Wepélisiananu 17
17
Abram valé Sarai tɔ dɛrɛ ye
(LvS 105:8–11)
1Abram lɛɛ kɛlɛ yɔ ziɛn wɔlɛ vu ta sɔraziɛn aan wo, Gakelebale bɔra Abram va yé é lé a lɛ léé: Maa a Plɛplɛfaazan Bale nya. ’I tawo an yuɛ va yé ’i kɛlɛ mi tegele nya. 2Maa dan an gi pa lɛ do i va, yé maa dan i kɛlɛ lɛ di, fɔɔ ’bɛ glɛ ’ka lo.
3Abram dia é bli la yé Kazambale we fe a lɛ yé é léé: 4An gi lé maa dan a pa lɛ i va do, yee lé ke ’ko: i dan kɛlɛ lɛ bɛngɔnɔ kiɛre ti nya. 5Wo ’ka dan i laa lɛ Abram é dɛrɛ lo, naa, maa dan i kɛlɛ lɛ bɛngɔnɔ kiɛre ti nya, amalé wo dan i tɔ laa lɛ Abraam. 6Maa dan i kɛlɛ lɛ né kiɛre yaazan nya fɔɔ ’bɛ glɛ ’ka lo. I nya lé bɛnnu é dan kɛlɛ lɛ yé minwiinzan blɛnnu é dan si lɛ i gi. 7Maa dan an gi pa lɛ do i va, yé maa dan an gi pa lɛ do ilé nénu lé wo dan kɛlɛ lɛ i zuo, wo va, wo kulu é kulu nya; ko gipawe ’ka dan sɛrɛ lɛ monomono lo, amalé an dan kɛlɛ lɛ ilé Bale nya yé maa dan kɛlɛ lɛ ilé nénu lé Bale nya i zuo. 8Tɛrɛ lé i ke é nyanale a ta bɛn nya ’ko, maa dan a nɔ lɛ bii valé ilé nénu lé wo dan kɛlɛ lɛ i zuo bɛ, wo lɛ. Maa dan Kanaan tɛrɛ faa nɔ lɛ wo lɛ wozé nya lɛɛfaama, a glɛ ’ka lo, yé maa dan kɛlɛ lɛ wolé Bale nya.
Ganedɔle pélisiale
(Kw 7:8; Rom 4:11–12)
9Kazambale lé Abraam lɛ léé: Bii, an gi lé ma a pa i va do ’ko, té bé sɛrɛ lo. Bii valé ilé nénu lé wo dan kɛlɛ lɛ i zuo, wo kulu é kulu nya, té ka a sɛrɛ lo. 10Gipawe lé é a lé i dɔ a ta, bii valé ilé nénu lé wo dan kɛlɛ lɛ i zuo, yee lé ke ’ko: ’ka ka va gɔnénu faa gane dɔ. 11’Ka ka va gɔnénu gane dɔ yé ’bɛ é dan kɛlɛ lɛ kaa gipale do tɔmase nya. 12’Ka ka va gɔnénu faa gane dɔ wo yi sɔraazan nya, wo kulu é kulunu nya; dé wa yaa ilé kɔn gioo, dé bé lɔ bɛn bɛ mi lee yé é ’ka i bɛn nya looo, ’ka wo gane dɔ. 13Négɔné lé wa yaa ilé kɔn gi koo, mi lé bé lɔ gɔɔli nya koo, é a lé ka wo gane dɔ; yé anlé gipale tɔmase é dan kɛlɛ lɛ ka kɔlɛ ma, gipawe lé é ’ka nyaan lo, a nya. 14Gɔné lé a gane ’ka é dɔle lo, é anlé gipawe sɛrɛ, amalé é a lé wa kulu ga alé munu méléna.
15Kazambale lé Abraam lɛ léé: Té i na Sarai tɔ laa Sarai é dɛrɛ lo; naa, bé laa Sara. 16Maa dan a drɔɔ vo lɛ, yé maa dan négɔné do nɔ lɛ i lɛ a ma né nya; maa dan a drɔɔ vo lɛ yé é dan kɛlɛ lɛ bɛngɔnɔ kiɛre nya; bɛnnu nwiinzan blɛnnu é dan si lɛ a gi. 17Abraam dia é bli la; é yéri si yé é lé é bli gi léé: Gɔné lé a lɛɛ bɔ yɔ soru ’naan, ’bɛ é dan né yaa lɛɛ? Yé Sara lé ’bɛ lɛɛ bɔ yɔ ziɛn wɔlɛ vu ’naan, ’bɛ é dan né yaa lɛ kaa? 18Yé Abraam lé Kazambale lɛ léé: Oo, Ismaɛl ’é i yuɛi bɔ ma. 19Kazambale léé: Webozen lé, i na Sara é dan né yaa lɛ gɔné nya i lɛ; yé i dan a tɔ pa lɛ Izak. Maa dan an gi pa lɛ do a va, gipawe do lé é ’ka nyaan lo, ’té é dan kɛlɛ lɛ alé nénu zé nya a zuo, a nya. 20Dé é a Ismaɛl zé nya, maa ’bɛ ’ma. Bé gini, maa dan a drɔɔ vo lɛ, yé maa dan a kɛlɛ lɛ né kiɛre yaazan nya, yé maa dan a fan lɛ fɔɔ a glɛ ’ka lo; é dan tɛrɛzannu yaa lɛ vu ta fié, yé maa dan a kɛlɛ lɛ bɛn gɔnɔ blɛn do nya. 21Naa, Izak lé Sara é dan a yaa lɛ i lɛ bléyi ’ko va lɛɛ bɛ gi, yee ɛ va lé maa dan an gi pa lɛ do. 22Kazambale nyaa aan wo wefele nya Abraam lɛ, é si Abraam va yé é go loru.
23Abraam be Ismaɛl koo, gɔnénu faa lé wa yaa alé kɔn gi koo, é valé wo lé é wo lɔ gɔɔli nya koo, gɔnénu faa lé wo ke Abraam lé kɔn gi, Abraam wo si yé é wo gane dɔ yee yi duo nya, dére lé Kazambale a fe a lɛ, a yɛrama. 24Wo Abraam gane dɔ aan wo, ’té a lɛɛ a yɔ ziɛn wɔlɛ vu ta sɔraziɛn. 25Wo Abraam be Ismaɛl gane dɔ aan wo, ’té a lɛɛ a vu ta yaa. 26Abraam koo, é be Ismaɛl koo, wo wo fiénu gane dɔ yee yi duo nya. 27Dé wo wo yaa Abraam lé kɔn gioo, dé Abraam wo lɔ bɛnnu lee gɔɔli nyaoo, Abraam ma gɔnénu faa valé Abraam bozen koo, wo wo faa gane dɔ yee yi duo nya.
നിലവിൽ തിരഞ്ഞെടുത്തിരിക്കുന്നു:
Wepélisiananu 17: GOURU
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Alliance Biblique de Cote d'Ivoire 1979
