Wepélisiananu 26
26
Izak valé Filisitinu lé we
(WP 12:10–20; 20:1–18)
1Lɔrɔ dɔ ana tɛrɛ la Izak bléyi va. Lɔrɔ vinin lé é dɔ Abraam bléyi va, ’bɛ kaan lo; yé Izak go Filisitinu nwiinzan Abimélɛk va, Géraa. 2Gakelebale bɔra Izak va yé é léé: Té i zun Éjipiti tɛrɛ la lo; ’i nyana tɛrɛ lé maa dan a fe lɛ i lɛ, a ta. 3’I vo tɛrɛ ’ko la ’ko; maa dan kɛlɛ lɛ i va yé maa dan i drɔɔ vo lɛ, naa, maa dan tɛrɛ ’konu faa nɔ lɛ bii valé i kulu lɛ, yé gipawe lé maa a kɛlɛ i ti Abraam va, maa dan dɔ lɛ a ta. 4Maa dan i kulu kɛlɛ lɛ di bélé lagi monénénu zo; maa dan tɛrɛ ’konu faa nɔ lɛ i kulunu lɛ; yé tɛrɛ la bɛnnu faa drɔɔ é dan vo lɛ i kulu lé we ma; 5Abraam an dére lɛdɔma, yé é tawo an dére ta, yé é anlé bélidɔwe sɔnnénu pa, yé é anlé gɔnɔlawenu kɛlɛ, yé é tawo anlé bélidɔwenu ta, azama. 6Yé Izak vo Géraa.
7Ana munu Izak na lé we laa aan wo é lee, é léé: An buru lé. Rébéka yara a é nɔnɔmi, amalé Izak kana a fele ma léé, ’é na lé, dé ana munu é da ’é gyɛ Rébéka we ma. 8Izak mɔn tɛrɛ ’ko la. Yi do nya Filisitinu nwiinzan Abimélɛk a nagini fɛnɛti ta yé é Izak ye blɛn glewona é na Rébéka va. 9Abimélɛk mi pa zia Izak laana yé é léé: I na lé, webozen nya. Mɛmalé i léé, ’é buru léé? Izak lé a lɛ léé: An kana, dé an da ga le ’ko we ma, amalé maa fe. 10Abimélɛk léé: Mɛ lé bé kɛlɛ ko lɛ ’koo? Dé é kɛlɛ kɔɔn léé, ko va mi do yia i na va ’té i we dɔ ko nwiin. 11Abimélɛk dére fe munu faa lɛ léé: Mian é bɛ mane gɔné ’ko ma, ɛɛ, dé a na lé, a ma, wo dan ’bɛzan gyɛ lɛ.
Izak valé Abimélɛk lé we
(WP 21:22–34; Mt 5:5)
12Izak féi pa ana tɛrɛ la. Gakelebale dɔ a zi, amalé ’bɛ lɛɛ ’ko gi alé féi fɛ dɔ, é gié é glɛ ta gɔnɔ yɔ soru. 13Gɔné ’ko fua ble yé alé fɛ kɛlɛle di gi gyɛ fɔɔ ye é kɛlɛ fuablezan blɛɛn nya. 14Alé trubɛnu a, diri valé ’blanu nya, yé a wuomunu a di. Amalé Filisitinu bli bɔ alé fɛnu ma. 15’Yigurunu faa lé Izak ti lé nyanamapamunu a bo a ti Abraam bléyi va, Filisitinu fɛ zén wo gi yé wo wo fan tɛrɛ nya. 16Abimélɛk lé Izak lɛ léé: Bii a plɛplɛ é mini ko la, bɛwemalé ’i go, ’i si ko va. 17Izak si ana mi, yé é nyana Géraa gɔ worona yé é vo ’bɛna.
18’Yigurunu lé wa bo Izak ti Abraam bléyi va yé Filisitinu wo fan tɛrɛ nya Abraam gale zuo, Izak wo gi si é ziin. Tɔnu lé a ti a pa wo ma é kyɛn, yee tɔnu duo lé é a pa wo ma. 19Izak wuomunu ’yiguru bo é ziin gɔ worona, yé ’yi lé é ’ka bélié lo, wa ye ’bɛna. 20Géraa munu lé trubɛ tabinmunu za vɔ Izak lé trubɛ tabinmunu va yé wo léé: ’Yi ’ko, kozé lé. Wo za vɔ a ta, bɛwemalé é ’yiguru ’ko tɔ pa Ézɛk. 21Alé nyanamapamunu ’yiguru dɛrɛ bɛ bo, yé wo za vɔ ’bɛ ta é ziin yé é a laa Sitina. 22É si ’bɛna yé é ’yiguru do bo é ziin, yé wo ’ka za vɔ lɛ ’bɛ ta é dɛrɛ lo. É a tɔ pa Réobɔt yé é léé: Sin, Gakelebale fɛna nɔ ko lɛ, yé ko dan fua ble lɛ ’bɛ tɛrɛ ’ko la.
23É fwi ’bɛna yé é go Bɛɛ‐Sééba. 24Gakelebale bɔra a va é béli yé é léé: Maa a i ti Abraam zé Bale nya. Té i kana lo ma, maa a i va. Maa dan i drɔɔ vo lɛ, yé maa dan i kulu kɛlɛ lɛ di an wuozan Abraam lé we ma. 25É balebanna do kɛlɛ ana yé é Gakelebale tɔ laa ’bɛna yé élé sɔkɔn dɔ ana. Izak wuomunu ’yiguru do bo ana.
26Abimélɛk koo, a béé Auzat koo, alé sunyanu nwiinzan Pikɔl koo, wo si Géraa yé wo da Izak va. 27Izak lé wo lɛ léé: Mɛwemalé ka dan an vaa? An za a ka gi, yé ka an bin ka va. 28Wo léé: Ko a ye léé, Gakelebale a i va. Bɛwemalé ko léé, kaa bale ’nyɔɔn kaa ke lɛ, yé kaa gi é vo ékeva do. 29’I bale ’nyɔɔn léé, ’é ’ka dan wenyané do kpen kɛlɛ lɛ ko lɛ lo, fɛan zo lé ko ’ka wenyané kɛlɛ lɛ i lɛ lo, yé ko wezin saa kɛlɛ i lɛ, yé ko zi nɔ i lɛ léé, i go drɔɔ bɛ, a zo. Sin, Gakelebale i drɔɔ vo. 30Izak fɛti kɛlɛ wo lɛ yé wo fɛ ble yé wo ’yi mini. 31Wo nwa bladi tutu yé wo dére pa ékema do bale ’nyɔɔnle nya. Izak zi nɔ wo lɛ, yé wo si a va drɔɔ.
32A yi duo nya Izak lé nyanamapamunu da, ’yiguru lé wa bo, alé we fe lɛ a lɛ, yé wo lé a lɛ léé: Ko ’yi ye. 33É a tɔ pa Siiba, bɛwemalé wo ’bɛ fla laama Bɛɛ‐Sééba fɔɔ kyɔ.
34Ézau lɛɛ kɛlɛ aan wo yɔ fié yé é le si; Et mi Bééri lu Judit a do, yé Et mi Élɔn lu Bazmat a do. 35Izak valé Rébéka bli gi kyɛ dɔ lomu ’konu lé we ma.
നിലവിൽ തിരഞ്ഞെടുത്തിരിക്കുന്നു:
Wepélisiananu 26: GOURU
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Alliance Biblique de Cote d'Ivoire 1979
