍ ଆତି କାତା ୱେଚ୍‌ଚାନ୍

8ହେନାଞ୍ଜ୍ ମିକାଲିଙ୍ଗ୍ ବେତଲିହିମ୍ ସହର୍‌ନି ପାଡ଼୍‌ହା-ପାଡ଼୍‌ହି କେତ୍‌ଜାଣ୍ ମେଣ୍ଢା ଗଡ଼ିୟାର୍ ହେୱାର୍ ମେଣ୍ଢାକାଙ୍ଗ୍ ହାର୍‌ତାନାଣା ହାକ୍‌ଡ଼ିତ କାସି ମାଚାର୍। 9ମାପୃତି ରକାନ୍ ଦୁତ୍ ହେଦାପ୍ରେ ମେଣ୍ଢା ଗଡ଼ିୟାର୍ ମୁମ୍‌ଦ ଚଞ୍ଜିଆତାନ୍। ମାପୃ ଗୌରବ ହେୱାରିଙ୍ଗ୍ ଚାରିବେଣ୍‌ତାଙ୍ଗ୍ ଗୌରବ ଆତାତ୍।

10ମେଣ୍ଢା ଗଡ଼ିୟାର୍ ଆଦିକ୍ ପାଣ୍ଡ୍ରା ଆତାର୍। ସରଗ୍‌ଦୁତ୍ ହେୱାରିଙ୍ଗ୍ ୱେଚ୍‌ଚାତ୍, “ପାଣ୍ଡ୍ରା ଆମାଟ୍, ଇନେସ୍‌କି ଆନେଙ୍ଗ୍ ମି କାଜିଙ୍ଗ୍ ଆଦିକ୍ ହାର୍ଦିକାବୁର୍ ୱେଚ୍‌ଚେଦେଙ୍ଗ୍ ୱାତାଙ୍ଗ୍‌ନା। ହେଦାଙ୍ଗ୍‌ୱିଜୁ ମାନାୟାର୍ କାଜିଙ୍ଗ୍ ୱାରିନି ବିଷୟ ଆନାତ୍‌। 11ନେଞ୍ଜେଙ୍ଗ୍ ଦାଉଦ ରାଜା ବେତଲିହିମ୍ ସହର୍‌ତାକେ ମି କାଜିଙ୍ଗ୍ ଉଦାର୍ କିଦ୍‌ନାକାନ୍ ଜନମ୍ ଆତାନ୍‌ନା ହେୱାନ୍ ଆନାନା ଖ୍ରୀଷ୍ଟ ମାପୃ। 12ଏପେଙ୍ଗ୍ ହେୱାନିଙ୍ଗ୍ ଇ ଚିନା ହୁଡ଼୍‌ଜି ପୁନାଦେର୍, ଏପେଙ୍ଗ୍ ର ହିମ୍‌ଣାତିଙ୍ଗ୍ ହେନ୍ଦ୍ରାତ ହୁର୍‌ପି ଆଜି କଡିକାଙ୍ଗ୍ ହିନି କୁଣ୍ଡିତାକେ ହୁନ୍‌ଞ୍ଚାକା ହୁଡ଼୍‌ନାଦେର୍।”

13ହେପାଦ୍ନା ସରଗ୍‌ତାଙ୍ଗ୍ ବେସିହେନି ଦୁତ୍‌କୁ ୱାଜି ହେ ସରଗ୍‌ଦୁତ୍ ଲାହାଙ୍ଗ୍ ମେହା ଆତିକ୍। ଆରେ ହେୱାର୍ ଈଶ୍ୱରତିଙ୍ଗ୍ ଜୟ୍-ଜୟକିଜି ୱେଚ୍‌ଚିକ୍,

14“ସରଗ୍‌ତାକେ ମାନି ଈଶ୍ୱରତିଙ୍ଗ୍ ଜୟ୍-ଜୟ୍‌ ଆୟେତ୍, ଆରେ ଇ ପୁର୍ତିତାକେ ଇମ୍‌ଣି ମାନାୟାରିଙ୍ଗ୍ ଈଶ୍ୱର ଦୟା କିନାନ୍ ହେୱାରିଙ୍ଗ୍ ଶାନ୍ତି ଆୟେତ୍।”

