मत्ती 14
14
बप्तीस्मा तेर्केन युहन्ना सीक्योक
(मर्कुस ६:१४-२९; लुका ९:७-९)
1ओः तेःकासु गालील प्रदेशकीइ शासक हेरोद एन्टीपासकीइ येशुइ बारेला कोःसी। 2ओःले खुङगीइ राःङगीइ लाबुक्याला लाःसी, “दीखो नी बप्तीस्मा तेर्केन युहन्नारा इःङे! खुङ सीक्योकलाःम्ले सोम्बो लोःदी ओःङ्क्योक इःङे। ओः सोङ्गारा, नी याःमाछाककीइ लेःगाक्या पेःगेन एःन्डुबा ल्हे ज्योर्ती एः।”
3चीलेलाःना तोःङ्ला हेरोदकीइ राःङगीइ नोः फीलीपकीइ पेःमे हेरोदीयासकीइ पेःगासुना युहन्नाला ताःम्दी चेङाङला कादी एःके। 4चीलेलाःना युहन्नाइ हेरोदला एःन्डु लाःती एःके, “ख्याइ राःङगीइ नोःइ पेःमे एःन्डुले याःर्का क्याःप्चे उःइ छ्येइ ठीम अनुसार डीक्पु मीःङे।” 5एःन्डु लाःक्योक सोङ्गारा हेरोदकीइ युहन्नाला सेचेङ छोल्दी एःके। इःनाङ खुङ मीःक्या थोङ्दी जीसी चीलेलाःना खुङक्याइ युहन्नाला कोन्ज्योइ लेःङ्गो तेर्केन्दी इःङे लाःती सेःसा पेःउके।
6हेरोदकीइ केबुइ ङीःमा ओःङ्सी, ओःले हेरोदीयासकीइ पोःमोइ खुङक्या थाम्जेरकीइ तोःङ्ला याःबु पेःदी छ्याम्दी तेङ्तेर्सी। दीखो थोङ्दी हेरोद माःङ्बुरा केःदाङ काःल्सी। 7ओः सोङ्गारा, खुङगीइ हेरोदीयासकीइ पोःमोला ची लाङ्नाङ तेर्के लाःती ताःम्ज्या पेःसी। 8इःनाङ ओःखोइ आमाइ लाःक्योक च्योःङ्रारा ओःखोइ लाःसी, “ङाःला बप्तीस्मा तेर्केन युहन्नाइ गो ताःसेरा दी तेःर्माला ना।” 9दीखो कोःदी क्याःल्बुला तुःङाल लाःङ्सी, इःनाङ राःङगीइ डोम्बोक्याइ तोःङ्ला ताःम्ज्या पेःदी लाःक्योक सोङ्गारा खुङगीइ ओःन्डुरा पेःगेन हुकुम तेर्सी, 10ओःले खुङगीइ युहन्नाइ गो चेङाङलारा तुप्च्युसी। 11ओःले गो तेःर्माला ख्योङ्दी ओः पेःन्पीःजाला तेर्सी, ओःले ओः पेःन्पीःजाइ राःङगीइ आमासाःला खेर्ती काःल्सी। 12ओः तीङ्ला युहन्नाइ योबाक्या ओःङ्दी खुङगीइ फुम्बुला खेर्ती तीःप्सी, ओःले खुङक्या काःल्दी दी ताम येशुला लाःतेर्सी।
येशुइ तोङ ङा मीःक्याला साःच्युक्योक
(मर्कुस ६:३०-४४; लुका ९:१०-१७; युहन्ना ६:१-१४)
13दीखो लेःङ्गो कोःमीजीक येशु टुःला जादी एकान्त ठाउँछ्योले काःल्सी। इःनाङ येशु काःला डोदेरा एःपा लाःकेन ताम छोर्मीःजीक मीःक्या युःल युःललाःम्ले थेङ्दी काङ्बाइरा काःल्दी खुङला ब्य्राङ्सी। 14येशु टुःलाःम्ले पाःप्कासुःना मीःक्याइ पोर्चोमगीइ राःङला कुःदी तेःक्योक थोङ्सी। ओः मीःइ पोर्चोमला थोङ्दी खुङला नीङ च्योःदी ओःङ्सी, ओःले खुङगीइ ओःला एःक्योक नेःपाक्याला टाःच्युसी।
15कुःङ्से काःल्मीजीक योबाक्या ओःङ्दी खुङला लाःसी, “ताःसे कुःल्बु काःल्सीःङ्सी, ओःले दीला नी चीयाङ म्याः। दी मीःक्याला ताङ्तेर ओःले खुङक्या युःलक्याला काःल्दी खुङक्या राःङगीइ लागी साःगेन स्याःक्या ङ्योःदी साःज्युक।” 16इःनाङ येशुइ खुङक्याला लाःसी, “खुङक्या डोमेःको, ख्योक्याइरा खुङक्याला साःजे तेर।” 17खुङक्याइ लाःसी, “ङीः ङीमु नी ङाथाल खुरा ओःले ङीथाल ङ्याः चीग्रा एः।” 18येशुइ लाःसी, “खुरा रा ङ्याः ङाःसाःला खेर्च्यो ले।”
