Wepélisiananu 24
24
Izak le si
1Abraam kɛlɛ é kwa yé a lɛɛ kɛlɛ kiɛre; yé Gakelebale Abraam drɔɔ vo we faa gi.
2Yé Abraam we fe é leezan do lé, é mɔn a va alé kɔn gi é mini é bɔlunu faa ta, ’té alé fɛnu faa bɛ ke é pale a lee bɛ, a lɛ, yé Abraam lé a lɛ léé: Ilé zanté, ’i bɛlaa wɔra an boro wuo; 3Gakelebale lé ke lagi Bale valé tɛrɛ lé Bale nya, bé ’nyɔɔn léé, i ’ka dan le si lɛ an be na nya Kanaan munu lé maa nyanaan wo va ’ko, wo lunu va lo; 4naa, i dan go lɛ anlé tɛrɛ la, an lelenu va, yé i dan le do si lɛ an be Izak na nya wo va ’bɛna. 5A leezan lé a lɛ léé: Dé lezan ’ka a nyi si lɛ léé, ’é dan an zuo tɛrɛ ’ko la lo nii? É a lé an go i be nya, tɛrɛ lé i si a ta bɛ, anaa? 6Abraam lé a lɛ léé: ’I yuɛ pa ibozen va é zima; té i go an be nya ’bɛna lo. 7Gakelebale, lagi Bale lé é an si an ti lé kɔn ’léé, é valé an lelenu va, ’té e we fe an lɛ yé ébo ’nyɔɔn an lɛ léé, ’é dan tɛrɛ ’ko nɔ lɛ an kulu lɛ, yeebozen é dan élé lanje nwunvɔ lɛ i ’lɛ; yé i dan le do si lɛ an be na nya ’bɛna. 8Dé é ’ka sɔ lɛ lezan lɛ léé, ’é da i zuo lo, ilé bale lé bé ’nyɔɔn an lɛ bɛ, ’té i so a gi. Naa, duowo, té i go an be nya ’bɛna lo. 9Abraam leezan é bɛlaa wɔra ézan Abraam boro wuo, yé é bale ’nyɔɔn léé, ’é dan we ’konu faa kɛlɛ lɛ.
10Abraam leezan lé, azan lé fɛnu faa bɛ ke é pale a lee bɛ, é nyɔgɔmé si vu ézan lé nyɔgɔménu va yé é go. É nwa yé é go Mézopotami, Nakɔɔ lé fla. 11É nyɔgɔménu zun wo powuo ta flagini ma, ’yiguru sɔnɔ, é nyanadi, lomu lé ’yitɔbléyi va. 12Yé é léma: Gakelebale, anzan Abraam zé Bale, ilé zanté, we lé an bli bɔ a ma, bé kɛlɛ an lɛ kyɔ ma, yé ’i wezin kɛlɛ anzan Abraam lɛ ma. 13Bé ye, maa a é dɔle ’yiguru sɔnɔ yé fla blɛnnu é dan bɔra lɛ ’yi tɔle we gi. 14Dé maa fe blɛnzan‐an lɛ léé, ilé zanté, ’ilé ’yibɔ tua yé maa ’yi mini, yé é a zi pa léé, ’i ’yi mini yé maa dan ’yi nɔ lɛ é ziin ilé nyɔgɔménu lɛ, ’bɛ blɛnzan ’é kɛlɛ blɛn lé bé si a va i wuozan Izak zé nya, a nya. ’Bɛ nya lé maa dan a gi dɔɔ lɛ léé, i wezin kɛlɛ anzan lɛ.
15É ’ka tan nyaa lɛ wefele nya lo tɔɔn yé Rébéka bɔ a ma élé bɔ nya é bɛapa ta. Abraam bwe Nakɔɔ na Milka be Bétuɛl lu lé. 16É a blɛn nya, é yara nya é nɔnɔmi; gɔné do kpen ’ka tan a dɔɔ lɛ le nya lo. É zun ’yiguru gi yé é ’yi fan bɔ nya, yé é bɔra a gi loru. 17Abraam leezan vlan buru a ’lɛ yé é léé: ’I ’yi nɔ an lɛ, maa mini. 18É bɔ zun tuo, yé é a pa é lee, yé é léé: Anzan, ’i ’yi mini, yé é ’yiminile nɔ a lɛ. 19Yee blɛn nyaa aan wo ’yiminile nɔle nya a lɛ, é léé: ’Maa ilé nyɔgɔménu zé tɔ é ziin, ’wa mini yé wo kan a nya ma. 20Élé bɔ gi ’yi zén winu lé ’yiminifɛ gi é kele yé é go vlan nya ’yiguru gi é ziin yé é ’yi tɔ nyɔgɔménu faa zé nya.