15ସରଗ୍‌ଦୁତ୍‌କୁ ମେଣ୍ଢାଗଡ଼ିଆରିଙ୍ଗ୍ ପିସ୍ତି ସରଗ୍‌ତାକେ ହାଚିକ୍। ତାପାଚେ ମେଣ୍ଡାଗଡ଼ିଆର୍ ଜାର୍-ଜାର୍ ୱେଚ୍‌ପା ୱେଚ୍‌ପି ଆତାର୍, “ୱାଡ, ଆସେଙ୍ଗ୍ ବେତଲିହିମ୍ ସହର୍‌ତାକେ ହାନାସ୍, ମାପୃ ମାଙ୍ଗେଙ୍ଗ୍ ଇମ୍‌ଣି ବିଷୟ ଶୁଣାୟ୍ କିତ୍‌ତାନ୍‌ନା ହେଦାଙ୍ଗ୍ ଆସେଙ୍ଗ୍ ହୁଡ଼୍‌ନାସ୍।” 16ଲାଗିଙ୍ଗ୍ ହେୱାର୍ ବେଗି-ବେଗି ହାଚାର୍ ଆରେ ମରିୟମ ଆରେ ଯୋଷେପ୍‌ତିଙ୍ଗ୍ ଆରେ ହେ ହିମ୍‌ଣା ର କଡିହାଡ଼ାନି କୁଣ୍ଡିତାକେ ମାଗ୍‌ଜି ମାଚାକା ହୁଡ଼୍‌ତାର୍।

17ମେଣ୍ଡାଗଡ଼ିଆର୍ ହିମ୍‌ଣାତିଙ୍ଗ୍ ହୁଡ଼୍‌ତି ପାଚେ। ଇ ହିମ୍‌ଣା ବିଷୟରେ ସରଗ୍‌ଦୁତ୍‌କୁ ଇନାକା ୱେଚ୍‌ଚି ମାଚିକ୍, ହେଦାଙ୍ଗ୍ ହେୱାର୍ ମାନାୟାରିଙ୍ଗ୍ ୱେଚ୍‌ଚାର୍। 18ଇମ୍‌ଣି ମାନାୟାର୍ ମେଣ୍ଡାଗଡ଼ିଆର୍ କାତା ୱେନ୍‌ଞ୍ଜି ହେୱାର୍ କାବା ଆତାର୍। 19ମାତର୍ ମରିୟମ ଇୱିଜୁ କାତା ଜାର୍ ମାନ୍ ବିତ୍ରେ ଇଡ଼୍‌ଜି ଗରବ୍‌ତାକେ ଚିନ୍ତା କିଦେଙ୍ଗ୍ ଲାଗାଲାତ୍‌। 20ମେଣ୍ଡାଗଡ଼ିଆର୍ ଜାର୍ ମେଣ୍ଢାଙ୍ଗ୍ ଲାଗାୟ୍ ଲେଉଟା ଆଜି ହାଚାର୍। ଆରେ ସରଗ୍ ଦୁତ୍‌କୁତାଙ୍ଗ୍ ଇନାକା ୱିଜୁ ୱେନ୍‌ଞ୍ଜି ମାଚାର୍, ଆରେ ହୁଡ଼୍‌ଜି ମାଚାର୍, ହେଦାଙ୍ଗ୍ କାଜିଙ୍ଗ୍ ଈଶ୍ୱରତିଙ୍ଗ୍ ଜୟ୍-ଜୟ୍ କିତାର୍।