19येशुइ मीःक्याला चाला तेःच्युसी। ओः तीङ्ला खुङगीइ ङाथाल खुरा रा ङीथाल ङ्याः लेःङ्सी, ओःले नाःम्खालीङछ्योले तादेरा कोन्ज्योला थुजीछे तेर्सी। खुङगीइ खुराक्या च्यासी ओःले योबाक्याला तेर्सी, ओःले योबाक्याइ खेर्ती मीःक्याला केःतेर्सी। 20थाम्जेरकीइ डाङेन पेःदी साःसी। ओःले योबाक्याइ लाःक्योक पुःजुपक्या पती चीङ्ङी तुःसी। 21ओःला साःगेनक्या पेःन्पीःजा रा पीःजाबाहेक ख्य्वापीःजा चीग्रा हजार ङा जे एःके।
येशु छ्युखाला काःल्क्योक
(मर्कुस ६:४५-५६; युहन्ना ६:१५-२१)
22ओः लेःगा पेःदी सीःङ्लुङम्याःपा येशुइ राःङगीइ योबाक्याला टुःला जादी खुङ भन्दा तोःङ्ला फार्केनछ्योले सुङ लाःती लाःसी। इःनाङ खुङदी मीःइ पोर्चोमला बीदा मातेरथुप ओःलारा तेःसी। 23मीःक्याला बीदा तेर्मीःजीक खुङ राःङ चीग्रा रेःम्जेला काःङला काःल्सी। कुङ्मु छेसीमीःजीक येशु चीग्रा काःङला एःके। 24ओः तेःकासुथुप टुःदी सुःरलाःम्ले छोला तोबारा फार्ला लेप्ती एःके। इःनाङ टुःइ तोःङ्लाःम्ले ल्हाबा ओःङ्क्योक सोङ्गारा छ्युइ हादीइ टुःला छुर्ला रा फार्ला योःङ्सी। 25ङामु नुःपला येशु छ्युखाला डोदेरा योबाक्यासाःला ओःङ्सी। 26योबाक्याइ खुङला छ्युखाला काःल्क्योक थोङ्मीःजीक, खुङक्या माःङ्बुरा जीसी ओःले “दीखो नी हेन्डी इःङे!” लाःती जीबाइ चीरे तेङ्सी। 27ओःले येशुइ खेप चीगलारा लाःसी, “माःजी, ङाः इःङे, सहास पेःदो।”
28दीखो कोःदी पत्रुसकीइ लाःसी, “प्रभु, दीखो तेःन्दामरा ख्या इःङे लाःना, ङाःलाङ ख्यासाःलारा छ्युखाला ओःङेन आज्ञा ना।” 29येशुइ लाःसी, “स्यो ना ले!” पत्रुस टुःलाःम्ले पाःप्ती छ्युखाले पेःदी येशुसाःला डोगाला स्युःसी। 30इःनाङ छ्योम्बो ल्हाबा ओःङ्क्योक थोङ्दी खुङ जीसी ओःले खुङ बीङ्गाला स्युःसी, ओःले “प्रभु, ङाःला सेन्च्युदो!” लाःती केताङ्सी। 31येशुइ खुङला खेप चीगलारा जुम्दी लाःसी, “खोइ ख्योइ सेमल्हुक लुक्योक, चीले पाःकेन पेःक्योक?” 32ओः तीङ्ला येशु पत्रुस ङीमुरा टुःला जासी ओःले ल्हाबा छ्याबे तेःसी। 33टुःला एःक्योक योबाक्या थाम्जेरकीइ खुङगीइ तोःङ्ला खाप्लु क्याःप्ती लाःसी, “तेःन्दामरा ख्या नी कोन्ज्योइ पुः इःङे!”
34येशु योबाक्या ङीमु छो तार्तीदी गनेसरेत लाःकेन ठाउँला पाःप्सी। 35ओःला ख्य्वापीःजाक्याइ येशुरा इःङे लाःती ङोःसेदीहाल्तीसी। ओः सोङ्गारा, खुङक्याइ छुरफारकीइ थाम्जेर युःलक्याला लेःङ्गो ताङ्सी ओःले मीःक्याइ नेःपाक्याला येशुसाःला ख्योङ्सी। 36ओःले खुङक्याइ येशुला एःन्डु लाःतेरा वासी पेःसी, “ओः नेपाक्याला राःङगीइ केःलाइ सुःर चीग्रा एःनाङ देजे तेर।” ओःले खुङगीइ केःला देगेनक्या थाम्जेर टाःसी।
നിലവിൽ തിരഞ്ഞെടുത്തിരിക്കുന്നു:
मत्ती 14: SYW
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2024 (Active), Wycliffe Bible Translators, Inc. All rights reserved.