21Gɔnézan vo a naginina gi vurule nya, yé é ’ka we do kpen si lɛ a ta a zi lo; dé Gakelebale alé tawogiwe vɔ a maa? dé é ’ka a vɔ lɛ a ma loo? a yele we ma. 22Nyɔgɔménu nyaa ’yi minile nya aan wo, gɔnézan nyémakyan si, ’té a bɛn a sikla buu nya, yé é bɛmafɛ fié si, ’té ’bɛ bɛn a kyan sikla vu nya, yé é a nɔ blɛnzan lɛ 23yé é léé: De lu lé ke i nyaa? Bé fe an lɛ. An bɔaléé, an yiina ye i ti lé kɔn gii? 24É léé: Maa a Milka valé Nakɔɔ be Bétuɛl lu nya. 25Yé é lé é ziin léé: Lɔɔ valé winu lé fɛblele a ko va di, yé yiina ana é ziin. 26Yé gɔnézan bua, yé é dia é bli la Gakelebale ’lɛ, 27’té é a fé léé: ’Wo Gakelebale drɔɔ vo ma; anzan Abraam lé Bale lé; é ’ka daan é nyanai zénle ma anzan ta lo, ’té é alé we kɛla yarapalale nya. Maabozen, Gakelebale da maa nya anzan bwenu lé kɔn’léé.
28Yé blɛnzan go vlan nya we ’konu zuo fe lɛ ’é bu lɛ kɔn gi.
29Rébéka bwe do ana wa laama Laban. Yé Laban go gɔnézan si lɛ zia vlan nya, ’té é a é dɔle ’yiguru sɔnɔ. 30É nyémakyan ye, yé é bɛmafɛnu ye é zuané bɛ ma, yé we lé a zuané Rébéka a fe léé, ’ko zo lé gɔnézan we fe ’é lɛ bɛ, é a ’ma; amalé é go gɔnézan va, ’té ’bɛ a é dɔle nyɔgɔménu va, ’yiguru sɔnɔ 31yé é léé: Bii lé Gakelebale i drɔɔ vo, ’i da. Mɛmalé i vo béeraa? Maa kɔn ma’lɛrɛ yé maa nyɔgɔménu lé fɛna ma’lɛrɛ. 32Gɔnézan bɔ kɔn ’léé. Laban kɔné si nyɔgɔménu punu yé é lɔɔ valé fɛblele nɔ nyɔgɔménu lɛ, yé é gane ma zuru ’yi nɔ gɔnézan valé é vamunu lɛ. 33’Bɛ zuo é fɛblele nɔ wo lɛ. Naa, gɔnézan léé: Maa ’ka dan fɛ ble lɛ lo, ’té dé an ’ka tan an damawe gi fe lɛ lo. Laban léé: Bé fe.
34Yé é léé: Maa a Abraam leezan nya. 35Gakelebale anzan drɔɔ vo é baba yé é kɛlɛ plɛplɛ. ’Blanu valé dirinu koo, gɔɔlifu valé kyan koo, nyanamapagɔnénu valé nyanamapalomu koo, nyɔgɔménu valé sokofalenu koo, Bale a nɔ anzan lɛ. 36Anzan na Sara négɔné yaa anzan lɛ alé kwa ta né nya; yé é élé fɛ faa nɔ a lɛ. 37Anzan lé an lɛ léé, ’maa bale ’nyɔɔn ’é lɛ léé, Kanaan munu lé éé nyanaan wo va bɛ, té maa wo va le si é be na nya lo, 38naa, ’maa go ’é ti lé kɔn’léé, yé ’maa le do si ’é be na nya ’élé munu va. 39Yé maa lé anzan lɛ léé, dé é ’ka sɔ lɛ lezan lɛ léé, é da an zuo lo nii? 40Yé é lé maa lɛ léé, Gakelebale lé ’é tawo a ’lɛ, é dan ’élé lanje do pa lɛ maa va, yé anlé tawowe é dan vɔ lɛ a ma, yé an le do si ’é be na nya ’é ti lé kɔn gi, ’é ti lé munu va. 41É léé, dé an si élé munu va faa, ’té bale lé maa ’nyɔɔn ’é lɛ bɛ, ’té an so a gi, yé dé ’élé munu ’ka le nɔ lɛ an lɛ lo, ’té bale lé maa a ’nyɔɔn ’é lɛ bɛ, ’té an so a gi. 42An bɔ kyɔ ’yiguru ta yé maa léé: Gakelebale, anzan Abraam zé Bale, dé é sɔ i lɛ léé, anlé tawogiwe ’é vɔ a ma, 43bé ye, maa a é dɔle ’yiguru ’ko sɔnɔ; dé blɛnzan‐an da ’yi tɔ lɛ yé dé maa fe a lɛ léé, ’i ’yi nɔ an lɛ maa mini, dé é a fe léé, 44’i ’yi mini yé ’maa ’yi tɔ é ziin ilé nyɔgɔménu zé nya, ’bɛ blɛnzan ’é kɛlɛ le lé