ଶିମିୟନ୍ ଆରେ ହାନ୍ନା ହିମ୍‌ଣା ଯୀଶୁଙ୍ଗ୍ ଜୟ୍-ଜୟ୍ କିତାର୍

21ହିମ୍‌ଣା ଆଟ୍‌ଦିନ୍ ଆତିଲେ ହେ ହିମ୍‌ଣାତିଙ୍ଗ୍ ଯିହୁଦି ଦରମ୍‌ନି ସୁନତ ବିଦିତାଙ୍ଗ୍ ସୁନତ କିତାର୍। ଆରେ ତା ତର୍‌ ଯୀଶୁ ହିତାର୍। ହେ ହିମ୍‌ଣା ପଟବତ୍ରେ ମାନ୍‌ୱାଦାଙ୍ଗ୍ ନେ ସରଗ୍‌ଦୁତ୍ ହେୱାନିଙ୍ଗ୍ ଇ ତର୍‌ ହିଦେଙ୍ଗ୍ ୱେଚ୍‌ଚି ମାଚାତ୍।

22ମୋଶା ଲେକିକିତି ନିୟମ୍‌ନି ସାସ୍ତର୍‌ନି ନିୟମ୍‌ତାଙ୍ଗ୍ ଶୁଚି ଆନି ସମୟ୍ ୱିସ୍ତି ପାଚେ, ଯୋଷେପ୍‌ ଆରେ ମରିୟମ ଯୀଶୁଙ୍ଗ୍ ଈଶ୍ୱର ଲାଗାୟ୍ ହିଦେଙ୍ଗ୍ ଯିରୁଶାଲାମ ମନ୍ଦିର୍‌ତାକେ ତାହିୱାତାର୍। 23ଈଶ୍ୱର ତା ନିୟମ୍ ସାସ୍ତର୍‌ତାକେ ଆଦେସ୍ ହିଜିମାଚାନ୍, “ପରିବାର୍‌ନି ପାର୍ତୁମ୍ ହିମ୍‌ଣା ଜନମ୍ ଆତିସ୍ ହେୱାନିଙ୍ଗ୍ ଈଶ୍ୱର ତର୍‍ଦାଙ୍ଗ୍ ହିଦେଙ୍ଗ୍ ଆନାତ୍।” 24ଆରେ ଈଶ୍ୱର ନିୟମ୍ ସାସ୍ତର୍ ଅନ୍‌ସାରେ ହେୱାର୍ ରିଣ୍ଡାଙ୍ଗ୍ ପାଣ୍ଡ୍‌କା ଆରେ ପାର୍‌ୱା ପୁଜା କିଦେଙ୍ଗ୍ ପା ହାଚାର୍।

25ଯିରୁଶାଲାମ ସହର୍‌ତାକେ ଶିମିୟନ୍ ତର୍‍ଦାକାନ୍ ରକାନ୍ ମାଚାନ୍। ହେୱାନ୍ ବେସି ଦରମ୍ ଆରେ ଈଶ୍ୱରତିଙ୍ଗ୍ ହେବାକିନାକାନ୍ ମାଚାନ୍। ଇସ୍ରାଏଲ ଜାତିନି ମାନାୟାରିଙ୍ଗ୍ ଶାନ୍ତି କିଦେଙ୍ଗ୍ ଇମ୍‌ଣି ରକ୍ଷାକିଦ୍ନାକାନ୍‌ ୱାନାକା ମାଚାତ୍, ହେୱାନିଙ୍ଗ୍ ହୁଡ଼୍‌ଦେଙ୍ଗ୍ ଇଚାକିଜି ମାଚାର୍। ଆରେ ପବିତ୍ର ଆତ୍ମା ତା ହୁଦାଙ୍ଗ୍ ମାଚାତ୍। 26ପବିତ୍ର ଆତ୍ମା ହେୱାନିଙ୍ଗ୍ ୱେଚ୍‌ଚି ମାଚାତ୍, “ଖ୍ରୀଷ୍ଟଙ୍ଗ୍ ହୁଡ଼୍‌ୱି ପାତେକ୍ ଏନେଙ୍ଗ୍ ହାଃଉଇ।”

