Wepélisiananu 8
8
Lɛɛ blɛɛn nyaa
1Noé sele dɔ Kazambale gi. Bwigiwinu valé flawinu lé wo ke ’yitagoro gi a va, wo sele dɔ Kazambale gi. Kazambale fu gié tɛrɛ la, yé ’yinu dɔ flee. 2’Yiwuonu valé lagi gɔɔnnu lɛ tan yé lɛɛ kini. 3Yi yɔ sɔrafié wɔlɛ vuzan nya yé wo tabole pélisia, yé ’yi vo sina tɛrɛ la, ’té woo goo baa. 4Moné sɔrafiézan, moné yi vu ta sɔrafiézan nya, ’yitagoro dɔ Ararat gɔ nwiin. 5’Yinu ta go bole nya fɔɔ moné vu. Moné vuzan yi vininzan nya, yé gɔ nwiinnu bɔra.
6Yi yɔ fiézan nya, fɛnɛti lé Noé a pa ’yitagoro ma, é a lɛ so. 7É daan kanwéi ma, yé ’bɛ bɔra, ’té ’bɛ éé goo, ’té ’bɛ éé dan, fɔɔ ’yinu béli tɛrɛ la, a zo. 8’Bɛ zuo Noé daan plawuo ma, a gi dɔɔle we gi léé, dé ’yinu tabo tɛrɛ laa? 9’Yi a tɛrɛ la fɛfaana, bɛwemalé plawuo ’ka é gane zunna ye lɛ fɛ do kpen na lo, yé é da Noé va ’yitagoro gi é ziin. Noé é bɛ soi, é a kun, yé é a wɔra é va ’yitagoro gi. 10É yi sɔrafié lɛbɛn é ziin yé é plawuo bɔra ’yitagoro gi é ziin. 11Plawuo da a va é ziin é nyanadi, ’té ɔliviyili laa do a é pale a lɔ ma. Amalé Noé a gi dɔɔ léé, ’yi a bélina tɛrɛ la. 12É yi sɔrafié lɛbɛn é ziin, yé é plawuo bɔra ’yitagoro gi, yé ’bɛ ’ka da lɛ a va é dɛrɛ lo.
13Lɛɛ wuru yaa é ta lé lɛɛ dozan nya, moné vininzan lé yi vininzan nya, ’yinu béli tɛrɛ la. Noé ’yitagoro lɛ ta so, é a nagini, yé é tɛrɛ ta ye é gale. 14Moné fiézan lé yi yɔ do wɔlɛ sɔrafiézan nya, tɛrɛ boen ga.
15Yé Kazambale we fe Noé lɛ, yé é léé: 16Bii koo, i na koo, i benu koo, i benu nanu koo, ’ka si ’yitagoro gi. 17Winu lé ke i va, ’i wo faa bɔra. Mianénu koo, flawinu koo, winu lé woo tawoo ’wo plɛ la tɛrɛ la koo, woo faa lé. ’Wo nwɛɛn tɛrɛ la ma. ’Wo né yaa ma, yé ’wo fan tɛrɛ la ma. 18Noé koo, a benu koo, a na koo, a benu nanu koo, wo si ’yitagoro gi. 19Winu faa koo, tawoplɛlawinu faa koo, mianénu faa koo, fɛ faa lé woo kɔɔan tɛrɛ la koo, wo si ’yitagoro gi wo gɔnɔ ma gɔnɔ ma.
20Noé bale banna do dɔ. É wi kenu si wi zinzinnu faa va, yé é miané kenu si miané zinzinnu faa va, yé é wo kyɛ ble Bale zé nya, balebanna ta. 21Gakelebale fɛ gin néné si, yé Gakelebale lé é bli gi léé: Dé munu bɔn‐in bɔrɔle naané pélisia wo kénéné la bléyi vaoo, maa ’ka dan bale pa lɛ tɛrɛ ma munu lé we ma é dɛrɛ lo. Fɛnu faa lé ke é yuɛma, maa ’ka dan wo bla lɛ é dɛrɛ, bélé maa kɛlɛ fɛan zo ’ko, a zo lo. 22Fɛvɔbléyi valé fɛgyɛbléyi koo, dunu valé kyɛyee bléyi koo, fɛna ga bléyi valé lɛɛ da bléyi koo, yiéyi valé béli koo, dé tɛrɛ mɔn kaaoo, ’té wo ana, wo glɛ ’ka dɔa lo.
നിലവിൽ തിരഞ്ഞെടുത്തിരിക്കുന്നു:
Wepélisiananu 8: GOURU
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Alliance Biblique de Cote d'Ivoire 1979