Gakelebale a si a va anzan be na nya, a nya. 45An ’ka tan nyaa lɛ wefele nya an bli gi lo tɔɔn, Rébéka bɔ an ma élé bɔ nya é bɛapa ta; é zun ’yiguru gi yé é ’yi tɔ. Maa lé a lɛ léé, ’é yi nɔ an lɛ, maa mini. 46Élé ’yibɔ si é bɛapa ta tuo yé é léé, ’an ’yi mini yé é dan ’yiminile nɔ lɛ anlé nyɔgɔménu lɛ é ziin. An ’yi mini, yé é ’yiminile nɔ anlé nyɔgɔménu lɛ é zii. 47Maa we laa a lee léé, de lu lé ke i nyaa? É léé, ’é a Nakɔɔ valé Milka be Bétuɛl lu nya. Yé maa kyan vɔ a nyé ma, yé maa kyan vɔ a bɛ ma. 48A zuo maa bua yé an dia an bli la Gakelebale ’lɛ yé maa Gakelebale anzan Abraam zé Bale drɔɔ vo; é da an nya yarapalale nya, anlé anzan bwe lu sile a be na nya we gi. 49Sin, dé é sɔ ka lɛ léé, ka wezin valé we tegele kɛlɛ anzan lɛ, ’ka fe an lɛ, dé é ’ka sɔ lɛ ka lɛ lo, ’ka fe an lɛ yé an nɔla, dé an bɛyilazia léé, dé an bɛbolazia léé, ana.
50Laban valé Bétuɛl léé: We ’ko si Gakelebale va. Dé é a wezin nyaoo, dé é a wenyané nyaoo, ko ’ka bɔa we do kpen fele lɛ a gi lo. 51Bé ye, Rébéka lé é dɔle bɛ, bé si i goan yé ’é kɛlɛ izan be na nya, Gakelebale a fe fɛan zo, a zo. 52Abraam leezan wo dére ’ma aan wo é dia é bli la Gakelebale ’lɛ. 53Gɔɔlifufɛnu koo, kyanfɛnu koo, sɔnu koo, Abraam leezan wo bɔra yé é wo nɔ Rébéka lɛ; é fuafɛnu nɔ é ziin a bwe valé a bu lɛ blan nya. 54’Bɛ zuo yee valé é vamunu fɛ ble yé wo yii. Dé tu kini, wo nwa yé Abraam leezan léé: ’Ka zi nɔ an lɛ ’an go anzan va. 55Blɛnzan bwe valé a bu léé: Blɛnzan ’é vo ko va sɛ é ziin ma, dé yi vu léé? a zuo yé i go. 56É lé wo lɛ léé: Gakelebale anlé tawogiwe vɔ a ma, amalé té ka an mɔn lo ma; ’ka zi nɔ an lɛ yé an go anzan va ma. 57Yé wo léé: Kaa blɛnzan laa, ’wo we laa a lee. 58Wo Rébéka laa yé wo lé a lɛ léé: É sɔ i lɛ léé, i go gɔné ’ko vaa? É léé: ’An go. 59Yé wo zi nɔ ’wo zuané Rébéka valé le lé ’bɛ a pa é kyɛn, wo lɛ, yé wo go Abraam leezan valé é vamunu nya. 60Wo Rébéka drɔɔ vo yé wo lé a lɛ léé: Oo, ko zuané, ’i kɛlɛ mi baa wuru é wuru bu nya, yé ilé nénu é pla ’wo nyanézannu nwiin ma. 61Rébéka valé é wuolomu nwa; wo vɔ nyɔgɔménu punu yé wo go gɔnézan zuo. Yé Abraam leezan Rébéka si yé wo go.
62Izak si Lakai‐roi ’yiguru va yé é nyana tɛrɛ lé ke yirinwana bɛyilazia, ana. 63Yi do é nyanadi Izak go bazoro lɛ féi, yé é yara nwa yé é a nagini yé bé ye, nyɔgɔménu a dana. 64Rébéka é ziin, é yara nwa loru yé é Izak ye, yé é zun élé nyɔgɔmé punu. 65É lé Abraam leezan lɛ léé: Mi lé ke sina féi yé kaa go kee lɛ wo nya bɛ, de léé? Abraam wuozan léé: Anzan lé. Yé Rébéka sɔ bua é wuo ma. 66We faa lé Abraam leezan a kɛlɛ, é a zuo faa fe Izak lɛ. 67Izak go Rébéka nya é bu Sara lé sɔkɔn gi; é Rébéka si é na nya, yé é sɔ a lɛ. ’Bɛ kɛlɛ Izak tɔrɔpaawe nya a bu gale zuo.
നിലവിൽ തിരഞ്ഞെടുത്തിരിക്കുന്നു:
Wepélisiananu 24: GOURU
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Alliance Biblique de Cote d'Ivoire 1979