27ପବିତ୍ର ଆତ୍ମା ଶିମିୟନ୍‌ତିଙ୍ଗ୍ ଈଶ୍ୱର ମାନି ମନ୍ଦିର୍‌ ପିଣ୍ଡାତାକେ କୁକ୍‌ଚି ଅତାତ୍‌। ଈଶ୍ୱର ଆଦେସ୍‌ନି ନିୟମ୍‌ତାଙ୍ଗ୍ ପୁଜା କିଦେଙ୍ଗ୍ ଯୋଷେପ ଆରେ ମରିୟମ ତା ହିମ୍‌ଣା ଯୀଶୁଙ୍ଗ୍ ଆସ୍ତି ହେବେ ଏକାତାର୍। 28ଶିମିୟନ୍ ହିମ୍‌ଣା ଯୀଶୁଙ୍ଗ୍ ହୁଡ଼୍‌ଜି ଡ୍ରକ୍‍ଚି ଆସ୍ତି ଈଶ୍ୱରତିଙ୍ଗ୍ ଜୟ୍-ଜୟ୍ କିଜି ୱେଚ୍‌ଚାନ୍,

29“ମାପୃ! ଏନେଙ୍ଗ୍ ଇମ୍‌ଣି ଆଦେସ୍ ନାଙ୍ଗେଙ୍ଗ୍ ହିଜି ମାଞ୍ଚାଇ ହେଦାଙ୍ଗ୍ ପୁରା କିତାଇ। ନଙ୍ଗୟ୍ ଆନେଙ୍ଗ୍ ଶାନ୍ତିରେ ହାଃଦେଙ୍ଗ୍ ଆଡ୍‌ନାଙ୍ଗ୍।

30ଏନେଙ୍ଗ୍ ଇମ୍‌ଣି ଉଦାର୍ କିଦ୍‌ନାକାନିଙ୍ଗ୍ ଚଚ୍‌ଚାତାଇ ହେୱାନିଙ୍ଗ୍ ଆନେଙ୍ଗ୍ ନା କାଣ୍‍କୁକାଙ୍ଗ୍ ହୁଡ଼୍‌ତାଙ୍ଗ୍।

31ଏନେଙ୍ଗ୍ ଇମ୍‌ଣି ଖ୍ରୀଷ୍ଟଙ୍ଗ୍ ରସ୍ତାଇନା ହେୱାନିଙ୍ଗ୍ ୱିଜୁଜାତି ନିକାର୍ ହୁଡ଼୍‌ନାର୍।

32ହେୱାନ୍ ବିନ୍‌ଜାତିନି ମାନାୟାରିଙ୍ଗ୍ ହେୱାନ୍ ର ଅଜଡ଼୍‌ଲେକେ ଈଶ୍ୱରତିଙ୍ଗ୍ ପୁନିକିନାନ୍। ଆରେ ତା ଜାର୍ ଇସ୍ରାଏଲ ଜାତିନି ମାନାୟାରିଙ୍ଗ୍ ସନ୍‌ମାନ୍ କିୟିକିତାନ୍‌।”

33ଯୀଶୁ ତେହି ଲାତ୍ରାହି ତା ବିଷୟରେ ଶିମିୟନ୍ ୱେଇଦାଙ୍ଗ୍ ଇବେଣ୍ ୱେନ୍‌ଞ୍ଜି ଚାନିଆଆତାର୍। 34ତାପାଚେ ଶିମିୟନ୍ ହେୱାରିଙ୍ଗ୍ ଆଶ୍ରିବାଦ୍ କିତାନ୍ ଆରେ ଯୀଶୁ ତେହି ମରିୟମତିଙ୍ଗ୍ ୱେଚ୍‌ଚାନ୍, “ଇ ହିମ୍‌ଣା କାଜିଙ୍ଗ୍ କେତେକ୍ ଇସ୍ରାଏଲନି ମାନାୟାର୍ ରକ୍ଷା ପାୟାଆନାର୍‌ ଆରେ କେତେକ୍ ହେନି ଦଣ୍ଡ୍ ପାୟାଆନାର୍‌। ଇୱାନ୍ ଈଶ୍ୱର ପକ୍ତିତି ର ଚିନା ଲେକେ, ମାତର୍ ମାନାୟାର୍ ହେୱାନିଙ୍ଗ୍ ଆହୁର୍। 35ହେଲେକେ ମାନାୟାର୍ ଇମ୍‌ଣି କାତାତିଙ୍ଗ୍ ମାନ୍ତ ବାବିକିଜି ମାନ୍‌ଗାନାର୍ ହେଦାଙ୍ଗ୍‌ତିଙ୍ଗ୍ ମାନାୟାରିଙ୍ଗ୍ ୱେଚ୍‌ନାର୍। କାଣ୍ଡା କୁନ୍ଦ୍‌ତିସ୍ ଇନେସ୍ ନନାତ୍ ହେଲେକେ ଦୁକ୍ ଏପେଙ୍ଗ୍ ପା ପାୟାଆନାଦେର୍।”

36ହେପାଦ୍ନା ହାନ୍ନା ତର୍‍ଦାକା ଭବିଷ୍ଯତବକ୍ତା କଗ୍‌ଲେ ରଞ୍ଜେଲ୍ ମାଚାତ୍। ହେଦେଲ୍ ଆଶେର୍ ଲାତ୍ରାନି ପିନୁଏଲ୍‌ ଗାଡ଼୍‍ହି ମାଚାତ୍। ହେଦେଲ୍ ବେସି ବୁଡି ଆଜି ମାଚାତ୍। ବିବାଆଜି ସାତ୍‌ବାର୍‌ହୁ ନେ ତା ଡକ୍ରାହି ହୁଦାଙ୍ଗ୍ ମାଚାତ୍। ଆରେ ବାକି ବାର୍ହୁ ରାଣ୍ଡି ଆଜି ମାଚାତ୍, ଆରେ ଅସେ ଚାରି ବାର୍ହୁ ଆତିଲେ ହେଦେଲ୍ ହାଃତାତ୍। 37ହେଦେଲ୍ ୱିଜୁଦିନ୍ ଈଶ୍ୱର ମାନି ମନ୍ଦିର୍‌ତାକେ ପୁଜାକିଜି ମାନାକା। ଆରେ ହେଦେଲ୍ ୱେଡ଼ା ନାଣା ତିନ୍‌ୱାଦାଙ୍ଗ୍ କି ଉଣ୍‌ୱାଦାଙ୍ଗ୍ ଈଶ୍ୱରତିଙ୍ଗ୍ ହେବାକିଜି ପାର୍ତାନା କିଜି ମାଚାତ୍। 38ଶିମିୟନ୍ ଯୀଶୁ ବଷୟରେ ୱେଚ୍‌ଚି ପାଚେ ହାନ୍ନା ଯୋଷେପ ଆରେ ମରିୟମ ଲାଗାୟ୍ ଏକାତାତ୍। ହେଦେଲ୍ ପା ହେ ହିମ୍‌ଣାତିଙ୍ଗ୍ ହୁଡ଼୍‌ଜି ଈଶ୍ୱରତିଙ୍ଗ୍ ଜୟ୍-ଜୟ୍ କିତାତ୍। ଇମ୍‌ଣାକାର୍ ଇସ୍ରାଏଲ ଜାତିରିଙ୍ଗ୍ ଈଶ୍ୱର ରକ୍ଷା କିଦ୍‌ନାନ୍ ଇଞ୍ଜି ଆହାକିଜି କାସି ମାଚାର୍, ହେୱାରିଙ୍ଗ୍ ହାନ୍ନା ହେ ହିମ୍‌ଣା ଯୀଶୁ ବିଷୟରେ ୱେଚ୍‌ଚାତ୍।

ନାଜରିତ ସହର୍‌ତାକେ ଯୀଶୁ ତେହି ତାଞ୍ଜ୍‌ବା ଲେଉଟା ଆଜି ହାଚାର୍

39ଯୋଷେପ ଆରେ ମରିୟମ ଈଶ୍ୱର ତା ନିୟମ୍ ସାସ୍ତର୍‌ତାକେ ଆଦେସ୍ ହିଜିମାନ୍‌ଞ୍ଚାନ୍ ହେଲେକେ ତା ରିତିବିଦି ୱିସ୍ତାର୍। ଆରେ ହେୱାର୍ ଜାର୍ ଗାଲିଲୀ ଜିଲ୍ଲାନି ନାଜରିତ ସହର୍‌ତାକେ ହାଚାର୍।

40ଆରେ ହିମ୍‌ଣା ଯୀଶୁ ଦିରେ-ଦିରେ ଗାଜା ଆତାନ୍। ଆରେ ବୁଦି ପା ହେଲେକେନେ ଦିରେ-ଦିରେ ବାଡାଆତାତ୍‌, ଆରେ ଈଶ୍ୱର ଆଶ୍ରିବାଦ୍ ତା ଜପି ମାଚାତ୍।

ହିମ୍‌ଣା ଯୀଶୁ ପଣ୍ଡିତାର୍ ହୁଦାଙ୍ଗ୍ କାତାବାର୍ତା ଆନି ବିଷୟ

41ନିସ୍ତାର୍ ପାର୍ବୁ ମାନି କିଦେଙ୍ଗ୍ ଯୀଶୁ ତେହି ଲାତ୍ରାହିର୍ ୱିଜୁବାର୍‌ହୁ ଯିରୁଶାଲାମ ସହର୍‌ତାକେ ହାଲ୍‌ଜି ମାଚାର୍। 42ଯୀଶୁଙ୍ଗ୍ ବାର ବାର୍ହୁ ଆତିହିଙ୍ଗ୍ ୱିଜୁବାର୍ହୁ ହାନିଲେକେ ହେୱାର୍ ପାର୍ବୁଚିଞ୍ଜେଙ୍ଗ୍ ହାଚାର୍। 43ପାର୍ବୁ ୱିସ୍ତି ପାଚେ ହେୱାର୍ ଇଞ୍ଜ ୱାଜିମାଚାର୍। ମାତର୍ ହିମ୍‌ଣା ଯୀଶୁ ଯିରୁଶାଲାମ ସହର୍‌ତାକେ ଟେବା ଆତାନ୍। ତା ତେହି ଲାତ୍ରାହିର୍ ପୁନ୍‌ୱାଦାଙ୍ଗ୍ ମାଚାର୍। 44ଆସେଙ୍ଗ୍ ହାନି ଗଉଲି ବିତ୍ରେ ହିମ୍‌ଣା ଯୀଶୁ ମାନାନ୍ ଇଞ୍ଜି ବାବିକିଜି ଯୋଷେପ୍‌ ଆରେ ମରିୟମ ପୁରା ୱେଡ଼ାବୁଡିନି ହାଜ୍‌ଦିଙ୍ଗ୍ ହାଲ୍‌ଜି ମାଚାର୍। ତାପାଚେ ହେୱାର୍ ଜାର୍ ପରିବାର୍ ମାନାୟ୍ ଆରେ ତା ଲକ୍‌ବାକ୍‌ତାକେ ୱେନ୍‌ବାତାର୍।

45ହେଦାଙ୍ଗ୍ କାଜିଙ୍ଗ୍ ଯୀଶୁ ତେହି ଲାତ୍ରାହି ଯୀଶୁଙ୍ଗ୍ ଡେକ୍‌ଚି-ଡେକ୍‌ଚି ଯିରୁଶାଲାମ ସହର୍‌ତାକେ ଲେଉଟା ଆଜି ୱାତାର୍। 46ଆରେ ତିନ୍‌ଦିନ୍ ପାଚେ ଯୀଶୁଙ୍ଗ୍ ଈଶ୍ୱର ମାନି ମନ୍ଦିର୍‌ ହାକ୍‌ଡ଼ିତ ଗାଟାଆତାର୍। ହେପାଦ୍ନା ହେୱାନ୍ ଯିହୁଦିର୍ ପଣ୍ଡିତାର୍ କାତା ୱେନ୍‌ଞ୍ଜି କୁଚ୍‌ଚି ମାଚାନ୍ ଆରେ ହେୱାରିଙ୍ଗ୍ ପ୍ରଶ୍ନ ୱେନ୍‌ବିସ୍ ମାଚାନ୍। 47ଏଚେଜାଣ୍ ତା ବୁଦିତାଙ୍ଗ୍ ଉତର୍ ହିନି କାତା ୱେନ୍‌ଞ୍ଜି ମାଚାର୍ ହେୱାର୍ ୱିଜାକାର୍ ଚାନିଆ ଆଜି ମାଚାର୍।

48ଯୀଶୁଙ୍ଗ୍ ତା ତେହି ଲାତ୍ରାହିର୍ ହେୱାନିଙ୍ଗ୍ ହୁଡ଼୍‌ଜି କାବାଆଜି ହାଚାର୍। ତା ତେହି ହେୱାନିଙ୍ଗ୍ ୱେନ୍‌ବାତାତ୍, “ଏବପା! ଏନେଙ୍ଗ୍ ମା ହୁଦାଙ୍ଗ୍ ଇଲେକେ ଇନେକିଦେଙ୍ଗ୍ କିତାଇ? ମିଞ୍ଜ୍‌ବା ଆରେ ଆନେଙ୍ଗ୍ ନିଙ୍ଗେଙ୍ଗ୍ ଡେକ୍‌ଚି-ଡେକ୍‌ଚି ବେସି ଚିନ୍ତା ଆତାପେ।” 49ଇଦାଙ୍ଗ୍ ୱେନ୍‌ଞ୍ଜି ଯୀଶୁ ତା ତେହି ଲାତ୍ରାହିଙ୍ଗ୍ ୱେଚ୍‌ଚାନ୍, “ଏପେଙ୍ଗ୍ ନାଙ୍ଗେଙ୍ଗ୍ ଇନା କିଦେଙ୍ଗ୍ ଡେକ୍‌ଚି ମାନ୍‌ଞ୍ଚାଦେର୍? ଇମେତାକେ ନା ଆବା ଈଶ୍ୱର ଇଲ୍ ବିତ୍ରେ ମାନି ଦର୍‌କାର୍ ମାନାତ୍, ଆନେଙ୍ଗ୍ ହେବେ ମାନାଙ୍ଗ୍ ଇଞ୍ଜି ଏପେଙ୍ଗ୍ ଇନାକା ପୁନ୍‌ୱାଦାଙ୍ଗ୍ ମାଚାଦେର୍?”

50ମାତର୍ ଯୀଶୁ ୱେଚ୍‌ଚି ବେଣ୍‌ତିଙ୍ଗ୍ ହେୱାର୍ ଅଲପ୍‌ପା ବୁଜାଆୱାଦାଙ୍ଗ୍ ମାଚାର୍।

51ଯୀଶୁ ହେୱାର୍ ହୁଦାଙ୍ଗ୍ ନାଜରିତ ସହର୍‌ତାକେ ହାଚାନ୍। ହେୱାନ୍ ତା ତେହି ଲାତ୍ରାହି ୱିଜୁ କାତା ମାନିକିଜି ମାଚାନ୍। ଯୀଶୁ ତେହି ଇୱିଜୁ କାତାତିଙ୍ଗ୍ ତା ମାନ୍ତ ଇଡ଼୍‌ଜି ମାଚାତ୍।

52ଆରେ ଯୀଶୁ ଦିରେ-ଦିରେ ଗାଜା ଆତାନ୍ ଆରେ ବୁଦି ପା ହେଲେକେନେ ବାଡାଆତାତ୍‌। ଆରେ ଈଶ୍ୱର ଆରେ ମାନାୟାର୍ ଦୟାତାଙ୍ଗ୍ ଗାଜା ଆତାନ୍।

നിലവിൽ തിരഞ്ഞെടുത്തിരിക്കുന്നു:

ଲୁକ 2: PEGNT

ഹൈലൈറ്റ് ചെയ്യുക

പങ്ക് വെക്കു

പകർത്തുക